iVakamacala Taumada

Na Mataveiliutaki Taumada kei na Kuoramu ni iApositolo Le Tinikarua eratou sa tauyavutaka na Nodra iVakavuvuli na Peresitedi ni Lotu ena veivola eso me vukei kemuni me titobu kina na nomuni kila vakavinaka sara na kosipeli vakalesuimai ka toro voleka yani vua na Turaga ena nodra ivakavuvuli na parofita ena gauna oqo. Ni sa vakaikuritaka na Lotu na itukutuku ena ivola oqo, ko ni na vakasokumuna kina e dua na iyau ni ivola veidusimaki me baleta na nomuni vuvale. Sa tuvanaki na lewe ni ivola oqo me vakayagataki ki na vuli yadua ni tamata ka baleta talega na ivakaro ni Sigatabu. E rawa talega me vukei kemuni ena nomuni vakarautaka na veilesoni tale eso se vosa kei na isau ni taro me baleta na ivunau ni Lotu.

E volai tu ena ivola oqo na ivakavuvuli nei Peresitedi Lorenzo Snow, ka a veiqaravi me Peresitedi ni Lotu i Jisu Karisito ni Yalododonu Edaidai mai na ika 13 ni Sepiteba, 1898, kina ika 10 ni Okotova 1901.

Vuli Yadua

Ni ko vulica tiko na ivakavuvuli nei Peresitedi Lorenzo Snow, masulaka na veivakauqeti ni Yalo Tabu. Na taro e tiko ena mua ni iwase yadua ena vukei iko mo kila na ivakavuvuli nei Peresitedi Snow ka saga mo bulataka. Ni ko vulica na ivakavuvuli oqo, ko na rairai gadreva beka mo na wasea vei ira na lewe ni nomu matavuvale kei na itokani. Oqo me na vaqaqacotaka na nomu kila na veika o sa wilika.

iVakavuvuli mai na iVola Oqo

Sa vakarautaki nai vola oqo me vakayagataki mai vale vakakina e valenilotu. Na idusidusi oqo me na vukei iko mo na veivakavulici mai na ivola oqo.

Vakavakarau mo Veivakavulici

Vakasaqara na Yalo Tabu ni ko sa vakarau mo veivakavulici. Masulaka na nomu vulica na wase e lesi me rawa ni ko yalodei ena nomu kila na ivakavuvuli nei Peresitedi Snow. Ko na veivakavulici ena yalodina kei na kaukauwa ni sa vakayavalati iko na nona vosa (raica na V&V 11:21).

Kevaka mo vakavulica tiko e dua na lesoni ni Matabete i Melikiseteki se iSoqosoqo ni Veivukei, kakua ni biuta vakatikitiki na ivola oqo se vakarautaka na lesoni mai na dua tale na ivola. Digitaka mai na iwase ena masumasu na tikina ko vakila ni na veivuke vei ira ko na vakavulica. E so na iwase ena tiko kina e levu sara na ka ni vuli ka ko na sega ni rawa ni vakavulica kece ena gauna ni kalasi.

Vakauqeti ira na vakaitavi me ra vulica na iwase ni bera na gauna ni lesoni ka kauta vata tiko mai na nodra ivola. Ni ra cakava oqori, era sa na vakavakarau vakavinaka cake sara me ra vakaitavi ena veiwasei ka veivakaqaqcotaki vakai ira.

Vakamacalataka na iWase

Ni ko vakamacalataka na iwase kei na vo ni lesoni, sasagataka mo sureta yani na Yalotabu me rawa ni tara na nodra bula o ira ko na vakavulici ira tiko. Tekivutaka na lesoni, ena nomu vukei ira ko vakavulica mera vakanamata kina ivakavuvuli ni iwase. Taurivaka na veivakasama oqo:

Wilika ka veivosakitaka na iwase ka kena iulutaga “Mai na Bula nei Lorenzo Snow” na kena itekitekivu ni iwase.
Veivosakitaka e dua na iyaloyalo se ivolanikalou mai na iwase.
Lagata e dua na sere e salavata.
Wasea vakalekaleka na ka e sotavi yadudua me baleta na iulutaga.

Liutaka na Veivosakitaki ni iVakavuvuli nei Peresitedi Snow

Ni ko sa veivakavulici mai na ivola oqo, sureti ira e so mera wasea mai na nodra vakasama, taroga e so na taro ka veivakavulici vakai ira. Ni ra sa vakaitavi mai, era na qai vakarau mera na vulica ka ciqoma na ivakatakila baleti ira. Vakatara me toso na veiwasei e vakaibalebale ka kakua ni saga mo cakava ga vaka iko na veivakavulici. Me vakauqeti na veiwasei, vakayagataka na taro e tiko ena iwase ni vola. Na idusidusi e tiko ena veiwase yadua e baleta tiko na veitaro oqori. E rawa talega mo taroga e so na taro ko nanuma ni ganita, baleti ira ko vakavulica.

Na veidigidigi oqo e rawa me vakaikuritaka na nomuni vakasama:

Mo ni kerei ira na vakaitavi me ra wasea na veika era vulica mai na nodra vuli yadua ena iwase. E rawa ni veivuke vakalevu sara me ia na veitaratara ena loma ni macawa vata kei na lewe vica era vakaitavi ka kerei ira me ra vakavakarau ena nodra lako mai ka mai wasea na veika era sa vulica.
Mo ni lesi ira na vakaitavi me ra wilika na veitaro digitaki mai na itinitini ni iwase (me ra wilika yadudua se vakailawalawa lalai). Mo ni tarogi ira me ra vakasaqara na ivakavuvuli ena iwase ka rau salavata kei na veitaro. Mo ni qai sureti ira me ra wasea na nodra vakasama kei na nodra rai vata kei ira na vo ni ilawalawa.
Wilika e dua na tikina vulici mai na itukutuku nei Peresitedi Snow ka tiko ena iwase ni ivola. Tarogi ira na lewe ni kalasi me ra wasea e so na kena ivakatautauvata mai na ivolanikalou vakakina mai na ka era sa sotava tiko me vakaraitaka na ka e vakavulica tiko o Peresitedi Snow.
Kerei ira na vakaitavi mera digitaka e dua na kena iwase ka wilika toka vakamalua. Sureti ira mera dabe yarua se yatolu, vakatau ena iwase ni ivola era wilika ka veiwaseitaka na veika era sa vulica.

Vakauqeta na Veiwasei kei na Bulataki

Na ivakavuvuli nei Peresitedi Snow ena vakaibalebale vei ira era veiwaseitaka ka saga mera na bulataka. Taurivaka na veivakasama oqo:

Sureti ira na vakaitavi mera na vakayagataka na ivakavuvuli nei Peresitedi Snow ena nodra itavi vakaitubutubu se itavi ni dauveisiko se siko vuvale.
Vakauqeti ira na vakaitavi mera wasea eso na ivakavuvuli nei Peresitedi Snow vei ira na matavuvale kei na itokani.
Sureti ira na vakaitavi tiko mera na mai wasea na veika era sa vulica tiko ka sotava ena itekivu ni kalasi e tarava.

Tinia na Veivosaki

Vakalekalekataka ga na veika e sa vulici se kerea e dua se rua na vakaitavi me rau cakava. Vakadinadinataka na veika o sa vakavulica. Ko na rairai gadreva mo sureta e so mera wasea na nodra ivakadinadina.

iTukutuku me baleta na iVurevure era Cavuti ena iVola Oqo

Na veivakavuvuli e tiko ena ivola oqo e tauri mai na vosa cavuti nei Peresitedi Lorenzo Snow ni vunau, ivola volai, ivola kei na ivolaniveisiga. Ena vosa cavuti kece mai na nona ivola kei na ivolaniveisiga, na maka, na sipeli, na matanivola levu, parakaravu era sa wasewasei tu. Na vosa cavuti mai na ivola sa tabaki, e maroroi tu kei na maka, na sipeli, na matanivola levu, parakaravu ena kena a volai taumada, vakavo kevaka sa veisautaki me matata na kena wiliki. Qo ena vakavuna na kena na via duidui toka ena so na gauna na ka era volai. Me kena ivakaraitaki, na vosa kosipeli ena matanivola lalai ena so na vosacavuti, kei na matanivola lelevu ena so tale.

Vakatalega na nona dau vakayagataka o Peresitedi Snow na vosa tamata, tagane, se umatamata me vakadinadinataka kina tamata taucoko, tagane kei na yalewa. Dau vakayagataka wasoma o koya na vosa o koya, nona, kei na koya me baleta na tagane kei na yalewa. Oqo e sa matau ena gauna e bula tu kina o koya. Dina ga ni duidui na vosa e vakayagataki ena duidui ni veigauna kei na kena e vakayagataki, na ivakavuvuli nei Peresitedi Snow e baleta ruarua na tagane kei na yalewa.