Mary visiting her cousin Elisabeth, who is also expecting a child.
Ao ma’ito Maria ia Iesu, sa asiasi atu Maria i lona tausoga o Elisapeta ma sa la olioli faatasi ma ia i le lelei o le Atua. O le lesona lenei e te maua ai avanoa e iloa ai le lelei o le Alii ma e ofo atu ai faaneetaga mo lena mea.
Tapenaga mo tagata aoga: Valaaulia tagata aoga ia omai i le vasega ua saunia e faasoa mai se laina mai se viiga o loo faamamafaina ai le lelei o le Alii.
Galuega e Mafai ona Faaaoga e Aoao Mai Ai
Aisea e te manatu ai tatou te usuina viiga e uiga i le Tama Faalelagi ma Iesu Keriso o se vaega o lo tatou tapuai ia te i La’ua?
O le a se viiga poo se laina o se viiga e faamamafa ai lo La lelei?
Afai e manaomia e tagata aoga se fesoasoani, fuafua e fai se lisi o viiga e mafai ona latou faitaua ma fautuaina i latou e vaavaai mo se fasifuaitau o loo faamamafa ai le lelei o le Atua. Valaaulia le vasega e faasoa mai mea na latou maua.
Faaavanoa se minute e mafaufau ai poo a ou lagona e uiga i le Tama Faalelagi ma Iesu Keriso. Toe mafaufau i mafuaaga e tatau ai ona viia i Laua ma pe faafia foi ona faaali atu ou lagona e uiga ia i Laua i soo se auala.
I lenei lesona, o le a e maua ai le avanoa e mafaufau atili ai pe aisea ma faapefea ona e viia le Atua ma olioli i le soifuaga ma le misiona a Iesu Keriso.
Ua olioli faatasi Maria ma Elisapeta i le agalelei a le Alii
Ao ma’ito Maria ia Iesu, sa ia asiasi ia Elisapeta lona tausoga ua olomatua ma o lona ma’ito o se vavega foi. I le taimi sa taunuu atu ai Maria, o le pepe a Elisapeta, o le a avea ma Ioane le Papatiso, ua “osooso i le manava o [Elisapeta] ma le olioli” ( Luka 1:44). O i na amata ai se talanoaga a Maria ma Elisapeta ma olioli ma vivii ai Maria i le Atua.
Fuafua e valaaulia le vasega e faitau e i latou lava isi fuaiupu e sosoo ane ai, ma vaavaai mo mea e mafai ona latou fesootai i ai.
Faitau le Luke 1:46–55 . A o e faitau i upu a Maria, taofi mo sina taimi ma mafaufau i le uiga o upu po o fasifuaitau patino. O le taofi ma mafaufau e mafai ona valaaulia ai le Agaga Paia e fesoasoani ia te oe ia atili loloto lou malamalama i tusitusiga paia. O se faataitaiga, e mafai ona taofi faitauga i le “faamaualaloina” poo le “auauna fafine” i le fuaiupu 48 . O nei upu e mafai ona maua ai le malamalamaaga i le loto maualalo o Maria ma lona migao i le Atua. E mafai ona fesoasoani upu o lenei fuaiupu ia te oe e te vaai ai e silafia ma alofa le Atua i ana fanau tusa po o a o latou tulaga. A faapea e aoga, mafaufau e sue uiga o upu e te le o malamalama ai e faaaoga ai se lomifefiloi po o le Taiala i Tusitusiga Paia, e maua i le ChurchofJesusChrist.org.
O a upu sa e taofi e mafaufau i ai? O le a se mea na e aoaoina?
O a upu po o fasifuaitau o loo e fesiligia pea?
Fesoasoani i tagata aoga ina ia latou malilie e faasoa mai mea sa latou maua a o valaaulia foi i latou e ole atu mo se fesoasoani ia malamalama i upu po o fasifuaitau faigata. Mo se faataitaiga, afai e i ai ni fesili a tagata aoao e uiga i le upu “matatau” i le Luka 1:50, fuafua e sue faatasi ma i latou i le Taiala i Tusitusiga Paia.E mafai ona fesoasoani lea i tagata aoga e malamalama ai faapea “o le matau i le Atua o le lagonaina lea o le migao ma le maofa mo Ia ma usiusitai i Ana poloaiga” (Taiala i Tusitusiga Paia, “ Matau,” scriptures.ChurchofJesusChrist.org).
O a mea moni e uiga i le Atua ua e aoao mai le molimau a Maria?
Atonu e tele ni mea moni e maua e le vasega mai fuaiupu sa latou suesueina, e aofia ai nisi o mea nei:
E mafai ona tatou olioli i le iloa ai o loo i ai so tatou Faaola ( Luka 1:47)
E silisili ese le Alii ma e mafai ona faia mea tetele ( Luka 1:49)
E alofa mutimutivale le Atua ia i latou e matatau ma usiusitai ia te Ia ( Luka 1:50)
O le Alii e faamaualaloina latou e lotomaualuluga ma faaeaina o e lotomaualalo ( Luka 1:52)
A fiaaai o tatou agaga, o le Alii e fafagaina i tatou ( Luka 1:53)
O le Alii e faataunuuina Ona folafolaga ( Luka 1:54)
Fesili i le vasega e tusi i luga o le laupapa mea moni sa latou iloa mai viiga a Maria.
Tatou te olioli i le agalelei a le Alii
O se tasi o mea moni tatou te iloa mai i le aafiaga o Maria a tatou mafaufau i le iai o le Alii i tatou olaga, tatou te olioli atu.
Aisea e te manatu ai o le iloa o faamanuiaga a le Atua i lou olaga e mafai ona fesoasoani e te maua ai le olioli?
Sa faasoa mai e Elder Dale G. Renlund se tasi o le Korama o Aposetolo e Toasefululua le ala na faamanuiaina ai o ia ona o le manatuaina o le agalelei o le Atua.
Ata
Official portrait of Elder Dale G. Renlund of the Quorum of the Twelve Apostles, January 2016.
A o o’u mafaufau i meaalofa mai lo tatou Tama Faalelagi ma Iesu Keriso, ua ou iloa ai lo La’ua alofa le i’u ma lo La’ua agaalofa lemafaatusalia mo fanau uma a le Tama Faalelagi [tagai i le 2 Nifae 26:33 ]. O lenei malamalama ua suia ai a’u, ma o le a suia ai foi oe.
Fesoasoani i tagata aoga e mafaufau i o latou faamanuiaga ma mafuaaga e faailoa atu ai le alofa i le Atua. Tuu atu se taimi mo le vasega e mafaufau ai i auala e viia ai le Tama Faalelagi ma Iesu Keriso ma tusi faamaumau i totonu o a latou api talaaga mo suesuega.
Faauma laasaga nei e fesoasoani ai ia te oe ia iloa faamanuiaga mai le Tama Faalelagi ma viia ai o Ia mo Lona agalelei.
Laasaga 1:
Faaali atu fesili nei pe faitau leotele, ma tuu atu se taimi mo le vasega e mafaufau iai.
Mafaufau i au tali i fesili nei.
O a nisi faamanuiaga mai le Tama Faalelagi o loo pito sili ona e faafetai ai?
O le a se mea ua fesoasoani nei faamanuiaga ia te oe e te malamalama ai e uiga i le Tama Faalelagi ma Iesu Keriso?
O le a se taimi na e faalogoina ai le olioli ina ua e iloaina faamanuiaga a le Atua mo oe po o se isi e te iloa?
O le a se tala o tusitusiga paia poo se fuaiupu ua fesoasoani e te manao ai e viia le Atua?
Laasaga 2:Filifili pe faapefea ona e viia ai le Atua. O nisi nei o manatu e mafai ona e filifili mai ai:
Tusi se solo po o se pese.
Tusi se ata.
Fai se tatalo o le lotofaafetai.
Tuu atu lau molimau i se isi tagata.
Tusitusi ia sa oe lava api talaaga.
Faasoa ou lagona e uiga i le Atua i luga o fesootaiga faaagafesootai.
E mafai foi ona tuuina mai sa oe lava manatu. A ua fai sau filifiliga, amata loa ona faatino. Afai e le mafai ona amatalia i le taimi nei, tusi i lalo se mafuaaga auiliili o le mea o le a e fai. Mo se faataitaiga, a e manao e fai se tatalo o le lotofaafetai, e mafai ona tusi i lalo le taimi ma le nofoaga e tatalo ai ma le mea atonu e te faaalia ai le lotofaafetai . E mafai ona e faasoa ou manatu i se matua poo se taitai o le Ekalesia e mafai ona faamanatu ia te oe e faatino lau fuafuaga.
Tuu se taimi i tagata aoga e amata ona faatino ai a latou fuafuaga. Afai e mafai, e mafai e tagata aoga ona faasoa o latou aafiaga i le faaiuga o le vasega lenei po o se lesona o le a sosoo mai.
Fuaiupu 46-55 o le Luka 1 ua lauiloa o le Pese a Maria. O viiviiga nei e fesootai ai le soifua mai o Iesu Keriso ma le taimi paia ua tuanai o Isaraelu. O upu ia e toe faamanatu mai ai le alofa mutimutivale o le Alii i Lona toe aapa mai e faamanuia ma faamamalu i Lona nuu—aemaise i latou e “faamaualalo” ( Luka 1:52).
Luka 1:53 . E faapefea ona “fagaina i mea lelei e sa fia aai” e le Alii?
O Elder Jeffrey R. Holland o le Korama o Aposetolo e Toasefululua sa aoao mai e uiga i le valaaulia a le Faaola tatou te omai ia te Ia ina ia fafagaina i tatou:
Ata
Official Portrait of Elder Jeffrey R. Holland. Photographed January 2018.
Oute tatalo i lenei taeao o i tatou uma o loo fiaaai ma fiafeinu, ma felotoai i taimi, ia tatou lagonaina le valaau mai ia te Ia o le Areto o le Ola, le Puna o le Vai Ola, o le Leoleo Mamoe Lelei o tatou uma lava, le Alo o le Atua: “Ia outou o mai ia te au, o outou uma o e tigaina ma mafatia i avega, … e malolo ai outou” [ Mataio 11:28–29 ]. E moni lava Na te fagaina “i mea lelei e sa fia aai,” e pei ona molimau ai lona Iava tina o Maria [ Luka 1:53 ]. Omai, ma aai i le la’o’ai a le Alii i le mea ou te molimau atu ai, o Lana Ekalesia moni ma soifua, e taitaina e le perofeta moni ma soifua.
(Jeffrey R. Holland, “Ua Fagaina e Ia E sa Fia Aai i Mea Lelei,” Ensign, Novema 1997, 66)
O a mea e tutupu mai pea tatou manatuaina i le alofa o le Atua?
Sa aoao mai e Elder Dean M. Davies o le Fitugafulu lenei feau pe a tatou iloa le auala ua faamanuia ai i tatou e le Atua:
Ata
Official Portrait of Bishop Dean M. Davies. Photographed in March 2017.
O aso taitasi, ae aimaise lava le aso Sapati, tatou te maua ai le avanoa faapitoa e lagona ai le matagofie ma le maofa o le lagi ma tuu atu a tatou viiga i le Atua mo Lona agalelei faamanuiaina ma le alofa mutimutivale lofituina. …
Pe a tatou tapuai atu, e tuu atu o tatou loto i viiga i lo tatou Atua faamamaluina i le taeao, aoauli, ma le po.
Tatou te faapaia ma faamamaluina o Ia e le aunoa—i o tatou faletapuai, aiga, malumalu, ma ia tatou galuega uma.
A tatou tapuai atu, tatou te tatalaina o tatou loto i le mana faamalolo o le Togiola a Iesu Keriso.
E avea o tatou olaga ma faailoga ma faaaliga o la tatou tapuaiga.
E faaopoopo i le faitauina o upu ma viiga a Maria, le tina o Iesu, mafaufau e valaaulia le vasega e aoao i upu a Sakaria, le tama o Ioane le Papatiso. E mafai ona faitau e le vasega le Luka 1:68-79, ma vaai pe na faapefea ona viia e Sakaria le Atua. E mafai ona faitau e nisi o le vasega upu a Maria ae faitau e isi upu a Sakaria. A uma, e mafai ona faasoa i latou i mea ua latou iloaina.
“O Come, O Come, Emmanuel” (Afio Mai, Afio Mai, Emanuele)
O le feau mai le pese “O Come, O Come, Emmanuel”o le, e ao ia Isaraelu ona olioli i le afio mai o Iesu Keriso e laveai Lona nuu. Fuafua e faaali upu o le pese pe tufa atu kopi o le pese ma faalogologo i le pese usuina. Atonu e mafai ona ta e se tagata aoao le pese i se mea faimusika, pe matamata foi i le vitio “O Come, O Come, Emmanuel (The Piano Guys)” (5:27), e maua i le ChurchofJesusChrist.org. Valaaulia le vasega pe mafaufau i mafuaaga tatou te olioli ai ona ua afio mai Keriso i le lalolagi.
