Doktrinal nga Kahanas: 2 Mga Taga-Tesalonica 2:1–3

“Ang Adlaw ni Kristo … Dili Pa Moabot, Hangtod nga Mahitabo Una ang Pagsupil”

Imahe

Imahe sa usa ka tawo nga nagsulat sa papel

Sa miaging leksiyon, imong nakat-onan nga gitagna sa karaan nga sa dili pa ang Ikaduhang Pag-anhi ni Jesukristo, mahitabo ang usa ka Apostasiya gikan sa Iyang Simbahan (tan-awa ang “2 Mga Taga-Tesalonica 2”). Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa 2 Mga Taga-Tesalonica 2:1–3, pagpasabot sa doktrina sa Apostasiya, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Isag-ulo ug ipasabot

Unsa ang imong nahinumdoman mahitungod sa unsa ang gitudlo sa 2 Mga Taga-Tesalonica 2:1–3?

Sag-uloha ang pakisayran sa kasulatan ug ang mahinungdanong hugpong sa pulong sa kasulatan alang sa 2 Mga Taga-Tesalonica 2:1–3. Usa ka paagi sa pagbuhat niini mao ang pagkompleto sa mosunod nga mga kalihokan (o ang usa ka parehas niana gamit ang Doktrinal nga Kahanas nga mobile app):

Isulat ang 2 Mga Taga-Tesalonica 2:1–3: “Ang adlaw ni Kristo … dili pa moabot, hangtod nga mahitabo una ang pagsupil” diha sa imong journal sa pagtuon o sa imong digital nga device.

Balika og sulti sa makusog ang pakisayran ug ang mahinungdanong hugpong sa mga pulong sa kasulatan o diha sa imong hunahuna sulod sa pipila ka higayon.

Papasa o tangtanga ang usa ka hugpong sa pulong, sama sa “mahitabo una ang pagsupil,” ug sulayi paglitok og balik ang kompleto nga pakisayran ug mahinungdanong hugpong sa pulong sa kasulatan.

Padayona pagpapas o pagtangtang ang dugang mga hugpong sa mga pulong hangtod nga imong malitok og balik ang tibuok pakisayran ug ang mahinungdanong hugpong sa pulong sa kasulatan gikan sa panumdoman.

Lagmit imong mahinumdoman nga dihang gitun-an nimo ang 2 Mga Taga-Tesalonica 2, imong nakat-onan nga gipanagna na sa karaan nga sa dili pa ang Ikaduhang Pag-anhi ni Jesukristo, usa ka apostasiya gikan sa Iyang Simbahan ang mahitabo.

1. Kompletoha ang mosunod diha sa imong journal sa pagtuon:

Pagsulat og usa ka pagpasabot kon unsa ang Dakong Apostasiya ug nganong nahitabo kini. Isulat nga ingon og imong gipasabot ang Apostasiya ngadto sa usa ka bata. Gamita ang mga kamatuoran gikan sa 2 Mga Taga-Tesalonica 2:1–3 isip kabahin sa imong pagpasabot, ug ilakip ang mga panabot kon nganong ang usa ka kompleto nga Pagpahiuli sa Simbahan ni Kristo gikinahanglan.

Pagbansay sa paggamit

Diha sa imong pagpadayon niini nga leksiyon, aduna kay kahigayonan sa pagtabang sa usa ka tawo nga mogamit sa mga baroganan sa pag-angkon og espirituhanong kahibalo. Aron makita unsa kamaayo ang imong paghinumdom niini nga mga baroganan, sulayi pagtukma ang mosunod nga mga pamahayag ngadto sa mga baroganan sa pag-angkon og espirituhanong kahibalo nga gihulagway sa matag pamahayag.

“Ang sinserong mga tigpangita sa kamatuoran kinahanglang magmabinantayon sa dili kasaligang mga tinubdan sa impormasyon.”
“[Salig] sa Dios ug Siya ang unahon pinaagi sa sinserong pag-ampo, ang pagtuon sa Iyang mga pagtulon-an, ug pagsunod sa Iyang mga sugo.”
“Ikonsiderar [ang mga pangutana] sa kinatibuk-ang kahulogan sa plano sa kaluwasan ug sa mga pagtulun-an sa Manluluwas.”

Lihokon inubanan sa hugot nga pagtuo.
Susiha ang mga konsepto ug mga pangutana nga adunay mahangtorong panglantaw.
Tinguhaa ang dugang nga panabot pinaagi sa balaanong gitudlo nga mga tinubdan.

Ang mga tubag sa pasulit anaa sa kataposan niini nga leksiyon.

Kon gikinahanglan pa gayod nimo ang pagrebyo niini nga mga baroganan, basaha ang mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Handurawa nga ikaw nag-text sa imong higala nga si Keyshawn, kinsa usa ka miyembro sa usa ka lahi nga Kristiyanong simbahan. Siya deboto kaayo kang Jesukristo ug kanunay nga nagtuon sa Biblia. Sa usa ka mensahe sa text nganha kanimo, miingon si Keyshawn, “Karong adlawa ang akong pastor mitudlo nga ang mga miyembro sa inyong simbahan nagtuo nga ang inyo mao lamang ang tinuod nga simbahan ug ang uban nga simbahan bakak. Tinuod ba kana? Akong gibati nga mas duol ko sa Dios tungod sa akong simbahan. Giunsa nga kini dili gikan sa Dios?”

Ngano kaha nga natural sa mga miyembro sa laing mga simbahan ang adunay mga pangutana nga sama niini?
Unsaon kaha nimo pagtubag kang Keyshawn sa Kristohanon nga paagi?

Imong gibawsan og text si Keyshawn, nagpasalamat ka niya sa iyang mahunahunaon nga pangutana. Nangutana ka kon mahimo ka bang mopakigbahin sa tubag kaniya sa sunod nga adlaw, ug siya miuyon.

2. Kompletoha ang mosunod diha sa imong journal sa pagtuon:

Gamita ang mga baroganan sa pag-angkon og espirituhanong kahibalo sa pag-andam og tubag alang kang Keyshawn. Seguroha nga gamiton ang tanang tulo ka mga baroganan. Gamita ang mosunod nga mga pangutana ug mga kalihokan aron makatabang kanimo sa pag-andam sa imong tubag.

Tinguhaa ang dugang nga panabot pinaagi sa balaanong gitudlo nga mga tinubdan

Unsaon man nimo paggamit sa mga kamatuoran nga gitudlo diha sa 2 Mga Taga-Tesalonica 2:1–3 aron matabangan si Keyshawn?

Pangita og labing menos sa tulo ka dugang nga mga kasulatan, mga pakigpulong, o mga artikulo nga sa imong hunahuna mahimong makatabang niini nga sitwasyon. Ikonsiderar ang paggamit sa mosunod nga mga kapanguhaan:

Basaha ang mga entry alang sa “Apostasiya” ug “Pagpahiuli sa Ebanghelyo” diha sa Giya ngadto sa mga Kasulatan. Kini nga mga entry anaa makita sa scriptures.ChurchofJesusChrist.org.
Bisitaha ang entry nga “Apostasiya” diha sa Giya ngadto sa mga Kasulatan (topics.ChurchofJesusChrist.org).
Tan-awa ngadto sa mga kasulatan ug mga pamahayag gikan sa “2 Mga Taga-Tesalonica 2” nga leksiyon o gikan sa “Leksiyon 1: Ang Mensahe sa Pagpahiuli sa Ebanghelyo ni Jesukristo” sa Isangyaw ang Akong Ebanghelyo (2004), 36–54.

Unsa nga mga tudling sa kasulatan o lain pang mga tinubdan ang imong nakit-an nga mahimong makatabang kanimo nga matubag si Keyshawn?

Susiha ang mga konsepto ug mga pangutana inubanan sa mahangtorong panglantaw

Unsa nga mga kamatuoran mahitungod sa Langitnong Amahan ug kang Jesukristo ang gusto nimong ipakigbahin kang Keyshawn nga mahimong makatabang kaniya nga makasabot sa pagkinahanglan sa Pagpahiuli?

Lihokon inubanan sa hugot nga pagtuo

Unsa nga pihong mga buhat ang imong idapit nga buhaton ni Keyshawn aron siya makakat-on sa iyang kaugalingon nganong ang usa ka Pagpahiuli sa Simbahan ni Kristo gikinahanglan?
Unsang klaseha sa mga kasinatian ang mahimong malaoman ni Keyshawn nga masinati kon iya kining pambuhaton nga mga buhat?
Sa unsang paagi nga ang pagdapit kaniya nga mobuhat sa usa ka lihok sa hugot nga pagtuo sa imong bahin?

Ang eksaktong mga tubag sa pagtukma nga kalihokan mao ang (1) c; (2) a; (3) b.