« បុព្វកថាទៅកាន់សុភាសិត ៖ ‹ ព្រះយេហូវ៉ាទ្រង់ប្រទានឲ្យមានប្រាជ្ញា › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« បុព្វកថាទៅកាន់សុភាសិត ៖ ‹ ព្រះយេហូវ៉ាទ្រង់ប្រទានឲ្យមានប្រាជ្ញា › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សុភាសិត ១–៤; ១៥–១៦; ២២; ៣១; សាស្ដា ១–៣; ១១–១២ ៖ មេរៀនទី ១០៩
បុព្វកថាទៅកាន់សុភាសិត
« ព្រះយេហូវ៉ាទ្រង់ប្រទានឲ្យមានប្រាជ្ញា »
តើឱវាទដ៏ឈ្លាសវៃពីមនុស្សជាទីស្រឡាញ់ដែលជាទីទុកចិត្តបានផ្ដល់ពរដល់ជីវិតអ្នកយ៉ាងដូចម្ដេច ? ការសិក្សាគម្ពីរសុភាសិត អាចប្រៀបដូចជាការស្វែងរកប្រាជ្ញាពីមិត្តភក្តិដែលមានការខ្វល់ខ្វាយ សមាជិកគ្រួសារ និងព្រះអម្ចាស់ ។ ការអនុវត្តព្រះប្រាជ្ញាញាណរបស់ទ្រង់ក្នុងជីវិតរបស់យើងអាចរក្សាយើងនៅលើផ្លូវនៃសេចក្ដីសញ្ញាតូច និងចង្អៀត ។ មេរៀននេះអាចជួយសិស្សស្វែងរកសេចក្តីពិតដែលអាចជួយពួកគេដើរតាមមាគ៌ារបស់ព្រះអម្ចាស់ ។
ការរៀបចំសិស្ស ៖ សូមអញ្ជើញសិស្សឲ្យជ្រើសរើសដំបូន្មានដ៏មានតម្លៃ ឬពាក្យទូន្មានដ៏មានប្រយោជន៍ ដែលពួកគេបានទទួលពីឪពុកម្ដាយ ថ្នាក់ដឹកនាំ និងមិត្តភក្តិដែលទុកចិត្ត ។ សូមអញ្ជើញសិស្សឲ្យរៀបចំដើម្បីចែកចាយដំបូន្មាន និងរបៀបដែលវាបានផ្ដល់ពរដល់ជីវិតរបស់ពួកគេ ។
សកម្មភាពរៀនសូត្រដែលអាចមាន
ដំបូន្មានជាទីទុកចិត្ត
សូមពិចារណាចាប់ផ្តើមថ្នាក់ដោយចែកក្រដាសដល់សិស្ស ។ សូមឲ្យពួកគេសរសេរនូវដំបូន្មាន ឬការប្រឹក្សាដ៏មានតម្លៃមួយដែលពួកគេបានទទួល ។ បន្ទាប់ពីប្រមូលក្រដាសរួចហើយ អ្នកអាចអានចម្លើយមួយចំនួន ។ សូមអញ្ជើញសិស្សដែលបានសរសេរចម្លើយឲ្យចែកចាយពីរបៀបដែលដំបូន្មាននោះបានជួយពួកគេ ។ សិស្សអាចហុចក្រដាសដែលនៅសេសសល់ជុំវិញបន្ទប់ អានដំបូន្មានរបស់មិត្តរួមថ្នាក់ផ្សេងទៀត ។ បន្ទាប់មក សូមអញ្ជើញសិស្សឲ្យពិភាក្សាសំណួរខាងក្រោមនេះ ។
-
តើអ្វីធ្វើឲ្យដំបូន្មានរបស់នរណាម្នាក់មានន័យសម្រាប់អ្នក ?
-
តើអ្នកកំណត់ថាតើដំបូន្មានណាដែលអ្នកអាចទុកចិត្តបានដោយរបៀបណា ?
បន្ទាប់ពីសិស្សបានចែកចាយចម្លើយរបស់ពួកគេរួចហើយ អ្នកអាចអញ្ជើញពួកគេឲ្យជញ្ជឹងគិតសំណួរបន្ទាប់ដោយការអធិស្ឋាន ។
-
តើអ្នកធ្វើតាមដំបូន្មានដ៏ឈ្លាសវៃរបស់អ្នកដទៃញឹកញាប់ប៉ុនណា ?
-
តើអ្នកស្វែងរក និងធ្វើតាមការទូន្មានរបស់ព្រះអម្ចាស់ញឹកញាប់ប៉ុនណា ?
ប្រាជ្ញារបស់សុភាសិត
គម្ពីរសុភាសិតគឺជាបណ្តុំនៃប្រាជ្ញាបែបកំណាព្យដែលសរសេរទៅកាន់ពួកសាសន៍អ៊ីស្រាអែល ។ សារលិខិតមួយចំនួននៅក្នុងសុភាសិតគឺត្រូវបានសន្មតថាជារបស់ស្តេចសាឡូម៉ូន ( សូមមើល សុភាសិត ១:១; ១០:១; ២៥:១; សូមមើលផងដែរ ពង្សាវតារក្សត្រ ទី១ ៤:៣២ ) ខណៈពេលដែលអ្នកនិពន្ធផ្សេងទៀតមិនបានដឹង ។ នៅពេលអ្នកសិក្សាសុភាសិត សូមយកចិត្តទុកដាក់ទៅលើរបៀបដែលព្រះវិញ្ញាណបរិសុទ្ធថ្លែងទីបន្ទាល់អំពីសេចក្ដីពិត នៅពេលអ្នករកឃើញការណែនាំដែលព្រះអម្ចាស់ចង់ឲ្យអ្នកអនុវត្តចំពោះជីវិតរបស់អ្នក ។
អ្នកអាចរំឭកសិស្សថាសុភាសិត ( ដូចជាយ៉ូប និងសាស្ដាដែរ ) ប្រើបច្ចេកទេសនៃកំណាព្យជាភាសាហេព្រើរ ដែលអាចពិបាកសម្រាប់អ្នកអាន ។ បើចាំបាច់ សូមចែកចាយថា ទោះបីជាសុភាសិតជាច្រើនមានលក្ខណៈខាងវិញ្ញាណយ៉ាងស៊ីជម្រៅក៏ដោយ ក៏ពាក្យខ្លះគ្រាន់តែជាដំបូន្មានខាងលោកិយប៉ុណ្ណោះ ។
សូមអាន សុភាសិត ១:១–៧ ដោយរកមើលគោលបំណងមួយចំនួនពីសុភាសិត ។
សូមអញ្ជើញសិស្សឲ្យចែកចាយនូវអ្វីដែលពួកគេបានរកឃើញ ។ ប្រសិនបើមានប្រយោជន៍ អ្នកអាចសួរថាហេតុអ្វីបានជាប្រាជ្ញាមានសារៈសំខាន់ក្នុងការរៀនសព្វថ្ងៃនេះ ។
សូមពិចារណាពន្យល់ថា « សេចក្តីកោតខ្លាចដល់ព្រះយេហូវ៉ា » ( ខទី ៧ ) សំដៅទៅលើអារម្មណ៍ និងការបង្ហាញគារវភាព និងការគោរពដល់ទ្រង់ ។ សិស្សអាចចង់សរសេរការពន្យល់នេះនៅក្នុងព្រះគម្ពីររបស់ពួកគេ ។
-
ហេតុអ្វីអ្នកគិតថា ការមានគារវភាព ឬការគោរពដល់ព្រះអម្ចាស់អាច « ជាដើមចមនៃតម្រិះ » យ៉ាងដូចម្តេច ( ខទី ៧ ) ។
សូមអាន សុភាសិត ២:៦–៩ ដោយរកមើលប្រភពនៃប្រាជ្ញាពិតប្រាកដ ។ ( ចំណាំ ៖ គ្រឿងការពារគឺជាខែល ) ។ ពិចារណាការភ្ជាប់ ឬយោងខគម្ពីរទាំងនេះជាមួយ ម៉ូសាយ ៤:៩ ។
-
តើអ្នកអាចសង្ខេបអ្វីដែលអ្នកបានរៀនជាសេចក្តីថ្លែងការណ៍នៃសេចក្តីពិតដោយរបៀបណា ?
ជួយសិស្សស្វែងរកសេចក្តីពិត ដូចជា ព្រះអម្ចាស់ប្រទានប្រាជ្ញាដល់យើង ដើម្បីជួយយើងធ្វើតាមមាគ៌ារបស់ទ្រង់ ។ អ្នកអាចអញ្ជើញសិស្សឲ្យសរសេរសេចក្ដីពិតនេះនៅក្នុងកំណត់ចំណាំ ព្រះគម្ពីរ ឬសៀវភៅកំណត់ហេតុការសិក្សារបស់ពួកគេ ខណៈពេលដែលអ្នកសរសេរវានៅលើក្ដារខៀន ។ សិស្សអាចចែកចាយឧទាហរណ៍អំពីគ្រាដែលព្រះប្រាជ្ញាញាណរបស់ព្រះអម្ចាស់បានជួយពួកគេ ។ ពួកគេអាចពិភាក្សាអំពីរបៀបដែលព្រះប្រាជ្ញាញាណរបស់ទ្រង់អាចខុសពីប្រាជ្ញារបស់លោកិយ ។ សិស្សអាចលើកឡើងពីអ្វីៗដូចជាការបង់ដង្វាយមួយភាគក្នុងដប់ដឹកនាំទៅរកពរជ័យរបស់ព្រះអម្ចាស់ ( ម៉ាឡាគី ៣:១០ ) ការធ្វើតាមក្រឹត្យវិន័យនៃសុខភាពរបស់ព្រះអង្គសង្រ្គោះ នាំមកឲ្យយើងនូវពរជ័យខាងរូបកាយ និងខាងវិញ្ញាណ ( គោលលទ្ធិ និងសេចក្តីសញ្ញា ៨៩:១៨–២១ ) ។
-
តើការធ្វើតាមដំបូន្មានដ៏ឈ្លាសវៃរបស់ព្រះអម្ចាស់បានជួយអ្នកឲ្យបន្តនៅលើមាគ៌ារបស់ទ្រង់យ៉ាងដូចម្ដេច ?
-
តើមានគំរូអ្វីខ្លះនៅពេលព្រះអង្គសង្គ្រោះស្វែងរកព្រះប្រាជ្ញាញាណពីព្រះវរបិតាទ្រង់ ជាជាងមកពីប្រភពផ្សេងទៀត ?
ប្រសិនបើសិស្សត្រូវការជំនួយបន្ថែម ដោយគិតអំពីគ្រាដែលព្រះអង្គសង្គ្រោះធ្វើតាមព្រះប្រាជ្ញាញាណរបស់ព្រះវរបិតាទ្រង់ អ្នកអាចចែកចាយឧទាហរណ៍ដូចជា ម៉ាថាយ ១៤:២៣; ២៦:៣៦–៣៩ ។ សិស្សអាចមានបទពិសោធន៍រៀនសូត្រដែលគួរឲ្យស្អាងចិត្ត នៅពេលពួកគេគិតអំពីរបៀបដែលព្រះយេស៊ូវគ្រីស្ទជាគំរូនៃសេចក្ដីពិតដែលពួកគេកំណត់អត្តសញ្ញាណ ។ ( សម្រាប់ការបំពាក់បំប៉នបន្ថែមអំពីការជួយសិស្សឃើញថាព្រះអង្គសង្គ្រោះគឺជាគំរូនៃគោលការណ៍មួយ សូមមើល « សង្កត់ធ្ងន់លើគំរូរបស់ព្រះយេស៊ូវគ្រីស្ទ » នៅក្នុងជំនាញអភិវឌ្ឍន៍គ្រូបង្រៀន ) ។
ព្រះប្រាជ្ញាញាណរបស់ព្រះអម្ចាស់អាចជួយយើងធ្វើតាមគំរូរបស់ទ្រង់
សូមជួយសិស្សស្វែងរកសេចក្តីពិតដែលអញ្ជើញពួកគេឲ្យដើរតាមព្រះអង្គសង្គ្រោះ ហើយកាន់តែដូចទ្រង់ ។ ដើម្បីធ្វើដូច្នេះ អ្នកអាចផ្តល់បទគម្ពីរយោងមួយចំនួន ឬទាំងអស់ដូចខាងក្រោមពីសុភាសិត ។ អ្នកអាចសរសេរបទគម្ពីរយោងដែលអ្នកជ្រើសរើសនៅលើចម្រៀកក្រដាស ។ អ្នកអាចចែកក្រដាសមួយចម្រៀកដល់សិស្សម្នាក់ៗ ។ អញ្ជើញពួកគេឲ្យអានបទគម្ពីរយោង ហើយធ្វើជំហានពីរខាងក្រោម ។ បន្ទាប់មក សិស្សអាចហុចក្រដាសរបស់គេទៅសិស្សម្នាក់ទៀត ហើយធ្វើជំហានទាំងពីរម្តងទៀត ។ ផ្លាស់ប្តូរវេនគ្នាធ្វើឡើងវិញម្តងទៀតរហូតដល់សិស្សបានសិក្សាវគ្គបទគម្ពីរមួយចំនួន ។
ចំណាំ ៖ មេរៀនទី ១១០ ៖ « សុភាសិត ៣ » នឹងផ្ដោតលើសេចក្តីពិតដែលបានរកឃើញនៅក្នុងជំពូកនោះ ។
សូមសិក្សាវគ្គបទគម្ពីរមួយ ឬច្រើនដូចខាងក្រោមពីសុភាសិត ហើយធ្វើដូចខាងក្រោម ៖
-
សរសេរអ្វីដែលអ្នករៀន ជាសេចក្តីថ្លែងការណ៍នៃសេចក្តីពិត ។
-
សូមសរសេរការពិពណ៌នាសង្ខេបអំពីរបៀបដែលប្រាជ្ញានេះអាចជួយនរណាម្នាក់ឲ្យធ្វើតាមគំរូរបស់ព្រះយេស៊ូវគ្រីស្ទ ឬប្រែក្លាយកាន់តែដូចជាទ្រង់ ។
សុភាសិត ១:៨
សុភាសិត ៤:១៤–១៥
សុភាសិត ៤:២៦
សុភាសិត ៦:២៣
សុភាសិត ១១:១៧
សុភាសិត ១៥:១
សុភាសិត ១៦:១៦
សុភាសិត ១៦:១៨–១៩
សុភាសិត ១៧:២២
សុភាសិត ២៣:១៧
សុភាសិត ២៨:១៣
សុភាសិត ២៩:១៨
សុភាសិត ៣០:៥
សកម្មភាពខាងក្រោមអាចជួយសិស្សពន្យល់ពីអ្វីដែលពួកគេបានរៀនពីការសិក្សាសុភាសិតរបស់ពួកគេ ។ សិស្សអាចធ្វើសកម្មភាពនេះជាលក្ខណៈបុគ្គល ឬអ្នកអាចរៀបចំវាជាក្រុម ។ អ្នកអាចផ្តល់ក្រដាស និងសម្ភារសិល្បៈដើម្បីបង្កើតប័ណ្ណប្រកាស ឬសិស្សអាចបង្កើតអ្វីមួយនៅលើទូរសព្ទរបស់ពួកគេ ។ ដើម្បីជួយសិស្ស សូមបង្ហាញការណែនាំខាងក្រោម ។
សូមស្រមៃគិតថាអ្នកត្រូវបានស្នើឲ្យបង្កើតរូបភាពដែលប្រើវគ្គបទគម្ពីរសុភាសិតមួយដើម្បីជួយក្មេងជំទង់ឲ្យកាន់តែដូចជាព្រះអង្គសង្គ្រោះ ។ ជ្រើសរើសសុភាសិតមួយ ហើយបង្កើតប័ណ្ណប្រកាសដូចអ្វីដែលអ្នកអាចរកឃើញនៅក្នុងទស្សនាវដ្តី ដើម្បីកម្លាំងនៃយុវជន ។ រូបភាពរបស់អ្នកអាចមានដូចខាងក្រោម ៖
-
ការបង្ហាញសាមញ្ញ—ជាអ្វីដែលមានភាពច្នៃប្រឌិត ហើយដែលអាចទាក់ទាញចំណាប់អារម្មណ៍របស់ក្មេងជំទង់
-
សេចក្ដីយោងសុភាសិត និងសេចក្ដីពិតដែលវាបង្រៀន
-
ការពន្យល់អំពីរបៀបដែលខគម្ពីរពីសុភាសិតអាចជួយក្មេងជំទង់ម្នាក់ឲ្យធ្វើតាមគំរូរបស់ព្រះអង្គសង្គ្រោះ ឬកាន់តែប្រែក្លាយដូចជាទ្រង់
ចែកចាយប្រាជ្ញានៃសុភាសិត
ផ្តល់ឱកាសដល់សិស្សដើម្បីចែកចាយ ឬបង្ហាញរូបភាពរបស់ពួកគេ ។ ប្រសិនបើសិស្សបានធ្វើសកម្មភាពនេះជាក្រុម ពួកគេអាចជ្រើសរើសនរណាម្នាក់ដើម្បីបង្ហាញរូបភាពរបស់ពួកគេដល់សិស្សក្នុងថ្នាក់ ។ អ្នកអាចដាក់បង្ហាញប័ណ្ណប្រកាសនៅជុំវិញបន្ទប់រៀន ហើយសិស្សអាចពិនិត្យមើលការងាររបស់មិត្តរួមថ្នាក់របស់ពួកគេ ។ ដើម្បីបញ្ចប់ថ្នាក់ អ្នកអាចអញ្ជើញសិស្សឲ្យពិភាក្សាអំពីសំណួរខាងក្រោម ឬឆ្លើយតបនៅក្នុងសៀវភៅកំណត់ហេតុការសិក្សារបស់ពួកគេ ។
ផ្អាក ហើយជញ្ជឹងគិតលើចំណាប់អារម្មណ៍ដែលអ្នកអាចមានពេញមួយមេរៀនថ្ងៃនេះ ។ បន្ទាប់មក សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើសេចក្ដីពិតដែលអ្នកបានសិក្សាថ្ងៃនេះបានជះឥទ្ធិពលដល់បំណងប្រាថ្នារបស់អ្នកដើម្បីធ្វើតាមព្រះអម្ចាស់យ៉ាងដូចម្ដេច ?
-
តើអ្នកមានអារម្មណ៍មានចំណាប់អារម្មណ៍នឹងធ្វើអ្វីខ្លះ ដើម្បីប្រែក្លាយកាន់តែដូចជាព្រះអង្គសង្គ្រោះ ?