Fakatupulaki ʻa e Ngaahi Taukei ʻa e Faiakó
Ako ʻiate koe pē ʻa e tokāteline ʻo Sīsū Kalaisí.

“Ako ʻiate koe pē ʻa e tokāteline ʻo Sīsū Kalaisí,” Fakatupulaki Ngaahi Taukei ʻa e Faiakó (2022)

“Ako ʻiate koe pē ʻa e tokāteline ʻo Sīsū Kalaisí,” Fakatupulaki Ngaahi Taukei ʻa e Faiakó

Akoʻi ʻa e Tokāteliné

Ako ʻiate koe pē ʻa e tokāteline ʻo Sīsū Kalaisí.

Taukeí: Faʻu ha ngaahi fehuʻi fekumi tauʻatāina ʻoku tokoni ke ʻilo he kau akó ʻiate kinautolu e tokāteline mo e ngaahi tefitoʻi moʻoni ʻo e ongoongoleleí pea ʻoua ʻe taki e kau akó ki ha tali pau.

Fakamatalaʻi

ʻOku fakaafeʻi e kau akó ʻi he ngaahi fehuʻi fekumí ke nau ʻiloʻi mo mahino e ngaahi moʻoni ʻi he folofolá ʻiate kinautolu pē kae ʻikai ko hono taki kinautolu ki ha tali kuo ʻosi tomuʻa fokotuʻutuʻu pe pau. ʻE lava ʻi he founga ko ʻení ke toe mahuʻinga ange hono ako ʻe ha tokotaha ako ʻa e folofolá pea lava ke fakaʻatā ʻa e ʻEikí ke akoʻi mo ueʻi fakalaumālie fakataautaha kinautolu. Ko e ngaahi fehuʻi ko ʻení (1) ʻoku kau ai ha fakaafe ki he kau akó ke fakakaukau ki he meʻa ʻoku makehe kiate kinautolú, (2) taʻofi e fie maʻu ke kumi ʻe he kau akó ha meʻa pau ʻoku fakakaukau ki ai ʻa e faiakó, pea (3) fakaʻatā ʻa e kau akó ke fakalaulauloto ki he founga ʻe lava ke fakaʻaongaʻi ai ʻa e ngaahi moʻoni kuo ʻiloʻi mo mahinó ʻi heʻenau moʻui fakatāutahá. ʻE lava ke fakaʻaongaʻi e ngaahi fehuʻi ko ʻení ʻi hono fakaafeʻi e kau akó ke fekumi ʻi he ngaahi vēsí ke ʻiloʻi e ngaahi moʻoní pea feinga ke mahino lahi ange e ngaahi moʻoni kuo nau ʻiló.

Fakatātaaʻi

Ko e ngaahi sīpinga ʻeni te ke ala tokoni ai ke ʻilo pea mahino ki he kau akó ʻiate kinautolu pē ʻa e ngaahi moʻoní ʻaki e ngaahi fehuʻi fekumi tauʻatāiná:

  • ʻIkai fakaafeʻi, “Kumi e veesi ʻoku akoʻi ai he ʻEikí e mahuʻinga ʻo e talangofuá,” te ke lava ʻo fehuʻi, “Ko e hā e tefitoʻi moʻoni mahuʻinga kia koe he vēsí ni?”

  • ʻIkai pehē, “ʻOku fakamamafaʻi ʻe Sīsū e fiemaʻu ke tau tui kiate Ia ʻi he ngaahi vēsí ni,” te ke lava fehuʻi, “Ko e hā e tefitoʻi moʻoni ʻoku tau ako mei he akonaki mo e sīpinga ʻa Sīsuú ʻi he ngaahi vēsí ni?”

  • ʻOua ʻe fehuʻi, “Te ke lava nai ʻo vakai ki he founga ʻoku fakamanatu mai ai ʻe he ʻEikí ʻi he veesi ko ʻení ke tau lotu maʻu ai peé?” ka te ke lava ʻo fehuʻi, “Ko e hā ha pōpoaki fekauʻaki mo e lotú ʻoku feinga ʻa e ʻEikí ke tokoni ke mahino kiate koe mei he veesi ko ʻení?”

Lomiʻi heni ke vakai ki ha vitiō ʻo e sīpinga ko ʻení.

Fakaangaanga

Fakaʻaongaʻi ha fakaangaanga ʻe taha pe lahi ange ʻi heni ke fakatupulaki hoʻo malava ke tokoniʻi e kau akó ke nau ʻiloʻi mo mahino kiate kinautolu ʻa e ngaahi moʻoní:

  • Vakai ki he Molonai 10:32–33. Fakaangaanga hono ʻiloʻi ha tefitoʻi moʻoni lahi ange ʻi he tahá ke vakai ki he founga ʻe ala ʻiloʻi ai ʻe he kau akó ha ngaahi tefitoʻi moʻoni kehekehe mei he ngaahi veesi ko ʻení. Hiki ha fehuʻi ʻe taha te ne fakaʻatā e kau akó ke nau ʻiloʻi ha ngaahi tefitoʻi moʻoni lahi.

  • Fakakaukau ki ha konga folofola ʻokú ke palani ke ako mo e kau akó ʻi he lēsoni ka hokó. ʻOua ʻe palani ke lau ʻe he kau akó e ngaahi veesi ko ʻení mo kumi ha tefitoʻi moʻoni pau kuó ke ʻosi ʻiloʻi, kae fakaangaanga hono hiki ha fehuʻi fekumi tauʻatāina ʻe ua ki he tolu ke tokoni ke nau ʻiloʻi ha tefitoʻi moʻoni ʻiate kinautolu pē.

  • Vakai ki ha palani ʻo e lēsoni ka hokó. Fili ha tefitoʻi moʻoni ʻe lava ke ʻiloʻi ʻe he kau akó mei he ngaahi veesi ʻoku akó. Fakaangaanga hono hiki ha fehuʻi faingofua ʻe ua pe tolu ke tokoni ke mahino lahi ange kiate kinautolu ʻa e tefitoʻi moʻoni ko ʻení ʻi ha founga ʻoku ʻikai taki ai kinautolu ki ha tali kuo ʻosi fokotuʻutuʻu pe pau.

Aleaʻí pe Fakalaulaulotó

Fakalaulauloto ki he meʻa kuó ke ako mei he aʻusia ko ʻení. Mahalo te ke lava ʻo hiki ha niʻihi ʻo e ngaahi fakakaukau ko ʻení ʻi ha tohinoa ako. Fakakaukau ki he ngaahi fehuʻi ko ʻení:

  • Ko e hā kuó u fakahoko kimuʻa ke tokoniʻi e kau akó ke nau ako ʻi he ngaahi fehuʻi fekumi tauʻatāiná?

  • Ko e hā kuó u ako ʻi he aʻusia ko ʻení ʻe lava ʻo fakatupulaki ai ʻeku malava ke fai e ngaahi fehuʻi fekumi tauʻatāiná?

  • Ko e hā te u fai ke hokohoko atu ʻeku fakalakalaká?

Fakatahaʻi

ʻI hoʻo teuteu hoʻo ngaahi lēsoni he uike ní, faʻu ha fehuʻi fekumi tauʻatāina ʻe ua ki he tolu ʻoku tokoni ki he kau akó ke nau ʻiloʻi ʻiate kinautolu pē ʻa e tokāteline mo e ngaahi tefitoʻi moʻoni ʻo e ongoongoleleí pea ʻoku ʻikai taki ai kinautolu ki ha tali pau. Hiki hifo ia pea feinga ke fakahoko e fehuʻi takitaha ki ha mēmipa ʻo e fāmilí, kaungā ngāue, pe ʻiate koe pē. Feinga ke ʻiloʻi ha fehuʻi ʻe taha ke fakahoko ʻi loki ako, pea fakaʻaongaʻi ia ʻi hoʻo lēsoní.

Fie Ako Lahi Ange?