Rebyo 16 sa Doktrinal nga Kahanas

Isag-ulo ang mga Pakisayran ug ang Mahinungdanon nga mga Hugpong sa mga Pulong sa Kasulatan

Inahan ug batan-ong babaye diha sa New Zealand magkaubang naglingkod nga nagbasa sa mga kasulatan. Mga litrato usab sa babaye nga namalandong.

Ang paghinumdom sa mga tudling sa kasulatan ug kon unsa ang gitudlo niini makatabang kanimo sa daghang mga paagi. Kini nga leksiyon gituyo aron matabangan ka nga masag-ulo ang pipila sa mga pakisayran sa kasulatan sa doktrinal nga kahanas sa Bag-ong Tugon ug sa mahinungdanong hugpong sa mga pulong sa kasulatan.

• Nganong lagmit nimong masag-ulo ang pipila sa mosunod: liriko sa kanta, usa ka iskedyul, o mga kasayoran mahitungod sa mga magdudula sa isports o mga tigpasundayag?

• Unsa ang lain pang mga pananglitan sa mga butang nga imong gisag-ulo? Nganong gisag-ulo man nimo kini?

• Unsa ang pipila sa mga rason nga sag-ulohon ang mga kasulatan?

Basaha ang mosunod nga pamahayag ni Elder Richard G. Scott (1928–2015) sa Korum sa Napulog Duha ka Apostoles, o tan-awa ang bidyo nga “He Lives [Siya Buhi],” anaa sa ChurchofJesusChrist.org, gikan sa time code 5:27 hangtod 6:05. Pangita og labing menos tulo ka panalangin nga matanyag kanato sa mga kasulatan.

Kataposang opisyal nga hulagway ni Elder Richard G. Scott sa Korum sa Napulog Duha ka Apostoles, 2004. Mitaliwan niadtong 22 sa Septyembre 2015.

Mosugyot ko nga memoryahon nimo ang mga kasulatan nga motandog sa imong kasingkasing ug mopuno sa imong kalag og panabot. Kon ang mga kasulatan gigamit sumala sa tuyo sa Ginoo sa pagkarekord niini, duna kini kaugalingon niyang gahom nga dili masulti kon usabon ang pulong. Usahay kon dunay makahuluganong panginahanglan sa akong kinabuhi, ribyohon nako sa hunahuna ang mga kasulatan nga naghatag kanako og kalig-on. Adunay dakong kahupayan, direksiyon, ug gahom nga modagayday gikan sa mga kasulatan, ilabi na sa mga pulong sa Ginoo.

(Richard G. Scott, “Siya Buhi,” Ensign, Nob. 1999, 87–88)

• Unsa ang pipila sa mga panalangin nga imong nasinati gikan sa pagsag-ulo og mga kasulatan o mahinungdanong mga hugpong sa pulong gikan sa mga kasulatan?

• Sa unsang paagi nga ang pagsag-ulo sa mga pulong sa Ginoo nga narekord sa kasulatan nakatabang nimo nga mobati nga mas duol ngadto sa Langitnong Amahan ug kang Jesukristo?

Mga flash kard

Usa ka paagi sa pagsag-ulo sa mga pakisayran sa kasulatan ug sa mahinungdanong mga hugpong sa pulong mao ang paggamit og mga flash kard. Aron sa paghimo og mga flash kard, pagpilo og katunga sa blanko nga panid sa papel ug dayon tungaon usab aron makahimo og upat ka bahin. Ibukhad ang papel, ug guntinga ngadto sa napilo nga mga linya aron makahimo og upat ka mga kard.

Isulat ang matag mosunod nga pakisayran sa usa ka bahin sa matag kard. Sa pikas nga bahin, isulat ang mahinungdanong hugpong sa mga pulong sa kasulatan.

Pakisayran	Mahinungdanon nga Hugpong sa mga Pulong sa Kasulatan
Pakisayran Mga Taga-Efeso 1:10	Mahinungdanon nga Hugpong sa mga Pulong sa Kasulatan “Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Pakisayran Mga Taga-Efeso 2:19–20	Mahinungdanon nga Hugpong sa mga Pulong sa Kasulatan Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
Pakisayran 2 Mga Taga-Tesalonica 2:1–3	Mahinungdanon nga Hugpong sa mga Pulong sa Kasulatan “Ang adlaw ni Kristo … dili pa moabot, hangtod nga mahitabo una ang pagsupil.”
Pakisayran 2 Timoteo 3:15–17	Mahinungdanon nga Hugpong sa mga Pulong sa Kasulatan “Ang balaan nga kasulatan … makagagahom sa pagtudlo kanimo ngadto sa kaluwasan.”

Pagmamugnaon aron matabangan ka sa pagsag-ulo. Pagpili og usa sa mosunod nga mga ideya o paghunahuna og usa sa imong kaugalingon.

• Pagpasulit sa kaugalingon: Guniti ang mga flash kard aron ang imo lamang makita mao ang pakisayran o mahinungdanong hugpong sa mga pulong sa kasulatan. Sulayi pagsulti sa katugbang nga mahinungdanong hugpong sa mga pulong sa kasulatan o pakisayran. Balika kini sa makadaghang higayon sa matag pakisayran ug katugbang nga hugpong sa pulong.

• Pagrebyo sa text: Pag-text og usa ka pakisayran ngadto sa mga higala sa imong seminary nga klase ug tan-awa kinsa ang mobalos sa insaktong mahinungdanong hugpong sa mga pulong.

• Pagpares nga kalihokan: Pakigpares og lain pang klasmeyt o miyembro sa pamilya. Ipabutang sa usa ka tawo ang ilang mga kard nga nag-atubang paitaas ang pakisayran ug ang lain pang tawo magbutang sa ilang mga kard nga nag-atubang paitaas ang mahinungdanong hugpong sa mga pulong sa kasulatan. Ipares ang mahinungdanong hugpong sa mga pulong sa kasulatan ngadto sa katugbang nga pakisayran pinaagi sa pagbutang sa kard sa mahinungdanong hugpong sa mga pulong sa kasulatan sa ibabaw sa pakisayran nga kard.

• Paggamit sa app: Gamita ang app sa Doktrinal nga Kahanas aron matabangan ka nga magsag-ulo.

1. Dalha ang imong mga flash kard ngadto sa imong senimanang face-to-face nga klase aron ipakigbahin sa imong magtutudlo. Tubaga ang mosunod nga mga pangutana diha sa imong journal sa pagtuon:

Pagpili og usa sa mga tudling sa doktrinal nga kahanas.

• Nganong gusto man nimong masag-ulo ang kini nga tudling o ang mahinungdanong hugpong sa mga pulong sa kasulatan?

• Sa unsang paagi kini lagmit makatabang aron mapalawom ang imong pagsabot kang Jesukristo ug sa Iyang ebanghelyo?