Para kadagiti Lider—Panang-orient ken Panangsuporta kadagiti Mannursuro

Kas maysa a lider, addaanka iti pagrebbengan a “mangmiting kadagiti kaaw-awag a mannursuro” iti organisasionmo ken “mangtulong kadakuada para kadagiti calling wenno takemda” (Sapasap a Handbook, 17.3, Gospel Library). Dagitoy a miting ket gundaway a mangyam-ammo kadagiti baro a mannursuro kadagiti sagrado a calling-da ken ikkan ida iti inspirasion iti konsepto ti kaipapanan ti panangisuro iti wagas ti Mangisalakan. Kas maysa a lider, makatulongka kadagiti baro a mannursuro nga agsagana nga agserbi babaen ti panangaramid kadagiti sumaganad:

• Ipeksam ti panagtalek a tulonganto ida ti Mangisalakan iti calling wenno takemda (kitaen iti Doktrina ken Katulagan 88:78).

• Ikkam dagiti baro a mannursuro iti maysa a kopia daytoy a resource, ket allukoyem ida a mangsapul kadagiti wagas a pakaaramatan dagiti pagbatayanna iti panangisuroda.

• Ibinglaymo kadagiti baro a mannursuro ti maysa a banag maipapan iti organisasionmo a makatulong a maammuanda.

• No kasapulan, ibagam kadagiti baro a mannursuro no sadino a siled ti pangisuruanna ken no ania a lesson ti irugina. Mangipaay iti ania man nga impormasion a kasapulanda maipapan ti klaseda ken dagiti miembro ti klase.

• Ilawlawag kadagiti baro a mannursuro a matulongam ida iti calling wenno takemda. Mangidiaya iti suporta iti siled ti klase ken pananggun-od kadagiti resources iti panangisuro no kasapulan.

• Sagpaminsan a mangidiaya nga agpaliiw kadagiti klase dagiti mannursuro, ket mangipaay iti masao wenno feedback no tignayen ti Espiritu.

• Awisem dagiti mannursuro a makiraman kadagiti teacher council meeting iti tunggal tallo a bulan.

Bayat ti panagserbi dagiti mannursuro, itultuloyyo ti regular a pannakipagkita kadakuada tapno agtultuloy a suportaranyo ida. Kas pagarigan, mabalinmo ti maaddaan iti ababa a panaglilinnawag iti maysa a mannursuro sakbay wenno kalpasan ti klase tapno paglinnawagan dagiti pagbatayan ti Panangisuro iti Wagas ti Mangisalakan. Saludsoden iti mannursuro no ania ti mariknada a nasayaat nga ar-aramidenda ken dagiti wagas a kayatda a pasayaaten. Paregtaenyo ida nga addaan iti kinaasi ken panagyaman para iti serbisio nga itedda.

Rumbeng nga agsaganaka para kadagitoy a panaglilinnawag babaen ti panangbuyam iti mannursuro a mangisuro. Kalikagumam a maawatam a nasaysayaat dagiti pagpigsaan ti mannursuro ken takuatem dagiti wagas a makaidiayaka iti suporta. Ti panangbukel kadagiti pagpigsaan ti maysa a mannursuro ket napateg a kas iti panangilasin kadagiti gundaway para iti panagdur-as.