Faiako ʻaki e Laumālié

Tokoniʻi e kau akó ke kumi, ʻiloʻi, mo ngāueʻi e fakahā fakatāutahá.

Taukeí: Kimuʻa hono tali ha fehuʻi ʻa ha taha ako, kiʻi taimi ʻo fakakaukau, “Ko e hā te u lava ʻo fehuʻí?” pe “Ko e hā te u lava ʻo fakaafeʻi ke ne faí?”

Fakamatalaʻi

ʻI he taimi ʻoku fakamatala ai pe fehuʻi ha tokotaha ako, naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOua ʻe fakakaukau, ʻKo e hā te u talaange kiate kinautolú?ʼ ʻoku totonu ko e tokangá ko e, ʻKo e hā te u ʻeke kiate kinautolú?ʼ Pea ʻikai ngata pē ʻi he ʻKo e hā te u ʻeke kiate kinautolú?ʼ ka ʻKo e hā te u fakaafeʻi ke nau fakahokó?ʼ” (“An Evening with Elder David A. Bednar” [evening with a General Authority, Feb. 7, 2020], broadcasts.ChurchofJesusChrist.org). ʻI he taimi ʻoku fehuʻi ai ʻe ha faiako “Ko e hā te u lava ʻo ʻeke kiate kinautolú?” ʻe lava ke tataki e faiakó ʻe he Laumālie Māʻoniʻoní ke ne maʻu ha fakamatala lahi ange ke lelei ange ʻene vakai ki he tokotaha akó pe ʻilo e founga ke tokoniʻi ai ia ke fekumi mo ngāueʻi e fakahā fakatāutahá.

ʻI he taimi ʻoku fehuʻi ai ʻe ha faiako “Ko e hā te u fakaafeʻi ke nau fakahokó?” ʻe lava ke fakafehokotaki ʻa e faiakó mo e Laumālie Māʻoniʻoní ke ʻiloʻi ʻa e fakaafe ke faí, pea ʻe lava ke fakakaukauʻi lelei ange ʻe he tokotaha akó ʻa e founga ke ngāueʻi ai e fakahā fakatāutahá.

Fakatātaaʻi

Fekumi ki he fakakaukau ʻa e faiakó kimuʻa pea toki talí:

• ʻOku tali ʻa Malia he ʻosi e kalasí ke ʻeke e founga te ne ʻilo ai e faikehekehe ʻi heʻene fakakaukaú mo e ngaahi ueʻi ʻa e Laumālié.

• Kimuʻa peá u talí, ʻoku ou kiʻi tuʻu ʻo fakakaukau, “Ko e hā te u lava ʻo fehuʻi ʻe fakaafeʻi ai ia ke fekumi ki heʻene talí ʻo fakafou ʻi he fakahā fakatāutahá?” mo e “Ko e hā te u lava ʻo fakaafeʻi ia ke fakahoko kae lava ke ne ako e talí ʻiate ia pē?”

Lomiʻi heni ke vakai ki ha vitiō ʻo e sīpinga ko ʻení.

Fakaangaanga

ʻOku fakahoko ʻe Safali ʻa e fehuʻi ko ʻení ʻi he kalasí: “Te u fakaʻaongaʻi fēfē ʻa e Fakalelei ʻa Sīsū Kalaisí ke tokoniʻi au ʻi ha ngaahi meʻa kehe mei he fakamolemolé?”

Kimuʻa pea faʻu hoʻo talí, kiʻi taʻofi ʻo fakakaukau, “Ko e hā te u lava ʻo faí …”

Fakatokangaʻi ange: ʻOku ʻikai fakahoko ʻe he fakaangaangá ʻa e fehuʻí pe fakaafé. ʻOku kole atu ia ke ke kiʻi taimi ʻo fakakaukau, “Ko e hā te u lava ʻo kole ange pe fakaafeʻi ia ke ne fakahokó kae lava ke ne fetuʻutaki mo e Laumālie Māʻoniʻoní pea ako ʻa e talí ʻiate ia pē?”

ʻOku pehē ʻe ʻAna, “He ʻikai ke u teitei mali. Kuo fuʻu tokolahi e kau mēmipa hoku fāmilí kuo nau ʻosi vete mali, ko ia ʻoku ʻikai hano ʻaonga.”

Kimuʻa pea faʻu hoʻo talí, kiʻi taʻofi ʻo fakakaukau, “Ko e hā te u lava ʻo faí …”

ʻOku fehuʻi ʻe Niki, “Ko e hā e meʻa lelei taha te u lava ʻo fai ke teuteu ai ki he ngāue fakafaifekaú?”

Kimuʻa pea faʻu hoʻo talí, kiʻi taʻofi ʻo fakakaukau, “Ko e hā te u lava ʻo faí …”

Aleaʻí pe Fakalaulaulotó

• Ko e hā hoʻo tali angamahení hili hano ʻeke atu ʻe ha taha ha fehuʻi?

• Ko e hā kuó ke ako fekauʻaki mo hono tataki e kau akó ke nau fekumi mo ngāueʻi e fakahā fakatāutahá?

Fakatahaʻi

Fakakaukauloto ʻi he ʻaho kotoa pē he uiké ni ʻoku fakahoko atu ʻe ha tokotaha ako ha fehuʻi. Kimuʻa peá ke talí, lea fakalongolongo pē kiate koe, “Ko e hā te u lava ʻo kole ange pe fakaafeʻi ia ke ne fakahokó kae lava ke ne fetuʻutaki mo e Laumālie Māʻoniʻoní pea ako ʻa e talí ʻiate ia pē?” Pea ʻi he lolotonga ʻo e uiké, ʻi he taimi ʻoku fai atu ai ʻe ha tokotaha ako ha fehuʻi pe fakamatala, kiʻi taimi ʻo fakakaukau pe ko e hā ha fehuʻi pe fakaafe te ke lava ʻo fai ange kae ʻikai ko e meʻa te ke talaangé.

Fie ako Lahi Ange?

• David A. Bednar, “An Evening with Elder David A. Bednar” (evening with a General Authority, Feb. 7, 2020), broadcasts.ChurchofJesusChrist.org