“Wan Paten blong Stap Gro I Kam Antap,” Divelopmen blong Yuwan: Gaedbuk blong Ol Yut (2019)
“Wan Paten blong Stap Gro I Kam Antap,” Divelopmen blong Yuwan: Gaedbuk blong Ol Yut
Wan Paten blong Stap Gro I Kam Antap
Blong stap groap, hem i wan impoten pat blong plan blong Papa long Heven. Blong helpem yu, Papa long Heven i givim long yu Tabu Spirit, ol skripja, mo ol profet we oli stap laef blong oli lidim yu. Bae yu lan aot long ol eksperiens blong yu, speseli taem yu dipen long Jisas Kraes mo Atonmen blong Hem. Hemia i wan paten blong stap helpem yu blong stap laef folem gospel long evri eria blong laef blong yu.
Faenemaot wanem yu nid blong wok long hem.
Mekem Plan long hao nao bae yu mekem samting ia.
Tekem Aksen folem plan blong yu, wetem fet.
Tingtingbak long wanem yu bin lanem.
Faenemaot
Ol Nid, Presen mo Talen blong Yu
Papa long Heven i bin givim yu ol presen, ol talen mo ol paoa blong mekem samting. Hem i wantem yu blong faenemaot mo developem olgeta blong mekem yuwan, ol nara pipol, mo iven wol ia, i kam gud moa. ?Olsem wanem yu save kam antap mo groap?
Traem askem ol kwestin olsem:
-
?Wanem nao mi filim se mi mas lanem o jenisim insaed long laef blong mi?
-
?Wanem nao ol talen o skil we mi wantem kasem?
-
?Wanem nao ol fasin long saed blong spirit we mi nidim blong developem o kam antap long olgeta?
-
?Olsem wanem nao bae mi kipim ol kavenan we mi bin mekem taem mi bin baptaes?
-
?Huia mi save givim seves long hem?
Papa long Heven bambae i ansarem olgeta kwestin ia taem yu stap dipen long Hem. Prea Luklukgud insaed long ol skripja mo ol toktok blong ol profet we oli stap laef. Ridim petriakel blesing blong yu sapos yu gat wan. Lan blong luksave ol filing mo ol tingting we oli kam long Tabu Spirit. Bambae Hem i helpem yu blong save wanem i moa impoten blong yu naoia. Sapos yu no save stret wanem blong mekem, luk long ol pej 58–63.
Mekem Plan
Blong Kam Gud Moa
Taem yu disaed finis wanem bae yu wok long hem, mekem wan plan blong folem wei we bae yu mekem samting ia. Insaed long plan blong yu bae i gat ol spesifik step o aksen blong tekem, o i save gat ol wei blong developem wan fasin o wan kwaliti blong yuwan.
Traem askem ol kwestin olsem:
-
?From wanem hemia i impoten long mi?
-
?Olsem wanem hemia bae i helpem mi kam moa olsem Jisas Kraes?
-
?Wanem aksen mi save tekem blong mekem hemia?
-
?Mi save brebrekem ol aksen ia i kam ol moa smol step blong tekem?
-
?Wanem plan mi save mekem naoia blong winim olgeta jalenj we mi stap fesem?
Prea from plan blong yu, mo lisingud long ol filing mo ol aedia we yu kasem. Yu save askem help long Tabu Spirit, long famli blong yu, mo ol lida blong yu.
Tekem Aksen
Blong Groap wetem Fet
!Folem plan blong yu! Raetem ol pepa blong rimaenem yu blong no lukluk olbaot. Yu save mekem wan not, putum alam, o askem wan blong wok wetem yu. Samtaem, blong wok long plan blong yu, bae i had. Samtaem, bae yu mestem. !Hem i oraet! Taem yu stap lan wanem we i wok mo wanem i no wok, bae i helpem yu blong stap groap.
Sapos yu fas, traem askem ol kwestin olsem:
-
?Wanem i bin wok long mi? ?From wanem?
-
?Wanem i no bin wok long mi? ?From wanem?
-
?Wanem nara samting mi save traem?
-
?Wea nao mi save karem moa aedia long hem?
-
?Mi save brebrekem gol blong mi long ol smol moa step o aksen blong tekem?
-
?Wanem nao mi save lanem aot long slo taem?
Blong mekem gud wan samting, i nidim praktis mo fasin blong save wet longtaem. Askem ol famli, ol fren, o ol lida blong yu blong kasem help. Sevya i save yu mo olgeta jalenj we yu stap fesem. Hem i save helpem yu blong mekem ol samting we oli had. Prea blong kasem help mo daereksen.
Tingtingbak
Long Wanem Yu Bin Lanem
Tingting hevi abaot ol gol mo ol plan blong yu taem yu stap wok long olgeta, mo taem yu finisim. ?Yu filim olsem wanem? ?Wanem nao yu bin lanem? Raetemdaon ol tingting mo ol filing we oli save helpem yu afta.
Traem askem ol kwestin olsem:
-
?Mi mi groap smol?
-
?Olsem wanem nao mi save yusum wanem mi bin lanem blong givim seves long ol narawan?
-
?Olsem wanem nao ol aksen blong mi oli bin helpem mi blong kam kolosap moa long Sevya?
-
?Olsem wanem mi save gohed blong stap gro long eria ia?
Taem yu finis blong stap wok long wan gol o wan plan, talem tangkyu long Papa long Heven mo olgeta we oli bin helpem yu. Tingtingbak long rol blong Sevya insaed long laef blong yu taem yu stap tekem mo kakae sakramen. Tingting mo prea abaot nekis samting we bae yu wok long hem afta.