Atamai i Aoaoga Faavae Iloiloga 12
Sue ma Faailoga: 1 Korinito 6:19–20 e oo i le Faaaliga 20:12
O se tasi o faamoemoega o le atamai i aoaoga faavae o le fesoasoani lea ia te oe e sue ma faailoga mau faasino ma fasifuaitau autu o mau o le atamai i aoaoga faavae. O lenei lesona o le a tuuina atu ia te oe avanoa e sue ma faailoga ai fuaitau e 13 o mau o le atamai i aoaoga faavae o loo maua i le afa lona lua o le Feagaiga Fou.
Gaoioiga E Mafai Ona Aoao Mai Ai
Mau faasino ma fasifuaitau autu o mau
Mafaufau faapea ua vaai atu lau uo o e suesue ma faailoga au tusitusiga paia. Ina ua uma ona vaai i se itulau o i ai le tele o faailoga, ua ia fesili atu ia te oe pe aisea ua e faia ai ni faailoga i au tusitusiga paia.
-
E faapefea ona e tali atu i lau uo?
O le faailogaina po o le vaseina o mau o se auala aoga lea e iloa ai fuaitau patino o mau mai isi, ma e faigofie ai ona e maua na fuaitau o mau i le lumanai. I le lesona lenei, o le a e maua ai se avanoa e sue ma faailoga ai fuaitau e 13 o le atamai i aoaoga faavae o loo maua i le afa lona lua o le Feagaiga Fou. Ina ia fesoasoani ia te oe e faia lenei mea, mafaufau e kopi le siata lenei i lau api faamaumau suesuega.
Atamai i Aoaoga Faavae mo le Feagaiga Fou: 1 Korinito–Faaaliga
“O lou tino o le malumalu o le Agaga Paia.” | |
“E leai se tane pe a le o i ai le fafine, e leai foi se fafine pe a le o i ai le tane, i le Alii” | |
“Aua faapei ona oti uma ia Atamu, e faapea foi ona faaolaina uma ia Keriso.” | |
I le Toetutu, e tolu tikeri o le mamalu. | |
“I le tisipenisione o le atoaga o taimi, o le a faapotopoto faatasi ai e le Atua mea uma ia Keriso.” | |
O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.” | |
“O le aso o Keriso … e le oo mai lena aso, seia muai ona taunuu o le tete’a ese.” | |
“O tusi paia, e mafaia ona faapoto ai ia te oe e iu ai i le ola.” | |
O lo tatou Tama Faalelagi o “le Tamā o tatou agaga.” | |
“A e afai ua leai se poto i so outou, ina ole atu ia i le Atua.” | |
“O le faatuatua, pe afai e le i ai galuega, e mate lava.” | |
“Na folafola atu foi le talalelei i e ua oti.” | |
“Ona faamasinoina ai lea o e na oti … e tusa ma a latou amio.” |
Faaali atu faatonuga nei e tolu mo tagata aoga e mulimuli ai. Valaaulia tagata aoga e feoai i le potuaoga ma galulue ma ni paga e sue ma, pe a latou filifilia, e faailoga uma fuaitau o tusitusiga paia e 13 o le atamai i aoaoga faavae ma fuaitau autu o tusitusiga paia. Uunai tagata aoga e fai ma fesuiai a latou paga pe a maea ni nai minute.
Mo le fesili muamua, mafaufau e tuu atu ni nai fesili mo tagata aoga e filifili mai ai, e pei o le “O a ituaiga o pese e te faalogologo ai?” ma le “O a taaloga e te fiafia e taaalo ai?”
1. Fai atu se fesili e faamasani atili ai i le tasi ma le isi.
2. Fesoasoani le tasi i le isi e sue le fuaitau o le mau o le atamai i aoaoga faavae ma, pe afai e talafeagai, le fuaitau autu o le mau. Mafaufau e maka le fuaitau i au tusitusiga paia.
3. Faasoa pe aisea ua e manatu e taua ai le upumoni o loo i le fuaitau autu o le mau.
A uma, fautuaina i latou e amata ona tauloto nei mau ma fasifuaitau autu o mau.
Gaoioiga Faaopoopo e Aoao Mai Ai
O se isi gaoioiga
Mo se isi auala e fesoasoani ai i tagata aoga e auai i lenei lesona, o fesili e sili ona fesootai vavalalata i fuaitau taitasi o le atamai i aoaoga faavae e mafai ona tusia i luga o fasipepa. E mafai ona galulue taitoalua tagata aoga e tali fesili nei. O faataitaiga nei o auala e ono vaai ai lenei mea mo nisi o fuaitau o le atamai o aoaoga faavae:
1 Korinito 6:19-20 Sue le 1 Korinito 6:19–20 . Mafaufau e faailoga le fasifuaitau autu o le mau “O lou tino o le malumalu lea o le Agaga Paia.” Ia mautinoa e faailoga lenei fasifuaitau autu o le mau i au tusitusiga paia.
-
O le a le malumalu e sili ona e fiafia i ai? Aisea?
-
Aisea e te manatu ai o lou tino ua pei o se malumalu?
1 Korinito 11:11 Sue le 1 Korinito 11:11 . Manatu e faailoga le fasifuaitau autu o le mau “E leai se tane pe a le o i ai le fafine, e leai foi se fafine pe a le o i ai le tane, i le Alii.” Ia mautinoa e faailoga lenei fasifuaitau autu o le mau i au tusitusiga paia.
-
O fea na e vaai ai i se faataitaiga lelei o se faaipoipoga malosi?
-
Aisea e te manatu ai, o le faaipoipoga i le va o se alii ma se tamaitai e taua i le Tama Faalelagi?