Jesus is smiling at the daughter of Jairus who was raised from the dead, her father is in the foreground and some disciples in the background.
Ua toe faatuina mai e Iesu le afafine o Iairo nai le oti. O le faamoemoe o lenei lesona o le fesoasoani atu ia te oe e faatino lou faatuatua ma talitonu ia Keriso i taimi o le mata’u ma le lē mautonu.
O le uunaiga o tagata o le vasega ia saili aafiaga faaleagaga patino. A o e aoao atu, uunai tagata o le vasega e faaloloto atili lo latou liliuga e ala i le sailia o o latou lava aafiaga faaleagaga. A o latou feagai ai ma nei aafiaga, e mafai ona aotauina i latou e le Alii e ala i le mana o le Agaga Paia.
Tapenaga mo tagata o le vasega: Uunai tagata o le vasega e tauloto le faaupuga “Aua e te mata’u, tau lava ina e faatuatua” ( Mareko 5:36). Talosaga ia i latou e mafaufau loloto pe faapefea ona fesoasoani lenei faaupuga ia i latou i taimi o puapuaga.
Gaoioiga Talafeagai mo Aoaoga
Faatinoina o le faatuatua ia Iesu Keriso
I le lesona mo lenei aso, o le a e suesue atili e uiga i le faatinoga o lou faatuatua ia Iesu Keriso e oo lava i taimi o le lē mautonu ma le mata’u. Mafaufau i soo se tulaga ua ono faatupuina ai le lē mautonu poo le mata’u i lou lava olaga. Lisi se tasi pe lua o nei tulaga i totonu o lau api faamaumau suesuega.
Na faapei lou faatuatua i taimi o nei tulaga? Tusi i lalo ou mafaufauga i se fuaiupu e tasi pe lua.
A o e suesue i lenei lesona, faalogo mo musumusuga mai le Agaga e mafai ona faalototele ai oe e faatino le faatuatua e sili atu ia Iesu Keriso i taimi o le lē mautonu ma le mata’u.
Ata
Jairus coming to Jesus to heal his daughter.
I le Mareko 5, na faafeagai ai se tasi tagata Iutaia e pule i le sunako e igoa ia Iairo ma se taimi o le matuai lē mautonu ma le mata’u.
Faitau i le Mareko 5:22–24, ma vaavaai pe o le a le mea na aafia ai Iairo. E mafai foi ona e matamata i le ata “Ua toe Faatuina mai e Iesu le Afafine o Iairo,” o loo maua i le ChurchofJesusChrist.org, i le taimi 0:00 i le 1:02.
Aisea e te manatu na saili atu ai e Iairo i le Faaola?
A o latou agai atu i le fale o Iairo, na pa’i le tasi fafine ua ia te ia le punatoto i ofu o le Faaola ma faamaloloina ai o ia. Sa tu Iesu e talanoa ma faamafanafana i lenei fafine (tagai i le Mareko 5:25–34).
O a ni mafaufauga ma lagona ua e manatu na i ai ia Iairo a o ia vaai atu i le Faaola o talanoa ma lenei fafine?
Faitau i le Mareko 5:35–36, e vaai pe o le a le mea na sosoo ai.
O le a se filifiliga na mafai ona fai e Iairo ina ua tau atu ia te ia ua oti lona afafine?
O le a sou manatu pe na faapefea ona fesoasoani upu a le Faaola i le fuaiupu 36 ia Iairo e faafeagai ai ma lona matau?
O a mea ua e iloa e uiga ia Iesu Keriso e mafai ona fesoasoani ai ia te oe e talitonu ia te Ia, e oo i taimi o le matau?
Faamaea le toega o le faamaumauga i le faitauina o le Mareko 5:37–43, ma vaavaai mo le vavega na molimauina e Iairo ona ua ia filifili e talitonu.
O a ni auala e mafai ai e lenei faamaumauga ona faamalosia lou faatuatua ia Iesu Keriso?
E fautua mai le Alii ia aua nei tatou matatau
O loo fautua mai ia te i tatou le Alii i tusitusiga paia atoa ia “aua e te matau, tau lava ina e faatuatua” ( Mareko 5:36). Sailiili i tusitusiga paia po o tautalaga mo tusitusiga paia i konafesi aoao mo upusii o loo fautua mai ia aua nei tatou matatau. E te ono manao e faafesootai pe faasino nei fuaiupu ma tautalaga i konafesi ma le Mareko 5:36 .
E mafai ona lisi e tagata aoga tusitusiga paia ua latou mauaina i luga o le laupapa. Mafaufau pe e te faasoa i se aafiaga patino mai le mulimulitaia o le valaaulia a le Alii ia “aua e te matau, tau lava ina e faatuatua.”
Aisea ua e manatu e fautua soo mai ai le Alii ia aua nei tatou matatau?
Ua faapefea ona faamanuiaina oe ona o lou mulimulitaia o le valaaulia a le Alii ia “aua e te matau, tau lava ina e faatuatua”?
E ono aoga mo tagata aoga le tali o fesili o le a mulimuli mai nei i totonu o a latou api faamaumau suesuega. Mafaufau pe valaaulia ni tagata aoga ua loto i ai e faasoa i a latou tali. E ono avea lenei taimi ma avanoa lelei mo tagata aoga e lipoti ai i le tapenaga mo tagata aoga.
O a ni tulaga i lou olaga e ono fetalai mai ai le Alii ia te oe ia, “Aua e te matau, tau lava ina e faatuatua”?
O a ni au gaioiga e mafai ona fai e te mulimulitaia ai le valaaulia a le Faaola ia “aua e te matau, tau lava ina e faatuatau”? E faapefea e na gaioiga ona fesoasoani ia te oe e te faafeagai ai ma ou popolega?
A mafai, aumai ni oloa tusi ata e mafai ona faaaogaina e tagata aoga e tusi ai se ata i le faatinoga o le a mulimuli mai nei. E mafai foi ona tusi e tagata aoga se ata e faaaoga ai masini faaneionapo.
Tusi se ata ma le faaupuga “Aua e te matau, tau lava ina e faatuatua.” E mafai foi ona e faaopoopo i ai ma nisi faaupuga mai tusitusiga paia po o upusii sa e mauaina. Tuu lenei ata i se mea o le a fesoasoani ai ia te oe e manatua e talitonu ia Iesu Keriso ma ia aua nei e matau.
Manatu ma Faamatalaga o Talaaga
O le a le faatuatua ia Iesu Keriso?
O loo aoao le upusii o le a mulimuli mai nei mai Autu o le Talalelei e uiga i le faatuatua ia Iesu Keriso:
O le i ai o le faatuatua ia Iesu Keriso o lona uiga o le faalagolago atoa atu lea ia te Ia—faalagolago i Lona mana, atamai, ma le alofa e faavavau. E aofia ai le talitonu i Ana aoaoga. O lona uiga o le talitonu e tusa lava pe tatou te le malamalama i mea uma, e malamalama i ai o Ia. Ona sa aafia o Ia i o tatou tiga, mafatiaga, ma vaivaiga uma, ua Ia silafia ai pe faapefea ona fesoasoani ia i tatou e faatoilaloina o tatou faafitauli i aso uma.
O le a se mea e mafai ona fesoasoani ia i tatou ia talitonu ai ma aua le matau?
Ua aoao mai Neil L. Andersen o le Korama a Aposetolo e Toasefululua:
Ata
Official portrait of Elder Neil L. Andersen of the Quorum of the Twelve Apostles, 2010, August.
Sa ta’u atu e Iesu i le taitai o le sunako, “Aua e te matau, tau lava ina e faatuatua” [ Mareko 5:36 ]. O le avea ai ma soo o le talitonu lea ia te Ia i taimi o le filemu ma le talitonu ia te Ia i taimi o faigata, pe a faatoafimalieina o tatou tiga ma le fefe e le talitonuga e alofa o Ia ia i tatou ma Na te tausi i Ana folafolaga.
(Neil L. Andersen, “O Le A Se Taofi o Keriso ia te Au?,” Ensign po o le Liahona, Me 2012, 113)
O luitau, faigata, fesili, masalosaloga—o vaega uma nei o o tatou olaga i le tino. Ae e le o tuua na o i tatou. I le avea ai ma soo o le Alii o Iesu Keriso, ua i ai ni a tatou faatanoa tetele faaleagaga o le malamalama ma le upumoni ua faaavanoaina mo i tatou. E le mafai ona o mai faatasi le matau ma le faatuatua i le taimi lava e tasi i totonu o o tatou loto. I o tatou taimi o faigata, tatou te filifili ai le auala o le faatuatua. Na fetalai Iesu, “Aua e te matau, tau lava ina e faatuatua” [ Mareko 5:36 ].
(Neil L. Andersen, “Ua Lava Mea Ua E Iloa,” Ensign po o le Liahona, Novema. 2008, 14)
O a ni auala e mafai ai ona faamalolo e le Alii tatou?
Sa aoao mai Peresitene Dallin H. Oaks o le Au Peresitene Sili:
Ata
Official Portrait of President Dallin H. Oaks taken March 2018.
O faamanuiaga o le faamalologa e oo mai i auala e tele, e fetaui lelei ma o tatou manaoga taitoatasi, e pei ona silafia e Ia o lē e sili lona alofa ia i tatou. O nisi taimi e faamaloloina e se “faamalologa” o tatou ma’i pe faamatuu ese atu ai a tatou avega. Peitai, o nisi taimi e “faamaloloina” i tatou e ala i le tuuina mai o le malosi po o le malamalama po o le onosai e onosaia ai avega ua tuu mai i o tatou luga.
(Dallin H. Oaks, “Na te Faamaloloina i Latou e Mafatia i Avega,” Ensignpo o le Liahona, Novema. 2006, 7–8)
Faatinoga Faaopoopo e Aoao Mai Ai
Toe iloiloSau, Mulimuli Mai ia te A’u
Mafaufau pe toe iloilo ma tagata aoga le manatu mo suesuega mo Mataio 9:18–26; Mareko 5:22–43 i le Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023. Valaaulia ni tagata aoga ua loto i ai e faasoa i a latou aafiaga mai le latou suesuega patino.
E ono aoga foi le felafolafoai i nisi o faamatalaga i lalo o le vaega o “Manatu ma Faamatalaga o Talaaga” e uiga i le faatoilaloina o le matau e ala i le faatuatua i le Alii.
O le faatuatua ma le matau
Fesoasoani i tagata aoga ia malamalama e lē mafai ona o faatasi le faatuatua ma le matau i le taimi e tasi. Mafaufau pe faitauina le Mareko 4:40 ma le Mareko 5:36 faatasi ma le vasega atoa ia faamanino ai lenei manatu. Felafolafoai i mafuaaga e alai ona lē mafai ona o faatasi le faatuatua ma le matau ma auala e mafai ai ona tatou faatinoina lo tatou faatuatua i le Faaola ina ia tatou manumalo i o tatou popolega. E mafai ona aofia ai fesili o le a mulimuli mai nei i lenei felafolafoaiga: O le a le mea e tupu i le tatou faatuatua pe a tatou toilalo i le matau? E faapefea ona manumalo le faatuatua i le matau?
E ono aoga foi ona felafolafoai i faamatalaga o loo i lalo o le vaega o “Manatu ma Faamatalaga o Talaaga” e uiga i le faatoilaloina o le matau e ala i le faatuatua i le Alii.
O se faataitaiga o le tausia o le faatuatua ia Iesu Keriso
Mo le fesoasoani i tagata aoga ia malamalama e mafai ona tatou tausia lo tatou faatuatua ia Iesu Keriso e oo lava i taimi e lē oo mai ai le faamalologa i le auala na tatou faamoemoeina, mafaufau pe matamata i le faasoa a Shayne M. Bowen le Matua o le Fitugafulu e uiga i se taimi faigata na faamalolo ai e le Alii lona loto. Matamata i le “Ou Te Ola A’u, O Le Mea Lea E Ola Ai Outou,” o loo maua i le ChurchofJesusChrist.org, mai le taimi 4:04 seia oo i le 10:57.
