Ua Aoao atu e le Faaola Ona Soo e Fai Galuega Amiotonu
Ata
O Iesu Keriso o loo aoao atu i se motu o tagata. O loo alala Keriso i luga o se auvaemauga papa. O lo o laei o ia i ofu talaloa mumu ma lanumoana. E tasi lona aao o lo o sii i luga. O nisi o faatusa o loo piilima e faaalia ai lo latou tuutooga.
Na faaauau e Iesu Lana Lauga i luga o le Mauga, ma aoao mai e ao ona tatou faia galuega lelei e faafiafiaina ai lo tatou Tama Faalelagi a e lē ina ia maua ai so tatou viiga mai isi tagata. I lenei lesona, o le a e maua ai le avanoa e iloilo ai ou faamoemoega mo le faia o galuega lelei ma filifili ai pe faapefea ona e manao e faaleleia atili oe lava.
O le iloaina ma le malamalama ai i le aoaoga faavae a Keriso. Fesoasoani i tagata o le vasega ina ia “iloa ma malamalama” i aoaoga faavae a Keriso. O le iloaina ma le malamalama ai “o le poto lea o le mafaufau ma le loto.” A oo ina molimau le Agaga i le moni o se mataupu faavae o le talalelei, e tele le avanoa mo tagata aoga e “lagona ai le moni o lena mataupu faavae ma amata ona vaai manino, naunau loloto atili, ma o le a malamalama atoatoa atili ai i o latou loto e uiga i galuega a lena mataupu faavae i o latou olaga.” (Kim B. Clark, “Aoaoina Loloto ma Olioli i le Alii” lauga na fai i le faasalalauga o aoaoga faamasani faaletausaga o le Seminare ma Inisitituti, Iuni 13, 2017])
Sauniuniga a le tagata aoga: Valaaulia tagata o le vasega e mafaufau e uiga i o latou faamoemoega mo a latou faatinoga na fai i le 24 itula a o lei faia le vasega.
Gaoioiga e Ono Mafai Ona Aoao Ai
Manatua: O le Tatalo a le Alii ma fuaitau fesootai o loo iai i le ( Mataio 6:9–15) o le a aoaoina i se lesona e fai i se taimi o i luma o loo taulai i le Luka 11 .
O o tatou faamoemoega
Mafaufau i le faamatalaga lenei: Na toe faalelei e Gustavo le pa a lona tuaoi.
Mafaufau e tusi i luga o le laupapa se ata faafasilaau o se tasi o loo uu se samala. Tusi le faamatalaga i luga o le laupapa i autafa o le ata fasilaau .
Ata
Ata faafasilaau o loo uuina se samala
O le a sou manatu ia Gustavo?
Tapeese le periota o lo o i le faaiuga o le “Na toe faalelei e Gustavo le pa a lona tuaoi,” ae tusi ai le auā … i le faaiuga o le faamatalaga. Fai atu i tagata o le vasega e faauma le faamatalaga i ni mafuaaga eseese atonu na toe faaleleia ai e Gustavo le pa. E mafai ona aofia ai i tali ni fasifuaitau e pei o le, “e agalelei o ia,” “sa ia auai i se galuega fesoasoani na fai i ai lona tina e alu iai,” “na ia manao e faaofo le afafine o lona tuaoi,” “na te lē i manao e saofia atu le taifau a lona tuaoi i totonu o lona fanua,” ma “na ia talepeina le pa a o ita ma ua faatonuina ai o ia e lona tama e alu e toe faalelei.”
Aisea e taua ai faapogai [o a tatou amioga]?
Tatou te faitau i le Mataio 6 e faapea na faaauau e le Faaola Lana Lauga i luga o le Mauga ma aoao mai e uiga i faapogai mo le faia o galuega lelei. Ina ia fesoasoani ia e mafaufau i mafuaaga e te faia ai galuega lelei e pei o auaunaga, fesoasoani i isi, tatalo, ma le auai i seminare, ia faia le gaoioiga lenei.
Fai se siata e tolu ona koluma i lau api talaaga mo suesuega. Faatumu le pito i luga o le siata faapea:
Faaali le siata lenei i luga o le laupapa. Valaaulia tagata o le vasega e tusi i totonu o a latou siata a latou tali i fesili o lo o i le pito i luga o le siata.
O a ni au galuega lelei se tolu na e faia i le vaiaso talu ai? (Lisi le tasi i laina taitasi.)
O a ni mafuaaga na e faia ai ia galuega?
O a ni ou lagona ina ua uma ona e faia nei galuega lelei?
Faitau i le Mataio 6:1–6, 16–18, ma vaavaai mo aoaoga a le Faaola e uiga i o tatou faamoemoega mo a tatou faatinoga amiotonu. O le upu meaalofa e faasino i “faatinoga tuuto faalelotu” ( fuaiupu 1, vaefaamatalaga e), e pei o le foai atu i e matitiva. O le upu tagata pepelo e faasino ia i latou ua fai ma “tagata faafoliga” ( fuaiupu 2, vaefaamatalaga a).
E faapefea ona e aoteleina mea na aoao mai e le Faaola?
Valaaulia tagata aoga e aotele mea na latou faitau iai ma fai atu ni a latou fesili o i ai. A o aotele ai e tagata aoga, atonu latou te tau mai i ni matupu faavae e pei o lenei: Afai tatou te faia ni faatinoga amiotonu e fiafia ai le Tama Faalelagi, o le a Ia aumai faaaliali le taui ia te i tatou. Afai tatou te faatinoina galuega amiotonu ina ia vaaia e isi, o le a tatou le mauaina faamanuiaga faalelagi mo a tatou taumafaiga.Valaaulia tagata aoga naunau e tusi i luga o le laupapa ia mataupu faavae sa latou faailoa mai.
E taua le malamalama o tatalo e fai i nofoaga faitele e lē sese pau a ona e lē o faia “i le mea lilo” ( Mataio 6:6). O le tatalo ma isi faiga faalelotu e mafai ona faatinoina i nofoaga faitele pe afai e faia ma le faamaoni, tuuto, ma le naunau ia viia le Atua. E moni foi lenei manatu e faatatau i le anapogi. O fasifuaitau “mata faanoanoa” ma “ua latou faaleaga o latou mata” i le Mataio 6:16 e faasino i tagata i le taimi o Iesu sa latou faaalialia i foliga i fafo a latou anapogi ina ia iloa mai ai i latou e tagata.
Aisea e te manatu ai e amanaia tele e le Alii o tatou faamoemoega, e oo lava i taimi tatou te faia ai faatinoga amiotonu?
Toe vaai i lau siata ma faatusatusa au mafuaaga mo galuega lelei ua e faia ma mea na aoao mai e le Faaola e pei ona tusia i le Mataio 6 .
Aisea e te manatu ai e tatau ona e “taumafai e tautua mo mafuaaga e sili ona maualuga ma lelei”? (Dallin H. Oaks, “Aisea Tatou Te Tautua Ai?” Ensign, Nov. 1984, 13).
Afai o loo faafaigata i se isi ona galue mo mafuaaga e tonu, o le a se mea e te fautua atu latou te faia?
Na aoao mai Peresitene Dieter F. Uchtdorf, a o iai i le Au Peresitene Sili, e uiga i faamoemoega o le Faaola a o faatino Ana galuega. Matamata i le vitio “E Faatatau i le Faamaoni” mai le faailotaimi 15:34 seia oo i le 16:29, pe faitau le tusiga lea.
Ata
O le ata aloaia o Elder Dieter F. Uchtdorf o le Korama o Aposetolo e Toasefululua, 2006. Valaauina e avea ma Fesoasoani Lua i le Au Peresitene Sili, 3 Fepuari 2008. Na faia se ata aloaia i le 2008 e sui ai le ata na pueina i le 2004.
O le tamalii silisili, sili ona malosi, sili ona ma’ema’e na savalia lenei lalolagi, o le tamalii sili foi lea ona lotomaualalo. Sa Ia faatinoina nisi o Ana auaunaga sili ona faagaeetia i taimi patino, faatasi ai ma ni nai tagata sa iloaina, ia sa Ia faatonuina ia “aua nei tala atu i se tasi” mea sa Ia faia [tagai i le Luka 8:56 ]. Pe a ta’ua o Ia e “lelei” e se tagata, e vave lava ona Ia toe faasino sao atu lea upu vivii, ma tautino atu ua na o le Atua lava e lelei moni [tagai i le Mareko 10:17–18 ]. Ua manino lava e leai se taua o viiga o le lalolagi ia te Ia; e na o le tasi lava Lona faamoemoega ia auauna atu i Lona Tama ma “faia pea lava o mea e lelei ia te ia” [ Ioane 8:29 ]. E ao ina lelei ona tatou mulimuli atu i le faataitaiga a lo tatou Matai.
(Dieter F. Uchtdorf, “E Faatatau i le Faamaoni,” Ensign po o le Liahona, Me 2015, 83)
Mafaufau i faataitaiga o loo faapupula mai ai faamoemoega o le Faaola mo le faia o Ana galuega.
O le a se mea ua faagaeetia ai oe e uiga i nei faataitaiga?
E faapefea e nei faataitaiga ona faateleina lou malamalama i le alofa o le Faaola ma pe aisea ua Ia togiolaina ai a tatou agasala?
Faaali atu fesili nei, ma valaaulia tagata aoga e tali i totonu o a latou api talaaga mo suesuega.
O le a sou lagona e uiga i ou faamoemoega mo le faia o galuega lelei?
O a ni auala e mafai ai e ou faamoemoega mo le faia o galuega lelei ona aafia ai la lua sootaga ma le Tama Faalelagi?
O le a se mea e tasi e mafai ona e faia e mulimulitai ai i le faataitaiga a le Faaola mo le faia o galuega lelei?
Valaaulia ni tagata aoga o loo naunau mai e faasoa mai se mea ua latou tusia pe lagonaina. Tau i tagata aoga o le a iai so latou avanoa i se lesona i se taimi o i luma e iloilo ai pe ua faapefea ona suia o latou faamoemoega mo le faia o galuega lelei talu ona latou suesue i lenei lesona. Mafaufau e molimau atu i mataupu faavae na aoaoina i lenei lesona.
Manatu ma Talaaga o Faamatalaga
O a mafuaaga sa’o mo i tatou e auauna atu ai?
Na aoao mai e Peresitene Dallin H. Oaks o le Au Peresitene Sili e uiga i mafuaaga tonu mo le tautua:
Ata
Ata aloaia o Peresitene Dallin H. Oaks ia Mati 2018.
Na aoao mai e le perofeta o Moronae afai e viia a tatou galuega mo le lelei, e tatau ona faia mo mafuaaga tonu. Afai o se tagata “e ofo atu se meaalofa, pe tatalo atu i le Atua, vagana ai e faia e ia ma le loto faamaoni i ai e leai se aoga ia te ia.
Aua faauta, e le faitauina ia te ia lena mea mo le amiotonu” ( Moronae 7:6–7 .) …
… O la tatou auaunaga e tatau ona faia mo le alofa o le Atua ma le alofa i uso a tagata ae lē o le faia mo se mafuaaga faaletagata po o se isi lava faamoemoega e itiiti ifo.
(Dallin H. Oaks, “Aisea Tatou Te Tautua Ai?” Ensign, Nov. 1984, 12, 14)
E mafai faapefea e se molimau ia Iesu Keriso ma Lana talalelei ona uunaia i tatou e faia galuega lelei?
Na aoao mai e Elder Dieter F. Uchtdorf o le Korama a Aposetolo e Toasefululua e uiga i “le malosiaga faaosofia aupito mamana i o tatou olaga”:
Ata
O le ata aloaia o Elder Dieter F. Uchtdorf o le Korama o Aposetolo e Toasefululua, 2006. Valaauina e avea ma Fesoasoani Lua i le Au Peresitene Sili, 3 Fepuari 2008. Na faia se ata aloaia i le 2008 e sui ai le ata na pueina i le 2004.
O o tatou faamoemoega ma mafaufauga e laualuga i le aafia ai o a tatou faatinoga fai. O le molimau i le moni aiai o le talalelei toefuataina a Iesu Keriso, o le malosiaga faaosofia aupito mamana lea i o tatou olaga. Sa faamamafa soo lava e Iesu le mana o mafaufauga lelei ma faamoemoega tatau: “Ia faalagolago ia te a’u i manatunatuga uma; aua le masalosalo, aua le fefe” (MF&&F 6:36).
… E faaosofia tatou e a tatou molimau ina ia ola amiotonu, ma o le ola amiotonu e mafua ai ona malosi atili a tatou molimau. …
… O se molimau e faaosofia ai tatou e filifili i le mea e tonu i taimi uma ma i tulaga uma. E faaosofia ai tatou e faalatalata atili i le Atua, ma faataga Ia e latalata atili mai ia te i tatou (tagai i le Iakopo 4:8).
(Dieter F. Uchtdorf, “O Le Mana o se Molimau Patino,” Ensign po o le Liahona, Nov. 2006, 37, 39)
Gaoioiga Faaopoopo e Aoao Ai
O se isi amataga mo le lesona
A o le i ulufale mai tagata aoga i le potuaoga, mafaufau e tusi i luga o le laupapa lenei fesili: “O a ni mafuaaga e ala ai ona auauna atu tagata i isi?” Valaaulia tagata aoga e tusi a latou tali i luga o le laupapa. Ona faatonu lea o i latou e faatulaga a latou mafuaaga mo le auauna atu i isi mai le aupito lelei seia oo i le aupito faa-le-lelei. Mafaufau e fai atu ia i latou fesili nei: “O le a se mea ua e faia talu ai nei e lelei? O le a lou faamoemoega na ala ai ona e faia?”
Faaopoopoina atu i se lisi o uiga paia
I se lesona talu ai, atonu na amatalia e tagata aoga se tusi talaaga lea na amata i le “ Mataio 5–7 : E mafai ona ou avea atili e pei o le Tama Faalelagi ma Iesu Keriso i le …” Mafaufau e valaaulia i latou e faaopoopo i lenei tusi talaaga soo se malamalamaaga ua latou mauaina mai le lesona o lenei aso.
