Mose 1; Aperaamo 3: Lesona 4

Mose 1:1–11

“Ua ia te A’u se Galuega mo Oe … Lo’u Atalii”

I se mauga maualuga “sa vaai faafesaga’i lava [Mose] i le Atua, ma sa talanoa ma Ia” (Mose 1:2). Na ta’u atu e le Atua ia Mose, “O oe o lo’u atalii” (Mose 1:4) ma “Ua ia te a’u se galuega mo oe” (Mose 1:6). O le faamoemoega o lenei lesona o le fesoasoani lea i tagata aoga ia lagona o i latou o fanau a le Atua ma ua ia te Ia se galuega mo i latou e fai.

Sauniuniga a le tagata aoga: Valaaulia tagata aoga e mafaufau loloto pe tusi mea latou te talitonu o lo latou faamoemoega i le olaga.

Gaoioiga e Mafai ona Fai e Aoao Ai

O se mea mo oe e te faia

Tusi i luga o le laupapa, “ (Lou igoa), e i ai se mea ou te manao e te faia.” Fesili i le vasega pe o a ni o latou lagona pe a ta’u atu e se tasi ia i latou se mea latou te mananao latou te faia. Mafaufau e fai atu fesili nei.

• Pe ese sou lagona e faalagolago i le tagata e fesili mai? Aisea pe aisea foi e leai ai?

• O le a sou lagona pe afai o le Atua o loo fetalai mai ia te oe? Aisea?

  Valaaulia tagata a’oga e tali fesili nei i a latou api talaaga mo tusitusiga paia.

• E te talitonu e i ai se galuega a le Atua mo oe i lenei olaga? Aisea pe aisea foi e leai ai?

• O le a le lelei o lou lagona ai ua e iloa le mea e finagalo le Atua e te faia?

• O le a sou manatu o le a se mea e tatau ona e iloa e uiga i le Atua ma oe lava ia mo lena galuega ina ia faaosofia oe e fai?

A o suesue e tagata aoga le Mose 1 i le lesona lenei, valaaulia i latou e saili le fesoasoani e ala i le Agaga Paia ia iloa atili e uiga ia i latou lava, le Atua, ma mea e finagalo o Ia latou te faia i lenei olaga.

O le faataitaiga a Mose

Valaaulia tagata aoga e saili le tusi a Mose i le Penina Tau Tele. Faamalamalama atu e faapea, na faaali mai e le Atua le Tusi a Mose e ala mai i le Perofeta o Iosefa Samita a o ia galue i le faaliliuga musuia o le Kenese 1 e oo i le Kenese 6:13. O loo i ai upu na poloaiina e le Atua ia Mose e tusifaamaumau (Mose 1:40).

Mafaufau e faaali atu se ata o Mose e pei o nei.

• O le a se mea ua e iloa e uiga ia Mose ma lona olaga?

  Afai e manaomia, faamalamalama atu e faapea a o lei faatinoina e le Alii ia vavega e ala ia Mose e taitai ese ai lona nuu mai le nofopologa, sa fanau mai Mose o se tagata Isaraelu (o se tasi o le nuu o le feagaiga a le Atua) ae sa vaetamaina e se aiga tupu o Aikupito. Na iu lava ina tatau ona ia sola ese mai Aikupito i se laueleele fou e faasao ai lona ola, ma tuua ai le aiga e tasi lava na ia iloaina.

• Afai sa e i ai i le tulaga o Mose, o a ni ou manatu e ono i ai e uiga i le faamoemoega mo lou olaga?

I se taimi ina ua mavae le sola ese o Mose mai Aikupito, sa faaali atu le Faaola ia Mose “faafesaga’i lava” (Mose 1:2). O Iesu Keriso, o lē e tasi ma le Tama Faalelagi, na fetalai atu ia Mose e faapei o Ia o le Atua le Tama. O le mea lea, e mafai ai ona tatou faitauina nei fuaiupu ina ia malamalama atili ai i le Tama ma le Alo. E tele mea na aoaoina e Mose e uiga i le Tama Faalelagi ma Lona sootaga ia te Ia lea na taitai atu ai o ia e faia se galuega taua. Ina ia fesoasoani i tagata aoga e iloa mea na aoaoina e Mose, tusi le siata lenei i luga o le laupapa. I lenei gaoioiga, e mafai e tagata aoga ona kopi le siata i a latou api talaaga mo suesuega pe faamaea o se vasega i luga o le laupapa.

Tama Faalelagi ma Iesu Keriso	Mose

Faitau le Mose 1:1–11, ma mafaufau pe faape’i le i ai o lenei aafiaga. I luga o le siata, tusi ai mea o loo aoao mai e fuaiupu e uiga i le Tama Faalelagi, Iesu Keriso, ma Mose.

O se isi auala e suesue ai nei fuaiupu o le faaali atu lea o le vitio “O A’u o se Atalii o le Atua” mai le faailo taimi 0:00 i le 2:49. A uma le vitio, e mafai ona e valaaulia tagata aoga e faitau ia fuaiupu, ma vaavaai mo faamatalaga taua po o auiliiliga e le’i i ai i le vitio.

Valaaulia tagata aoga e faasoa mai mea na latou maua i tusitusiga paia a o latou faamaeaina le siata ma pe aisea e ono taua ai pe anoa ia i latou. Afai e manaomia, fai atu fesili nei:

• O le a se mea na tulaga ese ia te oe e uiga i le Tama Faalelagi ma Iesu Keriso? Aisea?

  A o fefaasoaa’i tagata aoga, vaavaai mo auala e faamamafa atu ai le silisiliese o le Atua. E mafai ona e fai atu i le vasega e ta’u mai fasifuaitau o loo faamamafa mai ai Lona mana.

• O le a le mea na ta’u atu e le Atua ia Mose i fuaiupu 4, 6–7 e faatatau foi ia te oe?

  Atonu e faailoa mai e tagata aoga se upumoni e pei o le: O i tatou o fanau a le Atua ma ua ia te Ia se galuega mo i tatou e fai. Mafaufau e valaaulia tagata aoga e tusi lenei upumoni ia latou tusitusiga paia pe faailoga fuaitau o loo aoao mai ai.

• E faapefea e le iloaina o le silisiliese o le Atua ona atili anoa ai le avea o oe o Sona atalii/afafine?

• E mafai faapefea e le malamalama e faapea, o i tatou o fanau a le Atua ona fesoasoani tatou te malamalama ai i lo tatou faamoemoega po o ni faamoemoega i lenei olaga?

Manatua: Atonu e aoga le iloa e faapea, i le lesona e sosoo ai i le Mose 1:12–26, o le a suesue ai e tagata aoga le ala na tuuina atu ai e le malamalama o Mose i lona faasinomaga o se atalii o le Atua ia te ia le mana e tetee atu ai i faaosoosoga a Satani. Ma le isi, o le lesona i le Kenese 1:26–27 i le vaiaso e sosoo ai o le a fesoasoani i tagata aoga e lagona ai le taua o lo latou faasinomaga ma le gafatia o ni atalii ma afafine o ni matua faalelagi.

O le galuega ua i le Atua mo i tatou

Ina ia fesoasoani i tagata aoga e mafaufau loloto pe o faapefea ona i ai i le Atua se galuega taua mo ana fanau taitoatasi, mafaufau e fai le gaoioiga lenei.

Tusi ni ata faafasilaau se tolu i lau api faamaumau mo suesuega. Aoao e uiga i le galuega na i ai i le Atua mo tagata taitoatasi i faataitaiga nei ma faaigoa ia ata faafasilaau. Ona tusi lea o tali i fesili nei i autafa po o lalo ifo o ata taitasi.

1. Mose. Su’e le “Mose“ i le Bible Dictionary po o le Taiala i Tusitusiga Paia.

2. O Girish (o se alii na fanau ma ola a’e i Nepale o lē sa mauaina le talalelei ma iu ai ina siitia atu i Iuta). Faitau le faamatalaga lenei pe matamata i le “E Ia te A’u se Galuega mo Oe” (10:25) mai le faailo taimi 0:18 i le 1:12.

I ni tausaga mulimuli ane, ina ua silia ma le 1,500 tagata sulufai mai tolauapiga i Nepale na toe masii atu i Iuta, sa musuia Girish e fesoasoani. Faatasi ai ma le lelei o lana gagana faa-Nepale ma le malamalama faaleaganuu, sa avea Girish ma faamatalaupu, faiaoga, ma se faufautua. Sa faatulagaina se paranesi mo le gagana Nepale, ma sa avea mulimuli ane Girish ma peresitene o le paranesi. Sa avea foi o ia o se tufuga aao i le faaliliuina o le Tusi a Mamona i le faa-Nepale. (John C. Pingree, Jr., “Ua ia te A’u Se Galuega mo Oe,” Liahona, Nov. 2017, 32)

1. O se tuafafine lotovaivai. lle vaega lenei.

I se tasi aso, sa aioi atu ai se tamaitai lotovaivai, “Le Alii e, o le a la’u auaunaga patino?” Sa Ia tali mai, “Maitau isi tagata.”… Talu mai lena taimi, sa ia maua le olioli i le maitauina o i latou o e faagaloina i le tele o taimi, ma sa galue le Atua e ala ia te ia e faamanuia ai le toatele. (John C. Pingree, Jr., “Ua ia te A’u Se Galuega mo Oe,” Liahona, Nov. 2017, 33)

E mafai ona e suia le tala ia Girish po o le tuafafine lotovaivai i se isi faataitaiga o aso nei e te iloa.

Atonu e fesoasoani le faaali atu o fesili nei i luga o le laupapa.

• O le a le mea na faia e le tagata e fesoasoani ai i isi ma aumai i latou ia Iesu Keriso?

• Aisea e finagalo ai se Atua alofa ia i latou ia faia lenei galuega?

• Na faapefea ona latou saunia faapitoa e fesoasoani? Pe na faapefea ona latou fesoasoani i se auala tulaga ese pe patino?

A o faasoa mai e tagata aooga mea na latou maua, vaavaai mo auala e faamanino atu ai e le o galuega uma e finagalo le Alii tatou te faia e tetele pe maoae, ae e taua i taimi uma i le Alii ma i latou o Ana fanau tatou te auauna atu i ai. O galuega ma tiutetauave faapitoa e ono tuuina mai e le Alii ia i tatou o le a fesoasoani ia i tatou e auai i Lana galuega o le faaolataga ma le faaeaga (tagai Mose 1:39). Atonu foi e i ai ni galuega e finagalo o Ia e taulai atu i ai i le taimi nei, ae e mafai ona Ia talosagaina i tatou e taulai atu i se mea e ese i le lumanai.

O se galuega mo oe

Tusi se ata faaopoopo faafasilaau ma tusi lou igoa i lalo ifo.

Sa molimau mai Elder John C. Pingree Jr. o le Fitugafulu:

Na tautino atu e le Atua ia Mose, “Ua ia te A’u se galuega mo oe” (Mose 1:6). Pe ua i ai se taimi na e manatunatu ai pe e i ai se galuega a le Tama Faalelagi mo oe? Pe o i ai ni mea taua ua Ia saunia mo oe---ma e patino lava mo oe---e faataunuuina? Ou te molimau atu o le tali o le ioe! (“E I Ai Sa’u Galuega mo Oe,” Liahona, Nov. 2017, 32)

Mafaufau e valaaulia tagata aoga e fai se tatalo le leoa ma saili faaaliga mai le Alii a o latou taliina nisi po o fesili uma nei e faataamilo i le ata faafasilaau o i latou lava. Atonu e fesoasoani le faamalamalama atu e faapea e le ono maua e tagata aoga ni tali atoatoa i nei fesili i le vasega. Valaaulia i latou e faaauau pea ona mafaufau loloto ma tatalo e uiga ia i latou.

• O le a se mea ua uma ona ou faia atonu o se vaega o le galuega a le Atua mo au i lenei olaga?

• O le a se mea ua uma ona faaali mai e le Atua ia te au e uiga i mea e finagalo o Ia ou te faia? (O lenei mea e mafai ona aofia ai faamanuiaga faaleperisitua, valaauga, faamanuiaga faapeteriaka, ma isi taimi o faaaliga.)

• O le a se auala e ono finagalo ai le Atua ia te au lava ia e faia Lana galuega i lo’u aiga? i la’u uarota po o le paranesi?

• E ono faapefea ona finagalo le Atua ia ou saunia e fesoasoani i isi i le taimi nei po o le lumanai?

Afai e le patino tele, valaaulia tagata aoga e faasoa mai ni uunaiga po o ni lagona na latou maua a o latou suesueina i le asō. Mafaufau e faasoa atu lau molimau ma lagona e uiga i mataupu faavae o i lenei lesona.

O Punaoa Faaopoopo

O ai o loo talanoa ia Mose i le Mose 1: Tama Faalelagi po o Iesu Keriso?

Na saunoa Peresitene Iosefa Filitia Samita (1876–1972):

I tusitusiga paia uma, o mea o loo ta’ua ai le Atua ma mea ua Ia faaali mai ai, o Ieova lea sa fetautalatalaa’i ma Aperaamo, ma Noa, Enoka, Mose ma perofeta uma lava.

I le tuuina mai o faaaliga, e fetalai mai lo tatou Faaola i nisi taimi mo ia lava, a o isi taimi e mo le Tama, ma i le suafa o le Tama, e peiseaī o ia o le Tama, ae o Iesu Keriso lava, lo tatou Togiola o lē o loo tuuina mai le savali. (Doctrines of Salvation, comp. Bruce R. McConkie, 3 vols. [1954–56], 1:27–28)

Aisea e taua ai le iloa o i tatou o fanau a le Atua?

Na aoao mai Peresitene Russell M. Nelson:

A’u uo pele, o outou moni lava o fanau agaga a le Atua.

Ou te popole lava i lo outou faafofoga soo i lenei upumoni ua foliga mai ua na o se faaupuga nai lo o se upumoni paia. Ae, o le auala e te mafaufau ai po o ai moni oe e aafia ai toetoe o faaiuga uma e te faia. (“Filifiliga mo le Faavavau” [faigalotu i le lalolagi atoa mo le autalavou matutua, Me 15, 2022], broadcasts.ChurchofJesusChrist.org)

Mose 1:10. O le a le uiga o le “tagata o se mea noa”?

Na aoaoina e Mose e faapea, pe a faatusatusa i le Atua, “o le tagata o se mea noa“ (Mose 1:10). Na fautuaina foi i tatou e le Tupu o Peniamina ia “manatua pea lava pea, le silisiliese o le Atua, ma lo outou lava noa” (Mosaea 4:11).

Sa aoao mai e Peresitene Dieter F. Uchtdorf, a o avea ma sui o le Au Peresitene Sili:

O se faamatalaga faafeteenai lenei a le tagata: a faatusatusa atu i le Atua, o le tagata o le mea noa; peitai o i tatou o mea uma lava ia i le Atua. …

Uso e ma tuafafine, o le Tagata e pito sili ona malosi i le atulaulau o le Tama lea o lou agaga. E silafia e Ia oe. E alofa o Ia ia te oe i se alofa atoatoa. …

E silasila mai le Atua ia te oe e le gata o se tagata soifua i luga o se paneta itiiti, ma o le e ola mo se vaitau puupuu—E silasila mai o Ia ia te oe o Lona atalii/afafine. E silasila mai o Ia ia te oe o le tagata e gafatia ma faamoemoeina e avea ai oe. E finagalo o Ia ia e iloa e taua oe ia te Ia. (“E Taua Oe ia te Ia,” Liahona, Nov. 2011, 20, 22)

Gaoioiga Faaopoopo e Aoao Ai

O se isi amataga

Mo se isi amataga, fai atu i tagata aoga e faasoa mai pe o le a so latou manatu i lagona o le toatele o le autalavou e uiga i faamatalaga nei ma pe aisea.

• Ou te talitonu i le tagata ua ou i ai.

• Ou te iloa lo’u faamoemoega i le olaga.

Valaaulia tagata aoga e faasoa mai pe aisea e mafai ai ona faigata le lagona mautinoa ma le iloaina o lo latou faamoemoega. Fautuaina tagata aoga e mafaufau loloto pe o a ni o latou lagona patino ma saili le fesoasoani a le Alii e tali ai nei fesili a o latou suesueina lenei lesona.

”Ua ia te a’u se galuega mo oe” (Mose 1:6)

Mo se isi auala e fesoasoani ai i tagata aoga e mafaufau loloto po o le a le galuega a le Atua mo i latou e fai, mafaufau e valaaulia i latou e sui o latou igoa mo le igoa o Mose i le fuaiupu 6. Afai e te manao ai, e mafai foi ona e valaaulia i latou e faitau le Iosefa Samita—Talafaasolopito 1:33, ma vaavaai mo le upumoni lava e tasi mo Iosefa Samita ma suitulaga foi i o latou igoa iina. Atonu e te ta’u atu e faapea, e lei iloa e Iosefa po o le a lana galuega i le taimi lea, ae sa faaali mai e le Alii ia te ia i sina mea itiiti ma i sina mea itiiti.

Faasoa atu ma i latou le upusii lenei mai ia Peresitene Russell M. Nelson.

Ona o loo i ai se fuafuaga silisili o le faaolataga na faia e le Tama Faalelagi, pe le o manino mai ai ea o loo i ai foi sou taunuuga paia?

Aua ne’i e faia se measese e uiga i ai: O lou gafatia e paia. Faatasi ai ma lau sailiga filiga, o le a avatu e le Atua ia te oe nai faali’ali’aga o le tagata e ono mafai ona e avea ai oe. (“Filifiliga mo le Faavavau” [faigalotu i le lalolagi atoa mo le autalavou matutua, Me 15, 2022])

O se faataitaiga faaopoopo o le faia o le galuega a le Atua:

Afai e te manao e faasoa atu se faataitaiga faaopoopo o le faia o le galuega a le Atua, pe suitulaga ai mo se tasi [faataitaiga] i le lesona, mafaufau e faasoa atu le tala ia Priscilla Sampson-Davis i Kana (“Ina Ia Mafai Foi e i Latou Ona Auai i Pesega,” Talafaasolopito i le Lalolagi Atoa, Kana).