“O Se Mamanu mo le Tuputupu Ae,” Atinaega Faaletagata Lava Ia: Tusitaiala mo le Autalavou (2019)
“O Se Mamanu mo le Tuputupu Ae,” Atinaega Faaletagata Lava Ia: Tusitaiala mo le Autalavou
O Se Mamanu mo le Tuputupu Ae
O le tuputupu ae o se vaega taua o le fuafuaga a le Tama Faalelagi. Ina ia fesoasoani ia te oe, ua tuuina mai e le Tama Faalelagi ia te oe le taitaiga mai le Agaga Paia, o tusitusiga paia, ma perofeta soifua. O le a e aoao mai ou aafiaga, aemaise lava pe a e faalagolago ia Iesu Keriso ma Lana Togiola. O le mamanu lenei e fesoasoani ia te oe ina ia ola i le talalelei i vaega uma o lou olaga.
Ia iloa le mea e tatau ona e galue ai.
Fuafua pe o le a faapefea ona e faia.
Faatino lau fuafuaga i le faatuatua.
Tomanatu i mea na e aoaoina.
Iloa
O Ou Manaoga, Meaalofa, ma Taleni
Ua tuuina mai e le Tama Faalelagi ia te oe ni meaalofa, taleni, ma gafatia. E finagalo o Ia ia e iloa ma atiina ae i latou ina ia faaleleia atili ai oe lava ia, o isi tagata, ma e oo lava i le lalolagi. E mafai faapefea ona faaleleia oe ma tuputupu ae?
Taumafai e tuuina atu ni fesili faapea:
-
O le a le mea e tatau ona ou aoaoina pe suia i lo’u olaga?
-
O a ni taleni po o ni tomai ou te manao ia mauaina?
-
O a ni uiga faaleagaga e tatau ona ou atiinaeina pe faaleleia?
-
E mafai faapefea ona ou tausia feagaiga na ou osia ina ua ou papatiso?
-
O ai e mafai ona ou auauna atu i ai?
O le a tali mai e le Tama Faalelagi nei fesili pe a e faalagolago atu ia te Ia. Tatalo. Suesue i tusitusiga paia ma upu a perofeta soifua. Faitau lou faamanuiaga faapeteriaka, pe afai o i ai se (faamanuiaga). Aoao ia iloa lagona ma manatu mai le Agaga Paia. O le a fesoasoani o Ia ina ia e iloa le mea e sili ona taua mo oe i le taimi nei. Afai e te le o mautinoa le mea e fai, tagai i itulau 58–63.
Fuafua
Ina ia Faaleleia
A e mautinoa loa le mea o le a e faatinoina, fai se fuafuaga mo le auala e mafai ona e faia ai. Atonu o lau fuafuaga e aofia ai ni laasaga po o ni faatinoga maoti, pe atonu e aofia ai ni auala e atiina ae ai se uiga masani po o se uiga patino.
Taumafai e tuuina atu ni fesili faapea:
-
Aisea e taua ai lenei mea ia te a’u?
-
E faapefea ona fesoasoani lenei mea ia te a’u ia avea atili ai faapei o Iesu Keriso?
-
O le a se faatinoga e mafai ona ou faia e faataunuuina ai lenei mea?
-
E mafai ona ou vaevaeina nei faatinoga i ni laasaga laiti?
-
O a ni fuafuaga e mafai ona ou faia nei ia foia ai luitau e ono feagai ma a’u?
Tatalo e uiga i lau fuafuaga, ma gauai atu i lagona ma manatu e te mauaina. E mafai ona e ole atu mo le fesoasoani a le Agaga Paia, lou aiga, ma ou taitai.
Galue
Ina Ia Tuputupu A’e i le Faatuatua
Mulimuli i lau fuafuaga! Fai ni faamanatu e fesoasoani ia te oe ina ia tumau ai i le taulai atu. E mafai ona e tusia se tusiga, seti se uati faailo, pe fai atu i se tasi lua te galulue faatasi. O nisi taimi e faigata ai le galue i lau fuafuaga. O nisi taimi o le a e toilalo ai. E le afaina! O le aoaoina o mea e aoga ma mea e le aoga e fesoasoani ia e tuputupu ae ai.
Afai ua e le mautonu, taumafai e tuuina atu ni fesili faapea:
-
O le a le mea na aoga? Aisea?
-
O le a le mea e le’i aoga? E leai aisea?
-
O le a se isi mea e mafai ona ou faataitaia?
-
O fea e mafai ona ou maua ai nisi manatu?
-
E mafai ona ou vaevaeina la’u sini i ni laasaga po o ni faatinoga laiti?
-
E faapefea ona ou aoao mai ni nai toilalo laiti?
O le faia o se mea ia lelei e manaomia ai le faataitaia ma le onosai. Talosaga atu i lou aiga, uo, po o taitai mo se fesoasoani. E silafia oe e le Faaola ma luitau o feagai ma oe. E mafai ona Ia fesoasoani ia te oe e faia mea faigata. Tatalo mo le fesoasoani ma le taitaiga.
Tomanatu
I Mea Na E Aoaoina
Mafaufau loloto e uiga i au sini ma fuafuaga a o e galue i ai ma pe a e faamaeaina. O a mai ou lagona? O a ni mea na e aoaoina? O le tusitusiina i lalo o manatu ma uunaiga e mafai ona fesoasoani ia te oe i se taimi mulimuli mai.
Taumafai e tuuina atu ni fesili faapea:
-
Na faapefea ona ou tuputupu ae?
-
E mafai faapefea ona ou faaaogaina mea na ou aoaoina e auauna atu ai i isi?
-
Na faapefea ona fesoasoani a’u faatinoga ia ou latalata atili ai i le Faaola?
-
E faapefea ona faaauau pea ona ou tuputupu ae i lea vaega?
Pe a maea ona e galue i se sini po o se fuafuaga, faafetai atu i le Tama Faalelagi ma i latou na fesoasoani ia te oe. Tomanatu i le matafaioi a le Faaola i lou olaga pe a e ‘ai ma inu i le faamanatuga. Mafaufau ma tatalo i le mea e sosoo e mafai ona e galue ai.