Si Nicodemo usa ka Pariseo ug “pangulo sa mga Judeo” (Juan 3:1). Miduol siya sa Manluluwas inig ka gabii aron magsukna og mga pangutana mahitungod sa kaluwasan. Kini nga leksiyon makatabang kanimo sa pagsabot ug pagbati sa importansiya sa pagkatawo pag-usab “sa tubig ug sa Espiritu” (Juan 3:5) aron makasulod sa gingharian sa Dios.
Usa ka tinguha nga magbag-o
Paghunahuna og sitwasyon mahitungod sa usa ka tin-edyer nga gustong magbag-o, moduol sa Manluluwas, ug makasinati og dugang pang kalinaw pero dili sigurado kon unsaon. Paghunahuna og mga partikular nga butang nga lagmit nga gustong bag-ohon niining tawhana ug pipila ka mga problema nga posibleng ilang maatubang sa pagbag-o. Mahimo usab ka nga maghunahuna mahitungod sa mga kasinatian nga nasinati nimo o sa ubang tawo sa pagbuhat og mga positibong kabag-ohan nga makahatag niini nga tin-edyer og paglaom nga mabag-o sila.
Ngano kaha nga ang Langitnong Amahan nagkinahanglan man nga magbag-o kadtong gustong mosulod sa Iyang gingharian?
Sa imong journal sa pagtuon, isulat ang pipila ka paagi nga gibati nimo nga giaghat ka nga angayng bag-ohon ug mahimong mas mahisama ni Jesukristo. Sa kinatibuk-an niini nga leksiyon, dapita ang pagdasig sa Espiritu Santo samtang ikaw nagkat-on kon unsaon sa pagtinguha sa tabang sa Manluluwas sa pagbuhat og mga kausaban nga Iyang gitinguha diha kanimo.
Gitudloan ni Jesus si Nicodemo mahitungod sa pagkatawo pag-usab
Usa ka tawo nga ginganlan og Nicodemo miduol kang Jesus pagka-ka gabii. Si Nicodemo usa ka Pariseo ug pangulo sa mga Judeo. Sa kaulahian gipanalipdan niya si Jesus sa atubangan sa mga Pariseo (tan-awa sa Juan 7:50–53) ug miapil sa mga tumutuo atol sa lubong ni Jesus (tan-awa sa Juan 19:39–40). Miduol si Nicodemo sa Manluluwas niining gabhiona nga miila nga si Jesus “usa ka magtutudlo nga gikan sa Dios” (Juan 3:2).
Ang Juan 3:5 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.
Basaha ang Juan 3:1–5, pangitaa kon unsa ang gitudlo sa Manluluwas kang Nicodemo nga kinahanglan niyang buhaton aron makasulod sa gingharian sa Dios.
Unsa kaha ang gipasabot sa “ipakatawo pag-usab”? (Juan 3:3).
Ngano kaha nga kita kinahanglan nga ipakatawo pag-usab aron makita ang gingharian sa Dios?
Sa dihang wala masabti ni Nicodemo kon sa unsang paagi nga ipakatawo pag-usab, unsa ang gitudlo sa Manluluwas (sumala sa girekord sa bersikulo 5)?
Ang usa sa mga baroganan nga atong nakat-onan gikan sa mga pagtulon-an sa Manluluwas ngadto kang Nicodemo mao nga kinahanglan kitang matawo pinaagi sa tubig ug sa Espiritu aron makasulod sa gingharian sa Dios.
Sa imong hunahuna, unsay buot ipasabot sa matawo pinaagi sa tubig ug sa Espiritu?
Sa unsa nga mga paagi kaha nga ang pagpabunyag ug pagpakompirma makatabang kanato nga matawo pag-usab ug makasulod sa gingharian sa Dios?
Unsa ang gitudlo sa Manluluwas kang Nicodemo nga gusto nimong masabtan sa tawo nga anaa sa sitwasyon nga imong gimugna?
Ang bunyag ug ang pagpakompirma mao ang duha ka gikinahanglan nga mga ordinansa sa kaluwasan ug kahimayaan nga kinahanglang madawat sa kada tawo aron mapanunod ang langitnong gingharian. Kini nga mga ordinansa mao ang ganghaan nga atong sudlan aron makasulod sa dalan sa pakigsaad nga magdala ngadto sa kinabuhing dayon (tan-awa sa 2 Nephi 31:17–20). Samtang naglakaw kita niini nga dalan ug nagtuman sa atong mga pakigsaad, makasinati kita og kabag-ohan ug espirituhanong pagpakatawo pag-usab. Si propeta Alma diha sa Basahon ni Mormon mipasabot sa tahas sa Manluluwas sa pagtugot kanato nga ipakatawo pag-usab. Basaha ang Alma 7:14, nga pangitaa kon sa unsang paagi ang Manluluwas makatabang kanato nga ipakatawo kita pag-usab.
Unsa ang tahas sa Manluluwas sa pagtabang kanato nga ipakatawo pag-usab?
Gikan sa 2 Nephi 31:17 nakat-onan usab nato ang tahas sa Espiritu Santo sa pagtabang kanato nga ipakatawo pag-usab: “Ug unya mosunod ang kapasayloan sa inyong mga sala pinaagi sa kalayo ug sa Espiritu Santo.”
Unsa ang tahas sa Espiritu Santo sa pagtabang kanato nga ipakatawo pag-usab?
Tan-awa ang bidyo “A Change of Heart [Usa ka Pagbag-o sa Kasingkasing]” (4:39), gikan sa time code 0:40 hangtod sa 4:09, aron makita ang nasinati sa usa ka batanong lalaki nga ginganlan og Ever. Pangita og piho nga mga butang nga iyang gibuhat nga mitugot sa Manluluwas sa pagtabang kaniya nga mausab. (Kini nga bidyo anaa sa ChurchofJesusChrist.org.)
Unsay nakadasig kanimo mahitungod sa mga kausaban nga gibuhat sa batan-ong lalaki?
Unsa ang pipila ka mga kausaban nga gibuhat nimo o sa usa ka tawo nga imong kaila aron mahimong mas mahisama ni Jesukristo?
Unsay gikatabang sa mga ordinansa sa bunyag ug pagpakompirma niini nga mga kabag-ohan?
Usahay naghunahuna kita kon unsa ang atong kahimtang sa atong kaugalingong espirituhanong pagpakatawo pag-usab. Ang Manluluwas mitudlo sa Juan 3:8 nga makita nato ang mga epekto sa hangin pero dili kon asa kini naggikan o asa kini padulong. Sa samang paagi, kita dili sa kanunay nga makasabot kon kanus-a ang pagpakatawo pag-usab nagsugod, ni giunsa pagbuhat ang mga kausaban dinhi kanato. Apan, kita makakita sa mga epekto niini kon ang atong mga tinguha ug mga buhat mausab (tan-awa sa Mosiah 5:1–2). Isulat diha sa imong journal sa pagtuon mahitungod sa ebidensiya nga imong makita nga ang Manluluwas nagtabang kanimo nga mausab. Paghatag og pagtagad sa bisan unsang mga pag-aghat, hunahuna, ug impresyon nga lagmit nga imong nadawat gikan sa Espiritu.
Pagtabang sa uban
1. Kompletoha ang mosunod nga kalihokan diha sa imong journal sa pagtuon:
Hunahunaa ang sitwasyon nga imong gihimo sa sinugdanan sa leksiyon. Pamalandongi kon unsa ang imong nakat-onan ug gibati karong adlawa. Paghimo og mubo nga sulat ngadto sa tin-edyer gikan sa imong sitwasyon, nga nagpasabot kon sa unsang paagi nga makatabang ang Manluluwas sa pag-usab kanila. Lagmit nga makatabang kanimo ang mosunod nga mga pangutana samtang gibuhat nimo kini:
Unsa sa imong hunahuna ang mahimong buhaton niining tawhana aron mangayo og tabang sa Manluluwas sa pagbag-o? Sa imong hunahuna nganong makatabang man kadto nga mga aksiyon?
Sa unsang paagi nga ang mga ordinansa sa bunyag, pagpakompirma, ug pag-ambit sa mga timailhan sa sakramento makatabang niining tawhana nga magbag-o ug ipakatawo pag-usab?
Unsa ang imong nakat-onan mahitungod kang Jesukristo samtang nasinati nimo ang proseso nga matawo pag-usab o nakita kini nga proseso sa ubang tawo?
Opsiyonal: Gustong Makakat-on pa og Dugang?
Unsay buot ipasabot sa ipakatawo pag-usab?
Si Elder David A. Bednar sa Korum sa Napulog Duha ka Apostoles mipasabot:
Imahe
Elder David A. Bednar
Ang gitugotan nga mga sulugoon sa Ginoo nagbalik-balik sa pagtudlo nga usa sa importanteng mga katuyoan sa atong mortal nga kinabuhi mao ang pag-usab sa espirituhanong paagi ug pag-usab pinaagi sa Pag-ula ni Jesukristo. …
Gimandoan kita sa “pagduol ngadto kang Kristo, ug paghingpit diha kaniya, ug paglimod sa [atong kaugalingon] sa tanan nga dili diosnon” (Moroni 10:32), aron mahimong “bag-o nang [mga] binuhat” diha ni Kristo (tan-awa sa 2 Mga Taga-Corinto 5:17), sa pagsalikway “sa kinaiyanhon nga tawo” (Mosiah 3:19), ug sa pagsinati og “dako nga kausaban dinhi kanato, o sa atong mga kasingkasing, nga kita wala nay hilig sa pag buhat og dautan, apan sa pagbuhat og maayo kanunay” (Mosiah 5:2). Palihog timan-i nga ang pagkakabig nga gihulagway niini nga mga bersikulo dako, dili gamay—usa ka espirituhanong pagkatawo pag-usab ug sukaranang kausaban sa unsay atong gibati ug gitinguha, unsay atong gihunahuna ug gibuhat, ug unsa kita. Sa pagkatinuod, ang kinauyokan sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa “maayo nga buhat, ug kalooy, ug grasya sa Balaan nga Mesiyas” (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab.
(David A. Bednar, “Kinahanglang Matawo Kamo Pag-usab,” Liahona, Mayo 2007, 19–20)
Sa unsang paagi nga matawo ako pag-usab?
Elder David A. Bednar sa Kurom sa Napulog Duha ka Apostoles mihatag og usa ka pakigpulong nga giulohan og “Kanunay nga Magbaton og Kapasayloan sa Inyong mga Sala” (Liahona, Mayo 2016, 59–62) nga naglangkob og mga salabotan niining pangutana.
Nganong lisod man ang pag-ila kon natawo ba ako pag-usab?
Si Elder D. Todd Christofferson sa Korum sa Napulog Duha ka Apostoles nagtudlo:
Imahe
Elder D. Todd Christofferson
Lagmit mangutana ka, Ngano nga kining dako nga kausaban dili dayon mahitabo kanako? … Alang sa kadaghanan kanato, ang mga kausaban mas hinayhinay ug mahitabo sa kadugayan. Ang pagkatawo pag-usab … mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagka-mortal.
Sa samang higayon kinahanglan nga dili kita mangatarongan sa atong mga kaugalingon sa dili tininuod nga paningkamot. Kinahanglang dili kita makontento nga ipabilin ang pipila ka kinaiya sa pagbuhat og daotan. Kinahanglang takos kitang moambit sa sakramento matag semana ug magpadayon sa pagtawag sa Balaan nga Espiritu sa pagwagtang sa kataposang mga timailhan sa pagkadili putli nga ania kanato. Ako mopamatuod nga samtang kamo mopadayon diha sa dalan sa espirituhanon nga pagpakatawo pag-usab, ang maulaon nga grasya ni Jesukristo mokuha sa inyong mga sala ug sa lama niadto nga mga sala ninyo, ang mga pagtintal mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan.
(D. Todd Christofferson, “Natawo Pag-usab,” Liahona, Mayo 2008, 78)
Unsa ang kalainan tali sa “makakita” ug “makasulod” sa gingharian sa Dios?
Si Propeta Joseph Smith (1805–44) nagtudlo mahitungod sa mga pulong sa Manluluwas diha sa [Juan 3:3, 5], diin gihisgotan ang “makakita” ug “makasulod” sa gingharian sa Dios: “Usa ka butang ang makakita sa gingharian sa Dios, ug lain nga butang ang pagsulod niini. Kita kinahanglan gayod nga adunay kausaban sa kasingkasing aron makakita sa gingharian sa Dios, ug modawat ug motuman sa mga pakigsaad aron makasulod niini” (sa Journal, December 1842–June 1844; Book 3, 15 July 1843–29 February 1844, 130, josephsmithpapers.org]. Kon ang usa ka tawo “makakita” sa gingharian sa Dios, ang Espiritu Santo mao ang migiya sa tawo nga makabaton og dakong “kausaban sa kasingkasing” (tan-awa sa Alma 5:14). Dayon ang tawo kinahanglang moapil sa mga ordinansa sa ebanghelyo aron “makasulod” sa gingharian sa Dios.
(“Juan 2–4,” sa New Testament Student Manual [2018], ChurchofJesusChrist.org)
