Fakataukei Fakatokāteliné: Mātiu 11:28–30
“Haʻu kiate au … pea Te u Foaki ʻa e Fiemālié kiate Kimoutolu”
Kapau te tau haʻu kia Sīsū Kalaisi, te Ne fakamaʻamaʻa ʻetau ngaahi kavengá pea ʻomi ʻa e fiemālié kiate kitautolu.ʻE ʻoatu ʻe he lēsoni ko ʻení ha faingamālie ke ke fakamatalaʻi ai e mahino ʻokú ke maʻu ki he tokāteline ko ʻení ʻaki hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga tatau mo e ngaahi aʻusia ʻokú ke maʻu ʻi hoʻo moʻuí.
Ako maʻuloto mo fakamatalaʻi
Ako maʻuloto ʻa e fakamoʻoni fakafolofolá mo e kupuʻi lea mahuʻinga ki he Mātiu 11:28–30 ʻaki hono fakaʻaongaʻi ʻa e ʻuluaki mataʻitohi ʻo e foʻi lea takitaha ʻo e kupuʻi leá.
“Matthew __:28–__: Come unto m_, a__ ye that l____ a__ are heavy l____, and I will g___ you r___.”
ʻE lava foki ke tokoni atu ʻa e app Fakataukei Fakatokāteliné ke ke ako maʻuloto ʻa e kupuʻi lea mahuʻinga ko ʻení.
Fakamatala’i e moʻoní
Manatuʻi pe ko e hā ʻa e haʻamonga (vakai ki he fakatātā ko ʻení). Toe vakaiʻi ʻa e Mātiu 11:28–30 , ʻo kumi e ngaahi moʻoni naʻe akoʻi ʻe he Fakamoʻuí.
1. Fakakakato ʻa e ʻekitivitī ko ení ʻi hoʻo tohinoa akó:
ʻI heʻetau lave ki he fakatātā ʻo e haʻamongá, fakamatalaʻi ange ʻa e founga ʻe lava ke tokoniʻi ai kitautolu ʻe he Fakamoʻuí ʻi heʻetau ngaahi kavengá. Fakapapauʻi ke fakakau hotau fatongiá ʻi heʻetau ngāue fakataha mo Kalaisí.
Akoako hono fakaʻaongaʻí
Kapau ʻe fiemaʻu, toe vakaiʻi e ngaahi tefitoʻi moʻoni ʻo hono maʻu ʻo e ʻilo fakalaumālié ʻaki hono ako e palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2020). Fakatauhoa ʻa e sētesí mo e tefitoʻi moʻoni totonu ki hono maʻu ʻo e ʻilo fakalaumālié.
(Vakai ki he Tali Ki he Siví ʻi he fakaʻosinga ʻo e lēsoní ki he ngaahi tali tonú.)
1. ʻE lava ke maluʻi kitautolu mei he fakamatala halá pea mo kinautolu ʻoku nau feinga ke fakaʻauha ʻetau tuí ʻaki e ako ke ʻiloʻi pea fakaʻehiʻehi mei he ngaahi maʻuʻanga tokoni ʻoku taʻefalalaʻangá.
2. ʻI heʻetau feinga ke fakatupulaki ʻa e mahino ʻoku tau maʻú pea fakaleleiʻi ha ngaahi palopalema, ʻoku mahuʻinga ke tau falala ki he fakamoʻoni ʻa ia kuo tau ʻosi maʻu kau kia Sīsū Kalaisí, ko hono Fakafoki Mai ʻo ʻEne ongoongoleleí, mo e ngaahi akonaki ʻo ʻEne kau palōfita kuo fakanofó.
3. ʻOku tau fekumi ki he tokoni ʻa e Laumālie Māʻoniʻoní kae lava ke tau vakai ki ha ngaahi meʻa ʻo hangē ko e ʻafio ki ai ʻa e ʻEikí.
A. Ngāue ʻi he tui.
E. Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
F. Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.
Fokotuʻutuʻú
2. Fakakakato ʻa e ʻekitivitī ko ení ʻi hoʻo tohinoa akó:
ʻI ha foʻi sētesi ʻe ua pe tolu, faʻu ha fakatātā ʻo ha tokotaha faʻu foʻou ʻi ho toʻú ʻoku lolotonga mafasia ʻi ha kavenga. Fakakau ha hingoa, kavenga pau, mo ha fakaikiiki ʻe taha pe ua fekauʻaki mo e ongo ʻoku maʻu ʻe he tokotahá.
Ko hono maʻu ʻo e ʻilo fakalaumālié
Fakakaukau ki he founga te ke lava ai ʻo fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ke tokoni ki he tokotaha ʻi he tūkungá. Tali e ngaahi fehuʻi ko ʻení ke tokoni atu.
Ngāue ʻi he tuí
-
Ko e hā kuó ke fai ke falala ai ki he ʻOtuá pea tafoki kiate Ia ʻi hoʻo fehangahangai mo e ngaahi faingataʻá?
-
Ko e hā ha ngaahi lēsoni kuó ke ako mei hono fakaʻaongaʻi ʻo e tui kia Sīsū Kalaisi ʻi he kuohilí ʻe lava ʻo tokoni ʻi he tūkunga ko ʻení? ʻO fēfē?
Vakaiʻi mo sivisiviʻi ‘a e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá
-
Ko e hā ʻokú ke ʻilo fekauʻaki mo Sīsū Kalaisi ʻokú Ne lava ai ʻo tokoni ke toʻo ʻa e ngaahi kavengá?
-
ʻOku hoko fēfē ʻa e ngāue ki he ngaahi kavengá mo e ngaahi faingataʻa ʻi heʻetau moʻuí ko ha konga mahuʻinga ʻo e palani ʻa ʻetau Tamai Hēvaní?
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.
-
ʻE tokoni fēfē hono ʻiloʻi e tokāteline ʻoku maʻu ʻi he Mātiu 11:28–30 ki he kavenga pe faingataʻa ko ʻení?
-
Ko e hā ha potufolofola pe fakamatala fakaepalōfita ʻe taha ʻe ala tokoni? ʻO fēfē?
Toʻo ʻo e Ngaahi Kavengá
3. Fakakakato ʻa e ʻekitivitī ko ení ʻi hoʻo tohinoa akó:
ʻI hoʻo fakaʻaongaʻi e meʻa kuó ke ʻiló, fai ha tohi ki he tokotaha ʻi ho tūkungá. Fakakau ha ngaahi moʻoni mei he Mātiu 11:28–30 mo ha ngaahi maʻuʻanga tala kehe ke ʻomi ha fakafiemālie mo ha fakalotolahi.
-
Ko e tefitoʻi moʻoni fē ʻo e maʻu ʻa e ʻilo fakalaumālié ʻokú ke ongoʻi naʻe tokoni lahi taha ʻi hono teuteuʻi koe ke ke tali ki he tūkunga ko ʻení? Ko e hā hono ʻuhingá?
Kī ʻo e Tali ki he Siví: 1. C; 2. A; 3. B