Dagiti Miting ti Konseho ti Mannursuro—Para kadagiti Nagannak ken Maawagan a Mannursuro

Rumbeng a mangangay ti tunggal ward kadagiti miting ti konseho ti mannursuro iti tunggal tallo a bulan nga agpadpada para kadagiti nagannak ken para kadagiti maawagan a mannursuro iti ward. Kadagitoy a miting, dagiti nagannak ken dadduma pay a mannursuro mabalinda ti aggiinnuman a sangkamaysa maipapan kadagiti pagbatayan ti panangisuro a kas ken Cristo (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 13.4, 13.5, 17.4, 17.5, Gospel Library).

Agpadpada a maangay dagitoy a kita ti miting ti konseho ti mannursuro iti tunggal tallo a bulan kabayatan ti 50-minuto nga oras ti klase iti Domingo.

Dagiti Miting ti konseho ti Mannursuro Para kadagiti Nagannak

Asino ti Mangidaulo Kadagitoy a Miting? Gagangay nga, idauluan ti panguluen ti Sunday School dagiti miting ti konseho ti mannursuro para kadagiti nagannak. Nupay kasta, mabalin nga ituding ti bishop ti dadduma pay a miembro ti ward a mangidaulo kadagiti miting no dadduma.

Ti konseho iti ward, iti tulong manipud iti panguluen ti Sunday School, ti mangimaton kadagiti miting ti konseho ti mannursuro para kadagiti nagannak. Aggiinnumanda a sangkamaysa maipapan kadagiti kasapulan dagiti nagannak ken pamilia, ken agtitinnulongda a mangikeddeng no ania dagiti pagbatayan manipud iti Panangisuro iti Wagas ti Mangisalakan a kasayaatan a mangpennek kadagita a kasapulan.

Asino ti Nasken a Dumar-ay? Ikeddeng ti konseho iti ward no awisenna dagiti masinunuo a nagannak wenno aramiden a siwawaya a dumar-ay ti amin nga agtarigagay a makiraman.

Kaano a Nasken a Maangay Dagitoy a Miting? Mabalin nga angayen dagiti miting ti konseho ti mannursuro para kadagiti nagannak iti ania man a Domingo, kas ikeddeng ti konseho iti ward.

Dagiti Miting ti Konseho ti Mannursuro para kadagiti Maawagan a Mannursuro

Asino ti Mangidaulo Kadagitoy a Miting? Gagangay nga, idauluan ti panguluen ti Sunday School dagiti miting ti konseho ti mannursuro—para kadagiti maawagan a Mannursuro. Nupay kasta, mabalin nga ituding ti bishop ti dadduma pay a miembro ti ward a mangidaulo kadagiti miting no dadduma.

Ti konseho iti ward, iti tulong manipud iti panguluen ti Sunday School, ti mangimaton kadagiti miting ti konseho ti mannursuro para kadagiti maawagan a mannursuro. Aggiinnumanda a sangkamaysa maipapan kadagiti kasapulan dagiti mannursuro ken agad-adal, ken agtitinnulongda a mangikeddeng no ania dagiti pagbatayan manipud iti Panangisuro iti Wagas ti Mangisalakan a kasayaatan a mangpennek kadagita a kasapulan.

Asino ti Nasken a Dumar-ay? Tunggal maysa a mangisursuro iti korum wenno klase iti ward ket rumbeng a tumabuno kadagiti miting ti konseho ti mannursuro. Maawis met dagiti kameng ti panguluen ti korum ken organisasion.

Kaano a Nasken a Maangay Dagitoy a Miting? Tumabuno dagiti mannursuro kadagiti miting ti konseho ti mannursuro iti maysa a Domingo no saanda a mangisursuro iti regular a klaseda.

• Mabalin a dumar-ay dagiti mannursuro iti korum ti priesthood, Relief Society, ken Young Women iti umuna wenno maikatlo a Domingo, kas ikeddeng dagiti lokal a lider.

• Mabalin a dumar-ay dagiti mannursuro iti Sunday School iti maikadua wenno maikapat a Domingo, kas ikeddeng dagiti lokal a lider.

• Mabalin a dumar-ay dagiti mannursuro iti Primary iti ania man a Domingo, kas inkeddeng dagiti panguluen ti Primary ken Sunday School iti ward. No tarigagayan, mabalin nga agsisina nga agmimiting dagiti mannursuro iti Primary manipud iti dadduma pay a mannursuro tapno agiinnuman maipapan kadagiti naidumduma nga aspekto iti panangisuro kadagiti ubbing. Mabalin a mapasamak daytoy kabayatan ti 20-minuto nga oras iti panagkanta, sakbay wenno kalpasan dagiti regular a miting iti Domingo, wenno iti sabali pay nga aldaw ti lawas. Mabalin a maangay ti nasurok ngem maysa a miting ti konseho ti mannursuro iti tunggal tallo a bulan para kadagiti mannursuro iti Primary tapno saanda a malibtawan ti amin a klase iti Primary iti isu met la a lawas. (Palagip: No kasapulan, mangdutok ti panguluen ti Primary kadagiti mangsukat a mannursuro, pagtitiponen dagiti klase, wenno agaramid iti dadduma pay a pannakipagurnos tapno makadar-ay dagiti mannursuro iti Primary kadagiti miting ti konseho ti mannursuro.)

Pormat para kadagiti Miting

Dagiti miting ti konseho ti mannursuro—agpada para kadagiti nagannak ken kadagiti maawagan a mannursuro—a mangsurot iti daytoy a pormat:

1. Agbibinninglay ken aggiinnumanda a sangkamaysa (agarup 20 a minuto). Awisen dagiti nagannak wenno mannursuro a mangibinglay no ania ti nasayaat nga ar-aramidenda bayat ti panangisuroda iti ebanghelio iti pagtaengan wenno kadagiti klaseda. Mabalinda met nga ibinglay dagiti karit a pakaipaspasanguanda wenno dagiti banag a kayatda a pasayaaten.

2. Agsursuro a sangsangkamaysa (agarup 15 a minuto). Pagsasaritaan kadagiti nagannak wenno mannursuro ti maysa kadagiti pagbatayan iti Panangisuro iti Wagas ti Mangisalakan. Umaykayo, Sumurot Kaniak ket mabalin met a mausar kas maysa a resource para kadagitoy a panagsasarita.

3. Agplano ken awisen (agarup 10 a minuto). Awisen dagiti nagannak wenno mannursuro a mangibinglay no ania ti nasursuroda bayat ti miting ken no kasano ti planoda ti panangyaplikar iti dayta.