Galuega 22–28

Vaaiga Aoao

I lesona o lenei vaiaso, o le a e suesue ai i folafolaga na faia e le Alii i Ana Aposetolo ma le ala na faataunuuina ai i le olaga o Paulo. Pe saisaitia i filifili pe aumaia i luma o taitai ma tupu, sa faasoa atu ma le faamaoni e Paulo lana molimau mamana ia Iesu Keriso ma Lana talalelei. Ina ua feagai o ia ma matagi malolosi, malepe lona vaa, ma isi faigata, sa ia tuuina atu ni fautuaga ma lapataiga musuia ina ia saogalemu ai i latou na faatasi ma ia. O lenei vaiaso e aofia ai se lesona e fesoasoani ia te oe e tauloto ai mau faasino o le atamai i aoaoga faavae ma fasifuaitau autu o mau, faapea foi ma se avanoa e iloilo ai sini ua e faatuina faatasi ai ma le aoaoina ma le tuputupu ae patino na e maua i le taimi o lau suesuega o le Feagaiga Fou.

Sauni e Aoao Atu

O nei faamatalaga e tuuina atu ai mo faiaoga ni manatu mo ni mea e tatau ona muai saunia mo lesona taitasi.

Galuega 22–23, 26–28

Faamoemoega o le lesona: O lenei lesona ua faamoemoe e faatupulaia ai le loto mautinoa o tamaiti aoga e faapea o le a faataunuuina e le Tama Faalelagi ma Iesu Keriso a Laua folafolaga a o taumafai tamaiti aoga e auauna atu ia i Laua.

Sauniuniga a le tamaitiiti aoga: Valaaulia tamaiti aoga e mafaufau loloto i folafolaga na faia e le Alii ia i latou. Mo se faataitaiga, e mafai ona latou mafaufau i folafolaga i tatalo o le faamanatuga (tagai i le Moronae 4:3 ; 5:2) po o isi tusitusiga paia. O tamaiti aoga ua maua o latou faamanuiaga faapeteriaka e mafai ona faitauina ma vaavaai mo folafolaga mai le Alii.

Vitio: “Be of Good Cheer” (1:32)
Siata: O se siata o loo faaalia ai folafolaga a le Alii ma ala Na te faataunuuina ai

Fautuaga faafaiaoga i fesootaiga i vitio: A uma ona suesue e tamaiti aoga folafolaga na faia e le Alii i Aposetolo, fai atu ia i latou e faaaoga le vaega o talanoaga tau feau tusitusi e tusi ai se tasi o folafolaga ua latou iloaina. Ma a o faaauau pea a latou suesuega, valaaulia i latou e faasoa mai i le vaega o talanoaga tau feau tusitusi le auala na faataunuuina ai e le Alii le folafolaga sa latou faailoaina atu.

Galuega 22–26

Faamoemoega o le lesona: O lenei lesona ua faamoemoe e fesoasoani i tamaiti aoga e atiina ae ai se naunautaiga sili atu e mulimuli i le faataitaiga a Paulo i le molimau atu ai ia Iesu Keriso ma Lana talalelei i o latou olaga i aso taitasi.

Sauniuniga a le tagata aoga: Valaaulia tagata aoga e mafaufau loloto ma o mai saunia e faasoa mai se aafiaga o se taimi na aafia ai i latou i se molimau a se isi tagata.

Siata: O se siata o loo faaalia ai le ala na tali atu ai tagata i le molimau a Paulo

Fautuaga faafaiaoga i fesootaiga i vitio: I le faaiuga o le lesona, mafaufau e tuu tamaiti aoga i ni potu e taape i ai e talanoa ai e uiga i a latou molimau ma o latou manatu i le auala e faasoa atu ai i ni auala masani.

Galuega 27–28

Faamoemoega o le lesona: O lenei lesona ua faamoemoe e fesoasoani i tamaiti aoga ia lagona ai le taua o le mulimuli i timaiga a le perofeta.

Sauniuniga a le tamaitiiti aoga: Valaaulia tamaiti aoga e suesue nisi o aoaoga i le taimi nei a perofeta o aso nei. Mo se faataitaiga, e mafai ona latou faitau pe matamata i se lauga o se konafesi aoao talu ai nei, faitau se tala tusia mai se perofeta po o se aposetolo i le mekasini Mo le Malosi o le Autalavou, pe faitau ni nai mataupu i le tamaitusi Mo le Malosi o le Autalavou. Valaaulia tamaiti aoga e mafaufau loloto pe o a ni o latou lagona e uiga i le tali atu i timaiga a perofeta.

Pepa e tufa atu: “O Le Malaga a Paulo i Roma”

Fautuaga faafaiaoga i fesootaiga i vitio: Mafaufau e faaali atu se kopi o le pepa tufa atu mo tamaiti aoga e feutagai ai a o latou faia le gaoioiga i a latou api faamaumau mo suesuega. Ona faaaoga lea o le vaega o le laupapa paepae, tofi ni tamaiti aoga eseese e tusi se ata pe fai se aotelega o mea na tutupu i totonu o se tasi o pusa e fa. Ona fai atu lea i na tamaiti aoga e faamatala mai tala po o ata na latou tusia.

Iloiloga 16 o le Atamai i Aoaoga Faavae

Faamoemoega o le lesona: O lenei lesona ua faamoemoe e fesoasoani i tamaiti aoga e tauloto ai nisi o mau faasino o mau mo le atamai i aoaoga faavae ma fasifuaitau autu o mau o le Feagaiga Fou.

Sauniuniga a le tamaitiiti aoga: Valaaulia tamaiti aoga e faitau se tasi pe lua o fuaitau o le atamai i aoaoga faavae sa latou suesueina. Lu’i i latou e tauloto le mau faasino o tusitusiga paia ma le fasifuaitau autu o tusitusiga paia pe, afai e ono mafai, le fuaitau atoa o le atamai i aoaoga faavae.

Vitio: “He Lives” (17:03; matamata mai le faailotaimi 5:27 seia oo i le 6:05)
Anomea mo tamaitiiti aoga: Pepa e fai ai kata e aoao ai
Siata: O le siata o le atamai i aoaoga faavae e faaali pe tufa atu

Fautuaga faafaiaoga o fesootaiga i vitio: A uma ona faataitai e tamaiti aoga le taulotoina o mau faasino o le atamai i aoaoga faavae ma fasifuaitau autu o mau, faasilasila atu se fasifuaitau autu o mau i le vasega ma fai atu ia i latou e tuu tonu le kata e aoao ai i luma o a latou meapueata i totonu o se taimi faatapulaa (mo se faataitaiga, lima sekone).

Iloilo Lou Aoaoina 7

Faamoemoega o le lesona: O lenei lesona ua faamoemoe e fesoasoani i tamaiti aoga e iloilo ai sini na latou faatuina faatasi ai le aoaoga ma le tuputupu ae patino na latou maua mai i a latou suesuega o le Feagaiga Fou.

Sauniuniga a le tamaiti aoga: Valaaulia tamaiti aoga e o mai saunia e faasoa mai ni faataitaiga mai le tusi o Galuega o tagata o e na liua ia Iesu Keriso.

Fautuaga faafaiaoga o fesootaiga i vitio: Tuu atu i tamaiti aoga se vaaiga aoao o le Gaoioiga A ma le Gaoioiga E, ma lafo atu se kopi o gaoioiga uma e lua i tamaiti aoga. Ona tuu lea o tamaiti aoga i ni potu e taape i ai ma faataga i latou e filifili po o le fea o gaoioiga e fai faatasi. A latou toe foi mai i le vasega, tuu atu ia i latou e faasoa mai mea sa latou talanoaina ma aoaoina.