Mataio 8; Luka 7:11–17

O Le Mana Faavavega o Iesu Keriso

O se alii talavou o loo aui i le ofu o le falelauasiga o lo o nofo i luga i se moega faataavalevale. O lo o tuu e Iesu lona aao i luga o lona tauau, o loo vaaia ona soo i tua atu.

O se tasi o auala na faaalia ai e Iesu Lona mana e ala i faamalologa faavavega, e aofia ai le faatuina mai o le tama a le fafine ua oti lana tane mai le oti. O le faamoemoe o lenei lesona o le faamalosia o lou faatuatua i le mana o Iesu Keriso e faia ai vavega i o tatou aso ma i lou olaga.

Faaaogaina o mataupu aoaoina. A o e saunia lesona taitasi ma e suesue i le poloka mau, ia toe iloilo mataupu aoaoina faatasi ma le agaga tatalo. A o e faia lea sauniuniga, e mafai e le Agaga Paia ona fesoasoani ia te oe e fetuunai le lesona i manaoga o au tagata o le vasega. E mafai ona e filifili e faaaoga fautuaga uma po o se vaega foi o fautuaga faafaiaoga mo se poloka mau, pe e mafai foi ona e fetuunaia manatu fautuaina ia tusa ai ma manaoga ma tulaga o lau vasega.

Sauniuniga a le tagata aoga: Valaaulia tagata o le vasega e fesili i tagata o o latou aiga ma uo po o a ni mea na tutupu i o latou olaga ma i totonu o le Ekalesia ua latou manatu o ni vavega. Faamanatu i tagata o le vasega e ui ina ofoofogia isi vavega, a o isi e sili atu ona maaleale.

Gaoioiga e Ono Mafai Ona Aoao Ai

O Vavega

Mafaufau e tusi le faauigaga lenei i luga o le laupapa ma faaali ata o nisi o mea na tutupu faavavega i tusitusiga paia (tagai i ata ua aumai faatasi ai).

O Iesu o lo o faamagaloina ma faamaloloina se tagata.

Faailoaina o Iesu o lo o faamalolo setagata tauaso. Mo le faaaogaina o le Ala ata Mamona.

O se vavega o “se mea uiga ese na tupu e ala i le mana o le Atua. … E tatau ona i ai le faatuatua ina ia mafai ai ona faaalia mai vavega” (O Le Taiala i Tusitusiga Paia, “ Vavega,” scriptures.ChurchofJesusChrist.org).

• O a nisi o vavega e aupito sili ona e fiafia i ai o loo tusia i tusitusiga paia? Aisea?

• O a ni mea ua e aoao i ai e uiga ia Iesu Keriso mai nei vavega?

Pe a talafeagai tulaga o i ai, o tagata aoga e lē i faia le gaoioiga sauniuni a o lē i faia le vasega, e mafai ona valaaulia e latou te lafoina se feau tusitusi i se tagata o o latou aiga po o se uo e fesili i ai po o a ni mea na tutupu latou te manatu o ni vavega. E mafai ona faasoa mai e tagata o le vasega nei tali pe a lata i le faaiuga o le lesona.

A o soifua le Faaola, na Ia faia vavega e tele. A o e suesue i nisi o nei vavega i lenei lesona faapea foi i le faagasologa o lenei vaiaso, manatunatu loloto pe faapefea ona e talia fesili nei:

• O le a sou malamalama e uiga i vavega?

• O a ni a outou fesili e uiga i vavega?

• O le a se (ni) vavega o lo o e faamoemoe o le a faia e le Atua i lou olaga?

Atonu e te manao e tusi au tali i totonu o lau api talaaga mo suesuega. Saili mo tali o au fesili i lenei vaiaso a o e suesueina vavega na faia e Iesu Keriso.

O a ni mea o loo aoao mai e vavega ia i tatou e uiga ia Iesu Keriso?

O se tasi o tomai suesue i tusitusiga paia e mafai ona fesoasoani ia te oe e te amata iloaina ai Iesu Keriso o le vaai lea i talaatu o mea o loo Ia faia ma mafaufau loloto i le agaga tatalo po o a mea o faaalia mai i Ana galuega e faatatau i Ona uiga. A o e faitau, mafaufau e fai ni fesili faapea “O le a se mea ua ou aoao iai e uiga i faamoemoega, mea e faamuamua, ma uiga o le Faaola mai i mea o loo Ia faia ma fetalai i ai?”

Faitau i le Luka 7:11–17, ma saili mo ni mea patino i le tala o lo o aoaoina ai oe e uiga ia Iesu Keriso. Mo se faataitaiga, maitau totoa mea o fesoasoani atu ai le fuaiupu 13 e te malamalama ai pe aisea na Ia faia ai lea vavega. Atonu foi e te manao e matamata i le vitio “Widow of Nain” (2:22), o lo o maua i le ChurchofJesusChrist.org, a o e suesue i lenei tala.

• O le a se mea ua e aoao iai e uiga i faamoemoega, mea e faamuamua, ma uiga faaleatua o le Faaola mai i mea na Ia faia ma fetalai i ai a o Ia faatinoina lenei vavega?

• E mafai faapefea ona fesoasoani ia te oe i lou olaga i le taimi nei lava mea ua e aoaoina?

Na faia e Iesu le tele o vavega

Filifili se tasi pe siili atu o vavega nei e te suesue iai. Faaauau ona e mataituina mea ua e aoao iai e uiga i le Faaola mai tala nei.

Mafaufau e faaali atu ata nei ma mau faasino. Faasino i ata taitasi a o faitauina leotele le faamatalaga puupuu e faatatau iai. Ona vaevae ai lea o le vasega i ni vaega taitoatolu. Ia tofu le tagata taitasi o le vaega ma tala eseese e suesue iai, ma valaaulia tagata aoga e faasoa ma le latou vaega auiliiliga o le tala sa latou faitauina.

Mataio 8:1–4 ; Mareko 1:40–42 Ua faamalolo e Iesu se lepela.Semanu e tuliesea se lepela mai le faapotopotoga ona o le lepela o se faamai e tiga, e pipisi, ma o nisi taimi ose ma’i oti. O le toatele o tagata e aloese mai le latalata atu i ai pe pai atu ia te ia.

I le avea ai ma tagata o le Ekalesia a Iesu Keriso o le Au Paia o Aso e Gata Ai tatou te talitonu i se sootaga patino ma le Faaola. I le faitauina o le Feagaiga Fou ma le Tusi a Mamona e masani ona ou mafaufau pe faape’i le lagonaina o le pa’i atu o le Faaola ma maua le faamalologa e ala i lona soifua mama. O lenei ata o lo o faaalia ai le tala o lo o maua i le Mataio 8 o le Feagaiga Fou. O le lepela na alu atu ia Iesu sa faatuatua e faapea, afai e naunau iai, e mafai ona ia faamamaina o ia. Faatasi ai ma upu faigofie, “ia mama oe” sa aumaia ai se olaga mai le faavaivai i le faamoemoe. Faamata na faape’ī lena lava taimi? O le tagata fou na faamamaina, o lo o pulatoa atu i fofoga o le Faaola o le lalolagi.

Mataio 8:5–8, 13 Ua faamalolo e Iesu se auauna a le taitai o le toaselau.O se taitai o le toaselau, o se taitaiau o alii pe tusa ma le 100 i le au fitafita a Roma. O le toatele o tagata Iutaia i ona po o Iesu sa inoino i fitafita Roma ona o eseesega o tapuaiga ma ona o i latou o sui o le malo sa faatoilaloina i latou.

O se fitafita Roma o lo o sauniuni mo le taua.

Mareko 5:1–13, 18–20 Ua tuliesea e Iesu temoni mai se tagata sa nofo i le mea o iai tuugamau.Sa iai se tagata sa nofo i le mea o iai tuugamau, o loo tauvalaau ma faamanu’a o ia lava. Ina ua le mafai ona saisai o ia e tagata o le eria i filifili, sa latou alo ese mai ia te ia, ma ua tuulafoai o ia e nofo i le mea o iai tuugamau.

O se Alii ma se agaga leaga - ch.25-1

Valaaulia tagata aoga e talanoa i a latou vaega fesili e pei o nei e fesoasoani ai ia i latou e taulai i le Faaola nai lo na o le mea na tupu faavavega. Ia faamautinoa o malamalama tagata aoga o vavega a Iesu Keriso o loo faaalia mai ai Lona alofa ma le agalelei mo i tatou.

• O le a se mea ua e aoao iai e uiga i faamoemoega, mea e faamuamua, ma uiga faaleatua o le Faaola mai i mea na Ia faia ma fetalai i ai a o Ia faatinoina lenei vavega?

• E mafai faapefea ona fesoasoani ia te oe i lou olaga i le taimi nei lava mea ua e aoaoina?

• O le a se mea e mafai ona e faia pe a ua e lagona le manaomiaina o le fesoasoani a le Faaola?

Vavega i o tatou aso

Pe iai se taimi na e mafaufau ai pe o faatinoina pea e le Faaola vavega i aso nei? E ui ina e lē tele ni tagata ua molimauina nisi o vavega ofoofogia e pei ona tusia i tusitusiga paia, e pei o le vaeluaina o le Sami Ulaula po o le faatuina mai o tagata mai le oti, e taua ona e manatua o lo o tutupu pea vavega i nei ona po. Sa fetalai le Faaola, “o A’u o se Atua o vavega; ma o le a Ou faaali atu i le lalolagi e tutusa lava A’u ananafi, i le asō, ma le faavavau” ( 2 Nifae 27:23).

Sa aoao mai Peresitene Dallin H. Oaks o le Au Peresitene Sili:

Ata aloaia o Peresitene Dallin H. Oaks ia Mati 2018.

E tele vavega o loo tutupu i aso uma i galuega a la tatou Ekalesia ma i olaga o o tatou tagata lotu. E toatele outou ua molimauina vavega, atonu e sili atu nai lo ua outou silafia.

(Dallin H. Oaks, “Vavega,” Ensign, Iuni 2001, 6)

• O a ni mafaufauga po o ni fesili o lo o ia te oe e uiga i le faamatalaga lenei a Peresitene Oaks?

A o lē i tuuina atu fesili nei, mafaufau pe faamanatu i tagata aoga le fautuaga o sauniuniga a le tagata aoga pe valaaulia i latou e siaki mo le tali mai o tagata o o latou aiga po o uo na latou lafoina i ai feau tusitusia i le amataga o le lesona. Lapatai ia i latou e aua nei o latou faasoaina ni auiliiliga e patino tele pe paia.

• O a ni vavega sa faia e le Faaola o se vaega o le Toefuataiga ma i le faagasologa o le galuega a Lana Ekalesia?

• O a ni vavega sa e vaaia pe vaaia foi e tagata e pele ia te oe i o outou olaga?

• O le a se mea ua faaalia mai e nei vavega patino e uiga i le Tama Faalelagi ma Iesu Keriso?

Valaaulia tagata aoga e mafaufau i auala ua faateleina ai lo latou malamalama i vavega a o faagasolo lenei lesona. Valaaulia foi tagata aoga e maitau toto’a auala o lo o latou lagonaina ai aafiaga faavavega a le Alii i o latou olaga. Uunai i latou e saili i musumusuga mai le Agaga Paia e fesoasoani ia i latou ia maua tali o fesili o lo o i ai pea e uiga i vavega.

Manatu ma Talaaga o Faamatalaga

O le a le vavega tupito?

Sa aoao mai Peresitene Dallin H. Oaks o le Au Peresitene Sili:

Ata aloaia o Peresitene Dallin H. Oaks ia Mati 2018.

O nisi vavega e aafia ai tagata e toatele. O le vavega e aupito sili ona faapea o le Togiola a Iesu Keriso—O Lona manumalo i le maliu faaletino ma le faaleagaga mo tagata uma. E leai se vavega e sili atu ona loloto pe sili atu ona maoa’e.

(Dallin H. Oaks, “Vavega,,” Ensign, Iuni 2001, 9)

Pe o tutupu pea vavega maoae e pei o na faamauina i tusitusiga paia i aso nei?

O se tasi o faataitaiga o se vavega mataina o ona po nei lea na faasoa mai e Peresitene Gordon B. Hinckley (1910-2008):

O le ata e afa lona umi o Peresitene Gordon B. HInckley. O lo o faalagolago aao o Peresitene Hinckley i le pito i tua o se nofoa. O le ata o le ata aloaia a le Ekalesia o Peresitene Hinckley talu mai le 1995. O le ata aloaia mulimuli lea o Peresitene Hinckley. Na maliu Peresitene Hinckley i le aso 27 Ianuari 2008.

Sa talosagaina au pe mafai ona ou asiasi atu i se tamaitai o lo o i le falemai ua logo e lona fomai o le a tauaso o ia ma e tasi le vaiaso ona po ai lea o lana vaai. Sa ia talosaga pe mafai ona matou faamanuia ia te ia ma na matou faapena ona fai, ma na ia tautino mai ai lea ua faamaloloina faavavega o ia. … Na ou fai atu ia te ia, “Ou te lē i laveaiina lau vaai. E moni, o le Alii na ia laveaiina lau vaai. Faafetai atu ia te Ia ma ia saga loto faafetai ia te Ia.”

(Aoaoga a Gordon B. Hinckley [1997], 343)

Aisea e le maua ai e tagata vavega uma latou te sailia ma le faatuatua ia Iesu Keriso?

Na saunoa mai Peresitene Dallin H. Oaks o le Au Peresitene Sili:

Ata Aloaia o Peresitene Dallin H. Oaks ia Mati 2018.

E le maua vavega i le fesili atu. … O le finagalo o le Alii e silisili lava lea e le aunoa. E le mafai ona faaaogaina le perisitua a le Alii e faia ai se vavega e le tusa ai ma le finagalo o le Alii. E tatau foi ona tatou manatua e tusa lava pe tupu se vavega, e le tupu i le taimi tatou te mananao ai. Ua aoao mai e faaaliga e faapea, o aafiaga faavavega e tutupu “i lona lava taimi, ma i lana lava ala” ( MF&&F 88:68).

(Dallin H. Oaks, “Vavega,” Ensign, Iuni 2001, 9)

Aisea e mananao ai temoni i le tala o i leMareko 5:11–13 e uluitino i puaa?

Na faamalamalama mai e le Perofeta o Iosefa Samita (1805–44):

Ata pito i luma e afa le umi o le Perofeta o Iosefa Samita le Itiiti, O lo o liliu atu le ulu o Iosefa i autafa i se vaaiga e tolu kuata, o le lima taumatau i luga o le suilapalapa ma lona lima tauagavale o lo o uuina ni pepa. O loo faaalia lona ofuina o se suti enaena pa’auli ma se ofutino paepae ma se fusiua.

Na tatou o mai i lenei lalolagi ina ia tatou maua ni tino ma tuuina atu ma le mama i luma o le Atua i le malo selesitila. O le mataupu faavae sili o le fiafia e aofia ai le i ai o se tino. O le tiapolo e leai se tino, o lona faasalaga lena. E fiafia o ia pe a mafai ona ia mauaina le tino o le tagata, ma ina ua tuliesea e le Faaola sa ia talosaga ina ia uluitino atu i le lafu puaa, ua faaalia ai ua sili atu ia te ia le tino o se puaa nai lo le leai o se tino. O tagata uma ua i ai tino ua i ai le mana i luga atu o i latou o e leai ni tino.

(Aoaoga a Peresitene o le Ekalesia: Iosefa Samita [2007], 211)

Pe o le a tele atu ni vavega e tutupu a o lei toe afio mai le Faaola?

Na molimau mai Peresitene Russell M. Nelson:

Ata aloaia o Peresitene Russell M. Nelson ia Ianuari 2018

O lo tatou Faaola ma le Togiola, o Iesu Keriso, o le a faatinoina ni isi o Ana galuega mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga.

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 96)

Gaoioiga Faaopoopo e Aoao Ai

O Iesu Keriso o le, ma o le a faaauau pea ona avea o se Atua o vavega

Ina ia fesoasoani i tagata aoga ia latou iloa o lo o tutupu pea vavega, mafaufau e valaaulia i latou e suesue i le Mamona 9:11–21 . Valaaulia i latou e saili tali mo fesili nei:

• O a nisi o vavega a Iesu Keriso na faailoa mai e Moronae i fuaiupu nei?

• O le a se fautuaga na ave e Moronae ia i latou e lē o talitonu i vavega?

• Aisea e ono faamuta ai e le Atua le faia o vavega mo Ona tagata?

Tutulieseina o agaga leaga

A uma ona aoao e i ai i le Faaola le mana e tutuli ese ai agaga leaga, e mafai e tagata aoga ona faitau le valoaga a le Tupu o Peniamina i le Mosaea 3:5–6 . Valaaulia i latou e talanoa i le uiga o le mafai e le Faaola ona “tutuli ese tiapolo, po o agaga leaga ua mau i loto o le fanauga a tagata” ( fuaiupu 6). Valaaulia i latou e mafaufau loloto po o iai se mea o lo o taofia ai i latou faaleagaga ua mananao e aveese mai o latou lava loto. Molimau atu i le mafai e le Faaola ona aveese manaoga leaga mai o tatou loto pe a tatou liliu atu ia te Ia ma le faatuatua.