Seminare
Atamai i Aoaoga Faavae: Luka 24:36-39

Atamai i Aoaoga Faavae: Luka 24:36-39

“O le Agaga e Leai ni Aano ma ni Ivi, pei o Au Nei ua Outou Vaavaai i ai”

Ata
The resurrected Jesus Christ (dressed in white robes) standing at the entrance to the Garden Tomb. Christ is portrayed looking toward the heavens.

I lau suesuega o le Luka 24:1–9, 36–48, ua e aoao ai e uiga i le Toetu o le Faaola. I le faaaogaina o le fuaitau o le atamai i aoaoga faavae Luka 24:36–39, o le a fesoasoani lenei lesona ia te oe e faateleina ai lou tomai o le aoaoga faavae o le toetu e ala i le taulotoina o le mau faasino ma le fasifuaitau autu o le mau, faamatala le aoaoga faavae, ma le faaaogaina o mataupu faavae o le mauaina o le malamalama faaleagaga i se tulaga moni o le olaga.

Puleaina tatau o le taimi. O gaoioiga toefaamanatu o le atamai i aoaoga faavae e tatau ona pupuu ma ia aoga. Ia pulea lelei a o e faatautaia nei gaoioiga toefaamanatu ina ia le tele se taimi e alu ai.

Sauniuniga a le tamaitiiti aoga: Valaaulia tamaiti aoga e mafaufau i mea sa latou aoaoina ma lagonaina a o latou suesueina le Toetu o le Faaola i le Luka 24:1–9, 36–48 .

Gaoioiga e ono Mafai Ona Aoao Ai

Tauloto ma faamatala

Manatua ina ua mavae puapuaga o le Faaola i Ketesemane ma le maliu i luga o le satauro, sa tuuina ifo i lalo Lona tino ma lagomau ai i se tuugamau. I le tolu o aso mulimuli ane, na toetu mai ai Iesu Keriso. Faitau le fuaitau o le atamai i aoaoga faavae Luka 24:36–39 ma vase upu taua po o fasifuaitau na aoao atu e le Faaola i Ona soo ina ua mavae Lona Toetu.

Manatu faapea ua talosagaina oe e tali atu i le uunaiga lenei mo le vaega o “Fesili ma Tali” o le mekasini o le Mo le Malosi o le Autalavou . Mafaufau po o le a se mea e mafai ona e faasoa atu i le na o le 2–3 fuaiupu.

Afai e le masani tamaiti aoga i le vaega o “Fesili ma Tali” o le mekasini o le Mo le Malosi o le Autalavou, mafaufau e faasoa atu ni faataitaiga mai lomiga talu ai nei.

  • O le a se mea ua matua faapitoa e uiga i le Toetu o Iesu Keriso?

Tuu atu i tamaiti aoga se avanoa e tauloto ai le mau faasino mo le fuaitau o le atamai i aoaoga faavae Luka 24:36–39 ma lona fuaitau autu o le mau talafeagai soafaatasi. O loo i lalo se faataitaiga se tasi o se auala e fai ai.

Ina ia faataitai le taulotoina o lenei mau ma le fasifuaitau autu o mau, vaevae se itulau i lau api faamaumau suesuega i ni vaega se fa. Tusi le mau faasino ma se tasi o fasifuaitau (e pei ona faaalia i lalo) i vaega taitasi. Mafaufau e tusi se ata po o se aikona faigofie e faatatau i ai e faatusa i vaega taitasi e fa o le mau faasino ma le fasifuaitau autu. Faataitai le taulotoina o nei mea taitasi seia oo ina mafai ona e taulotoina uma e aunoa ma le tilotilo i ai.

  • Luka 24:36–39

  • Aua o le agaga

  • e leai ni aano ma ni ivi,

  • faapei o au nei ua outou vaavaai iai

Faataitai le faaaogaaga

Fesoasoani i tamaiti aoga e toe faamanatu mataupu faavae o le mauaina o le malamalama faaleagaga e ala i le faamaeaina o le gaoioiga o loo i lalo i le tusa o le 3–5 minute. Mafaufau e fai atu ia i latou e lipoti mai pe na mafai ona latou lisiina mataupu faavae e tolu mai le manatuaga, ma valaaulia i latou e naunau e faasoa mai pe na faapefea ona faaaoga nei mataupu faavae, pe mafai foi ona faaaoga, i o latou olaga.

Toefaamanatu faapuupuu parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). O se tasi o auala e ono faia ai lenei mea o le vaai pe mafai ona e lisiina uma mataupu faavae e tolu mai le manatuaga. Ona tusi lea i lau api faamaumau suesuega, pe na faapefea ona e faaaogaina, pe mafai foi ona faaaoga, nei mataupu faavae i lou olaga.

Faataitai nei ona faaaoga mataupu faavae o le mauaina o le malamalama faaleagaga ma le aoaoga faavae o loo aoao mai i le Luka 24:36–39 e ala i le faitauina o le vaaiga faataitai lenei ma tali fesili o loo mulimuli mai.

Mafaufau e fetuunai le vaaiga faataitai lenei ina ia talafeagai mo tamaiti aoga.

O se tasi o au uo mamae, o Jinyoon, ua malie e fai [ana] lesona a faifeautalai i lou fale. Na siitia atu talu ai nei Jinyoon ma lona aiga i le tou pitonuu, ma e lei i ai sona malamalamaaga muamua po o se iloa e uiga ia Iesu Keriso. Ina ua aoao atu i ai le ata o le faaolataga ma le matafaioi a Iesu Keriso, e foliga mai sa le lagolelei Jinyoon ae e leai se tala e fai mai. Mulimuli ane, ina ua tuumuli faifeautalai, sa ia faasoa atu ia te oe e le talitonu o ia i le mataupu o le toetu ma le olaga pe a mavae le oti.

O fesili nei ua faamoemoe e mafai ai e tamaiti aoga ona faataitai e faaaoga mataupu faavae o le mauaina o le malamalama faaleagaga e i latou lava. Po o le talanoaina o nei fesili o se vasega po o ni vaega toalaiti, ia mautinoa e faalogo ma le toto‘a i tamaiti aoga e fuaina ai lo latou tomai e faaaoga nei mataupu faavae e i latou lava. Afai e manaomia e tamaiti aoga se fesoasoani, mafaufau e uunaia i latou i fesili e pei o fesili i lalo o ulutala o mataupu faavae taitasi o loo lisi atu i lalo.

  • O le a se mea po o se tala e te ono fai e fesoasoani ai ia Jinyoon ia malamalama i lou naunautaiga e fesoasoani ia te ia?

  • O a fesili e ono mafai ona e fai atu ia malamalama atili ai i mea e talitonu i ai Jinyoon po o le uiga foi o ona manatu?

  • E mafai faapefea ona e faaaogaina mataupu faavae taitasi e tolu o le mauaina o le malamalama faaleagaga e fesoasoani ai ia Jinyoon?

Faatino i le faatuatua

  • E ono mafai faapefea ona e faatino i le faatuatua i lenei tulaga?

  • O le a se mea e ono mafai ona e faasoa atu ia Jinyoon e uiga i le faatinoina i le faatuatua? Aisea e taua ai lenei laasaga i le sailia ai o tali i ana fesili?

Iloilo mataupu ma fesili faatasi ai ma se vaaiga e faavavau

  • O a fesili e ono mafai ona e fesili atu ai po o upumoni e faavavau e ono mafai ona e molimau atu ai ia Jinyoon a o e taumafai e fesoasoani ia te ia ia vaai i lona popolega mai se vaaiga e faavavau?

  • E ono mafai faapefea ona fesoasoani lenei mea ia Jinyoon e amata ai ona malamalama i lenei mea mai se vaaiga faavavau?

  • O le a se mea na fesoasoani ia te oe e te malamalama ai i le Toetu o le Faaola ma lana matafaioi i le ata o le faaolataga?

Saili le malamalama atili e ala i punavai paia ua atofaina

  • O a mau patino mai le Luka 24 e ono mafai ona e faaaogaina pe a tali atu ia Jinyoon? O a nisi punaoa e te ono iloiloina ae e te lei tali atu? (O nisi o anomea sa e suesueina i le lesona talu ai i le Luka 24 e mafai ona fesoasoani.)

  • O fea se isi mea e te faasino i ai Jinyoon pe afai e manao o ia e suesue atili na o ia lava?

A uma se taimi na tuu atu i tamaiti aoga e faaaoga ai mataupu faavae o le mauaina o le malamalama faaleagaga, valaaulia i latou e mafaufau pe o a ni o latou lagona na i ai. Mafaufau e fai atu i tamaiti aoga e faasoa ane o latou aafiaga i le faaaogaina o nei mataupu faavae i o latou lava olaga. Valaaulia i latou e faasoa mai po o le a le uiga o nei mataupu faavae ia i latou.

Toefaamanatu o le Atamai i Aoaoga Faavae

Faaaoga le gaoioiga toe faamanatu lenei i se lesona o le a aoao atu i se taimi lata mai.Faaali atu vaega nei e fa o le mau faasino ma le fasifuaitau autu mo le Luka 24:36–39 e pei ona faaalia.

e leai ni aano ma ni ivi,

Aua o le agaga

Luka 24:36–39

faapei o au nei ua outou vaavaai iai

Valaaulia tamaiti aoga e tusi le mau faasino lenei ma le fasifuaitau autu i le faasologa sao i a latou api faamaumau suesuega.