Seminare
Ioane 2–4

Ioane 2–4

Vaaiga Aoao

Sa liua faavavega e Iesu Keriso le vai i le uaina i le ’aiga o le faaipoipoga. Sa Ia aoao atu i se taitai o tagata Iutaia e igoa ia Nikotemo e uiga i le toe fanau mai ma le alofa o le Tama Faalelagi na faaali mai e ala i le auina mai o Lona Alo e toatasi e togiola mo a tatou agasala. Ona aoao ai lea e Iesu se fafine Samaria e uiga i le vai ola Na te foaiina atu mo latou e faatuatua ia te Ia.

Sauni e Aoao Atu

O nei faamatalaga e aoga mo faiaoga ia latou iloa ai po o a ni mea e tatau ona saunia ae lei amata lesona taitasi.

Ioane 2

Faamoemoega o le lesona:O le faamoemoega o lenei lesona o le fesoasoani lea i tagata aoga e faateleina lo latou faatuatua ia Iesu Keriso ma le iloaina o mea moni e uiga i le mana ma uiga o le Faaola.

  • Tapenaga mo tagata aoga: Valaaulia tagata aoga e mafaufau faapea ua valaaulia i latou e fai se lauga i se sauniga faamanatuga e uiga i le mana o Iesu Keriso. Fesili iai e o mai sauni i le vasega e faasoa mai ni tala se tasi pe lua e mafai ona latou faaaogaina e faapupula ai Lona mana.

  • Meafaitino: Mafaufau e aumai i le vasega se meaai e faaaoga i le amataga o le lesona.

  • Vitio: “Jesus Turns Water into Wine” (2:26)

  • Fautuaga mo fetuunaiga o anolesona i luga o upega tafailagi: A uma ona suesue e tagata aoga le liliuina e Iesu o le vai i le uaina, mafaufau e faaaoga manatu o loo lisi i le vaega “Gaoioiga Faaopoopo e Aoao Ai” o lenei lesona i le vaega ua faaulutalaina “E mafai ona suia au e Iesu Keriso.” O nei manatu e mafai ona fesoasoani atu i tagata aoga ia iloa e mafai e Iesu Keriso ona suia o tatou olaga ma uiga faanatura e pei lava ona Ia suia le vai i le uaina.

Ioane 3:14–17

Faamoemoega o le lesona:O lenei lesona e tuuina atu ai i tagata aoga le avanoa e faamalolosia ai o latou faatuatua ia Iesu Keriso ao latou suesue atili e uiga i Lana Togiola.

  • Sauniuniga mo tagata aoga: Valaaulia tagata aoga e sue se mau po o se saunoaga mai le konafesi aoao o loo aoao mai ai se mea taua e uiga i le Togiola a Iesu Keriso.

  • Fautuaga mo aoaoga e faatino i vitio: Vaevae le vasega i totonu o potu mo vaega laiti i luga o fesootaiga faatekinolosi e latou te faasoa ma talatalanoa ai i le fesili mulimuli i luga o le tufaaga i ni vaega toalaiti.

Atamai i Aoaoga Faavae: Ioane 3:16

Faamoemoega o le lesona: O lenei lesona e avatu ai i tagata aoga le avanoa e faalelei atili ai o latou atamai i le aoaoga faavae o le Togiola a Iesu Keriso e ala i le ao tauloto o le mau faasino Ioane 3:16 ma le fuaitau autu o le mau, e faamatala atu ai mataupu faavae o lea tusitusiga paia, ma le fa’aaogaina o auala mo le mauaina o le malamalama faaleagaga i o latou olaga i aso uma.

  • Tapenaga mo tagata aoga: Valaaulia tagata aoga e mafaufau e faapea o latou o faifeautalai pe faapefea ona latou aoao atu i se isi e uiga ia Iesu Keriso ma Lana Togiola.

  • GaOioiga e toeiloilo ai: Ia mautinoa e faatino lenei gaoioiga pe a maea se lesona i le lumanai ae aua nei mamao tele mai le taimi na uma ai lenei lesona.

  • Fautuaga mo aoaoga e faatino i vitio: Valaaulia tagata aoga e faaaoga le vaega mo talanoaga e faasoa atu ai mau ma saunoaga mai taitai o le Ekalesia sa o latou maua e fesoasoani atu i le faataitaiga ua tuuina atu. Tuu atu ni nai minute mo le vasega e faitau i ni isi o tusitusiga po o saunoaga sa faasoa atu i le pusa mo talanoaga, ona valaaulia ai lea o i latou e tali atu i mea sa tulagaese mo i latou taitoatasi.

Ioane 4, Vaega 1

Faamoemoega o le lesona:O le faamoemoega o lenei lesona o le fesoasoani lea i tagata aoga ia latou iloaina e latou te manaomia le Faaola ma lagona Lona alofa mo i latou.

  • Tapenaga mo tagata aoga: Faasino tagata aoga i le gaoioiga i le Sau, Mulimuli Mai Ia te Au—Mo Tagata Taitoatasi ma Aiga mo le Ioane 2–4 e valaaulia ai i latou e sue ni meafaitino e taatele i o latou fale e mafai ona faaaoga e aoao atu ai upumoni faaleagaga. Valaaulia tagata aoga e aumai meafaitino i le vasega ma, afai e mafai, sauni e faamatala atu upumoni faaleagaga e mafai ona aoaoina atu e faaaoga ai nei meafaitino.

  • Vitio: “Jesus Teaches a Samaritan Woman” (4:11; matamata mai le 0:00 i le 2:01, ma le 2:02 i le 4:11)

  • Fautuaga mo aoaoga e faatino i vitio: Mafaufau e valaaulia tagata aoga e sue ni meafaitino e taatele i o latou fale e mafai ona faaaoga e aoao atu ai upumoni faaleagaga.

Ioane 4, Vaega 2

Faamoemoega o le lesona:O le faamoemoega o lenei lesona o le fesoasoani lea i tagata aoga e malamalama atili i le vai ola e foaiina mai e le Faaola: o le uiga o lenei mea, pe aisea latou te manaomia ai, ma auala e mafai ona latou maua ai.

  • Tapenaga mo tagata aoga: Valaaulia tagata aoga e faatusatusa taimi sa o latou lagonaina ai le mativa faaleagaga ma taimi sa latou faalogoina ai ua faamalieina o latou olaga faaleagaga. O le a le mafuaaga o lenei eseesega?

  • Tufaaga: “Vai Ola”

  • Fautuaga mo aoaoga e faatino i vitio: Mafaufau e tuu atu faatonuga mo le fauina o se lauga a o lei amataina le vasega ma valaaulia ni nai volenitia e faasoa mai a latou lauga i le amataga o le lesona.