Iloiloga 17 o le Atamai i Aoaoga Faavae

Malamalama ma Faamatala

Ata

Alii talavou o loo faitau ia tusitusiga paia

O se tasi o faamoemoega o le atamai i aoaoga faavae o le fesoasoani lea ia te oe ia malamalama i aoaoga a le Faaola o loo i ai i fuaitau o le atamai i aoaoga faavae ma mafai ai ona faamatala i au lava upu. O lenei lesona o le a tuuina atu ai ia te oe se avanoa e faalautele ai lou malamalama ma faamatala atu upumoni e uiga i se tasi pe sili atu o fuaitau o le atamai i aoaoga faavae mai le Feagaiga Fou.

Sauniuniga a le tagata aoga: Valaaulia tagata aoga e tagai totoa i soo se fuaiupu fenumiai, fasifuaitau, po o upu i le isi a latou suesuega patino faaletagata lava ia pe faaleaiga o tusitusiga paia ma ia o mai saunia i le vasega e faasoa mai.

Gaoioiga e ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu po o le taitai faamaopoopo o le eria po o le risone ina ia mautinoa o lesona o fuaitau o le atamai i aoaoga faavae taitasi o le a aoaoina a o faagasolo ia vasega seminare.

O le malamalama ai i tusitusiga paia

Pe ua e faitauina ea se mau—atonu e sili atu ma le faatasi—ma iloa ai sa e le mautonu i lona uiga?
E faafia ona e lagona e tupu pea lenei mea pe a e suesue i tusitusiga paia?
E faapefea ona e tali atu pe a tupu lenei mea ia te oe?

Fesoasoani i tagata aoga ia iloa o se mea masani le le malamalama i mea uma o loo i totonu o tusitusiga paia. Tulitatao sauniuniga a le tagata aoga e ala i le valaaulia o i latou e faasoa mai fuaiupu, fasifuaitau, po o upu mai mau latou te lei malamalama i ai mai a latou suesuega talu ai nei o tusitusiga paia. Atonu e fesoasoani le lisiina o i latou i luga o le laupapa.

Afai e i ai se taimi i le faaiuga o le lesona, e mafai ona manuia tagata aoga mai le tuufaatasia o tomai i mau na aoaoina i lenei lesona ma fuaiupu o loo lisiina i luga o le laupapa.

E finagalo le Faaola ia tatou malamalama i Ana afioga ma o le a fesoasoani ia i tatou e faia e ala i le Agaga Paia. E manaomia ai e lenei mea la tatou matafaioi o le taumafaiga. I lenei lesona o le a e maua ai le avanoa e aoao ai tomai mo le suesueina o tusitusiga paia lea e mafai ona fesoasoani ia te oe e malamalama ai i fuaitau eseese o le atamai i aoaoga faavae.

Tomai o le suesuega o tusitusiga paia

Toe faamanatu vave fuaitau taitasi o le atamai i aoaoga faavae ma fasifuaitau autu o mau.

Mafaufau e sui soo se fuaitau o loo iloiloina pe faaopoopo i ai isi fuaitau o le atamai i aoaoga faavae o le a manuia ai tagata aoga pe a taulai atu i ai.

E mafai e tagata aoga ona toefaamanatu taitoatasi nei fuaitau, pe i ni paga, pe faatasi ai ma le vasega atoa.

Fuaitau o le Atamai i Aoaoga Faavae	Fasifuaitau Autu o Mau
Efeso 1:10	“Ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.”
Efeso 2:19–20	O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”
2 Tesalonia 2:1–3	“O le aso o Keriso … e le oo mai lena aso, seia muai ona taunuu o le tete’a ese.”
2 Timoteo 3:15–17	“O tusi paia … e mafaia ona faapoto ai ia te oe e iu ai i le faaolataga.”

Mafaufau e vavae le vasega i ni vaega taitoafa ma valaaulia tagata aoga taitasi e filifili se fuaitau e manao o ia e malamalama atili i ai. Ia faamautinoa e faaaoga fuaitau uma e fa i vaega taitasi. E ono manaomia e lenei mea le tofia o nisi o tagata aoga e toefaamanatu le sili atu ma le tasi o fuaitau.

Afai o le a manuia tagata aoga mai se faataitaiga, mafaufau e faaaoga le 2 Timoteo 3:15–17 e aoao ai tagata aoga i le tomai o le faia o lisi.

Filifili se tasi o fuaitau o mau ua e manao e te malamalama atili i ai. Ona filifili lea o se tasi pe sili atu o tomai nei mo le suesueina o tusitusiga paia e fesoasoani e te malamalama atili ai i lena fuaitau. Ia saunia e faamalamalama atu lau mau i isi.

Afai e lava le taimi, taumafai e faaaoga se isi tomai i se tasi o isi fuaitau.

Gaoioiga A: Mau Fefaasinoai

Faaaoga punaoa o loo maua e sailia ai isi fuaitau o mau e mafai ona fesoasoani e faateleina ai lou malamalama i le fuaitau o le atamai i aoaoga faavae. O ia punaoa e ono aofia ai vaefaamatalaga mo mau, o le Taiala i Tusitusiga Paia, po o le Taiala mo Autu. Faailoga fuaitau mai nei punaoa, ma faamaumau i se api talaaga mo suesuega pe i le polokalama o le Potutusi o le Talalelei auala latou fesoasoani ai e faateleina lou malamalama o lou atamai i aoaoga faavae ua filifilia.

Gaoioiga E: Faamatala upu ma fasifuaitau

Saili upu i le fuaitau o le atamai i aoaoga faavae e te le malamalama ai. Saili mo faauigaga o na upu po o fasifuaitau i punaoa o loo maua, e pei o le Taiala i Tusitusiga Paia, le Bible Dictionary, po o se lomifefiloi masani. Tusi i se api talaaga mo suesuega, i se pito o se itulau o faapitoa mo tusitusiga paia, pe i le polokalama o le Potutusi o le Talalelei ia faauigaga ua e mauaina, faatasi ai ma soo se malamalamaga fou.

Gaoioiga I: O le malamalama i talaaga ma anotusi

Faamaea se tasi pe sili atu o mea nei o le a fesoasoani i lau fuaitau o le atamai i aoaoga faavae:

Faitau e uiga i le tusi lea e maua mai ai lenei fuaitau i le vaega faaulutalaina “ O Tusi a Paulo “ i le Taiala i Tusitusiga Paia po o le Bible Dictionary.
E faapefea e le ulutala o le mataupu po o fuaiupu taulalata ane ona faateleina lou malamalama i le fuaitau o le atamai i aoaoga faavae?

O ai o loo tautala atu i ai le tusitala musuia ma pe aisea?
O le a le savali autu o lenei fuaitau o mau?

Tusifaamaumau mea ua e malamalama i ai e uiga i le fuaitau ona o mea sa e mafaufau loloto i ai.

A uma ua lava se taimi, valaaulia tagata aoga e faamatala i a latou vaega o latou tomai i le suesueina o tusitusiga paia ma mea ua latou malamalama nei i ai e uiga i a latou fuaitau o le atamai i aoaoga faavae ona o lena mea. Mafaufau e valaaulia ni nai tagata aoga e faamatala mai a latou fuaitau i le vasega.

Faamanatu i tagata aoga o le a fesoasoani lo latou Tama Faalelagi ma le Faaola ia i latou ia malamalama i tusitusiga paia e ala i le Agaga Paia. Atonu e fesoasoani le tuuina atu o le molimau i le taua o le sailia o le fesoasoani a le Atua a o latou suesue ai.