Ina ua uma ona talisua i le tausamiga o le Paseka, sa mulumulu e Iesu vae o Ona soo. Sa Ia aoao i latou e uiga i le auauna atu ma le alofa o le tasi i le isi. O lenei lesona e mafai ona uunaia ai oe e saili le fiafia e ala i le auauna atu ma alolofa atu i isi e pei ona sa faia e Iesu.
Gaoioiga e Ono mafai ona Aoao ai
Taumafai ia avea e faapei o Iesu
Usu pe faitau upu o le pese “O Lo’o Ou Taumafai E Avea E Pei O Iesu” (Tusipese a Tamaiti,40).Pe e mafai foi ona e matamata i le “Music Video: I‘m Trying to Be like Jesus—Emily Brown” (3:18), o loo maua i le ChurchofJesusChrist.org. A o e pese, faitau, pe matamata, mafaufau e uiga i mafuaaga e te manao ai e taumafai ia faapei o Iesu.
O a ni auala o loo e taumafai ai ia avea e faapei o Iesu?
O a ni suiga ua e vaaia i olaga o tagata a o latou taumafai ia faapei o Iesu? Ae faapefea i lou lava olaga?
A o e auai ai i lenei lesona, ia uai atu i uunaiga a le Agaga Paia lea e mafai ona musuia ai oe e mulimuli atili i faataitaiga ma aoaoga a le Faaola.
“Ua Ou avatu le faaa’oa’o ia te outou”
I le taufaaiuiuga o le soifuaga o le Faaola, sa Ia faapotopoto faatasi ai Ona Aposetolo mo Lana talisuaga faaiu o le Paseka. O mea na tutupu i lenei afiafi e masani ona ta‘ua o le Talisuaga Mulimuli.
Faitau le Ioane 13:1–11, ma vaavaai po o a mea na faia e Iesu ina ua maea la latou talisuaga o le Paseka ma Ona Aposetolo.
Atonu e fesoasoani le iloaina e faapea i taimi o le Feagaiga Fou, e masani lava ona palapala vae o tagata ona o le seeina o seevae tosotoso ma le savalia o auala e tele ina palapala. O le mulumuluina o vae o le isi e masani lava ona faatinoina e auauna aupito maualalo.
O le a se mea ua e aoaoina e faatatau i le uiga o Iesu mai Lana faatinoga o le mulumuluina o vae o Aposetolo?
Mata o a ni ou lagona po o lou tali atu pe afai na ofoina atu e Iesu ia te oe lenei ituaiga o auaunaga faatauvaa?
Faitau le Ioane 13:12–17, ma vaavaai mo lesona e mafai ona e aoaoina mai afioga a le Faaola.
O le a se mea ua e aoaoina mai aoaoga a le Faaola i nei fuaiupu?
O le a se taimi na e maua ai le fiafia e ala i le mulimuli i faataitaiga a Iesu o le auauna atu?
”Ia outou fealofani”
Ina ua uma ona mulumuluina vae o Ana Aposetolo, sa faaalu e le Faaola se taimi e aoao ai i latou. Faitau le Ioane 13:34–35 e iloa ai le aoaoga faavae taua sa Ia aoao atu.
A o e faitau ma mafaufau e uiga i nei fuaiupu, o a ni ou mafaufauga, lagona, po o ni fesili o ia te oe?
Mafaufau i tala o tusitusiga paia lea na faaalia ai e le Faaola le alofa i isi.
Na faapefea ona faaalia e Iesu Keriso le alofa i auala eseese i tagata eseese?
Faaaoga sina taimi e mafaufau ai ma tusi e uiga i le taimi po o le a sou lagona i le alofa o Iesu mo oe. Mafaufau ia filemu ma ole atu i le Tama Faalelagi e fesoasoani ia te oe ia iloa nei taimi.
E faapefea e le iloaina ma le lagonaina o le alofa o le Faaola mo oe ona aafia ai lou manao e faaali atu le alofa i isi?
Fai se fuafuaga pe mafai faapefea ona e mulimuli i le faataitaiga a le Faaola ia alofa ma auauna atu i isi, faapea foi ma le taimi e te manao e fai ai. Atonu o le a fesoasoani manatu nei e mafaufau ai a o e faia se fuafuaga.
Fai se mea i le asō mo se tagata o le aiga, uo, po o se tasi i le nuu.
Fai se mea e faaali atu ai le alofa ma le agalelei i se tasi e ese mai ia te oe po o se tasi foi sa e tauivi e fegalegaleai i ai i le taimi ua tuanai.
Faailoa se tagata e te lagona le uunaiga e faaali atu i ai le alofa sili po o le faaaloalo.
Mafaufau pe mafai faapefea ona e valaaulia le alofa o le Faaola i au taumafaiga.
O le “sina mea e ‘ai” o loo faamatala i le Ioane 13:26 o se fasi areto e faaaoga e i latou e talisua e loiloi ma asu mai ai le suavai ma se aano manu fasi mai se pesini. Talu ai o se faailoaga lea o le agalelei ma le faaaloalo mo se tagata talimalo e loiloi sina fasi mea e ‘ai ma tuu atu i se malo o le taligasua, o lea na tuu atu ai e le Faaola ia Iuta se ofo o le faauo, atonu e fai ma avanoa faaiu mo ia e lafoai ai lana fuafuaga e faalata.
E mafai faapefea ona tatou fesoasoani i isi ia lagona le alofa o Iesu Keriso e ala i la tatou auaunaga ia i latou?
O Peresitene Henry B. Eyring na faasoa mai le tala lenei:
Sa tofia au e asiasi i se sauniga faamanatuga i se nofoaga autu mo le tausiga o tagata matutua. Sa talosagaina a’u e tufatufaina atu le faamanatuga. Nai lo le mafaufau e uiga i le faagasologa po o le sa’o o le auala e tufaina ai le faamanatuga, sa ou tilotilo i foliga o tagata matutua taitoatasi. Sa ou vaaia le toatele o i latou o fetagisi. O se tasi o tamaitai sa uuina le lima o lo’u ofu, tilotilo mai i luga, ma fai mai leotele, “Oi, faafetai, faafetai.”
Na faamanuiaina e le Alii la’u auaunaga na tuuina atu i Lona suafa. O lena aso sa ou tatalo ai mo sea vavega e oo mai nai lo le tatalo mo le lelei na ou faia ai la’u vaega. Sa ou tatalo ia lagona e tagata le alofa o le Alii e ala i la’u auaunaga alofa. Sa ou aoaoina o lenei mea o le ki lea i le auauna atu ma faamanuiaina ai isi i Lona suafa.
(Henry B. Eyring, “Faamanuia i Lona Suafa,” Liahona, Me 2021, 68–69)
Gaoioiga Faaopoopo e Aoao Ai
E mafai faapefea ona e faaalia o oe o se Kerisiano?
I le amataga o le vaega “Ia fealofani,” e mafai ona fesoasoani le gaoioiga lenei i tagata aoga e toe auai i le lesona:
Fesili i le vasega pe na tuuaia i latou e le o ni Kerisiano moni, pe o ni soo moni o Iesu Keriso, ona o i latou o tagata o le Ekalesia a Iesu Keriso o le Au Paia o Aso e Gata Ai. Afai na aafia ai ni tamaiti aoga, fesili pe na faapefea ona latou tali atu i lena tulaga. Valaaulia tagata o le vasega e talanoa i fesili nei:
E faapefea ona e tali atu pe afai e fai atu se tasi e le o oe o se Kerisiano?
O a nisi o auala e mafai ona e faaalia ai o oe o se soo o Iesu Keriso?
Ioane 13:35 . O le mea lea e iloa ai e tagata uma lava o o’u soo outou”
Mafaufau e faamamafa le upumoni i le Ioane 13:34 e faapea a tatou alolofa atu i isi e faapei ona alofa mai o Keriso ia i tatou, o le a iloa foi e isi, o i tatou o Ona soo..
Ina ia faapupula lenei upumoni, faasoa atu le tala lenei, na faamatalaina e Elder Paul E. Koelliker a o ia auauna atu o se tasi o Fitugafulu:
Ata
Final official portrait of Elder Paul E. Koelliker of the First Quorum of the Seventy, 2005. Granted emeritus status at the October 2013 general conference.
Sa tuitui ni faifeautalai talavou se toalua i se faitotoa, ma le faamoemoe o le a maua ai se tagata e taliaina le la savali. Sa tatalaina le faitotoa, ma sa faafeiloai i laua e se tamaloa lapoa i se leo e faalē-fiafia: “Faapea a a’u sa ou fai atu e aua nei lua toe tuituiina lo’u faitotoa. Sa ou lapataia oulua i le taimi muamua afai lua te toe o mai, o le a i ai se mea le lelei o le a tupu ia te oulua. O lea o ese loa.” Sa vave ona ia tapunia le faitotoa.
A o savavali ese atu ia faifeautalai, sa tuu e le faifeautalai e matua ma sili le potomasani lona lima i luga o le tauau o le faifeautalai laitiiti ina ia faamafanafana ma faamalosiau atu ia te ia. Ma lo la le iloaina, o loo tilotilo mai le tamaloa ia i laua i le faamalama ina ia mautinoa ua la malamalama i lana tala. Sa manatu o ia, o le a ia vaaia i laua o talie ma ta’umamaina lana tali faalelelei i le la taumafaiga e asia o ia. Ae peitai, a’o ia molimauina le faaalia o le agalelei i le va o faifeautalai e toalua, sa vave lava ona faamaluluina ai lona loto. Sa ia toe tatalaina le faitotoa ma talosagaina ia faifeautalai e toe foi atu ma faasoa atu le la savali ia te ia.
… O le mataupu faavae lenei o le alofa o le tasi i le isi ma le atiina ae o lo tatou gafatia ina ia taulai atu ia Keriso i le auala tatou te mafaufau ai, tautala ai, ma galulue ai, e faavae ai le avea ma soo o Keriso.
(Paul E. Koelliker, “E Alofa Moni o Ia ia i Tatou,” Ensign po o le Liahona, Me 2012, 17)
Valaaulia tagata aoga e mafaufau pe aisea na avea ai lenei fegalegaleaiga i le va o faifeautalai ma se aafiaga tele i le tamaloa.