Na poloaiina e Iesu Keriso Ona soo ia “aua le atuatuvale” (Iosefa Samita—Mataio 1:23) e ui lava i mala, puapuaga, ma faatafunaga o le a muai taunuu ao lei oo i le Afio Mai Faalua. O lenei lesona e mafai ona fesoasoani ia te oe e aloese ai mai le taufaasese ma faatoilalo ai le fefe e uiga i mea e tutupu i aso e gata ai.
Sauniuniga a le tagata o le vasega: Valaaulia tagata aoga e iloilo pe na faapefea ona fesoasoani a latou sini mo le suesueina o tusitusiga paia ia i latou. E mafai foi e tagata aoga ona iloilo pe na latou tauivi e tausia a latou sini ma pe faapefea ona latou mananao ina ia faaleleia atili lea tulaga.
Gaoioiga e ono Mafai Ona Aoao Ai
Faatoilaloina o le taufaasese
O a ni manatu sese se lua pe tolu ua taatele i le lalolagi i aso nei?
A o fetautalatalaai le Faaola ma Ona Aposetolo, sa vavalo le Faaola o le a i ai i latou o e faasalalau manatu sese a o lei oo i Lona Afio Mai Faalua. Faitau le Iosefa Samita—Mataio 1:22, vaavaai mo mea na valoia e le Faaola.
Aisea e taua ai le iloaina e faapea e oo lava i le au filifilia” e mafai ona faaseseina?
Na aoao mai Peresitene Ezra Taft Benson (1899–1994) e faapea o Keriso pepelo ma perofeta pepelo e le gata o ni tagata ae e mafai foi ona oo mai i fausaga o manatu ma aoaoga sese (tagai i le Aoaoga a Peresitene o le Ekalesia: Ezra Taft Benson [2014], 132). A o e suesue i lenei lesona, saili le taitaiga a le Agaga a o e vaavaai mo auala e mafai ona e faalagolago ai i le Alii ma faatoilalo soo se manatu sese po o le taufaasese.
Ina ua uma ona aoao atu e uiga i isi faiga taufaasese ma e uiga i faailoga o Lona Afio Mai (tagai Iosefa Samita—Mataio 1:23–36 ), sa aoao atu e le Faaola se auala e faatoilalo ai le taufaasese. Faitau le Iosefa Samita—Mataio1:37 .
Fai atu i tagata aoga e faasoa ane mea na latou maua i le fuaiupu 37 . Mafaufau e tusi le mataupu faavae lenei i luga o le laupapa: Afai tatou te teuina le afioga a le Alii, o le a le faaseseina i tatou.
Saili e fesoasoani i tagata aoga ia malamalama i le uiga o le teuina o le afioga a le Alii. E mafai ona tatou teu le afioga a le Alii a o tatou suesue i tusitusiga paia, suesue i upu a perofeta ma isi taitai musuia, ma maua ma faatino faaaliga patino.
O le gaoioiga lenei o se tasi lea o faataitaiga.
Ata
A drawing of a treasure chest.
I lau api faamaumau suesuega, tusi se ata o se fasi oa po o se pusa teu oa. O le teuina o se mea o lona uiga e te faapelepele iai, teu lelei, pe matua talisapaia lena mea. Pe a tatou “teumau” le afioga a le Alii, tatou te manatu e paia ma puipui atu iai (tagai i le Mataupu Faavae ma Feagaiga 43:34 ). I autafa po o totonu o le pusa, tusi ai ni auala e mafai ona tatou teumauina ai le afioga a le Alii.
Valaaulia tagata aoga e faasoa mai o latou manatu e uiga i le teumauina o le afioga a le Alii. Mafaufau e tusi se ata o se pusa oa i luga o le laupapa ma faataga tagata aoga e tusi o latou manatu faataamilo i le pusa.
Tuu atu i tagata o le vasega e faitau le tala lenei, pe mafaufau e faaali le vitio o le lauga a M. Russell Ballard “When Shall These Things Be?” o loo i luga o le speeches.byu.edu, mai le faailotaimi 30:47 i le 33:26.
Na faamatala e Peresitene M. Russell Ballard, Sui Peresitene o le Korama a Aposetolo e Toasefululua, le tala o le feiloaiga ma se faifeautalai ua maea le misiona o lē sa faitau i faamatalaga e faitioina ai le Ekalesia. Sa i ai i le alii talavou le tele o fesili sa le mafai ona ia mauaina ni tali, ma sa ia lagonaina ua faasolo ina leai sana molimau. Sa malie Peresitene Ballard e saunia tali i fesili a le alii talavou ae sa valaaulia foi le alii talavou e tautino atu e faitau le Tusi a Mamona mo se itula i aso uma mo le 10 aso. Na faamatala e Peresitene Ballard:
Ata
Official portrait of President M. Russell Ballard of the Quorum of the Twelve Apostles, 2004.
O le sefulu o aso mulimuli ane sa ia toe foi mai ai i lou ofisa, a ua ou saunia foi. Sa ou aumaia au pepa e amata ai ona tali ana fesili, peitai sa ia taofia au.
“Peresitene,” sa ia fai mai ai, “o le a le manaomia lena mea.” Ona ia faamatala mai lea: “Ou te iloa e moni le Tusi a Mamona. Ou te iloa o Iosefa Samita o se perofeta a le Atua.”
(M. Russell Ballard, “When Shall These Things Be?,”Ensign, Dec. 1996, 60)
Aisea e te manatu ai o le suesueina o le Tusi a Mamona i aso taitasi na foia ai le tele o atugaluga o lenei alii talavou?
Aisea e ono i ai se mana o afioga a le Faaola ia i tatou i tusitusiga paia i o tatou olaga?
Faaaoga sina taimi e mafaufau loloto ai pe na faapefea ona faamanuiaina patino oe e afioga a le Faaola. Na faapefea ona uunaia e Ana afioga ou lagona agai ia te Ia? Na faapefea ona fesoasoani le teuina o afioga a le Faaola e te aloese ai mai le faaseseina?
I le mulimuli ai i uunaiga a le Agaga, valaaulia ni nai tagata aoga e faasoa mai.
Afai o le a faamanuiaina tagata aoga mai le tele o le taimi e suesue ai lenei autu, mafaufau e faaaoga le gaoioiga mai le vaega o le “Gaoioiga Faaopoopo e Aoao ai” iinei.
Na fautua mai foi Peresitene Ballard:
Ata
Official portrait of President M. Russell Ballard of the Quorum of the Twelve Apostles, 2004.
Faatulaga se taimi ma se nofoaga e suesue ai tusitusiga paia i aso taitasi, e tusa lava pe na o ni nai minute i taimi taitasi. … I le fuafuaga sili o mea, o nei mea e alu ai ua na o sina taimi itiiti. Ae o faamanuiaga mo se taimi umi ia i tatou ma o tatou aiga e le gata ma faavavau, ma o le a tele mea latou te faia e saunia ai i tatou … mo luitau o le a faateleina pea o le lumanai.
(M. Russell Ballard, “When Shall These Things Be?,”Ensign, Dec. 1996, 60–61)
Iloilo au taumafaiga i le suesueina ma le teuina o afioga a Iesu Keriso. O a mai lou faataunuuga o lea mea? Mafaufau foi po o a ni faafitauli o le olaga e feagai ma oe ma pe faapefea ona fesoasoani le teuina o afioga a Keriso ia te oe e te manumalo ai.
Valaaulia tagata aoga e faasoa mai o latou mafaufauga. Taumafai e fausia se siosiomaga saogalemu lea e talia ai le tautala sao ma le faamaoni.
I lau api faamaumau suesuega, i autafa o lau ata o le pusa oa, mafaufau e tusi se sini o le auala e te manao e teu ai afioga a le Faaola.
Faatoilaloina o mea faalavefau ma le fefe
Mafaufau e tusi faamatalaga nei i luga o le laupapa ma valaaulia tagata aoga taitoatasi pe i ni vaega laiti e faafetaui ia mau faasino i faamatalaga.
Na tusia e Luka fautuaga ma lapataiga faaopoopo na faasoa mai e le Faaola e uiga i Lona Afio Mai Faalua. Faitau fuaiupu nei, ma faafetaui i latou i o latou otootoga sao.
a. O le agasala ma popolega o lenei olaga e mafai ona faalavelaveina i tatou mai le saunia mo le toe afio mai o le Faaola.e. I aso e gata ai, e toʻatele tagata o le a lagona le fefefe.i. A o tatou vaavaai atu ma le filiga mo faailoga o le Afio Mai Faalua o le Faaola, tatalo, ma taumafai ia agavaa, e mafai ona tatou saunia mo le toe afio mai o le Alii.
(Manatua: O le Faaliliuga a Iosefa Samita mo le Luka 21:36, vaefaamatalaga i, ua faaopoopo i ai le fasifuaitau “ma tausi i a’u poloaiga.”)
O le a le mea na tulaga ese ia te oe a o e faitauina nei mau e uiga i le Afio Mai Faalua?
Faalogo lelei i mea e faasoa mai e tagata aoga. Mafaufau e faaopoopo atu pe faamamafa atu mea latou te faasoa mai e ala i le tuuina atu o nisi o fesili nei.
O a nisi o mafuaaga e ono faavaivai ai loto o tagata ona o le fefe i aso nei?
E mafai faapefea e le agasala ma atuagaluga o lenei olaga ona faalavelaveina i tatou mai le saunia mo le afio mai o le Alii? Aisea e afaina ai le faalavelave faapenei?
E faapefea e le tatalo ma le taumafai ia agavaa ona fesoasoani ia i tatou e saunia ai e fetaiai ma le Alii?
Na faamanino mai e le Alii nisi o Ana afioga e ala mai ia Peresitene Russell M. Neleson. Afai e maua, matamata le vitio “Men’s Hearts Shall Fail Them” (3:24). Faalogo mo mea o aoao mai e Peresitene Nelson e uiga i le faatoilaloina o le fefe ma le masalosalo i aso e gata ai. E mafai ona maua le vitio ma tusigai luga o le ChurchofJesusChrist.org po o le Gospel Library app.
E mafai faapefea e le liliu atu i le Alii ona fesoasoani ia i tatou e faatoilalo ai o tatou masalosaloga ma popolega i nei aso e gata ai?
Faaaoga mea ua e aoaoina
Vaai faalemafaufau e faapea, ina ua uma se lesona e uiga i le Afio Mai Faalua, sa fai mai e ni uo se toalua faamatalaga nei:
Uo #1: “Ou te le manatu lava o le Afio Faalua Mai o se mea tele. O le mea moni, e le o manatu foi lou tamā o le a tupu. Ou te le fia popole i se mea faapena.”
Uo #2: “Ou te le fiafia e mafaufau e uiga i le Afio Mai Faalua. Ou te fefe ma popole i mea o aso uma e pei o le aoga ma faafitauli ma uo, ae o le Afio Mai Faalua e matua tele atu. O faailoga uma o taua ma mafuie ma le taufaaoleole—e foliga leaga.”
Filifili se tasi o vaaiga faataitai muamua. I le faaaogaina o mea ua e aoaoina i lenei lesona, saili le taitaiga a le Agaga a o e tusia mea e te ono fai atu pe fai ina ia fesoasoani ai i lau uo. Vaavaai mo ni auala e uunaia ai i latou e teuina afioga a le Alii ma faalagolago ia te Ia.
Mafaufau e valaaulia nisi o tagata aoga e faasoa mai mea sa latou tusia. Faafetai atu ia i latou mo le faasoa, ma faasino atu mataupu faavae moni i mea sa latou faasoa mai. Faaiu le lesona e ala i le tuuina atu o molimau e uiga i mataupu faavae i lenei lesona.
Tala Auiliili ma Faamatalaga o Talaaga
Mataio 24:24 . O a nisi o faataitaiga o pepelo ma taufaasese i aso e gata ai?
Na faamatala e Elder Gary E. Stevenson o le Korama a Aposetolo e Toasefululua nisi o auala o loo sailia e Satani e faasese ai le lalolagi i aso nei.
Ata
Official portrait of Elder Gary E. Stevenson of the Quorum of the Twelve Apostles, 2015.
Mo se faataitaiga, na te faafoliga sese taunuuga faataumaoi o fualaau faasaina ma le inupia ae fautua mai o le a aumaia e le inupia le fiafia. Na te faatofu i tatou i elemene eseese le lelei lea e mafai ona i ai i upega faaagafesootai, e aofia ai faatusatusaga faavaivai tagata ma tulaga faafoliga moni. I le ma lea, na te faalafi mai ia i tatou isi anotusi faataumaoi eleelea o loo maua i luga o le initoneti, e pei o ponokalafi, osofaiga matautia i isi e ala i telefoni feaveai, ma le totoina o ni faamatalaga sese e mafua ai le masalosalo ma le fefe i o tatou loto ma mafaufau.
(Gary E. Stevenson, “Aua E Te Taufaasese Mai Ia Te Aʼu,” Ensign po o le Liahona, Nov. 2019, 95)
Luka 21:26 . E mafai faapefea ona ou tetee atu i le lagona fefe ae opogi le lumanai ma le faatuatua?
Na aoao mai Peresitene Russell M. Nelson e uiga i le taua o le fesootai tumau pea i le Tama Faalelagi ma Iesu Keriso i taimi o le le mautonu:
Ata
Official portrait of President Russell M. Nelson taken January 2018
Ioe, o lo tatou saogalemu sili lava e oo mai pe a tatou lafo atu i tatou lava i le Tama Faalelagi ma Iesu Keriso! O se olaga e aunoa ma le Atua o se olaga e tumu i le fefe. O se olaga e i ai le Atua o se olaga e tumu i le filemu.
(Russell M. Nelson, “Faasaga Atu ma le Faatuatua i le Lumanai,” Ensign po o le Liahona, Nov. 2020, 75)
Gaoioiga Faaopoopo e Aoao Ai
O se isi amataga: teuina o le upu e aloese ai mai le taufaasese
Faitau le lisi lenei o manatu sese. Faamatala pe aisea ua sese ai.
E lelei le talalelei a Iesu Keriso, ae e tele naua mea i le olaga e sili atu ona taua.
Ou te fia faia mea lelei i le lalolagi, ae e le tele ni mea ou te ofoina atu.
E manaia Iesu Keriso, ae ou te manatu e le popole patino mai o Ia ia te au.
O le Afio Mai Faalua o se taimi e mamao lava. Ou te matua le tau mafaufau lava i ai.
Valaaulia tagata aoga e lisi isi manatu sese ua taatele i le lalolagi i aso nei.Ona valaaulia lea o i latou e suesue i tusitusiga paia po o saunoaga a perofeta ma aposetolo o le a fesoasoani latou te aloese ai mai le faaseseina e nei manatu.