Tabangi ang mga Tigkat-on sa Pagduol ngadto ni Jesukristo

Tabangi ang mga tigkat-on nga tuyoong maningkamot nga mahimong mas mahisama ni Jesukristo.

Kahanas

Obserbari ang Kristohanon nga mga hiyas diha sa mga estudyante ug ipakigbahin ang unsay imong namatikdan sa mga paagi nga makadasig kanila nga magpadayon nga mahimong sama Kaniya.

Ipasabot

Ang pag-ila sa mga aksiyon o mga hiyas ni Jesukristo diha sa uban ug pagpakigbahin niana nga pag-ila ngadto kanila modapit sa Espiritu Santo sa pagsaksi sa Amahan ug sa Anak ug modasig kanato nga magpadayon nga magpakabuhi sama Kanila. Atol sa klase, obserbahi ang mga estudyante ug pangutan-a ang imong kaugalingon, “Unsa nga mga kinaiya o mga hiyas ni Jesukristo ang akong nakita niana nga indibidwal?” Ipakigbahin ang unsay imong nailhan sa usa ka paagi nga makatabang kanila nga nakita nimo sila nga naningkamot nga mahimong mas sama ni Jesukristo.

Modelo

• Human nakita sa magtutudlo si Julio nga giablihan ang pultahan alang sa mga estudyante, siya hilom nga nangutana sa iyang kaugalingon, “Unsa nga mga kinaiya o mga hiyas ni Jesukristo ang akong nakita niana nga indibidwal?” Siya dayon nagpakigbahin sa mosunod: “Julio, salamat sa pag-abli sa pultahan alang nianang tanan nga mga estudyante. Nagpahinumdom ka kanako kon sa unsang paagi ang Manluluwas nangita og mga paagi sa pagserbisyo ug pagpanalangin sa uban.”

• Si Kai nakadawat og balita mahitungod sa kamatayon sa iyang pamilya, ug ang magtutudlo nagtan-aw ni Kalani nga naghupay kaniya. Ang magtutudlo nangutana sa iyang kaugalingon, “Unsa nga mga kinaiya o mga hiyas ni Jesukristo ang akong nakita diha ni Kalani?” Ang magtutudlo nagpakigbahin dayon kaniya, “Kalani, samtang nakakita ko nimo nga nakig-istorya ug nagtabang ni Kai karon, nagpahinumdom ka nako kon sa unsang paagi si Jesukristo migahin og panahon sa uban sa tagsa-tagsa. Salamat sa pagbuhat sa unsay Iyang buhaton.”

Pagpraktis

1. Pagpili og usa ka estudyante diha sa imong klase ug pangutana, “Unsa nga mga kinaiya o mga hiyas ni Jesukristo ang akong nakita niana nga indibidwal?” Andama kon unsay imong isulti ngadto sa estudyante ug dayon ipakigbahin ang kinaiya o hiyas ngadto kaniya.

2. Pagpili og estudyante ug pangutan-a, “Unsa nga mga kinaiya o mga hiyas ni Jesukristo ang akong nakita niana nga indibidwal?” Andama kon unsay imong isulti ngadto sa estudyante, ug dayon ipakigbahin ang kinaiya o hiyas ngadto kaniya.

Hisgoti o Pamalandongi

• Sa unsang paagi ang pag-obserbar sa Kristohanon nga mga hiyas diha sa mga estudyante ug pagpakigbahin sa imong mga hunahuna ngadto kanila modapit sa mga estudyante nga magpadayon nga tuyoong maningkamot nga mahimong sama ni Jesukristo?

Iapil

• Sugdi pinaagi sa pagpili og usa o duha ka estudyante kada adlaw. Obserbahi ug ipakigbahin ngadto kanila kon sa unsang paagi nimo namatikdan sila nga nahimong mas Kristohanon. Padayona kini hangtod mahimo kining natural.

Gusto pa og Dugang?

• 2 Nephi 25:26

• Chad H Webb, “Kami Naghisgot kang Kristo, Kami Nalipay diha kang Kristo” (Tinuig nga sibya sa pagbansay sa Seminaries and Institutes of Religion, Hunyo 12, 2018), broadcasts.ChurchofJesusChrist.org