Kapitulo 8

Ang Atong Misyonaryo nga Katungdanan

Wala ako makakita og mga elder nga nagmisyon aron sa pagsangyaw sa ebanghelyo [nga wala maghunahuna] nga sila nagmisyon aron sa pag-apil sa usa sa labing mahinungdanon nga mga buhat nga sukad gihatag ngadto sa tawhanong pamilya.¹

Gikan sa Kinabuhi ni John Taylor

Si Elder John Taylor mialagad isip misyonaryo sulod sa Estados Unidos ug sa uban nga mga nasud, nakahuman og pipila ka full time nga mga misyon tunga-tunga sa 1839 ug 1857. Siya mipakita sa iyang dakong hugot nga pagtuo ug sa pagpamatuod samtang sa kasagaran nagsangyaw ubos sa malisud nga mga kahimtang, usahay walay salapi o pagkaon. Siya misalig nga ang Ginoo mopanalipod kaniya ug sa iyang pamilya ug mohatag sa mga paagi alang kaniya sa pagsangyaw sa ebanghelyo.

Usa sa ingon nga hitabo sa mapaluyuhon nga gahum sa Ginoo nahinabo sa wala madugay human mobiya sa Elder Taylor sa iyang pamilya didto sa Montrose, Iowa, aron sa pagtuman sa usa ka misyon sa Englatera. Samtang siya nagbiyahe sa Indiana, siya nasakit pag-ayo ug napugos sa pagpuyo og pipila ka semana nga nagpaayo sa usa ka hotel. Sulod niini nga panahon, si Elder Taylor mitudlo sa ebanghelyo diha sa mga tigum nga iyang gihimo tapad sa hotel, bisan kon siya kinahanglan nga molingkod karon ug unya samtang siya nagsulti. Ang iyang mga tigpaminaw nakamatikod nga bisan pa man sa iyang lisud nga mga kahimtang, siya wala gayud mangayo og salapi. Sa katapusan, usa kanila miduol kaniya ug miingon: “Ginoong Taylor, ikaw wala mobuhat sama sa gibuhat sa kadaghanan nga magsasangyaw; ikaw walay gisulti mahitungod sa imong mga kahimtang o salapi, gani ikaw ania dinhi ug dugay-dugay na nga nasakit; ang imong doktor, hotel ug ubang bayranan tingali dako na. Pipila ka mga higala ug ako nagkasulti niini nga mga butang ug buot motabang kanimo.”

Sa mapasalamaton nga paagi si Elder Taylor midawat niini nga tabang ug sa wala madugay nakahimo sa pagpadayon sa iyang panaw, human makabayad sa tanan niyang mga bayranan. Mahitungod niini nga kasinatian, si Elder Taylor miingon, “Maayo pa nga akong ibutang ang akong pagsalig ngadto sa Ginoo kay ni bisan kinsa nga mga hari sa yuta.”² Uban sa iyang pagsalig sa Ginoo ug sa iyang halad sa pagtudlo sa ebanghelyo ngadto sa uban, si John Taylor mao ang usa ka gamhanan nga ehemplo kon unsaon nato paghimo sa misyonaryo nga buhat.

Ang Mga Pagtulun-an ni John Taylor

Ang misyonaryo nga buhat makahatag og kahibalo bahin sa kinabuhi ug pagkaimortal sa tanan nga mga katawhan.

Kita ania dinhi alang sa usa ka piho nga katuyoan; ang kalibutan gitukod alang sa usa ka piho nga katuyoan; …ang ebanghelyo gipahibalo alang sa piho nga katuyoan sa nagkalainlaing panahon, ug sa nagkalainlain nga mga katawhan diin kini gipadayag ug gisulti, ug kita, karon, nagsunod lamang sumala niadtong mga katuyoan. Ang Ginoo naggiya kanato sama sa iyang paggiya sa Israel kaniadto, ug sa iyang paggiya sa mga Nephite gikan sa yuta sa Jerusalem, ug sa napulo ka mga tribo, ug sa ubang mga katawhan, kinsa miadto sa nagkalainlain nga mga dapit. Siya naggiya, ug ang unang butang nga iyang gibuhat uban kanato… mao ang pagpadala sa iyang ebanghelyo, nga kini gipadayag paguna ngadto ni Joseph Smith, ug siya, nga gitugutan sa Makagagahum, ug nga nakadawat sa iyang pagkatudlo pinaagi sa balaan nga priesthood nga didto sa mga langit, ug uban niana nga awtoridad sa pagkatudlo sa pagtugyan niini ngadto sa uban, mitugyan niini ngadto sa uban, ug sila usab ngadto sa uban, ug sukad niana ang ebanghelyo gipadala nganhi kanato diha sa nagkalainlain nga mga nasud diin kita nagpuyo.

Ug sa dihang kini nga mga tawo nanglakaw sa pagpahayag sa ebanghelyo, sila milakaw, sama sa giingon ni Jesus, dili sa pagbuhat sa ilang “kabubut-on, kondili sa kabubut-on sa Amahan nga nagpadala kanila,” [tan-awa sa Juan 5:30] ug sa pagtabang sa balaan nga priesthood dinhi sa kalibutan sa pagpaila sa husto nga mga baruganan. Ug mao nga sila nangadto sa mga nasud, ug mga kaliboan ug napulo ka mga kaliboan ug minilyon ang naminaw sa ilang mga pagpamatuod; apan sa nangagi nga mga adlaw, mao sa ulahing mga adlaw. Miingon si Jesus“Kay masigpit ang pultahan ug hiktin ang dalan nga padulong sa kinabuhi, ug dyutay ra ang nakatultol niini; kay dako ang pultahan ug sangkad ang dalan nga padulong sa kapildihan, ug daghan ang nagasulod agi niini.” [Tan-awa sa Mateo 7:13–14.] Kini mao ang nahitabo diha sa tanan nga mga katuigan ug sa tanang mga katawhan, bisan asa ug sa matag higayon nga ang ebanghelyo gisangyaw ngadto kanila.³

Ang Dios mipahiuli sa ebanghelyo alang sa katuyoan sa pagpahibalo sa kinabuhi ug pagkaimortal ngadto sa mga katawhan; ug kon walay kahibalo sa ebanghelyo walay kahibalo sa kinabuhi ug pagkaimortal; kay ang mga tawo dili makasabut niini nga mga baruganan gawas kon kini ipahibalo ngadto kanila…. Sa diha nga ang mga langit naabli ug ang Amahan ug Anak mipakita ug mipadayag ngadto ni Joseph sa mga baruganan sa ebanghelyo, ug sa diha nga ang balaan nga Priesthood gipahiuli ug ang Simbahan ug ang gingharian sa Dios gitukod dinhi sa yuta, dihay daghang mga panalangin nga gihatag niini nga mga kaliwatan nga posible nga madawat sa tawo. Kon sila makasabut niini, kini mao ang labing mahinungdanon nga panalangin nga matugyan sa Dios diha sa mga katawhan.⁴

Atong katungdanan ang pagtabang sa Ginoo pinaagi sa misyonaryo nga buhat.

Unya, karon, ang Ginoo nagmatinguhaon, niining panahona, ingon nga siya matinguhaon sa laing mga katuigan, sa pagpundok og mga katawhan sa iyang kaugalingon kinsa mobuhat sa iyang kabubut-on, maghupot sa iyang mga kasugoan, maminaw sa iyang tambag ug mosunod sa iyang mga sugo…. Ang Ginoo, ni-ini nga panahon ingon man sa nangagi nga mga higayon, mopadala kinsa ang iyang ipadala; siya mopili sa iyang kaugalingong mga mensahero ug mopadala kanila taliwala sa mga katawhan. Ug sa diha nga ang mga elder sa Israel nanglakaw, siya misulti ngadto kanila diha sa piho nga pagpadayag“Lakaw, ug ang akong mga anghel anaa libut kaninyo, ug ang akong espiritu magauban kaninyo.” [Tan-awa sa D&P 84:88.] Ug sila nanglakaw, ug ang Dios nagmatinud-anon sa iyang pulong, ug daghan kaninyo, niana nga panahon sa layo nga mga nasud, naminaw sa mga pulong sa kinabuhi, ug kon kamo nakadungog niini kamo nahibalo ug nakasabut dayon, sumala sa giingon ni Jesus“Ang akong mga karnero nagapatalinghug sa akong tingog, ug nakaila kanako, ug sila nagasunod kanako, apan sa laing magbalantay sila dili mosunod, kay sila dili man makasabut sa tingog sa lain.” [Tan-awa sa Juan 10:5, 27.] Kamo nakadungog sa tingog sa kamatuoran nga giubanan sa espiritu sa Dios, ug nga nakahimo kanimo sa pagbaton sa espirituhanon nga pagbati nga makaila sa kamatuoran ug kamo minunot sa nagmasulundon….

Unya, karon, kita gihiusa pagpundok aron pagtabang, alang sa unsa nga katuyoan? Aron pagpangita sa atong kaugalingong tinagsa nga kaikag? Dili. Aron pagtigum og bahandi? Dili. Aron pag-angkon ug pagpatuyang sa atong mga kaugalingon sa maayo nga mga butang niining kinabuhi? Dili, apan sa pagbuhat sa kabubut-on sa Dios ug mohalad sa atong mga kaugalingon, sa atong mga kahanas ug mga abilidad, sa atong salabutan ug impluwensya diha sa tanan nga posible nga paagi aron sa pagtuman sa mga plano ni Jehova ug motabang sa pagtukod sa kalinaw ug pagkamatarung dinhi sa yuta. Kini, sa akong pagsabut niini, mao nga ania kita dinhi, ug dili sa pag-atiman sa atong kaugalingon nga tinagsang mga buluhaton ug ipahimo sa Dios ug sa iyang gingharian sa pagbuhat sumala sa ilang kabubut-on. Kitang tanan maikagon sa mahinungdanon nga buhat sa Dios sa ulahing adlaw, ug kitang tanan kinahanglan nga mahimong kauban nga magbubuhat niini.⁵

Ako giorden nga usa ka Elder pinaagi sa tukma nga mga awtoridad, ug ako milakaw aron sa pagsangyaw niini nga Ebanghelyo. Ubang mga Elder nanglakaw sama sa akong gibuhat ngadto sa sibilisado nga mga nasud, nagsangyaw sa sama nga doktrina ug naghatag ngadto kanila sa sama nga mga saad. Ang pipila kanila dili kaayo makinaadmanon; ang pipila dili kaayo taas og edukasyon. Kita nagpadala og talagsaon nga matang nga mga Elder. Usahay ang misyonaryo usa ka negosyante, usahay usa ka magbabalaod, usa ka panday sa puthaw, usa ka kantero, usa ka tigmasa, usa ka mag-uuma, o kasagaran nga pahinante, ingon sa mahitabo. Apan ang tanan ubos sa sama nga impluwensya ug espiritu, ang tanan manglakaw isip mga misyonaryo aron sa pagsangyaw sa Ebanghelyo sa kahayag, sa kinabuhi ug sa kaluwasan. Sila nakadawat sa mga bahandi sa kinabuhing dayon, ug sila nakahimo sa pagtudlo kanila ngadto sa uban; ug sila mihatag sa sama nga mga saad.

Kamo kinsa nakadungog kanako niining hapona ingon man usab sa mga kaliboan og diha sa ubang mga kaliboan, kinsa naminaw ngadto niini nga mga baruganan, inyong gihatag ngadto kanila kadtong mga saad; ug sa diha nga kamo misunod sa Ebanghelyo, kamo nakadawat niining sama nga espiritu; ug kamo ang akong mga saksi sa kamatuoran sa mga butang nga akong gipahayag karon diha sa inyong atubangan ug sa Espiritu ug gahum sa Dios nga nag-uban sa pagkamasulundon ngadto sa Ebanghelyo, ug kamo dili molimud niini. Kini nga katiguman dili molimud niini. Sa diha nga kamo miuyon sa pagkamasulundon ngadto sa mga balaod sa Dios, misunod sa Iyang mga kasugoan, ug gibunyagan alang sa kapasayloan sa inyong mga sala ug adunay mga kamot nga gipandong diha kaninyo alang sa pagdawat sa Espiritu Santo, kamo nakadawat niini; ug kamo nahimong buhi nga mga saksi sa atubangan sa Dios. Kini mao ang tinagoan nga ang kalibutan dili makasabut…. Kita nagbaton sa mga baruganan sa kinabuhing dayon, ug nagtrabaho paingon sa mahangturon nga tumong; ug dayon kita nagtrabaho aron sa pagtukod sa Zion sa Dios, diin ang pagkamatarung mahimo nga itudlo, ug diin ang mga tawo mahimo nga mapanalipdan, ug diin ang kagawasan mapahayag ngadto sa tanang mga tawo sa tanang kaliwat, sa tanang tinuohan ug sa tanang nasud.⁶

Ang atong katungdanan mao ang pagsangyaw sa Ebanghelyo ngadto sa tanang mga tawo…. Ug kita nagbuhat niini bisan pa man sa pagbatok sa mga tawo, ug pinaagi sa ngalan sa Dios kita mobuhat niini…. Ug kon sila mahigugma sa yawa labaw pa kay sa Dios, sila makabuhat sa ingon ug makahatag sa ilang mga kaugalingon og kasamok ug kasub-anan ug katalagman ug gubat ug pagpaagas sa dugo. Kay managgubat ang nasud batok sa nasud, gingharian batok sa gingharian; ug mga trono mangapukan, ug mga imperyo pagatibulaagon ngadto sa upat ka mga hangin, ug ang mga gahum sa yuta sa bisag asa pagauyugon; ug ang Ginoo moabut sa dili madugay aron sa paghukom sa mga nasud; ug gikinahanglan nga kita mahibalo kon unsa ang atong gibuhat, ug samtang kita nag-angkon nga mga santos sa Dios kinahanglan nga dili mga tigpakaaron-ingnon, apan puno sa kamatuoran ug puno sa kaligdong ug mopalambo sa atong balaan nga tawag ug mopasidungog sa atong Dios.

Kini mao ang gipaabut sa Dios kanato. Ug dayon sa pagtukod og mga templo, ug dayon unsa? Modumala niini. Mopadala sa ebanghelyo ngadto sa mga nasud sa yuta. Ug dayon pundukon ang mga katawhan. Dayon unsa? Magtukod og daghan pa nga mga templo. Dayon unsa? Himoon nga ang mga tawo modumala niini.⁷

Ang mga misyonaryo nagtudlo sa walay katapusang kamatuoran uban sa gahum ug awtoridad sa Dios.

Adunay dako kaayo nga kalainan tali sa atong paagi sa pagsangyaw sa ebanghelyo, ug niana nga giagpas sa kalibutan. Daghan niini nga mga tawo… mahimo nga dili mahimo nga instrumento sa pagsangyaw sa ebanghelyo sumala sa hunahuna sa mga tawo sa kalibutan; apan ang dako kaayo nga kalainan tali kanato ug kanila mao nga kita molakaw diha sa ngalan sa Dios sa Israel, gipaluyohan pinaagi sa Iyang gahum, kaalam ug salabutan, sa pagpahayag sa mga baruganan sa mahangturong kamatuoran nga gisulti Niya ngari kanato; samtang sila manglakaw aron sa pagpahayag sa unsa ang ilang nakat-unan sa mga kolehiyo.

Ang atong mga Elder manglakaw diha sa kahuyang…. Kon [sila] manglakaw, sila walay pagpangandam gawas sa sukaranan nga mga elemento sa edukasyon nga unta angay nga makat-unan sa tanan; apan dili mga pulong ang ilang itudlo, kon dili mga ba-ruganan. Ug bisan kon sila magbarug atubangan sa mga tigpaminaw nga maalamon sa mga balaod sa Dios, sila mahimo nga mobati og dakong kahadlok ug kaulaw sa pagsulay sa pagpahayag sa ilang mga kaugalingon, bisan pa niana, sa dihang sila manglakaw ug mobarug sa atubangan sa mga katiguman sa kalibutan, ang Espiritu sa Ginoong Dios mag-uban kanila, ang Ginoo mopaluyo kanila ug mohatag ngadto kanila og kaalam, “nga ang tanan nila nga mga kaaway dili makahimo sa pagsukol, ni pagsupak.” [Tan-awa sa Lucas 21:15.] Kana mao ang saad nga gihimo ngadto sa mga sulugoon sa Ginoo kinsa manglakaw nga nagsalig diha Kaniya.⁸

Kining batan-on nga mga lalaki mga sama lamang kanato: sila nakadawat sa espiritu sa kinabuhi, kahayag ug salabutan, gasa sa Espiritu Santo, ug sila ang mga mensahero sa Halangdon nga Jehova, kinsa Iyang gipili, gigahin, ug giorden sa paglakaw ug sa pagpahayag sa Iyang kabubut-on ngadto sa mga nasud sa yuta. Sila nanglakaw dili sa ilang kaugalingon nga ngalan o kusog, apan diha sa ngalan, kalig-on ug gahum sa Dios sa Israel. Kana mao ang ilang katungdanan, ug kon sila mobutang sa ilang tanan nga pagsalig ngadto sa Dios ug magpalambo sa ilang balaan nga mga tawag, magsunod sa mga baruganan sa kamatuoran, ug molikay sa pagtintal ug pagkadautan sa tanan nga matang, ang gahum sa Dios magauban kanila, ug ang Dios mohatag kanila sa mga pulong nga ilang isulti ug makapahimo kanila sa paglibug sa mga maalamon ug sa mga makinaadmanon, ug sila mosulti og mga butang nga makapatingala sa ilang mga kaugalingon ug niadtong kinsa naminaw kanila.

Ako moingon ngadto niining mga kaigsoonan, pagmakugihon aron sa pagtuman sa inyong misyon. Ayaw panumbalinga ang kalibutan; ayaw panumbalinga ang mga dolyar ug mga sentabos, ang mga pounds, mga shilling, ug pence. Ibutang ninyo ang tanan nga pagsalig ngadto sa Dios, pagpakabuhi sa inyong relihiyon, pagpalambo sa inyong balaan nga mga tawag, pagmapainubsanon sa inyong mga kaugalingon sa atubangan sa Dios, tawag diha Kaniya sa tago ug Siya moandam sa inyong dalan diha sa inyong atubangan.⁹

Kita kinahanglan nga moandam sa atong mga kaugalingon sa espirituhanon nga paagi aron mahimo nga epektibo nga mga misyonaryo.

Ako moingon, hinoon, ngadto niadtong magmisyon nga kinahanglan nga sila magtuon sa Biblia, sa Basahon ni Mormon, Basahon sa Doktrina ug mga Pakigsaad, ug sa tanan nato nga sumbanan nga mga kasulatan, aron sila makasinati sa mga baruganan sa atong relihiyon. Ako moingon usab sa uban nga mga batan-ong mga lalaki kinsa karon dili moadto sa mga misyon, apan kinsa tingali molakaw sa uban nga panahon, nga kini nga mga butang mao ang labaw pa nga mahinungdanon ngadto kanila kay sa ilang maamgohan sa karon nga panahon. Kita kinahanglan nga matukod ug malig-on pinaagi sa kamatuoran. Kita kinahanglan nga makasinati sa mga baruganan, mga doktrina, ug mga ordinansa mahitungod sa Simbahan ug Gingharian sa Dios.

Kita gisultihan diha sa Basahon sa Doktrina ug mga Pakigsaad sa pagpangita sa kaalam sama sa atong buhaton sa gitago nga mga bahandi, pinaagi sa pagtuon ug pinaagi sa pagtuo; aron makasinati sa kasaysayan ug mga balaod sa nasud nga atong gipuy-an, ug sa mga nasud sa yuta [tan-awa sa D&P 88:78–80, 118]. Ako nasayud nga kon ang batan-ong mga lalaki magtrabaho dinhi sa palibut, moadto sa pangpang, magtrabaho sa uma, moadto sa sinehan, ug sa pagpadayon, ang ilang mga hunahuna dili kaayo okupado niining mga butanga; apan kon sila pagatawagon sa pag-apil sa misyonaryo nga buhat sa ilang mga kaugalingon, daghan kanila mangandoy nga ilang untang gihatagan og labaw pa nga pagtagad ang mga panudlo nga ilang nadawat, ug mihimo sa ilang mga kaugalingon nga labaw pa ka sinati sa Biblia, sa Basahon ni Mormon, ug sa Basahon sa Doktrina ug mga Pakigsaad.¹⁰

Ang matang sa mga tawo nga gusto natong modala niini nga mensahe sa ebanghelyo mao ang mga tawo kinsa adunay hugot nga pagtuo sa Dios; mga tawo kinsa adunay hugot nga pagtuo diha sa ilang relihiyon; mga tawo kinsa mopasidungog sa ilang priesthood; mga tawo kinsa nahibaloan sa mga katawhan nga adunay hugot nga pagtuo ug kinsa ang Dios adunay pagsalig…. Kita kinahanglan sa mga tawo nga puno sa Espiritu Santo ug sa gahum sa Dios…. Mga tawo kinsa nagdala sa mga pulong sa kinabuhi taliwala sa mga nasud, kinahanglan nga mahimong mga tawo sa kadungganan, kaligdong, hiyas ug kaputli; ug kini mao ang sugo sa Dios kanato, kita kinahanglan nga maninguha ug mopadayon niini.¹¹

Kinahanglan gayud nga kita adunay pagtuo ug kaisug sa pagtuman sa atong misyonaryo nga katungdanan.

Adunay malisud nga panahon nga nagpasabut sa mga nasud sa yuta, … hilabihan ka grabe nga si bisan kinsa dili makatuo o makatugkad sa gubat, pagpaagas sa dugo, ug kaawaaw, pagbangutan ug kaalaot, kamatay, kagutom, ug mga linog, ug sa tanan niadtong mga katalagman nga gisulti sa mga propeta siguro gayud nga matuman…. Ug alang kini kanato, mga Santos sa Ulahing mga Adlaw, sa pagsabut sa mga tahas ug mga kapangakohan nga ania kanato….

….Adunay pipila ka mga butang nga nakapalisud kaayo usahay alang sa mga tawo sa pagpahigayon sa matang sa mga misyon nga ilang mabuhat unta sa batan-on pa sila, tungod sa panuigon, mga kakulangan, ug mga kahimtang. Bisan pa niana sa kasagaran ako mibati og kaulaw sa diha nga akong nakit-an ang mga buhat sa kadaghanan niini nga mga korum diin akong gipasabut, sa dihang sila gitawag sa pagmisyon. Ang usa ka tawo adunay usa ka pamalibad, ug ang lain, ug lain. Mas sayon pa niadtong mga baynte ka mga tuig ang milabay sa pagtawag og duha o tulo ka gatus ka mga tawo kay sa niini karon sa mga kaliboan sa Israel. Unsaon nimo sa pagpasabut niini? Kini kabahin sa sangputanan nga diha sa pagka walay pagtagad.¹²

Adunay daghan kaayo nga maayo og lawas nga mga tawo kinsa, kon sila pa unta adunay labaw nga hugot nga pagtuo sa Dios, ug makaamgo sa mga katalagman nga nagsingabut sa yuta, ug ang mga responsibilidad niana nga priesthood nga gitugyan sa Dios diha kanila, sila andam sa pagtangtang sa tanan nga mga babag ug moingon, Ania ako, ipadala ako; Buot ako nga makapahimulos ang tawhanong pamilya. Kon si Jesus mianhi aron sa pagpangita ug pagluwas niadtong kinsa nawala, himoa nga magbaton ako sa sama nga espiritu.¹³

Ako sa akong kaugalingon nagbiyahe og mga gatusan ka libo ka mga kilometro nga nagsangyaw sa ebanghelyo; ug walay pitaka o puntil, nagsalig sa Ginoo. Iya ba gayud ako nga gibiyaan? Wala, wala gayud. Sa kanunay ako gihatagan, ug tungod niini ako nagdayeg sa Dios ang akong Langitnong Amahan. Ako naapil sa iyang buhat, ug siya misulti kanako nga siya mopaluyo kanako niini. Siya nagmatinud-anon sa akong pagsalig Kaniya; ug kon ako wala magmatinud-anon sa Iyang pagsalig kanako, ako naglaum nga siya mopasaylo kanako ug motabang kanako sa pagbuhat og labaw pa ka maayo. Apan ang Ginoo nagmatinuron ug nagmatinud-anon, ug ako wala gayud magkulang sa bisag unsa nga makaon o mainom o isul-ob, ug sa kanunay gihatagan sa gikinahanglan sa pagbiyahe ug akong gustong adtoan.¹⁴

Ako adunay labaw nga pagsalig sa mga tawo kinsa mobiya dinhi nga mibati sa ilang kahuyang ug pagkawalay abilidad, kaysa niadtong kinsa mibati nga nasayud kaayo ug makahimo sa pagtudlo sa bisan unsa nga mga butang ug sa tanang butang. Ngano? Tungod kay kon ang mga tawo mosalig sa ilang mga kaugalingon sila nagsalig sa butang nga walay kapuslanan; ug kon sila mosalig diha sa Ginoo sila dili gayud mapakyas…. Ang Ginoo labaw sa tanan, Siya nagbantay sa Iyang mga katawhan, ug kon kini nga mga kaigsoonan magpadayon sa pagsalig sa Dios …, ang Iyang Espiritu mag-uban diha kanila, mohatag og kahayag sa ilang mga hunahuna, mopadako sa ilang mga abilidad ug mohatag kanila og kaalam ug salabutan sa panahon sa panginahanglan. Sila dili kinahanglan nga mahadlok sa kaalam sa kalibutan; kay walay kaalam sa kalibutan nga tugbang ngadto niana nga gihatag sa Ginoo ngadto sa Iyang mga Santos; ug hangtud nga kining mga kaigsoonan maglikay sa dautan, magsunod sa ilang relihiyon, ug mobutang sa ilang tanan nga pagsalig sa Ginoo pinaagi sa paghupot sa Iyang mga kasugoan, walay angay kahadlokan sa mga sangputanan; ug kini magamit ngadto sa tanang mga Santos maingon man usab ngadto niining mga kaigsoonan.¹⁵

Bisan unsa pa ang ilang mga gibati, [ang mga misyonaryo] manglakaw ingon nga mga anghel sa kalooy nga nagdala sa bililhon nga mga baruganan sa ebanghelyo, ug sila ang mahimo nga mga paagi sa pagdala sa daghan gikan sa kangitngit ngadto sa kahayag, gikan sa kasaypanan ug pagkamatuotuohon ngadto sa kinabuhi, kahayag, kamatuoran, ug salabutan, ug sa katapusan, ngadto sa kahimayaan sa celestial nga gingharian sa atong Dios.

Kon kining mga kaigsoonan manglakaw, mahimo nga kini bag-o nga buhat ngadto kanila. Sila kinahanglan nga makig-away sa mga sayop sa miaging mga katuigan, makigbatok sa mga pagpanaway nga sila sa ilang mga kaugalingon mosulti kaninyo makahimo sa ingon ka gamhanan nga impluwensya diha kanila; sila usab kinahanglan nga mosangyaw ug mangatarungan sa mga tawo kinsa walay pagtagad sa kamatuoran, labaw pa sa relihiyon nga atong gisagop, bisan pa niana kini nga mga elder manglakaw ingon nga pinadala nga mga mensahero ni Ginoong Jesukristo. Sila manglakaw aron sa pagpahayag nga ang Dios mitukod sa iyang buhat dinhi sa yuta, nga siya misulti gikan sa mga langit, ug nga ang mga panan-awon sa Makagagahum naabli diha sa atong panan-aw; ang mahangturon nga kahayag gipadayag ngadto sa mga sulugoon sa Labing Halangdon, ang kangitngit nga mitabon sa kalibutan sulod sa mga katuigan giwagtang; ug kining pinili nga mga elder sa Israel gipadala aron sa pagpahayag niining maayo nga balita sa kaluwasan sa mangitngit ug wala malamdagi nga mga nasud sa yuta…. Sila nanglakaw ug sila mobalik nga magmaya, nagpas-an sa bililhon nga mga binugkos uban kanila, ug sila mopanalangin sa ngalan sa Dios sa Israel, nga sila nakaangkon sa kahigayunan sa pag-apil sa pagpahimangno niini nga kaliwatan.¹⁶

Mga Sugyot alang sa Pagtuon ug Panaghisgutan

Sa unsa nga paagi ang misyonaryo nga buhat makatabang sa pagtuman sa mga katuyoan sa Ginoo? Isip usa nga nakadawat sa ebanghelyo, unsa nga misyonaryo nga mga katungdanan ang anaa kaninyo diha sa plano sa Ginoo?
Ngano nga ang Simbahan nagpadala og mga batan-on ug walay kasinatian nga mga tawo isip full-time nga mga misyonaryo?
Ngano nga ang hugot nga pagtuo diha sa Ginoo gikinahanglan sa misyonaryo nga buhat?
Sa unsa nga paagi nga ang atong personal nga pagpangandam ug katakus makaapekto sa atong abilidad nga mahimong epektibo nga mga instrumento alang sa Ginoo?
Agi og dugang sa pag-alagad sa usa ka full-time nga misyon, unsa ang ubang mga kahigayunan nga anaa kaninyo aron sa pagpakigbahin sa ebanghelyo?
Unsa ang pipila ka mga katarungan ang gihatag sa mga sakop nga dili makaapil sa misyonaryo nga buhat? Unsa ang inyong mabuhat aron makabuntog sa inyong kaugalingong mga babag niini nga bahin?
Sa unsa nga paagi imong nakita ang Ginoo nga mipanalangin niadtong kinsa mihatag sa ilang panahon, mga talento, kusog, ug mga kwarta ron sa pagpakigbahin sa ebanghelyo?

May Kalabutan nga mga Kasulatan: Alma 26:5–7; 3 Nephi 20:29–31; D&P 1:18–23; 4:1–7; 75:2–5; 133:7–9