mga lalaki nga nagtudlo og pamilya

Mga Sugyot alang sa Nagkalainlaing Sitwasyon sa Pagtudlo ug mga Estudyante

Ang mga baroganan sa pagtudlo sumala sa pamaagi sa Manluluwas mahimong magamit ngadto sa bisan unsang oportunidad sa pagtudlo––sa panimalay, sa simbahan, ug bisan asa. Hinoon, ang matag oportunidad moabot uban sa kaugalingon niining talagsaon nga mga kahimtang. Kini nga seksiyon naghatag og dugang nga mga sugyot nga mga piho ngadto sa nagkalainlaing mga estudyante ug mga sitwasyon sa pagtudlo.

Panimalay ug Pamilya

Ang Panimalay mao ang Labing Maayo nga Dapit alang sa Pagtudlo ug Pagkat-on sa Ebanghelyo

Si Presidente Russell M. Nelson nagtudlo nga ang panimalay kinahanglan mao ang “sentro sa pagkat-on sa ebanghelyo” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018,113). Ang pagtudlo nga mahitabo diha sa Simbahan o sa seminary bililhon ug gikinahanglan, apan kini gituyo alang sa pagsuporta sa pagtudlo nga mahitabo sa panimalay. Ang nag-una nga dapit––ug ang labing maayong dapit––alang sa pagkat-on sa ebanghelyo, alang sa atong mga kaugalingon ug sa atong mga pamilya, mao ang panimalay.

Apan kana wala magpasabot nga ang maayong pagkat-on sa ebanghelyo mahitabo og kalit diha sa panimalay; kini nagkinahanglan og tinuyo nga paningkamot. Gisugyot ni Presidente Nelson nga tingali ikaw nagkinahanglan nga “mousab” o “mobag-o sa inyong panimalay”––dili kinahanglan nga gub-on ang mga bongbong o dugangan og bag-ong salog apan tingali pinaagi sa pagtimbang-timbang sa kinatibuk-ang espiritu sa inyong panimalay, lakip ang inyong kontribusyon ngadto niana nga espiritu (“Ang Mahimong Labing Dalaygon nga mga Santos sa Ulahing mga Adlaw,” 113). Sama pananglitan, hunahunaa ang musika, mga video, ug ubang media sa inyong panimalay, ang mga hulagway diha sa mga bongbong; ug ang paagi ang mga sakop sa inyong pamilya makigsultihay ug magtinagdanay sa usag usa. Modapit ba kining mga butanga sa impluwensiya sa Espiritu Santo? Mogahin ka ba og oras alang sa pagkat-on sa ebanghelyo, sa tinagsa ug isip usa ka pamilya? Mobati ba ang mga sakop sa pamilya og gugma, luwas, ug duol ngadto sa Dios kon sila anaa sa inyong panimalay?

Mahimong kamo wala mobati nga aduna moy pagpugong sa espirituhanong palibot sa inyong panimalay. Kon mao kana, himoa nga kamo ang labing maayo nga impluwensiya nga kamo makahimo ug hangyoa ang Ginoo alang sa panabang. Siya modawat sa inyong matarong nga mga paningkamot. Kon kamo maninguha sa pagtudlo ug pagkat-on sa ebanghelyo, bisan og dili mo makakita sa gitinguha nga resulta diha dayon, kamo mahimong magmalamposon.

Ang Pagkat-on sa Panimalay Gitukod diha sa mga Relasyon

Ang “Higugmaa kadtong inyong gitudloan” magamit sa tanang sitwasyon alang sa pagtudlo sa ebanghelyo, apan diha sa panimalay, ang gugma kinahanglang moabot sa labing natural nga paagi ug mabati sa labing lig-on nga paagi. Bisan og ang inyong panimalay dili ingon ka sulundon, kini gituyo nga mahimong sentro sa pagtudlo sa ebanghelyo tungod kay kana mao diin ang atong labing malungtarong mga relasyon gitukod. Ang mga magtutudlo nga gawas sa panimalay mahimong adunay mas daghan pang kasinatian o pagbansay isip usa ka magtutudlo, apan dili gayod sila makasama sa potensiyal sa mahigugmaon, mahangturong mga relasyon nga anaa sa panimalay. Busa amumaha kana nga mga relasyon. Gahini og panahon ug paningkamot nga gikinahanglan sa pagpaminaw ngadto sa mga sakop sa imong pamilya ug pagtukod og pagsalig ug pagsabot alang kanila. Kini motabang sa pagtukod og lig-on nga sukaranan alang sa inyong mga paningkamot sa pagtudlo ug pagkat-on sa ebanghelyo diha sa panimalay.

Ang Pagkat-on diha sa Panimalay Maplano apan Dili Usab Pinugos

Kasagaran sa mga klase sa Simbahan mahitabo kausa sa usa ka semana, nga gi-iskedyul ang pagsugod ug ang paghuman, apan kini dili kanunay ang mahitabo diha sa panimalay. Mahimo nga kamo adunay gi-iskedyul nga leksiyon sa home evening o pamilyang pagtuon sa kasulatan, apan ang mga oportunidad sa pagtudlo diha sa pamilya kanunay nga mahitabo sa impormal, inadlaw nga mga higayon––samtang nangaon, nagtrabaho, nagdula, nagbiyahe padulong sa trabaho o sa eskwelahan, nagbasa og libro, nag-uban sa pagtan-aw og sine. Ang usa ka unos mahimong usa ka kahigayonan sa paghisgot mahitungod kon sa unsang paagi ang Manluluwas nagpanalipod kanato gikan sa espirituhanong mga unos. Ang usa ka tinedyer nga may malisod nga desisyon nga pagahimoon mahimong andam sa pagkat-on mahitungod sa personal nga pagpadayag. Ang usa ka bata kinsa nahadlok mahimong makapahimulos gikan sa inyong pagpamatuod mahitungod sa Maghuhupay. Ang mga bata kinsa magpabadlong o mag-away sa usag usa matudloan mahitungod sa paghinulsol ug pagpasaylo.

Tungod kay ang ingon nga mga higayon wala planoha, dili mo makaandam alang niini sa samang paagi nga kamo mangandam alang sa usa ka tradisyonal nga leksiyon. Hinoon, kamo makaandam sa inyong kaugalingon pinaagi nga magsensitibo ngadto sa Espiritu ug maningkamot nga “andam kanunay” (1 Pedro 3:15). Bisan unsa nga higayon mahimong usa ka higayon sa pagtudlo ug sa pagkat-on.

Pagkat-on diha sa Panimalay Naglangkob og Gamay, Yano, Makanunayong mga Paningkamot

Usahay ang mga ginikanan mawad-an og kadasig kon ang ilang mga pagsulay sa pagtudlo sa ebanghelyo diha sa panimalay ingon og walay kalamposan. Tagdon sa tinagsa-tagsa, ang usa ka home evening, panahon sa pagtuon sa kasulatan, o panag-istoryahanay og ebanghelyo ingon og wala kini makatuman og daghan. Apan ang pagkatapok sa gagmay, yano nga mga paningkamot, nga gibalik-balik sa kanunay sa paglabay sa panahon, mahimong mas gamhanan ug makapalig-on kay sa panagsa nga halandomong higayon o makahuloganong leksiyon. “Ang tanan nga mga butang kinahanglan gayod nga mahinabo diha sa ilang panahon,” ang Ginoo miingon. “Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64: 32–33; tan-awa usab sa Alma 37:6–7). Busa ayaw paghunong sa pagpaninguha, ug ayaw kaguol mahitungod sa pagtuman og usa ka dakong butang matag higayon. Pagmakanunayon lamang sa inyong mga panigkamot.

Diha sa Panimalay, ang Pagtuon ug Pagpuyo Dili Mabulag

Ang ebanghelyo magbutang diha dayon og kalambigitan diha sa panimalay. Diha ang mga tawo kinsa kauban ninyo sa pagkat-on mao ang mga tawo kinsa kamo mopuyo uban niini––kada adlaw. Sa tinuod, kadaghanan sa panahon, ang pagpuyo sa ebanghelyo mao ang giunsa nato sa pagkat-on sa ebanghelyo. Busa samtang kamo nagkat-on ug nagtudlo sa ebanghelyo diha sa panimalay, pangita og mga paagi sa pagkonektar sa unsay inyong nakat-onan uban sa unsay inyong gibuhat. Sa inyong panimalay, himoa ang ebanghelyo nga usa ka butang nga kamo naningkamot sa pagpuyo, dili lamang usa ka butang nga inyong gihisgotan.

babaye nga nagtudlo sa mga bata

Mga oportunidad sa pagtudlo diha sa pamilya kanunay mahitabo sa impormal, kada adlaw nga mga higayon.

Pagtudlo sa mga Bata

Mga Bata Nagkinahanglan og Lainlain

Ang tanang mga bata magkalahi, ug samtang sila naglambo, ang ilang mga panginahanglan mausab. Ang paglainlain sa inyong mga pamaagi sa pagtudlo motabang kaninyo sa pagtubag sa ilang nagkalainlaing mga panginahanglan. Sama pananglitan, hunahunaa ang paggamit sa mosunod:

• Mga istorya. Ang mga istorya nagtabang sa mga bata nga makakita kon sa unsa nga paagi ang ebanghelyo magamit sa matag adlaw nga kinabuhi. Gamita ang mga istorya gikan sa mga kasulatan, gikan sa inyong kaugalingong kinabuhi, gikan sa kasaysayan sa pamilya, o gikan sa mga magasin sa Simbahan, ilabi na sa mga istorya mahitungod sa Manluluwas. Pagplano og mga paagi sa pagpaapil sa mga bata diha sa istorya––pinaagi sa paggunit og mga hulagway, pagbalik og sulti sa mga hugpong sa mga pulong, o pag-aksyon sa mga bahin.

• Mga visual aid. Mga hulagway, mga video, ug mga butang makatabang sa mga bata sa pagsabot ug sa paghinumdom sa mga baroganan sa ebanghelyo. Daghang mga hulagway ug mga video ang makaplagan diha sa Media Library sa ChurchofJesusChrist.org.

• Musika. Ang mga himno ug sagradong mga awit makatabang sa mga bata nga mobati sa gugma sa Dios, mobati sa Espiritu, ug mokat-on sa mga kamatuoran sa ebanghelyo. Ang mga melodiya, mga ritmo, ug yano nga mga garay makatabang sa mga bata sa paghinumdom sa mga kamatuoran sa ebanghelyo sa mga katuigan nga moabot. Samtang kamo mokanta uban sa mga bata, tabangi sila sa pagdiskobre ug pagsabot sa mga baroganan nga gitudlo diha sa mga awit.

Kadaghanan sa mga bata labing makakat-on kon maapil ang nagkalain-laing mga balatian. Pangita og mga paagi sa pagtabang sa mga bata nga magamit ang ilang mga balatian nga pangtan-aw, pangdungog, ug panghikap samtang sila nagkat-on. Sa pipila ka mga sitwasyon, mahimo gani nga kamo mangita og mga paagi nga malakip ang ilang mga balatian sa pangsimhot ug pangtilaw!

Mga Bata mga Mamugnaon

Kon inyong dapiton ang mga bata sa pagdrowing, pagtukod, pagkolor, o pagsulat og usa ka butang kalabot ngadto sa usa ka baroganan sa ebanghelyo, inyo silang gitabangan nga mas makasabot sa baroganan, ug inyo silang gihatagan og usa ka mahikap nga pahinumdom sa unsay ilang nakat-onan. Makagamit usab sila sa unsay ilang namugna sa pagpakigbahin sa unsay ilang nakat-onan ngadto sa uban. Ang matag isyu sa Higala nga magasin naglakip og mamugnaon nga mga kalihokan alang sa mga bata.

Mga Bata mga Masusihon

Kon ang mga bata mangutana, tan-awa kini nga mga oportunidad, dili ingon nga makasamok. Ang mga pangutana sa mga bata mga timailhan nga sila andam sa pagkat-on, ug ang ilang mga pangutana naghatag kaninyo og bililhong mga panabot ngadto sa unsay ilang gihunahuna ug gibati. Tabangi sila sa pagtan-aw nga ang mga tubag sa ilang espirituhanong mga pangutana makaplagan diha sa mga kasulatan ug sa mga pulong sa buhing mga propeta.

Mga Bata Nagkinahanglan og Gugma Bisan Kon Sila mga Samokan

Usahay ang usa ka bata naglihok sa mga paagi nga magsamok sa pagkat-on sa uban. Kasagaran sa mga pamatasan nga makasamok nagagikan sa panginahanglan nga wala matubag. Kon mahitabo kini, pagmapailobon, pagmahigugmaon, ug pagmasinabtonon mahitungod sa mga hagit nga tingali giatubang sa bata . Tingali nagkinahanglan lamang siya og dugang nga mga oportunidad nga maapil diha sa leksiyon sa positibo nga mga paagi—sama pananglitan, pinaagi sa paggunit og litrato, pagdrowing og usa ka butang, o pagbasa og kasulatan.

Kon ang usa ka bata magpadayon nga makasamok, mahimong makatabang nga makig-istorya kaniya sa indibidwal nga paagi. Diha sa diwa sa gugma ug pailob, ipasabot ang inyong mga gipaabot ug ang inyong pagsalig nga siya makabuhat niini. Dayega ang bata kon siya naghimo og mas maayong mga pagpili.

Mga Bata Adunay Daghang Ipakigbahin

Kon ang mga bata nagkat-on og usa ka butang nga bag-o, natural nga sila gusto niini nga ipakigbahin ngadto sa uban. Awhaga kini nga tinguha pinaagi sa paghatag sa mga bata og mga oportunidad sa pagtudlo og mga baroganan sa ebanghelyo ngadto sa usag usa, sa ilang mga sakop sa pamilya, ug sa ilang mga higala. Hangyoa usab sila sa pagpakigbahin nganha kaninyo sa ilang mga hunahuna, mga pagbati, ug mga kasinatian kalabot ngadto sa mga baroganan nga inyong gitudlo. Inyong makita nga sila adunay mga panabot nga mga yano, lunsay, ug gamhanan.

Mga Bata Makabati sa Espiritu apan Mahimong Nagkinahanglan og Tabang sa Pag-ila sa Ilang Impluwensiya

Bisan ang mga bata kinsa wala pa makadawat sa gasa sa Espiritu Santo makabati sa Iyang impluwensiya, ilabi na kon sila nagkat-on mahitungod ni Jesukristo ug sa Iyang ebanghelyo. Kon sila naghimo og matarong nga mga pagpili, sila mobati sa pag-uyon sa Manluluwas pinaagi sa Espiritu. Tudloi ang mga bata mahitungod sa lainlaing mga paagi ang Espiritu nakigsulti kanato. Tabangi sila sa pag-ila sa Iyang tingog samtang Siya nagsulti nganha kanila. Kini motabang kanila sa pagpalambo og batasan sa pagpangita ug paglihok sa personal nga pagpadayag sa tibuok nilang mga kinabuhi.

Pagtudlo sa Kabatan-onan

Kabatan-onan Adunay Dakong Kalagmitan

Ang kabatan-onan adunay kalagmitan sa paghimo og talagsaong mga butang diha sa pagserbisyo sa Ginoo. Daghang mga kasinatian nga girekord diha sa mga kasulatan naghulagway nga ang Dios adunay pagsalig diha sa espirituhanong mga abilidad sa kabatan-onan. Kon bation sa kabatan-onan nga kamo misalig kanila, ang ilang pagsalig diha sa ilang balaan nga kalagmitan motubo, ug sila mosorprisa kaninyo uban sa unsay ilang matuman. Sa mahigugmaong paagi tabangi sila sa pagkakita kon unsa ang nahibaloan sa Langitnong Amahan nga sila mamahimo. Sunda ang mga ehemplo sa Manluluwas pinaagi sa pagpadayon sa paghigugma ug pag-awhag kanila, mapainubsanong magtrabaho uban kanila, ug dili gayod mobiya kanila.

Kabatan-onan Nagkat-on mahitungod sa Ilang mga Kaugalingon

Ang kabatan-onan nga inyong gitudloan nagtukod sa pundasyon sa ilang mga pagpamatuod. Anaa sila sa proseso sa pagdiskobre sa ilang mga tinuohan ug lig-on nga mga pagtuo. Naghimo sila og mga desisyon nga moapekto og dagan sa ilang mga kinabuhi. Aron mabuhi sa espirituhanong paagi niining makuyaw nga mga panahon ug sa pagtuman sa misyon sa Ginoo alang kanila, ang kabatan-onan nga inyong gitudloan nagkinahanglang mahibalo kon unsaon sa pagpangita og kalig-on atol sa ilang mga pagsulay, mga tubag sa ilang mga pangutana, ug kaisog nga “mobarog ingon nga mga saksi sa Dios” (Mosiah 18:9).

Ang kabatan-onan adunay nagtubo nga tinguha sa pagkat-on pinaagi sa pagrason ug pagsinati kay sa pinaagi lamang nga sultihan og mga butang. Kini nagpasabot nga ang pagtudlo sa kabatan-onan nagkinahanglan og maayong mga kahanas sa pagpaminaw. Kon ang kabatan-onan mobati nga nasabtan, sila mobati nga mas bukas ngadto sa tambag ug paggiya. Pasaligi sila nga ang Ginoo nakaila kanila ug motabang kanila samtang sila nakigbisog sa mga pangutana ug mga pagsulay. Sila makabansay sa ilang hugot nga pagtuo diha Kaniya pinaagi sa pagpalambo og inadlaw nga batasan sa pag-ampo ug pagtuon sa kasulatan ug pinaagi sa pagserbisyo sa uban. Ang pag-awhag sa kabatan-onan sa pag-apil sa mga klase sa Simbahan ug sa pagtuon sa ilang kaugalingon makatabang kanila sa pagbaton og personal nga mga kasinatian nga motukod sa ilang pagpamatuod sa ilang balaang panulundon.

Daghan sa Kabatan-onan Mga Komportable sa Paggamit sa Teknolohiya

Kon ang kabatan-onan nga inyong gitudloan adunay ilang kaugalingong mga kagamitan nga elektronik, hinumdomi nga kini nga mga kagamitan mga himan sa pagpauswag sa pagkat-on. Tudloi sila kon unsaon sa paggamit sa ilang elektronik nga mga kasulatan ug ubang mga kapanguhaan nga makaplagan diha sa Gospel Library. Makapadala ka usab og mga mensahe ug mga link ngadto sa kabatan-onan sa pagtabang kanila sa pagpangandam alang sa umaabot nga mga leksiyon.

Klase sa Sunday School

Kinahanglan nga masabtan sa mga kabatan-onan kon unsay nahibaloan sa Langitnong Amahan nga sila mamahimo.

Pagtudlo sa mga Hamtong

Ang mga Hamtong Makaako og Responsibilidad alang sa Ilang Pagkat-on

Ang mga estudyante nga hamtong makahimo sa paglihok alang sa ilang mga kaugalingon sa mga sitwasyon sa pagkat-on sa ebanghelyo (tan-awa sa 2 Nephi 2:26). Dapita sila sa pag-andam alang sa mga panaghisgotan sa ebanghelyo pinaagi sa pagtuon daan og usa ka butang, ug sa pag-awhag kanila sa pagpakigbahin kon unsay ilang nakat-onan pinaagi sa Espiritu. Mahimo usab nga ikaw mangutana kanila hain sa mga baroganan sa ebanghelyo nga sila gusto nga mogahin og panahon sa pagkat-on nga mag-uban.

Mga Hamtong Mogamit sa Ilang mga Kasinatian Kon Magkat-on

Mipahayag si Job, “Ang kaalam anaa sa mga tawong tigulang; ug ang kataas sa mga adlaw anaa sa maayong pagsabot” (Job 12:12). Sa kinatibok-an, ang kaalam ug espirituhanong pagsabot moabot human sa mga tuig nga kasinatian. Samtang kamo magtudlo sa mga hamtong, dapita sila sa pagpakigbahin og mga kasinatian nga mitukod sa ilang hugot nga pagtuo diha sa Langitnong Amahan ug ni Jesukristo. Kini mohatag kanila og mga oportunidad sa pagpamatuod mahitungod kon sa unsang paagi sila miabot sa kahibalo nga ang mga baroganan sa ebanghelyo nga ilang gitun-an mga tinuod. Ang pagpakigbahin og mga kasinatian motukod usab og mga relasyon tali niadtong inyong gitudloan, nagtabang sa “tanan … mahatagan og kaayohan sa tanan” (Doktrina ug mga Pakigsaad 88:122).

Mga Hamtong Nangita og Praktikal nga Paggamit

Ang mga hamtong nga inyong tudloan mahimong adunay daghang mga tahas ug mga responsibilidad sa ilang mga propesyon, mga komunidad, mga calling sa simbahan, ug mga pamilya. Kon sila magtuon sa ebanghelyo, sila kasagarang naghunahuna mahitungod kon unsaon sa unsay ilang gikat-onan sa pagtabang kanila diha niadto nga mga tahas. Dapita sila sa pagtan-aw kon sa unsang paagi ang mga pulong sa Dios may kalabotan ngadto sa ilang talagsaong mga kahimtang. Kamo makahimo niini pinaagi sa paghangyo kanila kon sa unsang paagi ang mga baroganan sa ebanghelyo makahuloganon ug magamit diha sa ilang mga kinabuhi.

Mga Hamtong Makahunahuna sa Komplikadong mga Pamaagi

Tungod sa ilang mga kasinatian ug kahibalo, ang mga hamtong nahibalo nga dili kanunay adunay sayon nga mga tubag sa mga pangutana sa ebanghelyo. Sila makadayeg nga ang usa ka tudling sa kasulatan mahimong adunay daghang mga kahulogan, ug sila makagamit og usa ka baroganan sa ebanghelyo ngadto sa nagkalainlaing mga sitwasyon sa kinabuhi. Dapita sila sa pagpamalandong kon unsaon sa mga baroganan sa ebanghelyo may kalabotan sa usag usa ug ngadto sa unsay nahitabo diha sa ilang mga kinabuhi. Awhaga ang pag-apil ug panaghisgot aron sila makakat-on gikan sa usag usa nga talagsaong mga panglantaw.

babaye nagtudlo og klase

Ang mga hamtong makahimo sa pakigbahin og daghang mga kasinatian nga nakatukod sa ilang hugot nga pagtuo diha sa Langitnong Amahan ug ni Jesukristo.

Pagtudlo sa mga Tawo nga adunay mga Kakulangan

Tabangi ang Matag Tawo sa Pagtubo ug Pag-uswag

Si Propeta Joseph Smith mitudlo, “Ang tanang mga salabotan ug mga espiritu nga sukad gipadala sa Dios nganhi sa kalibotan dali ra nga mapalambo” (Mga Pagtulun-an sa mga Presidente sa Simbahan: Joseph Smith [2007], 210). Paghunahuna nga ang tanang mga anak sa Dios makahimo sa pagtubo sa kahibalo ug pag-uswag. Hangyoa ang Ginoo sa pagtabang kanimo unsaon sa pagtabang sa matag tawo.

Pagkat-on og Piho nga mga Panginahanglan

Pakigsulti ngadto sa mga estudyante o sa ilang mga ginikanan o tig-amuma. Susiha kon sa unsang paagi ang matag indibidwal makakat-on sa labing maayo ug unsa nga mga pamaagi ang labing makatabang. Makahimo ka usab nga magpakitambag sa ubang mga lider ug mga magtutudlo kinsa adunay kasinatian ug mga panabot nga ikapakigbahin. Alang sa makatabang nga mga pamaagi sa pagtudlo, tan-awa sa disabilities.ChurchofJesusChrist.org.

Pagmugna og Positibo nga Palibot

Paghimo og usa ka positibo nga palibot diin ang matag usa mobati nga luwas ug gihigugma. Ayaw paghunahuna nga ang tanang estudyante nga adunay kakulangan managsama, ug tagda ang kada tawo uban sa gugma ug respeto. Awhaga ang uban nga magmaluluy-on ug magmasinabtanon.

Siguroha Nga ang Tanan Makaapil

Ang ginagmay nga mga kausaban mahimong himoon og mga kalihokan aron sa pagsiguro nga ang tanang estudyante makakat-on, lakip niadtong adunay pisikal nga mga limitasyon o mga kalisod sa pagkat-on. Sama pananglitan, kon ang usa ka kalihokan nagsugyot sa pagpakita og usa ka hulagway, mahimo kamong manganta hinoon og usa ka awit aron maapil ang mga estudyante nga adunay mga problema sa panan-aw.

Pag-establisar og Naandang mga Kalihokan ug Sistema

Usa ka pamaagi sa pag-establisar og naandang kalihokan mao ang paghimo og poster nga may eskedyul. Ang imong eskedyul mahimong maglakip og mga pag-ampo, panahon sa pagtudlo, ug panahon sa kalihokan. Ang pagsunod og eskedyul makatabang sa pagminos og mga pagbati nga walay kasigurohan ug kabalaka alang sa ubang mga estudyante.

Pagsabot Nganong ang Mahagitong mga Pamatasan Mahitabo

Pagkat-on mahitungod sa mga kakulangan o mga kahimtang nga mahimong mag-impluwensya sa usa ka tawo sa paglihok nga dili angay. Bantayi og maayo kon unsay mahitabo sa higayon nga motumaw ang mahagiton nga mga pamatasan. Hunahunaa sa mainampoong paagi kon unsaon pag-usab ang sitwasyon aron mas maayo ang pagsuporta sa mga estudyante.

Alang sa dugang nga impormasyon mahitungod sa pagtudlo sa mga tawo nga adunay kakulangan, tan-awa sa disabilities.ChurchofJesusChrist.org.

Klase sa Young Women

Ang mga magtutudlo makamugna og positibo nga sitwasyon sa pagkat-on diin ang tanan mobati nga gidawat ug gihigugma.

Virtual nga Pagtudlo

Himoang Masinati sa Teknolohiya

Sa dili pa ang imong klase o miting, paggahin og pipila ka panahon sa pagsinati sa teknolohiya nga imong gamiton. Susiha ang pipila sa mga bahin niini, sama kon unsaon sa pagpakigbahin sa mga video o mga hulagway. Hunahunaa ang pagpahigayon og usa ka “sulay-sulay” nga pakighimamat sa mga sakop sa pamilya o mga higala.

Kasagaran sa mga ward ug mga stake adunay usa ka espesyalista sa teknolohiya. Mahimo usab nga imong mailhan ang uban kinsa adunay kasinatian sa virtual nga mga miting. Pangayoa ang ilang mga tambag o giya.

Wagtanga ang Malagmit nga mga Makabalda

Kon mahimo, pangita og hilom nga dapit aron sa pagtambong sa inyong miting. Ang mga kalangas diha sa palibot mahimong makabalda. Awhaga ang mga estudyante sa pagbuhat og sama o sa pagpalong sa ilang mikropono kon sila dili mosulti.

Gamita ang Kamera

Kon mahimo, ipabilin nga abli ang inyong kamera aron ang mga estudyante makakita sa inyong nawong. Dapita (apan dili gikinahanglan) ang mga estudyante sa pag-abli usab sa ilang mga kamera. Kini makamugna og diwa sa panaghiusa ug isig suportahay.

Gamita ang Virtual Chat Feature

Daghang mga programa sa virtual nga miting ang nagtugot sa mga partisipante sa pag-type sa mga pangutana o mga komentaryo diha sa usa ka chat window. Ang pipila nagtugot usab sa mga partisipante nga mopataas sa ilang mga kamot sa virtual nga paagi. Pahibaloa ang mga estudyante mahitungod niini nga mga bahin. Mahimo ka nga motudlo og usa ka tawo sa pagbantay sa gipataas nga mga kamot o mga komentaryo aron kamo makatutok sa inyong atensyon diha sa paggiya sa panaghisgotan.

Pangita og mga Pamaagi sa Pag-apil sa mga Estudyante

Ang virtual nga kahimtang sa pagkat-on usahay maghimo niini nga malisod alang sa mga tawo nga makita ug madungog. Paghimo og tinuyo nga paningkamot sa pag-apil niadtong kinsa gusto nga moapil. Usahay kini nagpasabot sa paghimo og mas gagmay nga mga grupo (sama pananglitan, pinaagi sa pagbuak sa usa ka dako nga klase sa Sunday School). Usahay kini nagpasabot sa paghangyo daan sa mga estudyante sa pag-apil sa piho nga paagi. Ayaw itugot ang mga limitasyon sa teknolohiya nga makahimo kaninyo sa pagkalimot o dili makamatikod sa mga tawo kinsa naghinam-hinam ug andam sa pagkat-on.