Faiako ʻaki e Laumālié

Toutou fai hoʻo fakamoʻoní, pea fakaafeʻi e kau akó ke vahevahe ʻenau ngaahi ongó, aʻusiá, mo e fakamoʻoní.

Taukeí: Faʻu ha ngaahi sētesi fakaʻaiʻai ʻe tokoni ke fakamatalaʻi ʻe he kau akó ʻenau ngaahi ongó, aʻusiá, mo e fakamoʻoní.

Fakamatalaʻi

ʻI hono vahevahe ʻe he kau akó ʻenau ngaahi ongó, aʻusiá, mo e fakamoʻoní, ʻe fakamoʻoniʻi ʻe he Laumālie Māʻoniʻoní ʻa hono moʻoni ʻo e meʻa ʻoku nau lea ʻakí, ki honau ʻatamaí mo e lotó fakatouʻosi pea ki he niʻihi kehé foki. Ko e sētesi fakaʻaiʻaí ko ha founga ia ʻe taha ke tokoniʻi kinautolu ke nau vahevahé. ʻOku meimei ke konga ua ʻa e ngaahi sētesi fakaʻaiʻai ko ʻení: Ko e konga ʻuluakí ʻoku fakaafeʻi e kau akó ke nau fakalaulauloto ki heʻenau ngaahi ongó, aʻusiá, mo e fakamoʻoní pea lava ke fakafehokotaki ia ki he ngaahi meʻangāue fakafaiako kehé, hangē ko e ngaahi fakatātaá, fehuʻí, talanoa ke ako mei aí, fanga kiʻi vitioó, mo e ngaahi himí. Ko e konga hono uá ʻoku ʻoange ai ha faingamālie ke kamata vahevahe ʻa e kau akó. ʻE lava ke fai ʻeni ʻaki hono fakaafeʻi e kau akó ke nau fakakaukau ki he founga te nau fakakakato ai ha kupuʻi lea ʻoku ʻikai kakato. Ko e konga mahuʻinga ʻo e ngaahi sētesi fakaʻaiʻai ko ʻení ko hono tokoniʻi e kau akó ke nau fetuʻutaki mo e Laumālie Māʻoniʻoní ke tokoni ke nau kamata fakakaukau ki ha founga ke fakamatalaʻi ai ʻenau ngaahi ongó, aʻusiá, mo e fakamoʻoní.

Fakatātaaʻi

Tā

tā valivali ʻo Sīsū Kalaisí

ʻOkú ke akoʻi ʻa e Tokāteline mo e Ngaahi Fuakava 45:1–5, pea ko e tefitoʻi moʻoní “Ko Sīsū Kalaisi ʻa hotau Taukapo ki he Tamaí.” ʻOkú ke fakaʻaliʻali ki he kau akó ʻa e tā ko ʻeni ʻo Sīsū Kalaisí pea fakaʻaongaʻi e sētesi “Kapau te u lava ʻo tala kia Sīsū Kalaisi ha ʻuhinga ʻe taha ʻoku ou ʻofa ai ʻiate Iá, te u vahevahe …”

Fakatātā Himi

ʻOku mou hivaʻi fakataha mo e kalasí ʻa e “ʻOku Moʻui Hoku Huhuʻí.” ʻOkú ke fakaafeʻi e kau akó ke nau kumi e ngaahi laine ʻoku nau saiʻia taha aí ʻa ia ʻoku tokoni ke nau fakakakato ʻa e kupuʻi lea ko ʻení: “ʻOku ou ʻilo ʻoku moʻui ʻa Sīsū Kalaisi ke …”

Lomiʻi heni ke vakai ki ha vitiō ʻo e sīpinga ko ʻení.

Fakaangaanga

Fakaʻaongaʻi e miniti ʻe nima ka hokó ke ʻiloʻi ha fakatātā, himi, pe vitiō fekauʻaki mo Sīsū Kalaisi ʻoku fehokotaki mo ha tefitoʻi moʻoni pe tokāteline ʻi ha konga folofola hoko mai. Faʻu ha sētesi fakaʻaiʻai ʻe tokoni ki he kau akó ke nau fakakaukau pea vahevahe ʻenau ngaahi ongó, aʻusiá, pe fakamoʻoni kia Sīsū Kalaisí fekauʻaki mo e tefitoʻi moʻoni pe tokāteline kuo filí.

Aleaʻí pe Fakalaulaulotó

• ʻE tokoni fēfē hono ʻoange ha sētesi fakaʻaiʻaí ke vahevahe ʻe he kau akó ʻenau ngaahi ongó, aʻusiá, mo e fakamoʻoní?

• Ko e hā kuó ke ako fekauʻaki mo hono tokoniʻi e kau akó ke nau ongoʻi lotolahi ange ʻi hono vahevahe e ngaahi fakamoʻoni mo e ongo ʻoku mahuʻingá?

Fakatahaʻi

Faʻu ha sētesi fakaʻaiʻai ki he lēsoni takitaha ʻi he uiké ni ʻa ia ʻoku tokoni ke vahevahe ʻe he kau akó ʻenau ngaahi ongó, aʻusiá, mo e fakamoʻoní.

Fie Ako Lahi Ange?

• “Tataki e Ngaahi Fealeaʻaki Fakalaumālié,” Ko e Faiako ʻi he Founga ʻa e Fakamoʻuí (2016), 33–34

• “Ideas for Virtual Learning and Teaching,” ChurchofJesusChrist.org