Jeremia 1–3; 7; 16–18; 20: Mësimi 131

Jeremia 2–3

“Kthehu … Sepse Jam i Mëshirshëm, Thotë Zoti”

Ashtu si sot, ndikimet e botës në kohën e Jeremias ishin të forta. Shumë nga njerëzit e Zotit ishin larguar nga mësimet e Tij dhe shumë shpejt do të pushtoheshin nga armiqtë e tyre. Pavarësisht ligësisë së tyre, Jeremia u dërgua për të dhënë mësimin se Perëndia i ftoi gjithsesi ata që të drejtoheshin tek Ai dhe të shëroheshin. Ky mësim mund t’i ndihmojë nxënësit ta rritin dëshirën e tyre për t’u drejtuar te Shpëtimtari për mëshirë dhe shërim.

Përgatitja e nxënësve: Ftojini nxënësit të gjejnë një shkrim të shenjtë që jep mësim rreth bekimeve të pendimit. Ata mund të përgatiten për të dhënë arsyen përse ato bekime janë kuptimplota për ta.

Veprimtari të Mundshme të të Mësuarit

Sterna që nuk mbajnë ujë

Për t’i ndihmuar nxënësit të kuptojnë gjendjen e popullit në kohën e Jeremias, shpjegoni se Zoti shpesh na ndihmon të shohim të vërteta shpirtërore duke i krahasuar ato me gjëra për të cilat kemi njohuri.

Merreni parasysh të sillni në klasë një kanë me ujë, një legen ose tas të madh, si dhe një kupë me disa vrima të vogla në fund.

Ngrijeni lart kanën me ujë ndërsa nxënësit lexojnë vargun vijues.

Lexo te Jeremia 2:13, duke kërkuar një titull të Shpëtimtarit që mund të përfaqësojë uji. (“Sterna” është një zonë nëntokë e krijuar për të ruajtur ujë.)

• Çfarë mund të na mësojë titulli “burim[i] [i] ujit që rrjedh” rreth Jezu Krishtit?

  Nxënësit mund të tregojnë gjëra të tilla si Jezusi është një burim i vazhdueshëm i pastrimit dhe përtëritjes shpirtërore.

  Ftojeni një nxënës ta mbajë kupën mbi legen (për t’u siguruar që uji të mos derdhet) dhe të hedhë pak ujë nga kana te kupa. Mund të jetë e dobishme për nxënësit që të kërkojnë në vargun 13 sërish para se të bëjnë njërën ose të dyja pyetjet vijuese.

• Çfarë mund të përfaqësojë derdhja e ujit në kupë nga ky varg?

• Çfarë mund të na mësojnë vrimat në sterna rreth gjendjes shpirtërore të popullit në kohën e Jeremias?

Thuajuni nxënësve se njerëzit në kohën e Jeremias po drejtoheshin te gjërat e botës, të tilla si perënditë e rreme dhe jo te Zoti, për qëllim dhe forcë në jetën e tyre.

Reflekto për një çast se sa i qëllimshëm je në të drejtuarit te Jezu Krishti për qëllim dhe forcë në jetën tënde. Ndërsa studion sot, ji i hapur ndaj mbresave ose ndjenjave nga Fryma e Shenjtë rreth të drejtuarit te Shpëtimtari dhe jo te burimet e tjera për bekime dhe shërim.

Të ndierit larg Atit Qiellor dhe Jezu Krishtit

Për t’i ndihmuar nxënësit të lidhen me skenarin vijues, merreni parasysh të paraqitni një figurë të një të riu si ajo që paraqitet. Ftojini nxënësit të gjejnë një emër dhe disa hollësi rreth tij.

Imagjino sikur në klasën tënde të seminarit është një i ri që mendon se jeta e tij është si një sternë e thyer për shkak të zgjedhjeve të këqija që ka bërë në të kaluarën. Ai ndihet larg Atit Qiellor dhe Jezu Krishtit dhe nuk shpreson që gjërat të bëhen më mirë.

Lexo te Jeremia 3:12–15, 22 duke kërkuar përshkrimet e Jezu Krishtit, kuptueshmëria e të cilave do të kishte dobi për të riun. (Mund të jetë e dobishme të dish se “rebel” në këto vargje do të thotë pa besim ose i pabindur.)

Merreni parasysh ta shkruani thënien e papërfunduar vijuese në tabelë. Ftojini nxënësit të tregojnë mënyrat për ta plotësuar thënien duke përdorur fjalët ose frazat nga vargjet.

Për ata që pendohen dhe drejtohen te Zoti, Ai …”

Përgjigjet mund të përfshijnë “do të jetë i mëshirshëm”, “nuk do të mbetet i zemëruar”, (vargu 12), “do t’ju çojë në Sion”, (vargu 14), “do t’ju japë barinj (udhëheqës) që do t’ju ushqejnë me dije dhe dituri”, (vargu 15), “do të shërojë rebelimet e tuaja”, (vargu 22) e me radhë.

Mund të jetë e dobishme të shpenzoni ca kohë duke diskutuar çdo frazë nga këto vargje për të cilën nxënësit kanë pyetje. Ftojini nxënësit të shënojnë në ditarët e tyre një ose dy fraza që ata mendojnë se do të ishin të dobishme që i riu në skenar t’i kuptonte në lidhje me Jezu Krishtin. Nxënësit do të kenë mundësinë ta tregojnë atë që zgjedhin më vonë.

Mëshira e Atit Qiellor dhe e Jezu Krishtit

Për t’i ndihmuar nxënësit ta rritin vetëbesimin e tyre në dëshirën e Zotit për t’i bekuar dhe shëruar ata që drejtohen tek Ai, ju mund të jepni thënien vijuese.

Plaku Diter F. Uhtdorf, i Kuorumit të Dymbëdhjetë Apostujve, dha mësim sa vijon rreth dëshirës së Atit Qiellor dhe të Jezu Krishtit për t’i shëruar ata që pendohen:

“Cili prej nesh nuk është larguar nga shtegu i shenjtërisë, duke menduar marrëzisht se mund të gjenim më shumë lumturi duke shkuar në vetë udhën tonë të përqendruar te vetja?

Cili prej nesh nuk është ndier i përulur, zemërthyer dhe i etur për falje dhe mëshirë?

Ndoshta disa madje mund ta kenë pyetur veten: ‘A është madje e mundur të kthehesh pas? A do të më etiketojnë përgjithmonë, përjashtojnë dhe shmangin miqtë e mi të mëparshëm? A është më mirë që thjesht të mbetem i humbur? Si do të reagojë Perëndia nëse përpiqem të kthehem?’…

Ati ynë Qiellor do të vrapojë drejt nesh, me zemrën të gufuar me dashuri dhe dhembshuri. …

Por unë jap dëshmi se, në çastin që vendosni të ktheheni dhe ecni në udhën e Shpëtimtarit dhe Shëlbuesit tonë, fuqia e Tij do të hyjë në jetën tuaj dhe do ta shndërrojë atë.” (“Plëngprishësi dhe Rruga që të Çon në Shtëpi”, Liahona, nëntor 2023, f. 88)

Shkruaj në ditarin tënd të studimit pikëpamjet që ke fituar nga kjo thënie të cilat mund ta bekojnë të riun në skenar. Ti do të kesh një mundësi për t’i treguar këto më vonë.

Nëse nuk e përdorët materialin filmik “The Savior Wants to Forgive” [“Shpëtimtari Dëshiron të Falë”] në Mësimin 77: “2 Samuelit 11–12”, mund ta shfaqni këtu si një shembull të dashurisë dhe dëshirës së Zotit për t’i bekuar dhe shëruar të gjithë ata që drejtohen tek Ai.

Përndryshe, mund të shfaqni “The Miracle of the Atonement” [“Mrekullia e Shlyerjes”] nga Plaku C. Skot Grou, i Të Shtatëdhjetëve, nga kodi kohor 0:20 deri në 2:12 (Liahona, maj 2011, f. 108).

Ftojini nxënësit t’u përgjigjen pyetjeve vijuese në grupe të vogla.

• Çfarë patë në jetën e këtij personi që mund të krahasohet me kupën me vrima dhe me kanën e ujit nga fillimi i orës mësimore?

• Çfarë mësuat rreth Atit Qiellor dhe Jezu Krishtit nga jeta e këtij personi?

Nxënësit mund të shtojnë në ditarët e tyre të studimit çdo mendim që mendojnë se do të ishte i dobishëm për të riun në skenar.

Përfundimi

Veprimtaria vijuese mund të jetë një mundësi e mirë për nxënësit që të ndiejnë Frymën e Shenjtë të dëshmojë për atë që ata thonë dhe dëgjojnë nga nxënësit e tjerë.

Merreni parasysh të paraqitni udhëzimet vijuese. (Pika e parë më poshtë u jep nxënësve një mundësi për ta treguar atë që bënë për përgatitjen e nxënësve para orës mësimore.)

Përgatitu për ta treguar atë që do t’i thoshe të riut në skenar duke shqyrtuar atë që shkrove në ditarin tënd. Merre parasysh të përfshish edhe sa vijon:

Diçka nga një shkrim tjetër i shenjtë ose histori e shkrimit të shenjtë që tregon bekimet e pendimit (Mund të kërkosh termin pendim tek Udhëzuesi për Shkrimet e Shenjta.)

Ndjenjat e tua rreth dashurisë dhe dëshirës së Shpëtimtarit për t’i ndihmuar të gjithë ata që drejtohen tek Ai

Pasi nxënësit të kenë pasur kohë për t’u përgatitur, ftojini ata t’ia tregojnë mendimet e tyre një partneri ose grupi të vogël.

Pasi nxënësit të kenë pasur mundësinë për të folur, mund ta përmbyllni mësimin duke ftuar disa vullnetarë të japin përgjigjet e tyre për pyetjen vijuese.

• Çfarë ke mësuar ose ndier sot që mund të ndikojë në dëshirën tënde për t’u drejtuar te Shpëtimtari për mëshirën dhe shërimin e Tij?

Burime Shtesë

Çfarë bekimesh mund të vijnë nga të drejtuarit drejt Jezu Krishtit?

Plaku Nil L. Andersen, i Kuorumit të Dymbëdhjetë Apostujve, dha mësim:

“Duke e fokusuar vëmendjen tonë te Jezu Krishti, gjithçka tjetër rrotull nesh – ndërkohë që është ende e pranishme – shihet nëpërmjet dashurisë sonë për Të. Shpërqendrimet më pak të rëndësishme zbehen dhe ne i largojmë ato gjëra që nuk janë në përputhje me dritën dhe karakterin e Tij. Ndërsa vazhdoni të përqendroheni me vëmendje në këtë mendim për Jezu Krishtin, i mirëbesoni Atij dhe i zbatoni urdhërimet e Tij, ju premtoj jo vetëm udhërrëfim qiellor por edhe fuqi qiellore – fuqi që iu sjell forcë besëlidhjeve tuaja, paqe vështirësive tuaja dhe gëzim bekimeve tuaja.” (“Mendja Ime po më Përqendrohej në Këtë Mendim për Jezu Krishtin”, Liahona, maj 2023, f. 93)

Po nëse të duket sikur ke dalë shumë nga udha?

Plaku Diter F. Uhtdorf, i Kuorumit të Dymbëdhjetë Apostujve, tregoi:

“Pavarësisht se çfarë mund të ketë ndodhur në jetën tuaj, unë u bëj jehonë dhe i shpall fjalët e bashkapostullit dhe mikut tim të dashur, Plakut Xhefri R. Holland: ‘Nuk është e mundur që ju të zhyteni më poshtë se [sa shkëlqen] drita e pafundme e [flijimit shlyes të] Krishtit’.

Ndonëse zgjedhjet mund t’ju kenë larguar shumë nga Shpëtimtari dhe Kisha e Tij, Shëruesi Mjeshtër qëndron te rruga që të çon në shtëpi, duke ju mirëpritur. Dhe ne, si anëtarë të Kishës së Jezu Krishtit, kërkojmë ta ndjekim shembullin e Tij dhe ju përqafojmë si vëllezërit dhe motrat tona, si miqtë tanë. Ne ngazëllejmë dhe kremtojmë me ju.” (“Plëngprishësi dhe Rruga që të Çon në Shtëpi”, Liahona, nëntor 2023, f. 88)

Presidenti Xhefri R. Holland, i Kuorumit të Dymbëdhjetë Apostujve, shpalli:

“Gjithçka në ungjill na mëson se ne mund të ndryshojmë nëse na nevojitet, që mund të marrim ndihmë nëse e dëshirojmë vërtet, që mund të shërohemi, pavarësisht problemeve të së kaluarës.” (“He Hath Filled the Hungry with Good Things”, Ensign nëntor 1997, f. 66)

Veprimtari Plotësuese të të Mësuarit

“Gjërave që nuk vlejnë asgjë” (Jeremia 2:8, 11)

Së bashku me studimin e vargut te Jeremia 2:13, ju mund t’i vini nxënësit të përcaktojnë dhe të shenjojnë frazat “gjërave që nuk vlejnë asgjë” dhe “diçka që nuk vlen asgjë” te Jeremia 2:8, 11. Ju mund t’i ftoni nxënësit ta lexojnë thënien vijuese nga Presidenti Nelson, duke kërkuar mënyrën se si ajo lidhet me mësimet e Jeremias:

“Por ja tek është e vërteta madhështore: Ndërkohë që bota këmbëngul se pushteti, pasuritë, popullariteti dhe kënaqësitë e mishit të sjellin lumturi, ato nuk ta sjellin! Nuk munden ta sjellin. Ajo që ato shkaktojnë, nuk është veçse një zëvendësuese e zbrazët për ‘gjendjen e bekuar dhe të lumtur të atyre që zbatojnë urdhërimet e Perëndisë’.

E vërteta është se është shumë më rraskapitëse që ta kërkoni lumturinë atje ku nuk mund ta gjeni kurrë! Sidoqoftë, kur viheni nën zgjedhë me Jezu Krishtin dhe bëni punën shpirtërore që kërkohet për ta mundur botën, Ai dhe vetëm Ai, e ka fuqinë t’ju ngrejë mbi ndikimin e kësaj bote.” (“Mundeni Botën dhe Gjeni Prehje”, Liahona, nëntor 2022, f. 97)

• Cilët janë shembujt e gjërave në të cilat njerëzit kërkojnë lumturi ku nuk mund të gjendet asnjëherë? Si mund të jetë kjo si një sternë e thyer?

• Si keni gjetur ju ose të tjerët që njihni gëzim në ndjekjen e Shpëtimtarit?

Kthehuni te Zoti

Ndonjëherë shkrimet e shenjta përdorin fraza që ne supozojmë se nxënësit i kuptojnë, por ata nuk i kuptojnë. Mund të jetë e dobishme të siguroheni që nxënësit e kuptojnë mënyrën se si mund të “ktheh[en]” te Jezu Krishti (shihni te Jeremia 3:12, 22). Një mënyrë se si mund ta bëni këtë është t’i ftoni ata të gjejnë një shkrim të shenjtë që na mëson rreth kthimit te Zoti. Disa shembuj përfshijnë vargjet te 2 Nefi 31:20; Enosi 1:2–4; Moroni 7:16; dhe Doktrina e Besëlidhje 11:12.

Nxënësit mund të ftohen më pas ta tregojnë atë që gjetën dhe mënyrën se si ajo do ta ndihmonte një person të drejtohet ose të kthehet te Zoti.

Një shembull i mëshirës dhe i dashurisë së Zotit

Si një alternativë për shembujt me materiale filmike në mësim, mund të shfaqni “Wheelz: Overcoming Is Possible” [“Wheelz: Kapërcimi Është i Mundur”]. Ftojini nxënësit të kërkojnë mënyrën se si e ilustron kjo histori atë që dha mësim Zoti te Jeremia 3:12–15, 22.