Atamai i Aoaoga Faavae: Iakopo 2:17–18

“E Mate Le Faatuatua Pe a Leai Ni Galuega”

Ata

two young men sharing Book of Mormon

I se lesona talu ai, sa e aoaoina ai e tatou te faaalia le faatuatua ia Iesu Keriso e ala i a tatou faatinoga amiotonu. O lenei lesona o le a fesoasoani ia te oe e tauloto ai tusi faasino o le atamai i aoaoga faavae ma le fasifuaitau autu o mau mo le Iakopo 2:17–18, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani o le olaga.

O le faailoaina atu i tagata aoga o a latou saofaga e faatauaina ma aoga. Vaavaai mo ni auala e fesoasoani ai i tagata aoga taitasi ia lagona le faatauaina ma le taliaina ma o a latou saofaga e faamanuiaina ai le vasega. Manatua e faafetai atu i tagata aoga mo lo latou auai ma faailoa atu ia i latou e te talisapaia lo latou naunau e faasoa atu.

Sauniuniga a le tagata aoga: Valaaulia tagata aoga e mafaufau e uiga i se mataupu faavae o le talalelei latou te talitonu i ai ae e ono faigata ona faatino. Fai atu i le vasega e mafaufau pe o le a le mea o ono taofia ai i latou mai le faatinoina o lena mataupu faavae.

Gaoioiga E Ono Mafai Ona Aoao Ai

O lenei lesona i fuaitau o le atamai i aoaoga faavae ua faatulagaina ia aoaoina pe a uma le lesona i le “Iakopo 2,” o le lesona faatatau mo le fuaitau o le atamai i aoaoga faavae Iakopo 2:17–18 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e talafeagai i le vaiaso foi lena.

Tauloto ma faamatala

Fesoasoani i tagata aoga e tauloto ma faamatala le tusi faasino o tusitusiga paia ma le fasifuaitau autu o le mau mo le Iakopo 2:17–18 . O le gaoioiga o mulimuli mai o se tasi lea o auala e faatino ai.

Tusi le Iakopo 2:17–18, E mate le faatuatua pe a leai ni galuega i luga o se fasipepa e i ai avanoa i le va o upu taitasi. Fai leotele le tusi faasino ma le fasifuaitau autu o le mau. Ona oti ese lea o upu taitasi ma le numera, faafefiloi, ma toe faatulaga lelei. Toe fai le mau ma le tusi faasino. Toe fai le faagasologa seia oo ina mafai ona e taulotoina le tusi faasino ma le fasifuaitau autu o le mau i le mafaufau e aunoa ma le fesoasoani a soo se fasipepa.

Afai e sili atu ona aoga mo lau vasega, mafaufau e oti ni nai seti o nei pepa a o lei amataina le vasega ma tuu seti taitasi i totonu o se teutusi e mafai e tagata aoga ona faaaoga taitoatasi, i ni vaega pe i ni paga.

A o e faitauina le Iakopo 2:17–18 , toe manatua mai le lesona talu ai le mataupu faavae e faapea o le faatuatua moni ia Iesu Keriso e manaomia ai galuega amiotonu.

E mafai faapefea ona e faamatalaina lenei upumoni i se auala e ono faaosofia ai se isi tagata e faatino lona faatuatua?

Faataitai le faaaogaina

Tagai i mataupu faavae nei e tolu o le mauaina o le malamalama faaleagaga. Ona tusi lea mo mataupu faavae taitasi se fuaiupu se tasi i au lava upu e faaaotele ai lona uiga. Afai e fesoasoani, toe faamanatu parakalafa 5–12 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022).

Faatino i le faatuatua.
Iloilo manatu ma fesili i se vaaiga e faavavau.
Saili le malamalama atili e ala i punaoa mamana ua filifilia.

O le faatino e tusa ai ma o tatou talitonuga e mafai ona faigata. Na ta’ua e Elder David A. Bednar o le Korama a Aposetolo e Toasefululua, “O mea ua tatou iloa e le o atagia mai i taimi uma i mea tatou te faia” (“More Diligent and Concerned at Home,” Ensign po o le Liahona, Nov. 2009, 17). A o e faitauina tulaga nei, mafaufau i mafuaaga atonu tatou te le faatinoina ai i taimi uma ia mataupu faavae o le talalelei ua tatou iloa.

Ua manao se tamaitai talavou e faitau ana tusitusiga paia i aso taitasi. O ni isi taimi e le maua ai e ia le uunaiga pe a ia le malamalama pe maua se uiga i mea o loo ia faitauina.
Sa totogi ma le faamaoni e se tamaitai talavou le sefuluai a o laitiiti. Ina ua matua o ia ma ua i ai sana galuega tumau, o le aofaiga o le sefuluai ua faamoemoeina mai ia te ia ua sili atu lava nai lo o se mea sa ia foaiina muamua ma ua sili atu ona faigata ona totogi.
Ua tele tausaga o aoaoina se alii talavou e uiga ia Iesu Keriso ma Lana Togiola. E talitonu o ia na puapuagatia Iesu mo agasala a tagata ma e mafai ona faamagaloina ana agasala. Sa ia maua se aafiaga anoa i le salamo i le taimi ua tuanai. Peitai, ua iloa e ia lava le umi o le faagasologa o ni vaitaimi e aunoa ma lona mafaufau e salamo.

Filifili se tasi o tulaga o i luga, pe mafaufau i se isi mataupu faavae o le talalelei e te talitonu i ai ae faafaigata ona e faatinoina. Tusi pe mafai faapefea e oe po o le tagata i le tulaga ua e filifilia ona faaaoga mataupu faavae e tolu o le mauaina o le malamalama faaleagaga e taulima ai le tulaga.

Afai e te manao i se fesoasoani mo le faaaogaina o nei mataupu faavae i le tulaga na e filifilia, mafaufau e tali ni isi po o fesili uma nei.

Mataupu Faaavae 1: Faatino i le faatuatua

I aso ua mavae, o le a le mataupu faavae o le talalelei na e faatinoina i le faatuatua?
O le a se mea na e aoaoina e uiga ia Iesu Keriso mai lena aafiaga e ono fesoasoani ia te oe i lenei tulaga?

Mataupu Faavae 2: Iloilo manatu ma fesili i se vaaiga e faavavau

O le a sou manatu pe faapei le silasila a le Tama Faalelagi i lenei tulaga? O a ni auala e mafai ai ona Ia fesoasoani?
E mafai faapefea e le faatinoina o lenei mataupu faavae ona oo atu ai i faamanuiaga i le taimi nei ma le faavavau?

Mataupu Faavae 3: Saili le malamalama atili e ala i punaoa mamana ua filifilia

E mafai faapefea ona fesoasoani le Iakopo 2:17–18 i lenei tulaga? O a isi mau po o lauga o le konafesi aoao e mafai ona fesoasoani ia te oe e malamalama atili ai ma lagona le faaosofia e ola ai i lenei mataupu faavae? (Mo se faataitaiga, tagai i le Alema 32:27–28 .)
E masani ona fesoasoani le talanoaina ai o nei mataupu ma se uo faatuatuaina, tagata o le aiga, po o se taitai o le Ekalesia. Mata o ai e finagalo le Alii ia te oe e te talanoa atu i ai i lenei tulaga?

Taumafai e fatu se siosiomaga e lagona ai e tagata aoga le saogalemu e talanoaina o latou manatu ma atugaluga. Valaaulia ni tagata aoga se toatele e faasoa mai se auala se tasi pe sili atu o le a latou faaaogaina ai mataupu faavae o le mauaina o le malamalama faaleagaga e fesoasoani ai i o latou tulaga e aunoa ma le faasoaina atu o soo se mea e maaleale patino tele. Afai e aoga, fai atu fesili tulitatao e pei o le “Aisea o le a fesoasoani ai lena mataupu faavae?” ma le “E i ai se isi tagata i le vasega e i ai ni malamalamaaga po o ni aafiaga e ono fesoasoani i lenei tulaga?”

Faaaoga sina taimi e mafaufau loloto ai i mea ua e aoaoina e ala i lenei lesona. Afai na e faailoa maia se upumoni o le talalelei o loo faigata mo oe lava ona faatino, ia iloilo ma le faamaoni pe afai ua e fuafua e faatino i le taimi nei. Afai e te le o fuafua e faatino i le taimi nei, mafaufau e uiga i mea faalavefau o loo i ai i lou ala ma pe mafai faapefea ona fesoasoani le Alii ia te oe.

Atonu e aoga le talanoaina o fesili i le parakalafa o loo i luga faatasi ma le vasega. Molimau atu i le naunautaiga o le Alii e fesoasoani ma faamanuiaga e oo mai a o tatou galulue ai i le faatuatua ia Iesu Keriso.

Toe faamanatu le atamai i aoaoga faavae

I le taimi o se lesona i le lumanai, fesoasoani i tagata aoga e toe faamanatu lenei fuaitau o le atamai i aoaoga faavae ma le fasifuaitau autu o le mau. Mafaufau e vaevae le vasega i ni paga ma tuu atu ia i latou e tagai faapuupuu i le tusi faasino ma le fasifuaitau autu o le mau: “Iakopo 2:17–18, E mate le faatuatua pe a leai ni galuega.” Ona valaaulia lea o i latou e auauai e fai mai se upu po o se numera taitasi i le taimi. Mo se faataitaiga, e fai mai le tagata aoga muamua “Iakopo,” o le tagata aoga lona lua o le a fai mai, “lua,” ma faapena ona fai. O le a faaauau pea ona latou feauauai seia oo ina latou tauina uma tusi faasino ma fasifuaitau autu o le mau. Ona mafai lea ona latou fesuiai le tagata e fai mai le upu muamua ma toe fai le gaoioiga.

Gaoioiga Faaopoopo e Aoao Ai 

E faaopoopo atu i fesili e lua o loo mulimuli ane i le “Mataupu Faavae 3: Saili le malamalama atili e ala i punaoa mamana ua filifilia,” mafaufau e valaaulia tagata aoga e faaaoga ni nai minute e sue ai autu i le Potutusi o le Talalelei i le ChurchofJesusChrist.org (e pei o le suesueina o tusitusiga paia, sefuluai, po o le salamo) e faatatau i le tulaga faataitai na latou filifili e tali atu i ai. E mafai e tagata aoga ona faaaoga mea ua latou aoaoina e tali atu ai i o latou tulaga faataitai na filifilia.