Kenese 3–4; Mose 4–5: Lesona 12

Mose 4:5–32; 5:1–15, Vaega 2

“Aua Talu Ai Ona Ua E Pa’ū, e Mafai Ona Togiolaina Oe”

O le Pa’ū o Atamu ma Eva na folasia mai ai luitau la te lei oo i ai i le Faatoaga o Etena. Sa vavaeeseina i laua mai le afioaga o le Atua ma o le a oo ai nei i le agasala, oti faaletino, ma isi faigata o le olaga faitino. Peitai, na saunia e lo tatou Tama oi le Lagi alofa se Faaola e faatoilalo ai aafiaga o le Pa’ū. O lenei lesona e mafai ona fesoasoani i tagata aoga ia lagonaina le olioli o le togiolaina mai le Pa’ū e ala i le Togiola a Iesu Keriso.

Sauniuniga a le tagata aoga: Valaaulia tagata aoga e vaavaai mo aafiaga o le Pa’ū o Atamu ma Eva o siomia atoa ai i latou. O nei mea e mafai ona aofia ai le fanau mai, oti, tino faaletino, agasala, matelaina, ma’i, ma isi mea faapena. Fai atu i le vasega e mafaufau pe mafai faapefea e Iesu Keriso ona fesoasoani i aafiaga taitasi latou te faailoa mai.

Gaoioiga e ono Mafai ona Fai e Aoao Ai

O lo tatou manaomia ai o se Faaola

Amata le vasega e ala i le fesoasoani i tagata aoga ia malamalama i lo tatou manaomia ai o le Togiola a Iesu Keriso. O se tasi o auala e mafai ona e faia ai lenei mea o le faaaogaina lea o le manatu lenei, e sii mai le lauga “O Le Togiola a Iesu Keriso” (Tad R. Callister, Liahona, Me 2019, 85). Faaali atu se ata o se tasi ua pa’ū mai se vaalele, ma valaaulia tagata aoga e talanoaina mea nei:

Manatu faapea ua e pa’ū i fafo o se vaalele, e faitau afe futu i le ea, e aunoa ma se parasuti po o se isi lava masini.

• O le a se mea e mafai ona e faia e taumafai ai e faatelegese lou pa’ū?

• O le a se faamoemoe o le a ia te oe e te ola ai?

I se faatusatusaga, mafaufau faapea ae e te lei pa’ū ese mai le vaalele, sa mafai e se uo ona tuu se parasuti i ou luga.

• O le a sou lagona o le a ese e uiga i lou pa’ū?

• O le a sou lagona e uiga i lau uo?

  Ina ia fesoasoani i tagata aoga e faafesootai le talanoaga na sei mavae atu i lo tatou manaomia o le Togiola a Iesu Keriso, e mafai ona latou talanoaina fesili nei ma se paga. Afai na fatuina e tagata aoga ni tamaitusi e uiga i aafiaga o le Pa’ū i le lesona talu ai, e mafai ona e valaaulia muamua i latou e iloilo puupuu nei tamaitusi. Afai e lei fatuina e tagata aoga ni tamaitusi, e mafai ona e fetuunaia gaoioiga e faasino i ai.

• E mafai faapefea ona tatou faatusatusaina lenei talafaatusa i le Pa’ū o Atamu ma Eva ma le matafaioi o le Togiola a Iesu Keriso i le fuafuaga a le Tama Faalelagi?

• O a nisi o aafiaga o le Pa’ū tatou te manaomia ai le fesoasoani a Iesu Keriso e faatoilalo ai?

  Pe a manaomia ai, faamanatu i tagata aoga ona o le Pa’ū, ua tatou oo uma ai i le oti faaleagaga. O lona uiga ua tatou fananau mai i se lalolagi ua vavaeese mai le afioaga o le Atua ma ua tatou faia le agasala, lea foi e vavaeeseina ai faaleagaga i tatou mai ia te Ia. Ona o le Pa’ū, ua tatou feagai ai foi ma faigata, ma’i, vaivaiga, ma iu ai i le oti faaletino.

  Valaaulia tagata aoga e mafaufau loloto i mea nei:

• O fea o nei faamatalaga e moni faatatau ia te oe?

  1. Ou te le iloa pe aisea ou te manaomia ai le Faaola.

  2. Ou te malamalama pe aisea ou te manaomia ai le Faaola, ae ou te le manatu e mafai ona ou faamatalaina atu i se isi tagata.

  3. E mafai ona ou faamatala atu lo tatou manaomia ai o le Faaola i se isi tagata.

  4. Ou te lagonaina le alofa ma le lotofaafetai mo Iesu Keriso ma mea ua Ia faia mo au.

Fautuaina le vasega e valaaulia le uunaiga a le Agaga Paia e ala i le auai atoatoa i le lesona atoa.

O Le Togiola a Iesu Keriso

I le avea ai o se vaega o le Pa’ū, sa tatau ai ona tuua e Atamu ma Eva le Faatoaga o Etena. Sa faaauau pea ona faamanuiaina i laua e le Alii e ala i le saunia o lavalava (tagai Mose 4:27) ma tuuina atu poloaiga e fesoasoani ia i laua e faatoilalo ai le Pa’ū.

Mafaufau e faaali atu le ata i le amataga o lenei lesona ma faitau faatasi o se vasega ia fuaiupu nei. Taofi mai lea taimi i lea taimi ina ia valaaulia tagata aoga e faasoa mai mea ua latou aoaoina. Mo se faataitaiga, a uma ona faitauina o fuaiupu 5–7, e mafai ona latou talanoaina pe faapefea e le ofoina atu o ulua’i manu o a latou lafu ona faatusa i le taulaga a Iesu Keriso. Pe e mafai foi ona e fesili i tagata aoga po o a mea ua latou aoao mai i le faataitaiga a Atamu o le usiusitai ma pe mafai faapefea ona latou faaaogaina lenei faataitaiga i o latou lava olaga.

Faitau le Mose 5:5–9, ma vaavaai mo mea na poloaiina e le Atua.

• O le a le mea na aoaoina e Atamu ma Eva mai le agelu ma le Agaga Paia?

  E mafai ona faailoa mai e tagata aoga e faapea, e ala i le Togiola a Iesu Keriso, e mafai ai ona togiolaina i tatou mai le Pa’ū. Mafaufau e valaaulia le vasega e maka ia fasifuaitau i le fuaiupu 7 ma le 9 lea o loo aoao atu ai lenei upumoni. E mafai ona e faamalamalama atu e faapea o le togiolaina o lona uiga o le laveaiina po o le faasaolotoina.

  Ina ia fesoasoani i tagata aoga ia faaloloto lo latou malamalama i lenei upumoni, faaali atu faatonuga nei ma tuu atu i tagata aoga pepa e tufa atu o loo i lalo. E mafai ona e tuuina tagata aoga i ni vaega taitoatolu ma valaaulia tagata taitasi i totonu o le vaega e suesue se vaega e ese mai o le pepa e tufa atu. Ona mafai lea e tagata aoga ona faasoa atu i a latou vaega mea na latou aoaoina ma fatu faatasi le itulau e sosoo ai i a latou tamaitusi. (Manatua: Lesona 21: “Iloilo Lou Aoaoina 1” o loo fautuaina mai ai e faasino tagata aoga i tamaitusi latou te fatuina i lenei gaoioiga e fesoasoani ai ia i latou e faamatala le matafaioi a Iesu Keriso i le avea ai ma o tatou Togiola.)

1. I totonu o lau tamaitusi, faailoga le itulau taumatau (avanoa) “O Le Togiola a Iesu Keriso.”

2. Suesue i anomea o i le pepa e tufa atu e iloa ai pe faapefea ona laveaiina i tatou e le Togiola a Iesu Keriso mai aafiaga o le Pa’ū. Atonu na e lisiina aafiaga o le Pa’ū i le itulau talu ai o lau tamaitusi.

3. I luga o le itulau fou o lau tamaitusi, tusi ai se fuaiupu se tasi pe lua e aotele ai mea ua e aoaoina mai vaega taitasi o le pepa e tufa atu. Saili le fesoasoani mai le Agaga Paia e iloa ai pe faapefea ona fesootai nei aoaoga ia te oe.

Mafaufau e valaaulia ni nai tagata aoga e faasoa mai ni mea na latou tusia ia latou tamaitusi. E mafai e isi tagata aoga ona faaopoopo mea na latou aoaoina mai a latou uo i le vasega i a latou tamaitusi.

O le olioli o le togiola

Valaaulia tagata aoga e faaigoa le faavaa i tua o a latou tamaitusi “O Le Olioli o Lo’u Togiolaina.” Fautuaina i latou e kopi le faamatalaga lenei i luga o lena itulau, tuu se avanoa e tusi ai i lalo ifo.

Na aoao mai Peresitene Russell M. Nelson:

A oo ina mafai ona tatou lagonaina le galue ai o le Togiola a le Faaola i o tatou olaga, o le a faatumulia i tatou i le olioli. (“Olioli ma le Ola ai Faaleagaga,” Liahona, Nov. 2016, 84).

Faitau le Mose 5:10–11, ma vaavaai mo mea na maitauina e Atamu ma Eva e uiga i taunuuga o le Pa’ū ma le Togiola a le Faaola.

• O le a se mea e tulaga ese ia te oe mai a laua upu?

Tuu atu i tagata aoga se taimi e faamaea ai le itulau faaiu o a latou tamaitusi, lea e mafai ona latou faia i le tusia o se lomiga patino o le Mose 5:10–11. E pei o Atamu ma Eva, e mafai ona latou tusia ni mafuaaga na latou maua mo le lagonaina o le olioli ona o lo latou Togiola.

Mafaufau e faaiu i le valaaulia ai o ni nai tagata aoga e faasoa mai mea na latou tusia.

O Punaoa Faaopoopo

E faapefea ona tatou faatoilaloina le oti faaleagaga?

Na aoao mai Elder D. Todd Christofferson o le Korama a Aposetolo e Toasefululua e faapea:

E faatoilaloina ai e tagata uma le oti faaleagaga e ala i le toe aumaia o i latou i le afioaga o le Atua ina ia faamasinoina. Na fetalai Iesu, “E pei ona sii a’e o a’u i [luga o le satauro] e tagata ia faapea foi ona sii a’e i luga tagata e le Tama, e tutu i ou luma, e faamasinoina i a latou galuega” (3 Nifae 27:14). O i latou ua faamamaina mai le agasala o le a tumau pea ma le Atua i le malo faalelagi, ae o i latou e le i salamo ma lē mamā e le mafai ona mau faatasi ma se Atua paia, ma a uma le Faamasinoga e tatau ona latou o ese ma faapena ai ona toe mafatia i le oti faaleagaga. O nisi taimi e faasino ai i lenei mea o se oti faalua po o le mafatia i le oti faaleagaga mo se taimi lona lua. (Tagai Helamana 14:15–18.) (“Togiolaina,” Liahona, Me 2013, 112, endnote 3)

Mose 4:27. O le a le sootaga i le va o “ofu pa’u manu” ma le Togiola a Iesu Keriso?

Ua faamatala mai e tusitusiga paia tagata o e tutu i le afioaga o le Atua ma agasala e lei foiaina o loo tutu i Ona luma i lo latou “le lavalava” (2 Nifae 9:14; Mamona 9:5).

Na faasoa mai Peresitene Russell M. Nelson o le ala faafaatusa e “ufitia” ai i tatou e le Togiola a Iesu Keriso:

I le faa-Eperu, o le upu faavae mo le togiola o le kaphar, o se veape o lona uiga “ia ufiufi” po o le “ia faamagalo.” E taulalata atu i ai le upu faa-Aramaika ma le faa-Arapi o le kafat, o lona uiga “o se opo felatai.” …

Ou te tagi ona o lou olioli pe a ou mafaufau i lona taua atoa. O le faaolaina o le togiolaina lava lea- taliaina i se opo felatai ma le Atua, faatasi ma foliga e le gata o Lana faamagaloga, ae faapea foi lo tatou tasi i le loto ma le mafaufau. (”O Le Togiola,” Ensign, Nov. 1996, 34)

Gaoioiga Faaopoopo e Aoao Ai

Faatusa o Iesu Keriso

Ina ia fesoasoani i tagata aoga ia malamalama i le Mose 5:5–7, valaaulia i latou e faailoa mai mea e tutusa ai le taulagaina e Atamu ma Eva o ulua’i lafu ma le taulaga a Iesu Keriso. E mafai ona latou sueina le “Tamai Mamoe a le Atua” i le Taiala i Tusitusiga Paia po o le “Iesu Keriso, Tamai Mamoe a le Atua” i le Taiala i Tusitusiga Paia. Pe e mafai foi ona e valaaulia i latou e sailiili i fuaitau nei:

Isaia 53:7

Ioane 1:36

Kolose 1:13–18

1 Peteru 1:18–20

Kaino ma Apelu

Afai e te lagona e mafai ona manuia tagata aoga mai le suesueina o le tala ia Kaino ma Apelu, mafaufau e faaali atu le ata lenei. Faamalamalama atu o Kaino ma Apelu o fanau a Atamu ma Eva (tagai Mose 5:16–17). Sa oo ina ita Kaino i lona uso o Apelu ma fasiotia o ia.

Valaaulia tagata aoga e suesue i paga le Mose 5:18–33 . E mafai e se tasi tagata aoga ona vaavaai mo filifiliga na faia e Kaino na taitai atu ai i le fasiotia o lona uso. E mafai e le isi tagata aoga ona vaavaai mo faamaoniga faapea sa alofagia Kaino e ona matua ma le Alii.

• O a ni mea ua e aoaoina e uiga i le alofa mutimutivale e leai se tuaoi o le Alii?

• O le a se mea na e aoaoina e uiga i taunuuga o le teenaina o le valaaulia a le Alii ia salamo?

(Manatua: E mafai ona e faamalamalama atu e faapea ona o le amioleaga o Kaino, sa ia maua ai se fetuu e aofia ai le “tapunia mai luma o le Alii” [Mose 5:41]. Sa tuu foi se faailoga i luga o Kaino [tagai Mose 5:39–40]. E le tatau ona tatou taumatemate e uiga i faamatalaga o lenei faailoga po o le taumatemate e faapea o le fetuu na mauaina e soo se tasi ae vagana ai o Kaino.)