Kapitulo 9

Mga Saksi sa Basahon ni Mormon

“Alang nako ingon og bisan kinsa nga miyembro niini nga Simbahan dili gayud matagbaw hangtud nga iyang mabasa ang Basahon ni Mormon kadaghan ug pamalandongan kini og maayo aron siya makasaksi nga kini usa gayud ka rekord nga adunay inspirasyon sa Labawng Makagagahum.”

Gikan sa Kinabuhi ni Joseph Fielding Smith

Si Presidente Joseph Fielding Smith miserbisyo isip Historian ug Recorder sa Simbahan gikan Marso 1921 hangtud Pebrero 1970. Samtang nagserbisyo niini nga posisyon, siya nakahimo sa pagkuha sa orihinal nga mga dokumento sa kasaysayan nga mahinungdanon sa Simbahan. Usa niining mga dokumento mao ang sinulat nga pagpamatuod nga gipirmahan ni David Whitmer, usa sa tulo ka linain nga mga saksi sa Basahon ni Mormon. Si Presidente Smith may pribilehiyo usab nga makagunit sa sinulat nga pagpamatuod ni Oliver Cowdery, laing usa sa Tulo ka mga Saksi sa Basahon ni Mormon. Human og kopya niining duha ka dokumento nga kinamot nga pagkasulat, gibasa kini ni Presidente Smith sa duha ka pakigpulong sa publiko—kausa niadtong Marso 1939 ug ang lain sa kinatibuk-ang komperensya sa Simbahan niadtong Oktubre 1956.

Bisan tuod mibati si Presidente Smith nga kining sinulat nga mga pagpamatuod igo na kaayo nga ipakigbahin, siya kanunayng mamulong sa lain nga pagpamatuod sa Basahon ni Mormon: ang iyang pagpamatuod mismo, nga iyang nadawat sa wala pa siya magtrabaho sa Opisina sa Church Historian. Siya miingon, “Nagsugod ko sa pagbasa sa Basahon ni Mormon sa wala pa ko mahimong deacon, ug sukad adto kanunay na kong nagbasa niini, ug nasayud ko nga kini tinuod.”¹ “Kadaghan na ko nakabasa niini,” iyang giingnan ang mga Santos sa Ulahing mga Adlaw. “Apan kulang pa ang akong pagbasa niini. Naa gihapon ni mga kamatuoran nga mahimo pa nakong siksikon ug pangitaon, bisan pa hanas na kaayo ko niini, ug nasayud nga kini tinuod.”²

Sa pagpakigbahin niining mga pagpamatuod sa Basahon ni Mormon, ang katuyoan ni Presidente Smith mao ang pag-awhag sa uban sa pagbaton og ilang kaugalingong pagpamatuod. Siya mideklarar, “Ako mopamatuod kaninyo nga ang Ginoo miklaro pag-ayo niini nako pinaagi sa pagpadayag nga akong nadawat, ug kamong tanan nga anaa dinhi makapamatuod usab niini, nga kining mga butanga tinuod, ug kana pribilehiyo ni bisan kinsang matinuorong tawo kinsa magkugi sa pagbasa uban sa mainampoong espiritu ug tinguha para masayud kon ang libro tinuod ba o dili; ug siya makadawat niana nga pagpamatuod sumala sa gisaad ni Moroni, kinsa misilyo sa rekord nga motungha sa Dispensasyon sa Kahingpitan sa Kapanahonan.”³

Mga Pagtulun-an ni Joseph Fielding Smith

Ang Basahon ni Mormon sagrado nga rekord nga naglangkob sa mahangturong ebanghelyo ug nagsaksi ni Jesukristo.

Ang Basahon ni Mormon sagrado nga kasaysayan sa karaang mga lumulupyo sa kontinente sa Amerika, ug naglangkob sa mga panagna sa ilang mga propeta, mga kasugoan sa Ginoo ngadto kanila, ug ang kasaysayan ug kapaingnan niining mga katawhan. Kini ang hugpong sa kasulatan sa Amerika, ug kini sama ka sagrado ug ka dinasig sa Biblia, nga naglangkob sa sagradong mga rekord sa Hebreohanong kaliwat sa silangang bahin sa kalibutan.⁴

Ang Nephite nga mga propeta kinasingkasing nga nag-ampo nga ang ilang mga sinulat mapreserbar aron motungha ug mamulong ingon nga kini gikan sa patay, sa pagsaksi ngadto sa kaliwatan ni Lehi, ug usab sa mga Judeo ug Hentil, nga gipadayag sa Dios ngadto kanila ang kahingpitan sa Ebanghelyo. Ang ilang kabalaka mao nga ang mga tawo sa katapusang mga adlaw mahimong maghinulsol ug magbaton og hugot nga pagtuo diha sa Dios pinaagi sa pagpamatuod sa daghang nanglabay nga mga siglo niining Nephite nga mga propeta. Gani, atong nakat-unan gikan sa Basahon ni Mormon nga kini ang pinakatumong sa Basahon ni Mormon, sumala sa nasulat sa daghang mga bersikulo niini. …

… Ang Ginoo miklaro niini pag-ayo sa Nephite nga mga propeta nga ang ilang kasaysayan ug mga panagna mapreserbar aron motungha sa ulahing mga adlaw isip saksi ni Jesukristo ug sa pag-establisar sa iyang Ebanghelyo sa mga katawhan. Si Nephi nanagna sa mga Hentil ug mga Judeo sa atong panahon ug mibilin kanila sa iyang pagpamatuod sa paagi nga naghatag gyud og gibug-aton ug importansya. (2 Nephi 33.) Gibuhat usab kini ni Moroni. (Moroni 10:24–34.)⁵

Si Nephi, usa sa labing una nga mga propeta sa kolonya sa mga Israelite, nanagna sa hapit unom ka gatusan ka tuig sa wala pa ang Kristiyanismo, nga kon ang mga rekord nga naglangkob sa kasaysayan sa iyang katawhan mapadayag gikan sa abug, kini mahitabo sa panahon diin ang mga tawo “molimud sa gahum sa Dios, ang Usa nga Balaan sa Israel,” ug sila moingon: “Patalinghug ngari kanamo, ug paminaw kamo sa among lagda; kay tan-awa walay Dios karon, kay ang Ginoo ug ang Manunubos nakahimo na sa Iyang buhat, ug Siya mihatag sa Iyang gahum ngadto sa mga tawo.” [2 Nephi 28:5.] Usab, daghan kanila ang moingon kon pakit-on og bag-ong hugpong sa kasulatan nga naglangkob sa kasaysayan sa mga tawo sa kasadpan: “Biblia! Biblia! Kami adunay Biblia, ug dili mahimo nga aduna pay lain nga Biblia.” [2 Nephi 29:3.]

… Kining bag-o nga hugpong sa kasulatan mahimong saksi, dili lang kang Kristo ug sa paglangkob sa mahangturong Ebanghelyo, apan pagsaksi usab sa kasulatan sa Judeo—ang Biblia; ug kining duha ka rekord—sumala sa panagna ni Nephi, iyang amahan, ug ni Jose, ang anak ni Israel—maghiusa sa pagpamatuod sa mahangturong ebanghelyo [tan-awa sa 2 Nephi 3:11–13; 29:10–14]. Sa ingon kini nga mga rekord nagbarug karon nga nagpamatuod sa kamatuoran nga ipahingmaraut ang tanang mosalikway sa mga pagtulun-an niini.⁶

Nasayud ko nga gihubad ni Joseph Smith ang Basahon ni Mormon pinaagi sa gasa ug gahum sa Dios, ug nga kini motungha “sa pagpamatuod ngadto sa Judeo ug Hentil nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.” [Ulohan nga pahina sa Basahon ni Mormon.]⁷

Sumala sa balaod sa mga saksi, ang Ginoo nagtawag og linain nga mga saksi sa pagpamatuod sa Basahon ni Mormon.

Adunay balaod nga klarong nasulat sa kasulatan nga nagdumala sa pagpamatuod ug sa pagpili og mga saksi. Kini nga balaod kanunayng gisunod sa Ginoo sa paghatag og bag-ong pinadayag ngadto sa katawhan.⁸

Sa tibuok kapanahonan kini nga balaod [ang balaod sa mga saksi] dili mausab ug hingpit. Kon kita adunay kompleto nga mga rekord sa tanang kapanahonan, atong masayran nga kon ang Ginoo moestablisar og dispensasyon, adunay sobra sa usa ka saksi nga mopamatuod kaniya. Si Pablo nagsulat ngadto sa mga Taga-Corinto miingon: “Ang bisan unsa nga sumbong kinahanglan paluyohan sa pagpanghimatuod sa duha o tulo ka mga saksi.” [2 Mga Taga-Corinto 13:1.]⁹

Kabahin sa pag-abot sa Basahon ni Mormon, ang Ginoo miingon nga siya mopili og mga saksi. Kinahanglang adunay linain nga mga saksi nga mopamatuod ngadto sa kalibutan, ug siya miingon:

“Ug walay lain nga makakita niini, gawas sa pipila sumala sa kabubut-on sa Dios, sa pagpamatuod sa iyang pulong ngadto sa mga katawhan; kay ang Ginoong Dios nag-ingon nga ang mga pulong sa matinud-anon kinahanglan mamulong ingon nga kini gikan sa patay.

“Busa, ang Ginoong Dios magpadayon sa pagtungha sa mga pulong sa basahon; ug diha sa mga ba-ba sa ingon ka daghan nga mga saksi nga iyang nakita nga maayo siya motukod sa iyang pulong; ug alaot ngadto kaniya nga mosalikway sa pulong sa Dios!” (2 Ne. 27:13–14.)¹⁰

Ang anghel mipakita sa bulawang mga palid ngadto nila ni Oliver Cowdery ug David Whitmer, duha sa Tulo ka mga Saksi, nga anaa si Joseph Smith. Sa wala madugay ang anghel mipakita sa mga palid ngadto ni Martin Harris, ang ikatulo nga saksi.

Ang tulo ka lalaki nga gitawag nga moserbisyo isip linain nga mga saksi sa pag-abot sa Basahon ni Mormon pinaagi sa gahum sa Dios, mao sila si Oliver Cowdery, David Whitmer, ug Martin Harris. … Sila kauban ni Joseph Smith sa pag-establisar niining kahibulongang buhat niining dispensasyon. …

Ang ilang pagpamatuod mao nga sila gibisitahan sa usa ka anghel nga gikan sa presensya sa Ginoo, nga mipakita kanila sa bulawang rekord diin gihubad ang Basahon ni Mormon ug mipahimangno kanila. Ilang nakita ang mga kinulit niining mga palid samtang tagsa-tagsang gipakli ang mga pahina niini sa ilang atubangan, ug sila nakadungog sa tingog sa Dios gikan sa kalangitan nga nagdeklarar nga ang paghubad niini pinaagi sa gasa ug gahum sa Dios, ug nagmando kanila sa pagrekord niini para sa tanang katawhan sa kalibutan. Kining tulo ka mga saksi, bisan pa sa mga kalisdanan, pagpanggukod, ug sa tanang kausaban sa kinabuhi, kanunayng nagpabiling matinud-anon sa ilang pagpamatuod nga ilang nakita ang mga palid diha sa presensya sa anghel ug nakadungog sa tingog sa Ginoo nga nagsulti kanila gikan sa kalangitan.

Adunay laing walo ka mga saksi kinsa nakakita sa mga palid, nakahikap niini, mabinantayong nakaeksamin sa mga kinulit niini samtang gipakita kini ni Joseph Smith ngadto kanila. Ang ilang mga pagpamatuod para usab sa tanang tawo sa kalibutan ug makita sa matag isyu sa Basahon ni Mormon. Kining walo ka mga lalaki nagpabiling matinud-anon niining pagpamatuod hangtud sa ilang kamatayon.

Kining napulog duha ka mga saksi [lakip ni Joseph Smith], upat kanila nakakita og mga anghel ug langitnong mga panan-awon, ug ang walo nakakita sa rekord ingon nga kini gipakita ngadto kanila ni Joseph Smith, silang tanan, ang gikinahanglan sa Ginoo sa pag-establisar sa kamatuoran sa Basahon ni Mormon, sama sa iyang gisaad pinaagi kang Nephi nga iyang buhaton. “Ug alaot ngadto kaniya nga mosalikway sa pulong sa Dios!” Ang pagpamatuod niining mga tawhana labaw pang nakatuman sa balaod.¹¹

Gipakita ni Joseph Smith ang bulawang mga palid ngadto sa Walo ka mga Saksi.

Si Joseph Smith … nag-inusara panahon sa unang panan-awon, nag-inusara sa dihang si Moroni nagpahibalo sa mensahe ngadto kaniya, nag-inusara dihang iyang nadawat ang mga palid; apan human niadto wala na siya mag-inusara. Ang Ginoo nagtawag og uban pang mga saksi. Si Lola Smith [inahan ni Joseph Smith, si Lucy Mack Smith] sa iyang kasaysayan miingon nga ang Propeta miabut sa balay nga nakahilak sa kalipay human ang mga saksi nakakita sa mga palid ubos sa mando sa anghel sa Dios, tungod kay, miingon siya, “Ang buluhaton migaan ug wala na ko mag-inusara.”¹²

Ang Tulo ka mga Saksi nagpabiling matinud-anon sa ilang mga pagpamatuod sa Basahon ni Mormon.

Ang tanang tulo ka [linain] nga mga saksi nahilayo ug mibiya sa Simbahan. Sila si Oliver Cowdery ug Martin Harris mapainubsanong mibalik sa Simbahan ug sila namatay nga hingpit nga miyembro sa Simbahan. Si David Whitmer wala na mobalik sa Simbahan; apan, silang tulo nagmatinud-anon sa pagpamatuod nga ilang gipamulong sa kalibutan nga makita sa matag kopya sa Basahon ni Mormon.¹³

Kini ang pagpamatuod ni David Whitmer, gipamulong sa Richmond, Missouri, niadtong Marso 19, 1881—gikopya gikan sa orihinal nga dokumento, nga gimantala sa Richmond Conservator niadtong adlawa.

“Ngadto sa tanang kanasuran, kaliwatan, pinulongan ug katawhan nga makabasa niini—

“Gisulti ni John Murphy nga taga-Polo [Caldwell County], Missouri, nga akong nakaistorya sa miaging ting-init, nga akong gilimud ang akong pagpamatuod isip usa sa tulo ka mga saksi sa Basahon ni Mormon—

“Alang niining katuyoan, aron siya makasabut karon kon wala kaniadto, ug aron ang kalibutan masayud sa kamatuoran, nanghinaut ko, nga hapit na ko motaliwan niining kinabuhia, ug sa kahadlok sa Dios, sa katapusan mohimo niining pamahayag sa publiko:

“Bisan kanus-a wala gyud nako, gilimud ang pagmatuod o bisan asa nga bahin niini, nga dugay na kaayong namantala niana nga libro, isip usa sa tulo ka mga saksi.

“Kadtong nakaila gyud nako, nasayud nga nagmatinud-anon kaayo ko niini nga pagpamatuod—Ug aron walay tawo nga masayop sa pagsabut o magduha-duha sa akong panglantaw karon kabahin niini, karon akong ipamatuod pag-usab ang katinuod sa tanan nakong pamahayag nga gipamulong ug gimantala.”¹⁴

Karon tuguti ko sa pagsulti kabahin ni Martin Harris. … Samtang nagpadayon nga nagmatinud-anon sa iyang pagpamatuod sa Basahon ni Mormon dugay na siyang nasilo sa Simbahan. Apan wala madugay human ang mga santos miabut sa Utah pipila sa atong buotang mga kaigsoonan nangita kaniya, nakaplagan siya ug midasig kaniya, ug mipabalik niya sa Simbahan. Mianhi siya dinhi [sa Utah], nabunyagan pag-usab, ug nagpuyo dinhi sulod sa pipila ka tuig, misaksi kabahin sa iyang pagpamatuod ngadto sa mga lumulupyo. Namatay siya dinhi ug gilubong [sa Clarkston, Utah].

Karon magsulat ko kabahin ni Oliver Cowdery. Unsay nahitabo ni Oliver Cowdery, ang pinakaimportante sa tulo, kinsa kauban ni Joseph Smith sa daghang higayon sa pagpakita sa mga anghel ug sa pagpahiuli sa mga yawe? Unsay nahitabo kaniya? Mibiya siya sa Simbahan ug hilabihan ang kasuko, apan wala gyud niya gilimud ang pagpamatuod. Pipila sa mga tawo miingon nga iyang gilimud, apan wala gayud. Kanunay siyang nagmatinud-anon niining pagpamatuod. …

… Human ang mga santos gipapahawa sa Nauvoo ug nanglakaw sa mga kapatagan ug ang tanan ingon og lisud kaayo (si Sidney Rigdon miingon nga silang tanan mangamatay ug walay paglaum alang kanila, ug ang mga mantalaan miingon nga dili na sila mabuhi pa!), sa ingon niini nga kahimtang, si Oliver Cowdery … mihangyo nga mobalik sa Simbahan. … Siya gidawat pagbalik, ug nangandam nga mag-misyon sa Great Britain dihang siya nasakit ug namatay. Siya namatay sa panimalay ni David Whitmer, nga nagpamatuod sa kamatuoran.¹⁵

Ang matag miyembro sa Simbahan mahimong saksi sa Basahon ni Mormon.

Dili lang kini ang mga saksi nga makasulti sa balaanong misyon ni Joseph Smith, o sa katinuod sa Basahon ni Mormon. Ang saad anaa sa Basahon ni Mormon nga si bisan kinsa nga may tinguha nga masayud kon kini ba tinuod ug naglangkob sa mga pulong sa Ginoo mahimong masayud nga kini tinuod kon sila mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopadayag niini ngadto kanila pinaagi sa gahum sa Espiritu Santo [tan-awa sa Moroni 10:3–5]. Daghan na kaayong mga tawo ang misulay niini nga saad ug sila matinud-anong makasulti nga ilang nadawat kana nga kahibalo.¹⁶

Ako nakombinser kaayo nga kining Basahon ni Mormon nga akong gibasa pulong sa Dios ug gipadayag, sama sa gideklarar ni Joseph Smith nga kini gipadayag, ug ako namahayag sa samang butang samtang nagbarug ko sa inyong atubangan. Matag kalag dinhi sa kalibutan kinsa may salabutan nga igong makasabut mahimong masayud sa kamatuoran. Unsaon niya sa pagkasayud niini? Ang iya lang buhaton mao ang pagsunod sa lakang nga gihatag mismo sa Ginoo sa dihang siya mideklarar ngadto sa mga Judeo nga kadtong mobuhat sa kabubut-on sa Amahan kinahanglang masayud sa doktrina, kon kini ba sa Dios o sa tawo [tan-awa sa Juan 7:17]. Ang akong pagsaksi sa tibuok kalibutan mao nga kining libro tinuod. …

Ako nasayud nga ang pagpamatuod niining [tulo] ka mga saksi nga narekord sa matag kopya sa Basahon ni Mormon tinuod, nga sila nagbarug atubangan sa anghel sa Dios kinsa mideklarar ngadto kanila nga ang paghubad sa rekord tinuod, nga ang ilang pagpamatuod nga ang Dios namulong kanila gikan sa kalangitan nagtawag kanila sa pagpamatuod niini kay tinuod, ug walay tawo ang dili makadawat niadto nga pagpamatuod kon siya magtinguha sa pagdawat niini, pinaagi sa mainampuon ug matinud-anong pagbasa niining libro, uban sa tinguha nga masayud sa kamatuoran sama sa gideklarar ni Moroni pinaagi sa pinadayag. Siya masayud sa katinuod kabahin sa pagpahiuli niining kasulatan nga gihatag sa karaang lumulupyo niining kontinente.¹⁷

Alang nako ingon og bisan kinsa nga miyembro niini nga Simbahan dili gayud matagbaw hangtud nga iyang mabasa ang Basahon ni Mormon kadaghan ug pamalandongan kini og maayo aron siya makasaksi nga kini usa gayud ka rekord nga adunay inspirasyon sa Labawng Makagagahum, ug ang kasaysayan niini tinuod. …

… Walay miyembro niini nga Simbahan nga takus nga mobarug sa atubangan sa Dios nga dili seryuso ug mabinantayong nagbasa sa Basahon ni Mormon.¹⁸

Kon kamo mobasa sa Basahon ni Mormon kamo masayud nga ang inyong gibasa tinuod. Ngano? Tungod kay ang Dios naggiya sa mga tawo sa pagsulat sa mga panghitabo samtang kini nahitabo ug Siya mihatag kanila og kaalam ug inspirasyon sa pagbuhat niini. Sa ingon ang mga rekord gisulat sa mga tawo nga mituo sa Dios. Kini nga mga rekord wala maadto sa mga kamot sa dili tumutuo; apan ang mga tigsaysay misulat ug namulong samtang sila nadasig sa Espiritu Santo, ug kita nasayud nga ang ilang gisulat tinuod kay ang Ginoo mismo miaprubar niini [tan-awa sa D&P 17:6].¹⁹

Samtang kita magpadayon sa pagbasa sa Basahon ni Mormon sa matinud-anon ug mainampoong paagi, mas maganahan kita niini.

Ang tanan nga kinasingkasing nga nakabasa sa Basahon ni Mormon natandog sa makapadasig nga sulod niini. … Adunay inspirasyon ug pagbati sa malinawong kalipay ug katagbawan sa matinud-anon ug mainampoong pagbasa niining libro.²⁰

“Adunay inspirasyon ug pagbati sa malinawong kalipay ug katagbawan sa matinud-anon ug mainampoong pagbasa niini nga libro.”

Samtang nagbasa ko [sa Basahon ni Mormon] mas nakadayeg ko sa kasagrado niini, uban sa mensahe niini nga nanalipod sa misyon ni Ginoong Jesukristo, ug sa ebanghelyo nga gipahiuli sa dispensasyon sa kahingpitan sa kapanahonan alang sa kaluwasan sa mga kalag. Mas naganahan ko niini nga rekord sa matag adlaw nga akong nakita ang katumanan sa mga panagna nga gipamulong niining mga propeta nga mitaliwan na, ug gikan sa abug ngadto sa tanang mga kanasuran sa kalibutan, nagsangyaw kanila sa paghinulsol, ug nagtawag kanila sa pagtuo kang Kristo.²¹

Mga Sugyot alang sa Pagtuon ug Pagtudlo

Mga Pangutana

Si Presidente Smith miingon nga kulangan pa ang iyang pagbasa sa Basahon ni Mormon (tan-awa sa “Gikan sa Kinabuhi ni Joseph Fielding Smith”). Unsay atong makat-unan gikan niining obserbasyon?
Niini nga kapitulo, ang seksyon 1 naglakip sa pipila ka mga pagtulun-an ni Presidente Smith kabahin sa mga katuyoan sa Basahon ni Mormon. Sa unsang paagi kining mga katuyoan natuman diha sa inyong kinabuhi?
Bisan tuod sila si Oliver Cowdery, Martin Harris, ug David Whitmer mibiya sa Simbahan, walay usa kanila ang milimud sa ilang pagpamatuod sa Basahon ni Mormon (tan-awa sa mga seksyon 2 ug 3). Nganong importante kini samtang atong ikonsiderar ang ilang mga pagpamatuod?
Si Presidente Smith miingon nga ang tanang katawhan mahimong saksi sa Basahon ni Mormon (tan-awa sa seksyon 4). Sa unsang paagi kamo nakaangkon og pagpamatuod niini nga libro? Unsay inyong buhaton sa pagpakigbahin niining pagsaksi?
Kabahin sa Basahon ni Mormon, si Presidente Smith miingon, “Mas naganahan ko niini nga rekord sa matag adlaw” (seksyon 5). Sa unsang paagi nga kini nahitabo kaninyo? Unsay mahimo sa usa ka tawo aron sa paglig-on sa iyang pagpamatuod sa Basahon ni Mormon?

May Kalabutan nga mga Kasulatan

1 Nephi 6:3–5; 2 Nephi 29:7–8; Jacob 4:1–4; Enos 1:13; D&P 20:8–12

Tabang sa Pagtudlo

“Pagpamatuod kon ang Espiritu moaghat kanimo sa pagbuhat sa ingon, dili lamang sa katapusan sa matag leksyon. Hatagi og kahigayunan ang imong gitudloan nga mohatag sa ilang pagpamatuod” (Pagtudlo, Walay Labaw ka Mahinungdanon nga Tawag, [1999], 45).