“Faiako mei he ngaahi folofolá mo e ngaahi lea ʻa e kau palōfita ʻo e ngaahi ʻaho ki mui ní,” Fakatupulaki Ngaahi Taukei ʻa e Faiakó: Akoʻi ʻa e Tokāteliné (2023)
“Faiako mei he ngaahi folofolá mo e ngaahi lea ʻa e kau palōfita ʻo e ngaahi ʻaho ki mui ní,” Fakatupulaki Ngaahi Taukei ʻa e Faiakó: Akoʻi ʻa e Tokāteliné
Faiako mei he ngaahi folofolá mo e ngaahi lea ʻa e kau palōfita ʻo e ngaahi ʻaho ki mui ní.
Pōtoʻi Ngāué
Teuteuʻi ha ngaahi fakaafe ʻe tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he meʻa ʻoku lea ʻaki ʻe he kau palōfita moʻuí.
Fakaʻuhingaʻí
ʻOku tokoni ʻa e kau palōfita moʻuí ke mahino kiate kitautolu mo fakamahinoʻi ʻa e tokāteliné koeʻuhí ke tau lava ʻo muimui lelei ange kia Sīsū Kalaisi. Te ke lava ʻo fakaafeʻi ʻa e kau akó ke fakafehokotaki e ngaahi moʻoni ʻoku maʻu ʻi he folofolá ki he ngaahi lea ʻa e kau palōfita moʻuí ke fakaloloto ʻenau mahino ki he meʻa ʻoku akoʻí. ʻOku faʻa kau ʻi he ngaahi fakaafe ko ʻení ha:
-
Fakamatala ʻo e moʻoni ʻoku akoʻí.
-
Fakaafe ke fekumi ʻi he ngaahi akonaki fakapalōfitá ki he ngaahi moʻoni ʻoku fekauʻaki mo iá.
Fakatātaaʻi
-
ʻOku loto ʻa Sisitā Sosi ke fakaafeʻi ʻa e kau akó ke nau fakafehokotaki ʻa e maʻu fakahaá ʻo hangē ko hono akoʻi ʻi he Tokāteline mo e Ngaahi Fuakava 8:2–3 ki he ngaahi akonaki ʻa e kau palōfita moʻuí. ʻOkú ne teuteuʻi ʻa e fakaafé: “Hili hono ako ʻa e Tokāteline mo e Ngaahi Fuakava 8:2–3, kātaki ʻo kumi ha fakamatala mei he konifelenisi lahi kuo ʻosí ʻoku fekauʻaki mo e maʻu fakahaá.”
-
ʻOku loto ʻa Sisitā Sosi ke fakaafeʻi ʻa e kau akó ke nau fakafehokotaki ʻa e maʻu fakahaá ʻo hangē ko hono akoʻi ʻi he Tokāteline mo e Ngaahi Fuakava 8:2–3 ki he lea ʻa Palesiteni Lāsolo M. Nalesoni “Fakahā maʻá e Siasí, Fakahā ki Heʻetau Moʻuí.” ʻOkú ne teuteuʻi ʻa e fakaafé: “Hili hono ako ʻa e Tokāteline mo e Ngaahi Fuakava 8:2–3, kātaki ʻo ako e lea ʻa Palesiteni Nalesoni mei he konifelenisi lahi ʻo ʻEpeleli 2018 ʻFakahā maʻá e Siasí, Fakahā ki Heʻetau Moʻuí’ pea feinga ke ʻiloʻi ha meʻa ʻokú ne akoʻi fekauʻaki mo hono maʻu ʻo e fakahaá.”
Fakaangaanga
Fakakaukau ki ha foʻi moʻoni ʻi he naunau fakalēsoní ʻe hoko ko ha konga ʻo ha kalasi he kahaʻú.
-
Teuteu ha fakaafe ʻokú ne tokoniʻi ʻa e kau akó ke nau fakafehokotaki e foʻi moʻoni ko iá ki he ngaahi lea ʻa ha kau palōfita moʻui ʻoku nau maʻu ʻiate kinautolu pē.
-
Teuteu ha fakaafe ʻe tokoni ke fakafehokotaki ʻe he kau akó ʻa e moʻoni ko iá ki he ngaahi lea ʻa e kau palōfita moʻuí ʻi ha lea kuó ke fili.
Fakatahaʻi
-
Teuteu tuʻo taha he uike ke tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he kau palōfita moʻuí.
Aleaʻi pe Fakalaulauloto
-
Ko e hā ʻokú ke ako fekauʻaki mo e mālohi ʻo hono fakafehokotaki e ngaahi moʻoni mei he folofolá ki he ngaahi lea ʻa e kau palōfita moʻuí?
-
ʻE tokoni fēfē hono fai ʻeni ʻi hoʻo faiako ki hoʻo kau akó ke nau ului lahi ange kia Sīsū Kalaisi?
Fie Ako Lahi Ange?
-
Clark G. Gilbert, “Ko Ha Palōfita ʻi he Fonuá: Ngaahi Fakamamafa Fakaepalōfita Lolotonga ki he Kakai Lalahi kei Talavoú” (Fakamafola fakataʻu ʻa e S&I, 27 Sānuali 2023), ChurchofJesusChrist.org
-
Neil L. Andersen, “Ko e Palōfita ʻa e ʻOtuá,” Ensign pe Liahona, Mē 2018, 24–27