Atamai i Aoaoga Faavae: 2 Tesalonia 2:1–3

“O Le Aso o Keriso … E Le Oo Mai, Seia Muai Ona Taunuu o le Tete’a Ese”

Ata

Image of man at a desk writing on parchment

I le lesona talu ai, sa e aoaoina ai sa valoia i aso anamua e faapea a o lei oo i le Afio Mai Faalua o Iesu Keriso, o le a tupu se Liliuese mai Lana Ekalesia (tagai i le “2 Tesalonia 2”). O lenei lesona o le a fesoasoani ia te oe e tauloto ai mau faasino o le atamai i aoaoga faavae ma le fasifuaitau autu o mau mo le 2 Tesalonia 2:1–3 , faamatala le aoaoga faavae o le Liliuese, ma faaaoga mataupu faavae o le mauaina o le malamalama faaleagaga i se tulaga masani o le olaga.

O le fesoasoani ai i tagata aoga e taulimaina fesili mai se tulaga o le faatuatua. “O le toatele o a tatou tagata aoga ua faamanuiaina i le meaalofa o le loto talitonu. O le toatele o a tatou tagata aoga e i ai fesili, ae le o ni masalosaloga. O le auala tatou te taulimaina ai le Atamai i Aoaoga Faavae e tatau ona faamautu ai le faatuatua ma fesoasoani ai i tagata aoga e tali fesili mo i latou lava ma saunia ai i latou e fesoasoani atu i isi. Ae e le tatau lava ona faia i se auala o le a fatuina ai le masalosalo po o le faaitiitia ai o le faatuatua” (Chad H Webb, “Atamai i Aoaoga Faavae” [saunoaga i le faasalalauga o le aoaoga faaletausaga mo Seminare ma Inisitituti o Mataupu Faalelotu, Iuni 14, 2016]).

Sauniuniga a le tagata aoga: Valaaulia tagata aoga e mafaufau loloto i le fesili lenei ma o mai saunia e faamatala mai pe faapefea ona latou taliina: “Aisea na manaomia ai ona faaali mai le Atua ia Iosefa Samita e toefuatai mai Lana Ekalesia pe afai ua uma ona faatuina le Faa-Kerisiano ma ua toatele tagata ua uma ona talitonu i le Tusi Paia?”

Gaoioiga e ono Mafai Ona Aoao Ai

O lenei lesona ua fuafuaina ia aoaoina pe a maea ona fai le lesona o le “2 Tesalonia 2,” o le lesona faatatau mo le fuaitau o le atamai i aoaoga faavae o le 2 Tesalonia 2:1–3. Afai e manaomia ona fetuunai lenei lesona i se isi vaiaso ina ia talafeagai ai ma isi faatulagaga o aoga, ia mautinoa e fetuunai foi ma le faatatau o le lesona.

Tauloto ma faamatala

Faaali na o le tusi faasino o le mau o le 2 Tesalonia 2:1–3, ma valaaulia le vasega e tali mai i le fesili lenei.

O le a se mea e te manatua e uiga i mea o loo aoao mai i le 2 Tesalonia 2:1–3 ?

Tauloto le tusi faasino o le mau ma le fasifuaitau autu o le mau mo le 2 Tesalonia 2:1–3. O se tasi auala e faia ai lenei mea o le faamaea lea o le gaoioiga lenei (po o se gaoioiga talitutusa e faaaoga ai le polokalama mo telefoni feaveai o le Atamai i Aoaoga Faavae):

E mafai e tagata aoga ona faamaea e i latou lava le gaoioiga lenei, pe e mafai foi ona faia i luga o le laupapa faatasi ma le vasega atoa.

Tusi le 2 Tesalonia 2:1–3: “O le aso o Keriso … e le oo mai, seia muai ona taunuu o le tete’a ese” i lau api faamaumau mo suesuega pe i totonu o lau masini faatekinolosi.

Toe faitau faatele ma leotele po o i lou mafaufau le tusi faasino ma le fasifuaitau autu o le mau.

Titina pe tapeese se fasifuaitau, e pei o le “muai ona taunuu o le tete’a ese,” ma taumafai e toe tauloto atoa le tusi faasino ma le fasifuaitau autu o le mau.

Faaauau pea ona titina pe tapeese ia fasifuaitau faaopoopo seia oo ina mafai ona e taulotoina atoa le tusi faasino ma le fasifuaitau autu o le mau mai lou manatua.

Atonu e te manatua ina ua e suesueina le 2 Tesalonia 2 , sa e aoaoina ai sa valoia i aso anamua e faapea a o lei oo i le Afio Mai Faalua o Iesu Keriso, o le a tupu se liliuese mai Lana Ekalesia.

Nai lo le tuu atu i tagata aoga e tusi se faamalamalamaga o le Liliuese Tele e fai ma vaega o le gaoioiga lenei, mafaufau e tofi i latou i ni paga ma valaaulia i latou e feauauai e faamalamalama atu le Liliuese Tele o le tasi i le isi. Afai e manaomia e tagata aoga ona malamalama atili i le aoaoga faavae o le Liliuese ma le Toefuataiga ao lei faamaeaina lenei gaoioiga, mafaufau e faaaoga ni nai minute e toe faamanatu ai anomea mai le lesona talu ai.

Tusi se faamalamalamaga po o le a le Liliuese Tele ma pe aisea na tupu ai. Tusi e pei o loo e faamatalaina atu le Liliuese i se tamaitiiti. Faaaoga upumoni mai le 2 Tesalonia 2:1–3 e fai ma vaega o lau faamalamalamaga, ma ia aofia ai malamalamaaga i le mafuaaga na tatau ai ona i ai se Toefuataiga atoa o le Ekalesia a Keriso.

Faataitai o le faaaogaina

Afai e manaomia, tuu atu se avanoa mo tagata aoga e toe faamanatu ai mataupu faavae o le mauaina o le malamalama faaleagaga. O se tasi o auala e faia ai lenei mea o le faaali atu lea o le suega puupuu faafetaui mo i latou e faamaea e i latou lava pe fai i ni paga po o ni vaega toalaiti. I se isi faiga, e mafai ona tuuina atu faaeletonika le suega i se taaloga i luga o upega tafailagi pe afai e maua e tagata aoga ni masini gafatia talafeagai. O tali sa’o o le (1) i; (2) a; (3) e.

A o e faaauauina lenei lesona, o le a e maua se avanoa e fesoasoani ai i se tasi e faaaoga mataupu faavae o le mauaina o le malamalama faaleagaga. Ina ia vaai po o le a le lelei o lou manatuaina o nei mataupu faavae, taumafai e faafetaui faamatalaga nei ma le mataupu faavae o le mauaina o le malamalama faaleagaga o loo faamatala mai i faamatalaga taitasi.

“O tagata e saili ma le faamaoni i le upumoni e tatau ona faaeteete i punavai o faamatalaga e le faatuatuaina.”
“Faalagolago i le Atua ma liliu muamua atu ia te Ia e ala i le tatalo faamaoni, o se suesuega o Ana aoaoga, ma le usiusitai i Ana poloaiga.”
“Mafaufau [i fesili] i le faatatauga aofai o le fuafuaga o le faaolataga ma aoaoga a le Faaola.”

A. Faatino i le faatuatua.E. Iloilo manatu faavae ma fesili i se vaaiga e faavavau. I. Saili le malamalama atili e ala i punaoa mamana filifilia.

Afai e manaomia ona e iloiloina atili nei mataupu faavae, faitau i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

Valaaulia tagata aoga e manatunatu i a latou sauniuniga mo le vasega a o latou faamaeaina le gaoioiga faataitai lenei.

Manatu faapea o loo e lafoina atu se feau tusitusi i lau uo o Keyshawn, o se tagata o se isi lotu Kerisiano. E tuuto tele o ia ia Iesu Keriso ma suesue i le Tusi Paia e le aunoa. I se feau tusitusia ia te oe, na fai mai Keyshawn, “O le asō na aoao mai ai la’u faifeau e talitonu tagata o la outou ekalesia e faapea o la outou ekalesia ua na o le pau lava lea o le ekalesia moni ma o isi lotu uma e sese. E sao lea? Ou te lagona le latalata atili atu i le Atua ona o la’u ekalesia. E faapefea ona faapea mai e le o se ekalesia mai i le Atua?”

Aisea e ono masani ai mo tagata o isi ekalesia ona i ai ni fesili faapenei?
E mafai faapefea ona e tali atu ia Keyshawn i se ala faaKeriso?

Ua e toe lafoina atu se feau tusitusi ia Keyshawn, ma faafetai atu ia te ia mo lana fesili magafagafa lelei. Ua e fesili atu pe mafai ona e faasoa atu lau tali ia te ia i le aso e sosoo ai, ma ua malie i ai o ia.

Faaaoga mataupu faavae o le mauaina o le malamalama faaleagaga e saunia ai se tali mo Keyshawn. Ia mautinoa e faaaoga mataupu faavae uma e tolu. Faaaoga fesili ma gaoioiga nei e fesoasoani ia te oe e saunia ai lau tali.

E mafai e tagata aoga ona talanoaina fesili nei i ni paga po o ni vaega toalaiti a o lei tusiaina e i latou lava a latou tali.

Atonu e aoga mo tagata aoga le auina atu o se kopi o a latou tali mo le iloiloina. Ia mautinoa ua malamalama lelei tagata aoga i le aoaoga faavae o le Liliuese ma le Toefuataiga ma mataupu faavae o le mauaina o le malamalama faaleagaga.

Saili le malamalama atili e ala i punaoa mamana filifilia

E mafai faapefea ona e faaaogaina upumoni o loo aoao mai i le 2 Tesalonia 2:1–3 e fesoasoani ai ia Keyshawn?

Saili ia le itiiti ifo ma le tolu ni mau, lauga, po o ni tusiga faaopoopo e te manatu o le a aoga i lenei tulaga. Mafaufau e faaaoga punaoa nei:

Faitau tusiga mo le “ Liliuese ” ma le “ Toefuataiga o le Talalelei ” i le Taiala i Tusitusiga Paia, pe saili ni tusiga talafeagai i le Taiala i Autu. O nei tusiga e mafai ona maua i le scriptures.ChurchofJesusChrist.org.
Asiasi i le tusiga o le “Liliuese” i Autu o le Talalelei (topics.ChurchofJesusChrist.org).
Faasino i tusitusiga paia ma faamatalaga mai le lesona o le “2 Tesalonia 2” pe mai le “Lesona 1: O Le Savali o le Toefuataiga o le Talalelei a Iesu Keriso” i le Tala’i La’u Talalelei (2018), 31–46.

O a fuaitau o tusitusiga paia po o isi punaoa na e maua e mafai ona fesoasoani ia te oe e tali ai ia Keyshawn?

Iloilo manatu faavae ma fesili faatasi ai ma se vaaiga e faavavau

O a upumoni e uiga i le Tama Faalelagi ma Iesu Keriso e te manao e faasoa atu ia Keyshawn e mafai ona fesoasoani ia te ia e malamalama ai i le manaomia o le Toefuataiga?

Faatino i le faatuatua

O a ni faatinoga faapitoa e mafai ona e valaaulia Keyshawn e fai ina ia mafai ai ona ia aoao mo ia lava pe aisea na tatau ai ona i ai se Toefuataiga o le Ekalesia a Keriso?
O a ituaiga aafiaga e mafai ona faamoemoe Keyshawn e maua pe afai na te faia nei faatinoga?
E faapefea ona avea le valaaulia o ia e galue e fai ma faatinoga o le faatuatua mo oe lava?

Valaaulia tagata aoga naunautai e faasoa mai i le vasega a latou tali, e aofia ai soo se fuaitau o tusitusiga paia, lauga, po o tusiga aoga na latou mauaina. Afai e i ai se taimi, mafaufau e valaaulia ni volenitia e faasoa mai pe na faapefea ona latou maua a latou molimau o le Toefuataiga.

Toe faamanatu le atamai i aoaoga faavae

I le amataga po o le faaiuga o se lesona o le a sosoo ai, ia le silia ma le tolu i le lima minute e toe faamanatu ai le tusi faasino o le mau ma le fasifuaitau autu o le mau mo lenei fuaitau o le atamai i aoaoga faavae. Faaaoga le gaoioiga tauloto lava lea e tasi na faamaeaina e tagata aoga i le amataga o lenei lesona.