“Mataupu 9: Saili Tagata e Aoao,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)
“Mataupu 9,” Tala’i La’u Talalelei
Ata
O Le Leoleo Mamoe Lelei, saunia e Del Parson
Mataupu 9
Saili Tagata e Aoao
Manatunatu i le Mea Lenei
E mafai faapefea ona ou faaaogaina le faatuatua e saili ai tagata e aoao?
E mafai faapefea ona tatou faalautele la tatou vaaiga mamao ma faaleleia a tatou fuafuaga mo le sailia o tagata e aoao?
E mafai faapefea ona ou tuputupu a’e i lo’u tomai ma le mautinoa e talanoa ai i tagata ou te feiloai i ai i aso taitasi?
E mafai faapefea ona tatou lotogatasi ma tagata o le ekalesia i le faasoaina atu o le talalelei?
O le a se mea e tatau ona tatou faia pe a tatou mauaina tagata na fasino mai?
O a nisi o auala mo le sailiina o tagata e aoao atu ou te le’i faataitaia?
Na ta’u atu e le Faaola toetu i Ona soo, “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Alo, ma le Agaga Paia” (Mataio 28:19; tagai foi i le Mareko 16:15). Sa toe fetalai mai le Alii i lenei poloaiga i o tatou aso, ma fetalai mai, “Ia outou o atu i le lalolagi uma [ma] talai atu le talalelei” (Mataupu Faavae ma Feagaiga 68:8; tagai foi i le 50:14).
O le galuega faafaifeautalai o le sailia lea o tagata, aoaoina o i latou, ma fesoasoani ia i latou e saunia mo le papatisoga. O le a e faataunuuina le poloaiga a le Alii e aoao atu Lana talalelei ma papatiso tagata liliu mai a o e “maua i latou o le a talia oe” (Mataupu Faavae ma Feagaiga 42:8). E leai se mea e tupu i le galuega faafaifeautalai sei vagana ua e maua se tasi e aoaoina. Mataala i taimi uma mo avanoa e faailoa atu ai le talalelei. Aoao e faaaoga auala e aoga i la outou eria.
E faapitoa lava le taua o le galulue faatasi ma tagata o le ekalesia i le sailia. Galue malosi ia maua lo latou faatuatuaga. A faatuatuaina e tagata o le ekalesia ia faifeautalai, o le a sili atu ona latou valaaulia a latou uo ma tagata o le aiga e feiloai ma outou. O nei tagata o le a sili atu ona liua i le Alii, papatisoina, ma alualu i luma i luga o le ala o le talalelei.
O le sailia o le a tupu e tusa ai ma le saunia o se tagata e faalogo i le talalelei. O le taimi o le a ese mo tagata taitoatasi. O le sailia e mafai ona maua mai i se fegalegaleaiga i le taimi muamua po o le tele o fegalegaleaiga i se taimi umi. E toatele tagata e tele a latou fegalegaleaiga ma faifeautalai po o tagata o le Ekalesia a o le’i amataina se suesuega faamaoni o le talalelei. Aua le faatuai ona toe faafesootai i latou.
O au taumafaiga e saili atonu e fua mai pe a uma ona e siitia ese pe ua maea lau misiona. Po o le a lava le taimi po o le taunuuga, e faafetai le Alii mo au taumafaiga.
O lenei mataupu o loo otooto atu ai mataupu faavae ma manatu e fesoasoani ia te oe ia maua. O nei mataupu faavae e aoao. Peitai, atonu e manaomia e faifeautalai ma taitai o misiona ona fetuunai i latou i o latou tulaga.
Atiina A’e o le Faatuatua e Su’e ai Tagata e Aoao
Po o fea lava e te auauna atu i ai, ua valaauina oe e le Alii e te galue “mo le faaolataga o agaga” (Mataupu Faavae ma Feagaiga100:4). Ina ia faia lenei mea, e tatau ona e faatinoina le faatuatua ia Keriso e saili ai tagata e aoao ina ia mafai ai ona latou filifili e mulimuli ia te Ia ma ia papatisoina.
O le faatuatua o se mataupu faavae o faatinoga ma le mana. Ia faatuatua o loo saunia e le Alii tagata e talia le talalelei toefuataiina. Ia i ai le talitonuga onosai o le a Ia taitai atu oe ia i latou, po o i latou ia te oe. Galue i lou faatuatua e ala i le setiina o sini, faia o fuafuaga, ma le faatinoina o au fuafuaga e saili tagata e aoao atu (tagai i le mataupu 8).
Ata
faifeautalai o loo tatalo
Tatalo ma le faatuatua a o e sailia le fesoasoani a le Atua e saili ai tagata e aoao. Ina ua taitai e Alema se misiona i Sa Sorama, na ia tatalo: “Le Atua e, pe e te alofa mai ea ia te i matou e toe faafoisia mai i latou ia te oe, ia Keriso. Silasila mai ia, le Atua e, ua taua o latou agaga … ; o lea, ia e foai mai ia te i matou, le Atua e, le mana ma le poto, ina ia matou faafoisia mai ia te oe i [latou] nei” (Alema 31:34–35).
O tagata e te feiloai i ai e tele ina latou lē iloaina o loo latou saili mo le talalelei toefuataiina, se’i vagana ua latou mauaina. Mo se faataitaiga, na fai mai se tasi tagata liliu mai, “Ina ua ou faalogo i le talalelei, na faatumuina ai se avanoa i totonu o lo’u loto ou te lē iloa sa i ai.” Na faapea mai se isi, “ua ou faaiuina le sailiga ou te lē iloa sa ou faia.” O isi o loo saili ma le mataalia mo le upumoni ae e lē iloa le mea e maua ai (tagai Mataupu Faavae ma Feagaiga 123:12).
Saili le taitaiga a le Agaga a o e vaavaai mo tagata e aoao. O le sailia e ala i le Agaga, e taua lava e pei o le aoao atu e ala i le Agaga. Ia faatuatua o le a e iloa le auala e maua ai i latou o le a taliaina oe.
Suesuega Faalesoa
Atonu e i ai ni tagata o le ekalesia i la outou eria o e ua liliu mai i le Ekalesia. Fesili atu pe na faapefea ona latou fesootai ma le Ekalesia. O a latou tali e ono avatu ai ia te oe ni malamalamaaga loloto i le auala e saili ai. Fesili atu foi pe na faapefea ona latou iloa sa aoaoina i latou e faifeautalai i le upumoni. Ia otooto o latou aafiaga i lau tusi talaaga o suesuega.
Suesuega o Tusitusiga Paia
E faapefea ona saunia fanau a le Atua ma taitaiina mai i le talalelei toefuataiina?
Faalautele Lau Vaaiga Mamao o le Fuafuaina e Saili
A o e saili e su’e tagata e aoao, ia nofouta i le eseesega i le va o le faatulagaina ma le fuafuaina. O le faatulagaina o taimi o le faatumuina lea o lau fuafuaga ma lou aso. O le fuafuaina o le faia lea o se taumafaiga lototatalo ma le faamoemoe e taulai atu i tagata ma auala sili ona lelei e saili ai.
O le gaoioiga sa’o, i le taimi sa’o ma i le nofoaga sa’o, e mafai ona fesoasoani ia te oe e saili ai tagata e aoao. Ia fesili ifo ia te oe ia fesili nei:
O fea tatou te ono feiloai ai i tagata atonu o loo saunia e le Alii?
O a nofoaga ma ituaiga o gaoioiga e sili ona lelei e saili ai i taimi patino o le aso po o le vaiaso?
E mafai faapefea ona tatou faaali atu le alofa, auauna atu ia i latou, pe aumaia le taua i o latou olaga i le taimi nei?
E mafai faapefea ona tatou faaaogaina malosiaga patino, tomai, ma taleni e siitia ai i latou?
O a ni a tatou fuafuaga faaleoleo pe afai ua lē lelei se mea?
Taumafai ia iloa auala o loo saunia ai e le Alii ia tagata. Pe o latou naunau ea e talanoa ma oe? Pe o latou sailia se fesoasoani po o se faamafanafanaga?
Mafaufau e uiga i taumafaiga o le sailiga na faamanuiaina. O fea le fegalegaleaiga muamua? Pe na aofia i taumafaiga ia tagata o le lotoifale? Pe na faaaogaina tekinolosi?
Amata lau fuafuaga e ala i le taulai atu i auala e mafai ona e faamanuiaina ai tagata, ona mamanuina lea o lau faatulagaga.
Suesuega Faalesoa
Faatasi ai ma lau soa, faaaoga le siata o loo i lalo e iloilo ai au taumafaiga i le sailia o tagata e aoao. Fuafua e faataitai nisi o manatu e fou ia te oe.
Taumafaiga o le Sailiga
O nisi taimi
Fai soo
Toetoe o taimi uma
Matou te faamasani ma tagata o le ekalesia ma lagolagoina i latou i a latou taumafaiga e faasoa atu le talalelei, e aofia ai tagata fou, autalavou, i latou o loo sauniuni e auauna atu i misiona, faifeautalai ua foi mai, aiga e le lolotu uma, ma toeaina faaolioli.
Matou te galulue ia maua le faatuatuaga o tagata ina ia latou toafimalie e valaaulia tagata o o latou aiga ma uo e feiloai ma i matou.
Matou te galulue ma taitai o le uarota i fonotaga faamaopoopo faalevaiaso e lagolago ai a matou taumafaiga e saili ma iloa ai pe i ai ni tagata e mafai ona matou faafesootaia.
Tatou te galulue faatasi ma tagata o i ai nei o loo aoaoina, tagata sa aoaoina muamua, ma tagata na faasino mai ala o faasalalauga ia sailia.
Matou te talanoa i ni tagata se toatele matou te mafaia i aso taitasi.
Matou te saunia faaleagaga ma tatalo mo le fesoasoani a le Atua a o matou fuafua e saili tagata e aoao.
Matou te talitonu o loo saunia e le Alii tagata mo matou e aoao.”
Matou te mafaufau pe faapefea ona fesoasoani ia i latou tatou te feiloai i ai ia lagonaina le uunaiga a le Agaga Paia.
Matou te faatutuina ni sini patino o le sailia faalevaiaso ma faaleaso (tagai i le mataupu 8).
O loo matou sailia pea lava pea tagata e aoao.
Matou te fatufatua’i ma faaaoga ni auala eseese e saili ai tagata. Matou te taumafai i ni auala fou ma aloese mai le mau i se faiga masani.
Matou te fuafua patino lava e saili. Matou te fuafua pe o afea, o fea, ma le auala o le a matou taulai atu ai.
Matou te mafaufau po o a nofoaga ma taimi sili ona lelei o le aso e sailia ai tagata e aoao.
Matou te mafaufau po o a gaoioiga e saili ai na aoga i le taimi ua tuanai.
Matou te fetuunaia a matou fuafuaga o le sailiga pe a manaomia ma faia ni fuafuaga faaleoleo pe a lē sologa lelei mea uma.
Matou te faaaogaina le polokalama Tala’i La’u Talalelei e su’e ai, e seti ai sini ma faia ni fuafuaga, ma iloilo ma faafou a matou faamaumauga i aso taitasi.
Matou te faaaogaina a matou taleni patino ma malosiaga e fesoasoani ai ia sailia.
Matou te fuafuaina po o afea ma le auala o le a matou faaaoga ai ala o faasalalauga faaagafesootai ma isi tekinolosi e saili ai tagata e aoao.
Matou te faaaogaina faalauiloa o ala o faasalalauga ma mea e ofo mai e le lotoifale e fetaui ma mea e fiafia i ai ma manaoga o tagata i la matou eria.
E vave ona matou tali atu i talosaga i le initoneti ma sāvali mai tagata atonu e fia faalogologo.
Matou te vave fuafuaina a matou faasalalauga faaagafesootai ma galulue ma tagata o le ekalesia e saili i luga o le initoneti.
Ia Filiga i le Sailia
Faia o le Sailiga o se Taumafaiga Faifai Pea
I le popofou o le Ekalesia toefuataiina, sa faatonuina soo ai e le Alii se vaega o uso e aoao atu Lana talalelei “i le ala” a o latou faimalaga. Sa manao o Ia ia latou faaaogaina avanoa uma e faasoa atu ai le talalelei. (Tagai Mataupu Faavae ma Feagaiga 52:9–10, 22–23, 25–27.)
Faaaoga le faatonuga lenei i lau sailiga. Fai se taumafaiga maelega e saili i le aso atoa. Fuafua lua taumafaiga e saili ai—ma vaavaai foi mo avanoa e lei fuafuaina. O le sailia o tagata fou e aoao atu o se manaoga faifai pea.
Saili musumusuga ma ia naunau e faaaoga ni auala eseese. Taulai atu i auala e sili ona aoga i la outou eria.
Ata
O Keriso o Loo Valaauina Peteru ma Aneterea, saunia e James T. Harwood
Teu Laina i totonu o le Vai
E faatatau i le galuega a faifeautalai, na saunoa ai Peresitene Dallin H. Oaks:
“E leai se tasi o i tatou e tatau ona pei o le faifaiva e manatu sa ia fagota i le aso atoa ae o le mea moni sa ia faaaluina le tele o lona taimi e alu atu ai ma toe sau mai le vai, ’ai i le aoauli, ma pisi i ana meafaigaluega. O le manuia o le fagota e fesootai i le umi e te tuu ai lau laina i le vai, ae le o le umi e te alu ese ai mai le fale mautotogi. O nisi faifaiva e o ese mai le fale mo le sefululua itula ma e i ai a latou laina i le vai mo le sefulu itula. O isi faifaiva e o ese mai le fale mo le sefululua itula ma e na o le lua itula e i ai a latou laina i le vai. O lenei ituaiga mulimuli atonu e taumanatunatu pe aisea latou te le maua ai le manuia e tasi e pei o isi.
“O le mataupu faavae foi lea e faatatau i faifeautalai, lea na valaauina e le Matai o ‘faifaiva i tagata’ [Mataio 4:19]. O le laina [afa fagota] a le faifeautalai e tatau ona tuu i le vai i le taimi lava e tuua ai le fale” (seminar for new mission presidents, June 20, 2000).
Ata
Laina fagota e tele
Sa faalauteleina e Elder Quentin L. Cook le uiga o lenei faatusatusaga. E le gata i le tuu pea o lau “laina i le vai” mo ni vaitaimi uumi, sa ia aoao atu foi faapea o faifeautalai o e mauaina tagata e aoao atu “ e masani lava ona tuu le tele o laina i le vai. …
“Latou te faailoa mai ma faafesootai aiga e le lolotu uma.
“Latou te sailia la latou [polokalama o le Tala’i La’u Talalelei] mo tagata o e na aoaoina i le taimi ua tuanai e faafesootai e ala i telefoni ma tesi.
“Latou te ofoina atu le auaunaga i tagata o le ekalesia, o tagata o e na aoaoina i le taimi ua tuanai, o tagata o loo latou aoaoina, ma le alalafaga e lautele. …
“Latou te fesoasoani i tagata o le ekalesia e fatufatu ni sāvali o le talalelei e faasoa atu ia latou lava … polokalama o ala o faasalalauga faaagafesootai.
“Latou te maua mai igoa na faasino mai mai tagata latou te asia ma aoaoina” (“Be Spiritual Pathfinders and Influencers,” missionary devotional, Sept. 10, 2020; faaopoopo le faamamafa).
Suesuega Faalesoa
Talanoaina fesili nei:
O a nisi o auala e mafai ona e faaumiumi ai lau “laina i le vai” i le aluga o le aso?
O a nisi o auala e mafai ona e tuua ai ni laina se tele i le vai a o e sailia tagata e aoao?
O a ni vaaiga i le polokalama o le Tala’i La’u Talalelei e mafai ona fesoasoani ia te oe?
E mafai faapefea ona e faaaogaina le tekinolosi e fesoasoani ai ia te oe e tuua ni laina se tele i totonu o le vai?
Talatalanoa ma Tagata Uma
Atiina a’e se manao loloto e aumai agaga ia Keriso (tagai Mosaea 28:3). Pe a e lagonaina lenei manao, o le a atagia mai lou alofa ma lou popolega i au taumafaiga e saili. O le a atagia mai foi lou alofa i au talanoaga.
Ia talanoa i ni tagata se toatele e te mafaia i aso taitasi. Talanoa ma i latou i soo se mea e te alu i ai. Pe a talafeagai ai, alu atu mai lea fale i lea fale. Sa faatonuina e le Alii nisi o toeaina anamua o le Ekalesia, “Tatala atu o lou fofoga e talai atu la’u talalelei.” Ona Ia folafola atu lea o o latou gutu o le a “faatumuina” i mea e aoao atu (Mataupu Faavae ma Feagaiga 30:5; tagai foi i le 33:7–10).
E faapena foi, na ta’u atu e Iosefa Samita ma Sini Rikitone, “Sii a’e o oulua leo i lenei nuu; tautala atu mafaufauga o le a Ou tuu i o outou loto.” Ona Ia folafola atu lea, “O le a tuu atu ia te oulua … i le minute tonu lava, mea e te lua fai atu ai” (Mataupu Faavae ma Feagaiga 100:5–6).
A o oulua feiloai atu i tagata, o le tele o taimi o le a oulua lagonaina ai le Fesoasoani o le Agaga ia te oulua ia iloa le tala e fai atu. Ae peitai, afai lua te lē lagonaina se uunaiga, tau lava o le amata i se mea—atonu e ala i le fai atu o se fesili ma faalogo i la latou tali (tagai “Saili i Mea o i ai Tagata” i le mataupu lenei). Pe atonu foi ia talanoa e uiga i le Alii o Iesu Keriso po o le valaauga o Iosefa Samita e avea o se perofeta a le Atua.
O manatu nei e mafai ona fesoasoani a o e talanoa atu ia i latou e te feiloai i ai:
Ia mata fiafia, faamaoni, ma faauō. Vaavaai mo ni auala e fesootai ai ma le tagata ma amata ai se talanoaga.
Faalogo ma le totoa i tala a tagata o loo fai atu. Saili ia malamalama i manaoga ma mea e fiafia i ai tagata taitoatasi. Ofo atu le fesoasoani patino pe a talafeagai ai.
Mafaufau pe mafai faapefea ona fesoasoani le talalelei e faafetaia’ia o latou manaoga. Ona aoao atu lea o se upumoni faavae o le talalelei ma valaaulia i latou e aoao atili. Faasoa atu pe mafai faapefea e le talalelei toefuataiina ona aumaia le faamoemoe sili atu ma le uiga i o latou olaga.
Fesili atu e uiga i o latou aiga. Fesoasoani ia latou iloa le auala e mafai ai ona avea le talalelei toefuataiina ma se faamanuiaga i o latou aiga. Ofo atu e fesoasoani ia i latou e su’e igoa o o latou tuaa ua maliliu.
Valaaulia i latou e o mai i le sauniga faamanatuga.
Ofo atu tamaitusi po o isi anomea a le Ekalesia, e lolomiina ma faaeletonika.
Faasoa atu ia i latou lou faamoemoega o se faifeautalai ma pe aisea na e filifili ai e auauna atu i se misiona.
E faatatau foi nei mataupu faavae i au fegalegaleaiga ma tagata o le ekalesia.
O se mea masani le popole i le talanoa atu i tagata. Tatalo mo le faatuatua ma le lototele e aoao atu ai le talalelei toefuataiina. O tagata uma tou te feiloai i ai o lou uso po o lou tuafafine i le aiga o le Atua. Ia manatua “e le teena e ia se tasi e sau ia te ia, e uliuli pe paepae, e pologa pe saoloto, o tane ma fafine; … ua tutusa tagata uma i le Atua” (2 Nifae 26:33
Suesuega a le Tagata Lava Ia pe Faalesoa
Faitau le tala mai ia Victor Manuel Cabrera i le “Thirsting for the Living Water,” Ensign, Aug. 2001, 60–61. A o e faitauina, ia vaavaai i le ala na saunia ai o ia e talia faifeautalai ma le ala na faaaoga ai e faifeautalai se avanoa e lei fuafuaina e aoao atu ia te ia le talalelei.
Na faapefea ona saunia le tamaloa mo le talalelei toefuataiina?
Mata o le a se mea semanu e tupu pe ana le faasoa atu e faifeautalai se sāvali o le talalelei?
Toe iloilo mea na lua faia ananafi. Na mafai ona oulua talanoa i ni tagata se toatele? Afai e leai, faatutu ni sini ma fai ni fuafuaga e talanoa i ni tagata e sili atu i le aso nei.
Suesuega o Tusitusiga Paia
O le a se mea e mafai ona e aoao mai i mau nei e uiga i le sailia o tagata e aoao? O le a se mea e mafai ona e aoao mai i nei mau e uiga i mea e tatau ona e aoao atu? O a mea ua folafola mai e le Alii?
“O le valaauliaina o tagata uma ia talia le talalelei o se vaega o le galuega o le faaolataga ma le faaeaga” (Tusitaulima Aoao, 23.0). Galulue faatasi ma tagata o le Ekalesia e sailia tagata e aoao. A faasino atu e tagata se tasi ia te oe ona auai lea i lesona, o le a sili atu ona foliga mai e papatisoina tagata ma tumau le toaaga i le Lotu.
Fausia ni Sootaga Malolosi ma Taitai i le Lotoifale
Fausia ni sootaga malolosi ma le au epikopo ma isi taitai o le uarota. O le taitai misiona a le uarota (pe afai ua valaauina se tasi) ma au peresitene o le korama a toeaina ma le Aualofa o au vaega autu ia o fesootaiga. Saili la latou taitaiga, ma lagolago i latou i fonotaga faamaopoopo faalevaiaso (tagai i le mataupu 13).
I le taimi o fonotaga faamaopoopo faalevaiaso, galulue faatasi ma le fesoasoani o le korama a ositaulaga ma le peresitene o le vasega a Tamaitai Talavou mo le vasega aupito matutua. Ua i ai i nei talavou se matafaioi taua i le faasoaina atu o le talalelei. Fesoasoani ia i latou e uunaia tagata o le korama ma le vasega e faasoa atu le talalelei. O se tasi o auala e mo le autalavou e valaaulia ai uo i gaoioiga.
Ia fesili soo ia te oe lava ia, “Pe o a’u ea o se faamanuiaga i taitai i le lotoifale?” Atiina a’e se uiga faaalia o le “E mafai faapefea ona ou fesoasoani?” E pei o Amona i le Tusi a Mamona, alu atu i taitai i le lotoifale ma se uiga faaalia o le auauna atu (tagai Alema 17:23–25).
I taitai misiona, na aoao atu Peresitene Russell M. Nelson: “Ou te faamoemoe o le a outou aoao e alolofa i taitai ma tagata o le ekalesia i le lotoifale. Siitia i latou ma musuia i latou. O lou tomai e faafesootaia le naunautai o faifeautalai faatasi ma le faato’ato’a alofa ma taumafaiga fesoasoani a tagata o le Ekalesia e le mafai ona sili atu le faamamafaina. O lou manuia o le a faateleina le toatele” (“Faamoemoega o Lo’u Loto,” semina mo taitai fou o le misiona, 23 Iuni, 2019).
Ata
faifeautalai o loo aoaoina tamaitai
Lagolago Tagata o le Ekalesia i a Latou Taumafaiga e Faasoa Atu le Talalelei
E tele auala e lagolago ma faamalosiauina ai tagata o le ekalesia i le faasoaina atu o le talalelei. Fesoasoani ia i latou e mafaufau pe na faapefea ona faamanuiaina o latou olaga e le talalelei. Uunaia i latou ia “tuu i luga lo [latou malamalama ina ia susulu atu i le lalolagi” (3 Nifae 18:24).
Fesoasoani i tagata e faaaoga mataupu faavae o le alofa, faasoa, ma le valaaulia. Tuu atu ni faataitaiga o auala masani ma faalenatura e mafai ona latou faaaogaina ai nei mataupu faavae.
Alofa. O se tasi o auala e faaali atu ai le alofa mo le Atua o le alofa ma auauna atu i Ana fanau. Uunaia tagata o le ekalesia e aapa atu ma le alofa i tagata o aiga, uo, tuaoi, ma isi. Soo se taumafaiga lava e faailoa atu le alofa o se auala taua lea e tausia ai feagaiga na latou osia ma le Atua (tagai Mosaea 18:9–10).
Faasoa atu. Ona o lo latou alolofa mo le Atua ma Ana fanau, e masani lava ona mananao tagata o le ekalesia e faasoa atu faamanuiaga ua Ia tuuina atu ia i latou (tagai Ioane 13:34–35). Uunaia tagata o le ekalesia e ta’u atu i isi e uiga i le auala e faamanuiaina ai o latou olaga e le talalelei. Fautuaina i latou e talanoa e uiga i le Faaola ma Lana uunaiga. Fesoasoani ia latou lagonaina le olioli i le faasoaina atu o lo latou alofa, taimi, ma mea e tutupu i le olaga. Fesoasoani ia i latou e aoao pe faapefea ona faasoa atu i auala masani ma faalenatura—ua na o se vaega o mea ua latou faia i o latou olaga.
Ata
Elder Gary E. Stevenson
“Tatou te fefaasoaai uma mea i isi. Tatou te faia soo. Tatou te faasoa atu po o a ata tifaga ma meaai tatou te fiafia i ai, o mea malie tatou te vaai i ai, nofoaga tatou te asiasi i ai, ata tatou te talisapaia, upusii ua musuia ai i tatou.
“E mafai faapefea ona tatou faaopoopo atu i le lisi o mea ua uma ona tatou faasoa atu mea tatou te fiafia i ai e uiga i le talalelei a Iesu Keriso? … E ala i le faasoa atu o o tatou aafiaga lelei i le talalelei i isi, tatou te auai i le faataunuuina o le poloaiga sili a le Faaola” (Gary E. Stevenson, “Alofa, Faasoa Atu, Valaaulia,” Liahona, Me 2022, 86).
Valaaulia. Ua valaaulia e le Faaola tagata uma ia talia Lana talalelei ma sauniuni mo le ola e faavavau (tagai i le Alema 5:33-34). E pei o le faasoa atu, o le valaaulia e masani lava o se mataupu o le na o le faaaofia ai o aiga, uo, ma tuaoi i mea ua uma ona faia e tagata o le ekalesia. Uunaia tagata o le ekalesia e tatalo e uiga i le valaauliaina o tagata i auala nei:
Sau ma vaai. Valaaulia tagata e “o mai ma vaai” i faamanuiaga e mafai ona latou maua e ala ia Iesu Keriso, Lana talalelei, ma Lana Ekalesia.
O mai ma auauna atu. Valaaulia tagata e “o mai ma auauna atu” i isi e lē tagolima.
O mai ma avea ma ni ō. Valaaulia tagata e “o mai ma auai” o ni tagata o le Ekalesia toefuataiina a Iesu Keriso.
Na saunoa Elder Gary E. Stevenson: “E faitau selau valaaulia e mafai ona tatou tuuina atu i isi. E mafai ona tatou valaaulia isi e “o mai ma vaai” i se sauniga faamanatuga, se gaoioiga a le uarota, se vitiō i luga o le initoneti e faamatala ai le talalelei a Iesu Keriso. O le “O mai ma vaai” e mafai ona avea o se valaaulia e faitau le Tusi a Mamona pe asiasi i se malumalu fou i le taimi o maimoaga a o lei faapaiaina. O nisi taimi o le valaaulia o se mea tatou te tuuina atu i totonu—o se valaaulia ia i tatou lava, e tuuina mai ai ia i tatou le mataalia ma le vaaiga mamao o avanoa o loo siomia ai i tatou, e faatino ai.” (“Alofa, Faasoa Atu, Valaaulia,” 86).
Ia mautinoa e fesoasoani i le autalavou ia alolofa, faasoa atu, ma valaaulia. E faapitoa le talenia o le autalavou i le alofa atu ia latou uo, faasoa atu mea o loo i o latou loto, ma valaaulia i latou i gaoioiga.
Fesoasoani i tagata ia malamalama o soo se taumafaiga lava e ola i mataupu faavae o le alofa, faasoa atu, ma valaaulia e lelei, pe feiloai pe leai se tagata ma faifeautalai pe auai foi i le Ekalesia.
Fesoasoani i tagata e utuvai mai o latou malosiaga i le faasoaina atu o le talalelei. O nisi e maoae i le sailia o tagata e aoao, ae o nisi o ni faiaoga maoae. O nisi e i ai se tomai masani e fesootai ai ma uo, ae o isi e fiafia e tatalo mo a latou uo. Fesoasoani ia latou iloa o loo i ai auala mo tagata uma e auai ai.
Pe a e asiasi atu i tagata o le ekalesia, ia faia ma se faamoemoega. Faaali atu o loo e auai ma le naunautai i le galuega o le sailia ma le aoao atu. Faaaloalo i o latou taimi ma taimi faatulagaina.
Atonu e talia e nisi o tagata o le ekalesia le tuu atu ia te oe e aoao atu se sāvali mai se tasi o lesona. O upumoni o le talalelei e suia ai le olaga atoa. O le faamalosia o le malamalama o tagata o le ekalesia i le talalelei o le a faateleina ai lo latou faatuatuaina o oe ma fausia ai lo latou fiafia e faasoa atu. Fesoasoani ia i latou e iloa le Agaga ma faatino uunaiga.
Saili e su’e tagata e aoao atu e ala i aiga e lē lolotu uma, toeaina faaolioli, tagata ua toe foi mai, ma tagata fou o le ekalesia. Atonu o le a toatele tagata o o latou aiga ma uo o isi faatuatuaga.
I mea uma e te faia i tagata o le ekalesia, mulimuli i le Agaga ma saili e fausia lo latou faatuatua i le Faaola, o Iesu Keriso.
Mo nisi manatu ma punaoa i auala e mafai ona e lagolagoina ai tagata o le ekalesia i le faasoaina atu o le talalelei, tagai:
Iloilo lau fonotaga faamaopoopo faalevaiaso mulimuli. Na mafai faapefea ona e faia ia sili atu ona aoga? Iloilo talosaga mai taitai o le uarota ma fuafua pe faapefea ma o afea e tali atu ai.
Fuafua pe faapefea ona e faamaopoopoina au taumafaiga faafaifeautalai i le isi fonotaga faamaopoopo.
Aoao igoa o taitai o le uarota (alii ma tamaitai). Fuafua po o le a se mea o le a e faia i le aluga o le masina e sosoo ai e atiina a’e ai ni sootaga malolosi atu ma i latou ma lagolagoina i latou i a latou taumafaiga faafaifeautalai.
Saili e ala i le Polokalama o le Tala’i La’u Talalelei
O le polokalama Tala’i La’u Talalelei o se punaoa sili lea mo le sailia o tagata e aoao. O faifeautalai o e faaaogaina pea lava pea ia vaaiga i lenei polokalama e sili atu ona faamanuiaina le sailiga. Ina ia faamasani i nei vaega, tagai i le aoaoga ua tuuina atu i totonu o le polokalama. Ia nofouta i uunaiga faaleagaga e mafai ona e maua a o e iloiloina igoa o tagata.
O le polokalama o loo aofia ai faamatalaga e uiga i tagata o e sa faasino mai muamua, faafesootai, pe aoaoina. O nisi o nei tagata atonu e mananao e toe feiloai ma faifeautalai. Atonu foi latou te iloa isi tagata atonu e fiafia e aoao e uiga i le talalelei.
I lau fuafuaga, faaaoga le faafanua ma faamama i le polokalama e faamuamua ai po o ai tagata e asiasi i ai. Vaai i a latou faamatalaga ma aoao pe na faapefea ona maua. Vaai pe o i ai se faamaumauga e uiga i tagata na fesoasoani ia i latou. Faaaoga le faamatalaga lenei e fuafua ai pe faapefea ona sili atu ona lelei le toe aapa atu ia i latou.
Ata
faifeautalai o loo suesue i telefoni
Faaaoga le faailoga faamama i le polokalama e faailoa ai i latou uma o e:
Sa i ai se aso na faatulagaina muamua o le papatisoga ae sa le’i papatisoina.
Sa auai i le sauniga faamanatuga e lē itiiti ifo ma le faatasi ae sa le’i papatisoina.
Na maua le silia ma le tolu lesona.
E le’i faafesoota’ia talu ai nei.
Afai e lē fiafia tagata e te faafesootaia i le aoaoina pe filifili e taofi le asiasi atu, faamaumau lena faamatalaga i le polokalama. Tusifaamaumau pe faapefea ona e fesootai pea ma i latou ma faafailele seia oo ina latou saunia e aoao atili. Mo se faataitaiga, mafaufau e valaaulia i latou e saini e alu i totonu mo se faasologa o imeli e maua ai sāvali e uiga ia Iesu Keriso po o isi autu o le talalelei. E mafai foi ona e faafesoota’ia i latou ma se tagata o le ekalesia e mafai ona taliina fesili ma faafailele lo latou fiafia ma faauoga. Seti se faamanatu i le polokalama e tulitatao ai. Fesili atu pe latou te iloa se isi tagata atonu e fiafia mai.
E mafai foi ona e maua tagata e aoao atu e ala i le polokalama o le Tala’i La’u Talalelei e ala i le faaaogaina o faamama po o vaega e auina atu ai sāvali faalevaega. E mafai ona avea lenei mea o se auala sili e faailoa atu ai i tagata mea e tutupu e pei o gaoioiga a le uarota ma sauniga o papatisoga. Tulitatao i valaaulia patino i nei mea na tutupu.
Suesuega Faalesoa
Ina ia vaai po o le a se punaoa maoae e mafai ona i ai le polokalama o le Tala’i La’u Talalelei i le sailia, faataitai gaoioiga nei. A o e faia, ia gauai atu i uunaiga faaleagaga e te mauaina.
I le faaaogaina o se faamama, faailoa tagata uma o e na aoaoina i lesona e tolu pe sili atu. Valaaulia taitoatasi i latou e auai i le lotu i le Aso Sa nei.
Fatu se faamama ma su’e i latou uma sa i ai se aso o le papatisoga ua faatulagaina ma auai pe faalua i le lotu.
Fuafua e auina atu se sāvali i tagata taitoatasi ina ia auai i se gaoioiga a le uarota po o se galuega fesoasoani. Mai lea taimi i lea taimi atonu e te manao e auina atu se sāvali faalevaega ma tulitatao atu i tagata taitoatasi.
Talanoa ma lau soa i latou na e lagonaina ai le faagaeetiaina. Fai ni fuafuaga e asiasi pe faafesootai vave i latou.
Saili e ala i Auaunaga
Saunia Avanoa mo Tagata e O Mai ma Auauna Atu
E mafai e tagata ona maua ni aafiaga lelei ma fesootai ma faifeautalai ma tagata o le ekalesia i le lotoifale i gaoioiga auauna atu. E toatele tagata e fiafia e faasoa mai a latou taleni, tomai, po o auaunaga ma na o le manaomia lava ona valaaulia.
Valaaulia tagata e auai i gaoioiga auauna atu ua faatulagaina e le uarota. E mafai foi ona e faafesootaia tagata e i ai avanoa e auauna atu ai i le JustServe.org o loo maua ai. A o outou auauna atu faatasi ma isi, tou te o mai faatasi i se ala mamana.
Ofo Atu le Auaunaga
E pei o le Faaola, “sa [femaliuai] ma agalelei” (Galuega10:38; tagai foi “Femaliuai ma Agalelei” i le mataupu 1). Tatalo ina ia nofouta i avanoa e faia ai mea lelei i aso taitasi. O nisi taimi o le a fuafuaina ai lau auaunaga, ae o le tele lava o taimi o le a le fuafuaina. Saili ni auala faigofie ma vave e auauna atu ai, fesoasoani, ma siitia ai tagata. Manatua sa faaaoga e le Alii ni avanoa e lei faamoemoeina e aapa atu ai ma faamanuia ai isi.
Auauna atu ma se manao faamaoni e fesoasoani i tagata. Afai e taitai atu le auaunaga i se avanoa faafaiaoga, ia lotofaafetai. Afai e leai, ona faafetai lea i le faia o mea lelei mo se tasi. Tali fesili pe a fesili atu tagata ia i latou. Afai e faaalia e se tasi le fiafia, tali puupuu atu ma faatulaga e feiloai i se taimi ese e faasoa atu ai se sāvali.
Ia mautinoa e mulimuli i taiala mo le auaunaga i Tulaga Faatonuina Faafaifeautalai mo Soo o Iesu Keriso, 2.7 ma le 7.2.
Saili Tagata i Mea O Loo Latou i Ai
Sailia o tagata i mea o loo latou i ai e amata i le taumafai e vaai atu ia i latou e pei ona faia e le Atua. Manatu atonu na taitaiina oe e talanoa i lenei tagata, pe atonu foi na taitaiina atu o ia ia te oe. Saili ia malamalama i manaoga ma naunautaiga faaleagaga o tagata. Saili po o le a le mea e sili ona taua ia i latou, aemaise lava i a latou sootaga ma aiga ma le Atua. E mafai ona e fai atu fesili e pei o fesili nei—ona faalogo lea ma le faamaoni:
O le a se mea e sili ona e faatauaina?
O le a se mea e aumaia ia oe le olioli?
O le a se mea e te manao ai mo lou lava lumanai ma mo i latou e te alofa i ai?
O a ni luitau o feagai ma oe i le ausiaina o ou faamoemoega ma miti?
O a vaega o lou olaga e te manao e faaleleia?
Saili musumusuga a o e tomanatu i mea ua e aoaoina e uiga i faamoemoega ma manaoga o le tagata. O a upumoni o le talalelei e masani ona fesootai ma mea e manao i ai o ia?
Mafaufau i lau auala mai le vaaiga a lena tagata. O le a se mea e silafia e ia e uiga ia te oe? O le a se mea e mafai ona e ofoina atu atonu e aoga? Pe o lagona e le tagata o se fegalegaleaiga ma oe o le a aoga?
Mafaufau i mafuaaga eseese atonu e mananao ai tagata e faamasani ia te oe, isi tagata o le ekalesia, po o le Ekalesia. O nisi o faataitaiga o mea e mafai ona e tuuina atu o loo otooto atu i lalo.
Ata
faifeautalai o loo talanoa atu i se tamaitai
Tuuina Atu Aafiaga po o Faamatalaga o le a Latou Faatauaina
Faaaoga punaoa a le Ekalesia ma au lava taleni ma malosiaga e fesootai ai ma mea e fiafia i ai se tasi. Saili le fesoasoani a le Tama Faalelagi i le ofoina atu o faamatalaga po o aafiaga o le a faatauaina e le tagata.
Ia faalogo i musumusuga ma ia fatufatua’i a o e mafaufau e uiga i ituaiga o aafiaga po o faamatalaga eseese e mafai ona e tuuina atu. O nisi o manatu o loo lisiina atu i lalo.
Faasoa atu se sootaga i se punaoa a le Ekalesia e maua ai faamatalaga e uiga i se mea o le a latou fiafia i ai.
Talimalo i se gaoioiga e pei o se faigalotu (i le tagata po o le maimoaina tuusao).
Ofo atu se mea i se faatasiga po o se gaoioiga i le lotoifale (mo se faataitaiga, fatu ni gafa saoloto o talafaasolopito o aiga i se maketi i le lotoifale).
Ofo atu e aoao se vasega.
Faatulaga se vasega e suesue ai tusitusiga paia, pe ofo atu e faitau le Tusi Paia ma isi mau faatasi ma i latou.
Aoao atu le Igilisi o se gagana lona lua.
Faalauiloa gaoioiga a le Ekalesia i le lotoifale e pei o se pati o aso malolo po o vasega o le ola tutoatasi. Faaaoga pepa o ata po o ala o faasalalauga faaagafesootai.
Valaaulia i latou i se sauniga o le papatisoga.
Ofo atu e tuuina atu ia i latou se maimoaga i le falelotu i le lotoifale.
O se tasi o aafiaga sili ona taua e mafai ona e fesoasoani ai i tagata ia maua o le auai lea i se sauniga a le Ekalesia. Valaaulia i latou ma faamatala i ai pe o le a faapei. Tau atu ia i latou pe faapefea e le auai i se sauniga faamanatuga ona faamanuiaina ai o latou olaga.
Faagaoioia Sootaga Faamaoni
E toatele tagata e mananao e feiloai atu i isi i o latou nuu pe faamasani atili ia i latou. O nisi tagata e lagona le tuuatoatasi. O nisi manatu mo le fesoasoani e faafaigofie ai sootaga faamaoni o loo lisiina atu i lalo.
Asiasi i tagata e le’i leva ona siitia atu i le eria e faafeiloai i latou.
Faailoa atu tagata i le alalafaga i tagata o le ekalesia o e na fefaasoaai mea e fiafia i ai.
Ia valaaulia tagata i sauniga a le uarota, gaoioiga, ma fale tatala.
Ofo atu e fesoasoani ia i latou e fesootai ma le taitai o le malumalu ma talafaasolopito o aiga a le uarota, o le e mafai ona fesoasoani ia i latou e aoao atili e uiga i tagata o o latou aiga ua maliliu.
Ofo atu e aoao tagata i le auala e fai ai afiafi faaleaiga pe faitau tusitusiga paia o se aiga. (Tagai i le Tusitaulima Aoao, 2.2.4, mo mataupu faavae aoga e mafai ona fetuunai i tulaga o tagata.)
Valaaulia tagata o vaitausaga talafeagai e auai i le seminare, auai i le inisitituti, pe auai i le BYU–Pathway Worldwide.
O loo tele ia auala lelei e sailia ai i latou ua saunia mo le talalelei toefuataiina. E tatau ona e faia mea uma e te mafaia ina ia tuuina atu ai [oe] i le ala o i latou ua saunia.
Suesuega Faalesoa
Faailoa mai ni manatu i lenei vaega e te le’i faataitaia. Fai ni fuafuaga e faataitai ai nisi o manatu i le aluga o le vaiaso e sosoo ai.
Faafesootai Tagata na Faasino atu ia te Oe
O tagata e faasino atu ia te oe atonu ua saunia e talia le talalelei a Iesu Keriso. O igoa na faailoa mai e mafai ona aumai mai tagata o le Ekalesia, isi faifeautalai, laumua o le Ekalesia, ma taumafaiga o faasalalauga faaagafesootai i le lotoifale.
Aapa Vave Atu
Pe a faasino atu se tagata ia te oe e ala i le laumua po o ala o faasalalauga faaagafesootai i le lotoifale, toe iloilo le faamatalaga o i le polokalama o le Tala’i La’u Talalelei e uiga i mea latou te fiafia i ai. Taumafai e faafesootai i latou i le vave e mafai ai.
Ata
faifeautalai o loo tuitui i le faitotoa
Faaaoga taiala nei pe a galulue ma tagata e faasino atu ia te oe:
Afai na faasino atu le tagata e se tagata o le ekalesia po o isi faifeautalai, faafesootai le tagata na auina atu le tagata na faasino mai e aoao atili ai. Afai na faasino e faifeautalai le tagata, e mafai ona latou aoaoina faatasi ma oe pe afai e faamaonia e lo latou taitai misiona. E mafai e tagata o le ekalesia ona auai patino pe faatekinolosi foi e auai i le aoaoga.
Taumafai vave e faafesootai le tagata e ala i se asiasiga, valaau, tesi, imeli, po o isi ituaiga o fesootaiga. Afai e lē tali mai le tagata, taumafai e faafesootai o ia i se taimi ese o le aso.
Afai o lau fesootaiga muamua o le valaau, tesi, po o le imeli, faatulaga se taimi e feiloai patino ai pe ala i tekinolosi.
I le avea ai ma se soa, iloilo le talosaga a le tagata ma faailoa mai ona manaoga ma mea e fiafia i ai. Fuafua pe mafai faapefea ona fesoasoani le talalelei e faafetaiaia na manaoga.
A outou feiloai, aumai soo se aitema na talosagaina, e pei o le Tusi a Mamona. Faasoa atu upumoni o le talalelei mai lesona a faifeautalai e fetaui ma mea e fiafia i ai po o manaoga o le tagata.
O nisi taimi o tagata o e faasino mai e mafai ona taitai atu oe i isi o loo saunia e le Atua. Afai e lē fiafia i ai tagata e te faafesootaia, fesili i ai pe latou te iloa isi atonu e fiafia mai pe manaomia foi le faamoemoe i o latou olaga. Atonu ua taitaiina atu oe i lenei tagata ona o se tasi i totonu o lona aiga po o le tuaoi ua saunia mo le talalelei.
Afai e le oo se taimi faatulagaina ma se tasi, mafaufau pe mafai faapefea ona e faia isi galuega faafaifeautalai i le eria. O le polokalama o le Tala’i La’u Talalelei e mafai ona fesoasoani ia te oe e saili ai tagata na latalata ane o e sa faafesootaia muamua pe na aoaoina.
Faasino Atu Tagata i Faifeautalai i se Isi Eria
Pe a e feiloai i tagata e fiafia e aoao atili e uiga i le talalelei ae nonofo i fafo atu o lau eria ua tofia i ai, faailoa atu i latou i le talalelei. Ona fesoasoani lea ia i latou e saunia e feiloai i faifeautalai ma tagata o le ekalesia i le mea o latou nonofo ai.
Faatasi ai ma le faamaoniga a lau peresitene o le misiona, e mafai ona faaauau pea ona e lagolagoina nei tagata e fesoasoani ia i latou ia maua le talalelei (tagai Tulaga Faatonuina Faafaifeautalai, 7.5.4).
Suesuega Faalesoa
Iloilo tagata uma o e na faasino mai i la outou eria i totonu o le masina ua tuanai. Faailoa mai soo se tagata ua le mafai ona e faafesootaia, ma taumafai e toe faafesootai i latou. Ia filifili po o ai o i latou ua uma ona faafesootai e tatau ona toe asiasi atu i ai. Faafou faamaumauga nei i le polokalama o le Tala’i La’u Talalelei.
Ata
faifeautalai o loo talanoa i le telefoni
Faaaoga Tekinolosi
E tele auala e mafai ona e faaaogaina ai tekinolosi e saili ai tagata e aoao. O loo lisi atu i lalo nisi faataitaiga:
Faaaoga ala o faasalalauga faaagafesootai e galulue ai ma tagata o le ekalesia e saili ai tagata.
Fausia sootaga e ala i le aapa atu e ala i imeli ma ala o faasalalauga faaagafesootai.
Faasoa atu mau faagaeetia, upusii, ma sāvali o le talalelei.
Fesoasoani i tagata e faaaoga le FamilySearch.org e aoao atili e uiga i tagata o o latou aiga ua maliliu.
Ofo atu vasega i luga o le initoneti e aoao atu ai tomai.
Fai ni fesootaiga talafeagai e ala i vaega e fiafia i ai i luga o le initoneti.
Fatu se faalauiloa e faamatala ai mea e tutupu a le uarota o loo loma.
O le faaaogaina o tekinolosi o se auala taua lea e tuu ai “laina e tele i le vai” i le aso atoa. E faaopoopo atu i isi au taumafaiga o sailiga, ia tuu ni laina se tele o le initoneti i totonu o le vai.
Ata
Elder David A. Bednar
Na aoao mai Elder David A. Bednar: “Ua saunia e tekinolosi le anoanoai o auala mamana e mafai ai ona tatou talai atu ’Iesu Keriso, ma o ia sa faasatauroina’ ma ’talai atu le salamo i tagata’ [1 Korinito 2:2; Mataupu Faavae ma Feagaiga 44:3]. Ua matuā saunia lelei lava le tupulaga faia’e e faalogo ma aoao e uiga i le talalelei toefuataiina e ala i nei auala o fesootaiga” (“E Tatau Ona Latou Folafola Atu Nei Mea i le Lalolagi,” semina mo peresitene fou o misiona, 24 Iuni, 2016).
Suesuega Faalesoa
Saili po o le a le mea o loo faia e lau misiona i ala o faasalalauga faaagafesootai. Talanoaina ma lau soa pe mafai faapefea ona e fatuina ni faamatalaga o ala o faasalalauga faaleagafesootai e ogatusa ma lenei mea. O au tusiga e tatau ona ogatusa ma aiaiga faavae o le initoneti a le Ekalesia (tagai i le“Initoneti” i le vaega 38.8 o le Tusitaulima Aoao).
Afai o lau misiona e i ai se tagata tomai faapitoa o ala o faasalalauga faaagafesootai, faaaoga lona tomai a o e fatuina ni faasalalauga faaagafesootai.
Ata
tamaitai e toalua o loo talanoa
Faaaoga Talafaasolopito o Aiga
O talafaasolopito o aiga o le isi auala e mafai ona e maua ai ni tagata e aoao. I le lalolagi atoa, o loo uunaia e le Agaga le faitau miliona o tagata e faailoa mai o latou tuaa ua maliliu. E toatele ua mananao i se sootaga malosi atu i o latou aiga lautele. E mafai ona oo atu lenei mea i se naunau e saili se sootaga ma le faasinomaga o se vaega o le aiga o le Atua.
O le mea tatou te ta’ua i nisi taimi o le agaga o Elia o le faatosinaga a le Agaga Paia e tosina mai ai tagata ia iloa, pepa o faamatalaga, ma faapelepele i tagata o o latou aiga—i aso ua mavae ma le taimi nei (tagai Malaki 4:5–6).
I lau sailiga, e mafai ona e faailoa atu i tagata le FamilySearch.org pe valaaulia i latou e sii mai le polokalama o le Gafa o le FamilySearch po o le polokalama o Manatuaga o le FamilySearch. E mafai foi ona e tuuina atu ia i latou se kopi o le tamaitusi O Lo’u Aiga: O Tala e Aumaia Faatasi ai i Matou. O nei punaoa e fesoasoani i tagata ia iloa aiga ma tuaa ma ao mai a latou tala.
Fuafua po o a punaoa o talafaasolopito o aiga o loo maua i la outou eria ma pe mafai faapefea ona latou fesoasoani i tagata e te faafesootaia. E mafai e le taitai o malumalu ma talafaasolopito o aiga a le uarota ona fesoasoani i tagata ia faailoa o latou tuaa ua maliliu.
Valaaulia tagata e faasoa mai manatuaga o e pele ia i latou ia te oe. A o latou faia, atonu latou te lagonaina le Agaga Paia o molimau atu ia i latou e uiga i le taua o aiga i le fuafuaga a le Atua. O nei taimi e mafai ona taitai atu ai i talanoaga masani e uiga i le faamoemoega o le olaga, fuafuaga o le fiafia a le Atua, ma le matafaioi a le Faaola i lena fuafuaga.
Pe a talafeagai ai, aoao atu i tagata le aoaoga faavae e uiga i le mafuaaga e faia ai e tagata o le Ekalesia ia galuega o talafaasolopito o aiga ma pe faapefea ona fesootai i malumalu.
Tatalo ina ia mataala i ni avanoa e faaaoga ai talafaasolopito o le aiga i au taumafaiga o sailiga. Ia fatufatuai, ma faamasani i punaoa o loo maua.
Suesuega o Tusitusiga Paia
Suesue mau nei e uiga i le talafaasolopito o aiga. Ia faamaumau mea e te aoaoina.
Ua Toefuatai mai le Mana o Faamauga e ala mai ia Elia
Taumafai se tasi pe sili atu o gaoioiga nei e fesoasoani ia te oe e saili ai e ala i talafaasolopito o aiga.
Ia fuafua e asiasi atu i se tagata o le ekalesia e i ai se poto masani i talafaasolopito o aiga. Aoao po o a auaunaga o loo maua e ala i le taitai o le malumalu ma talafaasolopito o aiga a lau uarota.
Faataitai pe faapefea ona e ofoina atu le fesoasoani i talafaasolopito o aiga ia i latou tou te feiloai. Fai ni fuafuaga e ofoina atu ai ia talafaasolopito o aiga i au taumafaiga e saili.
Faitau ma talanoaina le tamaitusi o Aiga ma Malumalu ina ia maua ai se malamalamaaga malosi atu i le galuega o talafaasolopito o aiga. Tusi mea ua e aoaoina i lau tusi talaaga o suesuega.
Faaaoga le tamaitusi O Lo’u Aiga po o punaoa o le FamilySearch.org a o e sailia tagata e aoao.
I nofoaga e mafai ai, fai se faletatala, aoao se vasega o talafaasolopito o aiga i se nofoaga faitele, pe ofo atu ni faatalanoaga.
Ia Saili Pe a E Aoao Atu
O le saili ma le aoao atu o ni gaoioiga e fesootai. O i latou e te aoaoina, e masani ona i ai a latou uo po o aiga o e ua saunia e talia le talalelei toefuataiina. A o aafia tagata o loo e aoaoina i faamanuiaga o le talalelei, o le a faateleina lo latou naunau e faasoa atu [le talalelei] (tagai 1 Nifae 8:12). I tulaga uma lava—e pei o le sailia, aoaoina, galulue faatasi ma tagata o le ekalesia—ia fesili atu, “O ai tou te iloa o le a faamanuiaina mai lenei sāvali?”
A saunia i latou o loo e aoaoina mo a latou sauniga o le papatisoga, fesili atu ia i latou e uiga i aiga ma uo latou te mananao e valaaulia i o latou papatisoga. Fai ni fuafuaga e valaaulia ai ma uunaia tagata uma e o mai. E mafai ona lagonaina ma le mamana le Agaga i le taimi o se sauniga o le papatisoga.
Suesuega Faalesoa
Ia toe iloilo se lisi o tagata o loo e aoaoina. Ia fai se lisi o i latou na e fesiligia mo igoa e faailoa mai, ma i latou e te le’i fesiligia. Ia faataitai pe faapefea ona e tuuina atu se valaaulia mo igoa e faailoa mai ia i latou o loo i vaega taitasi. I lau fuafuaga, ia tusi ai e tuuina atu lenei valaaulia i le isi a outou feiloaiga e sosoo ai.
Ata
O tamaitai o loo tilotilo i le telefoni
Aoao Atu Pe a E Maua
A o e feiloai atu i tagata ma faailoa mea latou te fiafia i ai ma manaoga, atiina a’e se mausa o le amata ona aoao atu ma faasoa atu lau molimau. O le a e maua ni tagata se toatele e aoaoina a o e molimau atu i le Faaola ma Lana talalelei ma faatagaina i latou ia lagonaina le mana o le Agaga Paia.
Mafaufau e aoao atu i autu e pei o le fiafia, faigata, faamoemoega o le olaga, po o le oti. Po o le a lava lau faiga muamua, ia tagai vave ma le faigofie i le Faaola, Lana talalelei, ma Lana valaauga i le Perofeta o Iosefa Samita. O la tatou savali tulaga ese lenei i le lalolagi.
O vaega nei o loo maua ai faataitaiga o auala e mafai ona e aoao puupuu atu ai e uiga i le Toefuataiga o le talalelei a Iesu Keriso ma le taua o le aiga.
Aoao atu ma Molimau i le Toefuataiga o le Talalelei a Iesu Keriso
Molimau atu ia Iesu Keriso ma aoao atu ni aotelega pupuu o upumoni toefuataiina. Mo se faataitaiga, e mafai ona e molimau atu e uiga i le talalelei toefuataiina a Iesu Keriso i na o ni fuaiupu se lua pe tolu foi:
I le mavae ai o ni seneturi o le leiloloa, na toefuatai mai upumoni e se Atua alofa e ala mai i se perofeta soifua. Ua ia i matou se faamaoniga o lenei mea e mafai ona e uuina i ou lima, faitau, ma mafaufau loloto i ai i lou loto. Matou te valaaulia oe e faitau ma tatalo ina ia aoaoina lona moni mo oe lava. E mafai ona e faatagaina i maua e …
Afai e i ai sina isi taimi itiiti, atonu e te fai atu nisi tala:
O le ma sāvali e faigofie. O le Atua o lo tatou Tama . O i tatou o Ana fanau. O i tatou o se vaega o Lona aiga. Na te silafia patino i tatou ma e alofa ia i tatou. Na te manao ia tatou oo i le olioli. Mai le amataga o le lalolagi, ua Ia mulimuli i se mamanu o le aapa atu i le alofa e faaali mai le talalelei a Iesu Keriso ina ia mafai ai e Lana fanau ona iloa le ala e toe foi atu ai ia te Ia. Sa ia faaalia le talalelei i perofeta e pei o Atamu, Noa, Aperaamo, ma Mose. Ae e toatele tagata na filifili pea lava pea e teena le talalelei ma perofeta o e na aoaoina atu. I le lua afe tausaga talu ai, na aoao atu ai e Iesu Keriso lava Ia Lana talalelei. Sa teena lava foi e tagata ia Iesu. Ina ua mavae le maliliu o Aposetolo a Iesu, sa femilosa’i e tagata ia aoaoga faavae moni, e pei o le Aiga Atua. Sa latou suia foi sauniga, e pei o le papatisoga.
O la ma valaaulia ia te oe, e faaopoopo atu lea i upumoni ua uma ona e faatauaina. Mafaufau i le faamaoniga e faapea, na toe aapa mai lo tatou Tama Faalelagi i Ana fanau i le alofa ma faaali mai aoaoga faavae moni ma sauniga i se perofeta. O le igoa o lenei perofeta o Iosefa Samita. O le faamaoniga o lenei upumoni mamalu o loo maua lea i totonu o se tusi—o le Tusi a Mamona. E mafai ona e uuina i ou lima, faitauina, ma mafaufau loloto i lona moni i lou mafaufau ma lou loto. Matou te valaaulia outou ia auai i le lotu ina ia aoao atili.
Aoao Atu ma Molimau Atu e uiga i le Taua o le Aiga
O le talanoaina o le taua o le aiga o le a fesoasoani ia te oe e saili ai tagata e aoao, pe i ai so latou talaaga faaKerisiano po o se tagata e le Kerisiano. E mafai ona e faafesootaia vave mea e iloa e le toatele o tagata e uiga i le aiga i le fuafuaga o le faaolataga a le Tama Faalelagi. Atonu e te faapea atu:
E mafai ona avea lo matou aiga ma se tasi o faatosinaga sili ona taua i o tatou olaga. O o tatou aiga e fusia faatasi ai i tatou i isi tagata ma fesoasoani ia tatou lagonaina le manaomia ma le alofaina.
O le maua o se aiga malosi ma fiafia, o le faamuamua maualuga lea mo le toatele o tagata i le lalolagi atoa. O le i ai o se faaipoipoga malosi ma le tausiaina o fanau i le lalolagi i aso nei e mafai ona matua luitauina lava.
Ona e faia lea o se suiga agai atu i le savali o le Toefuataiga:
Na avea oe ma se vaega o le aiga o le Atua ae e te lei fanau mai. O Ia o lo tatou Tama. E finagalo le Tama Faalelagi ia tatou toe foi atu e mau faatasi ma Ia. O oe o Sona atalii, ma e alofa o Ia ia te oe. E i ai Sana fuafuaga e fesoasoani ia te oe e toe foi atu ai ia te Ia.
O nei upumoni ma isi ua toefuatai mai i le lalolagi e lo tatou Tama Faalelagi alofa e ala mai i se perofeta soifua. O nei upumoni e fesoasoani tatou te malamalama ai i lo tatou tulaga i le aiga o le Atua. E mafai ona ma aoaoina atili oe e uiga i nei upumoni? Pe o le a e auai i le lotu ina ia mafai ona e aoao atili?
Suesuega Faalesoa
Ia saunia se sāvali e tasi le minute le umi e faavae i se tasi o lesona i le mataupu 3. Faataitai ona fefaasoaai i le tasi ma le isi. Mafaufau i ni auala e mafai ona e faasoa atu ai lenei sāvali i se tulaga o le sailiga. Fuafua e faasoa atu i se tulaga talafeagai e valaaulia ai isi e aoao atili e uiga ia Iesu Keriso.
E Leai Ni Taumafaiga E Maimau
A filifili tagata e aua ne’i sailiili i le talalelei toefuataiina, e le o maimauina au taumafaiga. Atonu ua e totoina se fatu o le a tupu i se isi taimi. Pe tupu lena mea pe leai, o lau auaunaga ma faailoaga o le alofa faamaoni o le a faamanuiaina ai oe ma i latou.
Afai e le o saunia tagata e talia le talalelei, vaai po o a isi mea e mafai ona e faia e faatamaoaigaina ai o latou olaga. O sootaga e te atiina a’e o loo anoa pea ma taua. Ia faaauau pea ona avea ma a latou uo.
O nisi taimi e manaomia ai e tagata se taimi e mafaufau ai i suiga e fesiligia ai i latou. Fesoasoani ia i latou ia maua sāvali e ala i imeli po o uepisaite a le Ekalesia. O nei sāvali e mafai ona fesoasoani e saunia ai tagata e talia valaaulia i le lumanai e aoao atili.
Afai e lē taliaina e se tagata le talalelei, o se mea masani le lē fiafia. Peitai, a o e liliu atu i le Alii i taimi faapena, ua Ia folafola mai, “Ou te faamalosia oe; e moni, ou te fesoasoani ia te oe; e moni, ou te taofia oe” (Isaia 41:10).
E ala i le faatuatua ia Keriso, e mafai ai ona e maua le filemu ma le faamautinoaga e uiga i au taumafaiga. Ia faatumauina se vaaiga mamao po o ai oe ma pe aisea ua e auauna atu ai i le Alii o se faifeautalai. O le a fesoasoani le faatuatua ia te oe e fetaomi atu ai i luma ma faaauau pea i manaoga amiotonu.
Manatu mo le Suesue ma le Faaaogaina
Suesuega Faaletagata Lava Ia
Faitau le Ioane 15:12, 21:15–17, 1 Tesalonia 2, ma le Mosaea 18:8–10. O le a le lelei o loo e faataunuuina ai lau matafaioi o le alofa atu ma auauna atu i isi? E faapefea ona e faaleleia? Tusi lau tali i totonu o lau tusi talaaga o suesuega.
Faitau le 3 Nifae 18:31–32, Alema 24:7–8, ma le Alema 32:41. O a mea o aoao mai e nei fuaiupu e uiga i le galulue faatasi ma tagata sa aoaoina muamua? Faamaumau i totonu o lau api talaaga o suesuega mea na e aoaoina. Aoao atu i lau soa.
Suesuega Faalesoa ma Felafolafoaiga Faalesoa
Fai ni fuafuaga e feiloai ai ma tagata fou i la outou eria. Afai e manaomia, faaaoga le polokalama Tala’i La’u Talalelei e faailoa mai ai. Fai fesili e pei o nei:
Na faapefea ona e saunia mo le talalelei?
O anafea ma na faapefea ona e fesootai muamua ma le Ekalesia?
O le a le mea na uunaia oe e talanoa ma faifeautalai?
E mafai faapefea ona matou lagolagoina lou alualu pea i luma?
Mai nei fonotaga, o le a se mea na e aoaoina e uiga i le sailia o tagata o e agaigai i luma i le papatisoga? Fai ni fuafuaga e faaaoga ai mea ua e aoaoina i lenei vaiaso.
Ia toe iloilo ia autu taitasi nei. I le faaaogaina o lesona i le mataupu 3, ia saunia se auala faigofie e saili ai. Faataitai ona aoao atu i se nofoaga e saili ai.
Lagona le manaomia o nisi taitaiga ma le faamoemoega o le olaga.
Manao e faalatalata atili atu i le Atua
Manaomia o le fesoasoani i filifiliga taua.
Aufono a le Itu, Konafesi Faalesone, ma le Aufono a Taitai o le Misiona
Ia talanoaina pe na faapefea ona fesoasoani nei manatu i faifeautalai e maua ai tagata e aoao.
Lisi nisi manatu mo le sailia o tagata e aoao. Ia valaaulia faifeautalai e faaali atu o latou manatu.
Ia valaaulia faifeautalai e seti ni sini a le tagata lava ia mo le faaleleia o a latou taumafaiga e saili.
Fai se lisi o ni avanoa e saili ai.
Tofi ia tofu le faifeautalai ma se tasi o avanoa. Tuu atu i faifeautalai taitasi le lima minute e saunia ai pe faapefea ona ia aoao atu se vaega o se lesona i le tulaga atofaina.
Ia faamamafa atu le taua o le tausisia o le umi o le savali ia talafeagai ma le tulaga.
Valaaulia ni nai faifeautalai e aoao atu le lesona na latou fuafuaina i o latou tulaga atofaina.
Ia valaaulia ia faifeautalai e faataitai ona fetufaai atu se sāvali e taitasi le minute i le isi. Atonu o le a e manao e seti ni tulaga eseese o le sailiga, e pei o le aoao atu i le fale o se tagata o le ekalesia, aoao atu i luma o le faasitepu o le fale, aoao atu i luga o le ala savali, pe o le faafesoota’ia o se igoa na faailoa mai. Tuu atu i faifeautalai e faataitai ona aoao atu i nei tulaga taitasi.
Taitai Misiona ma Fesoasoani o le Misiona
Fai se faataitaiga o le galuega faafaifeautalai mo tagata o le au paia, i totonu o lou aiga. Fetufaai atu i faifeautalai ma tagata o le au paia, mea na e oo i ai.
Ia fefautuaai ma taitai perisitua o le lotoifale ma taitai o faalapotopotoga pe o le a le auala sili ona lelei mo faifeautalai e maua ai tagata e aoaoina i lau misiona.
Faatulaga ni faeasaite a faifeautalai e mafai ai ona e talanoa atu ai i tagata ua aoaoina i lau misiona. Galulue faatasi ma taitai perisitua i le lotoifale ina ia mafai e tagata o le ekalesia ona aumai a latou uo. Valaaulia tagata fou o le ekalesia e faasoa mai a latou molimau ma faamatala atu a latou tala o le liua ae e te lei lauga.
Ia o ma faifeautalai i nisi taimi e fesoasoani ia i latou i le sailia o tagata e aoao.
