Rurura’a a te ’āpo’ora’a a te mau ’orometua ha’api’i—Nō te mau metua ’e te mau ’orometua tei pi’ihia

E mea tano ’ia fa’atupu te pāroita tāta’itahi i te mau rurura’a a te ’āpo’ora’a a te mau ’orometua ha’api’i pauroa te toru ’āva’e, nō te mau metua ’e nō te mau ’orometua tei pi’ihia, i roto i te pāroita. I roto i teie mau rurura’a, e nehenehe te mau metua ’e te tahi atu mau ’orometua ha’api’i e ’āpo’o ’āmui nō ni’a i te mau parau tumu nō te ha’api’ira’a mai tā te Mesia te huru (hi’o Buka arata’i rahi : Tāvini i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, 13.4, 13.5, 17.4, 17.5, Vaira’a buka ’evanelia).

E fa’atupuhia nā huru rurura’a a te ’āpo’ora’a a te mau ’orometua ha’api’i i te hō’ē taime i roto i te tau toru ’āva’e, i te taime nō te piha ha’api’ira’a 50 minuti i te sābati.

Te mau rurura’a a te ’āpo’ora’a a te mau ’orometua ha’api’i nō te mau metua

Nā vai e arata’i i teie mau rurura’a ? Tei matauhia, nā te hō’ē melo nō te peresidenira’a o te Ha’api’ira’a Sābati e arata’i i te mau rurura’a a te ’āpo’ora’a a te mau ’orometua ha’api’i nō te mau metua. Terā rā, e nehenehe te ’episekōpora’a e fa’aue i te tahi atu mau melo o te pāroita nō te fa’atere i te mau rurura’a i te tahi taime.

Nā te ’āpo’ora’a pāroita, tauturuhia e te peresidenira’a nō te Ha’api’ira’a Sābati, e hi’o i te mau rurura’a a te ’āpo’ora’a a te mau ’orometua ha’api’i nō te mau metua. E ’āpo’o ’āmui rātou nō ni’a i te mau hina’aro o te mau metua ’e te mau ’utuāfare, ’e e ’ohipa ’āmui rātou nō te fa’aoti e aha te mau parau tumu i roto i te Ha’api’ira’a mai tā te Fa’aora e pāhono maita’i a’e i te reira mau hina’aro.

’O vai tē ’āmui atu ? Nā te ’āpo’ora’a pāroita e fa’aoti e mea maita’i ānei ’ia ani i te tahi mau metua i ma’itihia ’aore rā e fa’atae i te tītaura’a i te feiā ato’a e hina’aro e ’āmui mai.

E aha te taime e fa’atupuhia ai teie mau rurura’a ? E nehenehe e fa’atupu i te mau rurura’a a te ’āpo’ora’a a te mau ’orometua ha’api’i nō te mau metua i te mau huru sābati ato’a, mai tei fa’aotihia e te ’āpo’ora’a pāroita.

Te mau rurura’a a te ’āpo’ora’a a te mau ’orometua ha’api’i nō te mau ’orometua tei pi’ihia

Nā vai e arata’i i teie mau rurura’a ? Tei matauhia, nā te hō’ē melo nō te peresidenira’a o te Ha’api’ira’a Sābati e arata’i i te mau rurura’a a te ’āpo’ora’a a te mau ’orometua ha’api’i nō te mau ’orometua tei pi’ihia. Terā rā, e nehenehe te ’episekōpora’a e fa’aue i te tahi atu mau melo o te pāroita nō te fa’atere i te mau rurura’a i te tahi taime.

Nā te ’āpo’ora’a pāroita, tauturuhia e te peresidenira’a nō te Ha’api’ira’a Sābati, e hi’o i te mau rurura’a a te ’āpo’ora’a a te mau ’orometua ha’api’i nō te mau ’orometua tei pi’ihia. E ’āpo’o ’āmui rātou nō ni’a i te mau hina’aro o te mau ’orometua ’e te mau pīahi, ’e e ’ohipa ’āmui rātou nō te fa’aoti e aha te mau parau tumu i roto i te Ha’api’ira’a mai tā te Fa’aora e pāhono maita’i a’e i te reira mau hina’aro.

’O vai tē ’āmui atu ? Te mau ta’ata ato’a e ha’api’i i te hō’ē pupu autahu’ara’a ’aore rā te hō’ē piha tē tano ’ia haere i te mau rurura’a a te ’āpo’ora’a a te mau ’orometua ha’api’i. Tē ani-manihini-ato’a-hia nei te mau melo o te peresidenira’a pupu ’e peresidenira’a ’āvirira’a.

E aha te taime e fa’atupuhia ai teie mau rurura’a ? E haere te mau ’orometua i te mau rurura’a a te ’āpo’ora’a a te mau ’orometua ha’api’i i te sābati ’aita rātou e ha’api’i i tā rātou piha ha’api’ira’a.

• E haere atu te mau ’orometua ha’api’i o te pupu autahu’ara’a, o te Sōtaiete Tauturu ’e o te Feiā ’āpī tamāhine i te sābati mātāmua ’aore rā i te toru o te sābati, mai te au i te fa’aotira’a a te feiā fa’atere i reira.

• E haere atu te mau ’orometua ha’api’i o te Ha’api’ira’a Sābati i te piti ’aore rā i te maha o te sābati, mai te au i te fa’aotira’a a te feiā fa’atere i reira.

• E haere atu te mau ’orometua ha’api’i o te Paraimere i te huru sābati ato’a, mai te au i te fa’aotira’a a te mau peresidenira’a o te Paraimere ’e o te Ha’api’ira’a Sābati o te pāroita. Mai te mea e hina’arohia, e nehenehe te mau ’orometua ha’api’i o te Paraimere e ruru fa’ata’a-’ē-hia i te tahi atu mau ’orometua ha’api’i, nō te ’āparau i te mau tītaura’a hō’ē roa nō te ha’api’i i te mau tamari’i. E nehenehe te reira e tupu i te taime hīmenera’a e 20 minuti, nā mua a’e ’aore rā i muri a’e i te mau purera’a i te sābati, ’aore rā i te tahi atu mahana o te hepetoma. E nehenehe e fa’atupu hau atu i te hō’ē rurura’a ’āpo’ora’a toru ’āva’e nā te mau ’orometua ha’api’i o te Paraimere, ’ia ’ore rātou ’ia ma’iri i te mau piha Paraimere i roto i te hō’ē ā hepetoma. (Fa’ata’ara : Mai te mea e tītauhia, e fa’ata’a te peresidenira’a Paraimere i te mau ’orometua ha’api’i mono, e ’āmui i te mau piha ha’api’ira’a ’aore rā e rave i te tahi atu mau fa’anahora’a nō te fa’ati’a i te mau ’orometua Paraimere ’ia haere atu i teie mau rurura’a a te ’āpo’ora’a a te mau ’orometua ha’api’i.)

Fa’anahora’a nō te mau rurura’a

E pe’e te mau rurura’a a te ’āpo’ora’a a te mau ’orometua ha’api’i—nō te mau metua ’e nō te mau ’orometua tei pi’ihia—i teie fa’anahora’a :

1. Fa’a’ite ’e ’āpo’o ’āmui (20 ti’ahapa minuti). ’A ani i te mau metua ’aore rā i te mau ’orometua ha’api’i ’ia fa’a’ite mai e aha te mea e tere maita’i ra ’a ha’api’i ai rātou i te ’evanelia i te fare ’aore rā i roto i tā rātou piha ha’api’ira’a. E nehenehe ato’a rātou e fa’a’ite mai i te mau fifi tā rātou e fa’aruru nei ’aore rā te mau mea tā rātou e hina’aro e ha’amaita’i.

2. Ha’api’i ’āmui (15 ti’ahapa minuti). ’A ’āparau ’e te mau metua ’e te mau ’orometua ha’api’i i te hō’ē o te mau parau tumu i roto i te Ha’api’ira’a mai tā te Fa’aora. E nehenehe ato’a te Mai, pe’e mai e fa’a’ohipahia ’ei mātēria tauturu nō teie mau ’āparaura’a.

3. Fa’anaho ’e ani (10 ti’ahapa minuti). ’A ani i te mau metua ’aore rā i te mau ’orometua ha’api’i ’ia fa’a’ite mai i te mea tā rātou i ’apo mai i roto i te rurura’a ’e nāhea rātou i te fa’anaho nō te fa’a’ohipa i te reira.