10:

Ipakita ang Kaligdong

Report:Daklit nga ipaambit sa grupo ang usa ka tubag sa pag-ampo sa miaging semana.

Pamalandungi:Nganong gihigugma man sa Ginoo kadtong dunay “kaligdong sa kasingkasing”?

Tan-awa:“What Shall a Man Give in Exchange for His Soul? [Unsa May Ikahatag sa Tawo nga Arang Ikabawi Niya sa Iyang kinabuhi?]” anaa sa srs.lds.org/videos. (Walay video? Basaha ang pahina 25)

Unsa May Ikahatag sa Tawo nga Arang Ikabawi Niya sa Iyang Kinabuhi?

Kon dili mo makatan-aw sa video, basaha kini nga script.

still from What Shall a Man Give in Exchange for His Soul

Elder Robert C. Gay: Ang Manluluwas nangutana sa Iyang mga tinun-an: “Unsa may ikahatag sa tawo nga arang ikabawi niya sa iyang kinabuhi?”

Mao ning pangutanaha ang gitudlo sa akong amahan nga hunahunaon gayud dugay na. Sa akong pagdako, gitahasan ko sa akong ginikanan og buhaton diha sa balay ug gibayaran ko sa pagtrabaho. Gamiton nako ang kwarta nga kapin sa 50 sentabos kada semana sa pagtan-aw og sine. Kaniadto ang sine tag-25 sentabos alang sa nag-edad og 11. Mabinlan ko og 25 sentabos alang sa candy, nga tag-5 sentabos ang buok. Sine unya duna pay lima ka candy! Wala nay makalabaw pa niini.

Maayo ra ang tanan hangtud nag-12 na ko. Milinya ko usa ka hapon niana, akong naamguhan nga ang bayad sa 12 anyos tag-35 sentabos na, buot pasabut tulo na lang ka candy. Dili pa andam niana nga pagkunhod, mirason ko, “Pareho ra gihapon akong tan-awon kay sa miaging semana.” Mitikang ko ug nangayo og tag 25 sentabos nga tiket. Wa mokihol ang cashier, ug nakapalit ko sa naandang lima ka candy imbis tulo na lang unta.

Nakabilib sa akong nahimo, midali dayon kog uli aron sultihan si papa sa dako nakong puntos. Dihang gisulti nako ang tanan, wala siya motingog. Sa nahuman na ko, gitan-aw ko niya ug miingon, “Anak, ibaligya ba nimo ang imong kalag sa usa ka sinsilyo?” Midulot ang pulong sa akong kasingkasing nga 12 anyos. Leksyon kadto nga dili nako hikalimtan.

(“Unsa May Ikahatag sa Tawo nga Arang Ikabawi Niya sa Iyang Kinabuhi?” Ensign o Liahona, Nob. 2012, 34)

Balik sa pahina 24.

Hisguti:Unsay buot ipasabut sa pagbaton og kaligdong? Unsa ang pipila ka gagmayng mga butang diin ang mga tawo mitugyan sa ilang mga kalag aron makaangkon sa mga butang niini nga kinabuhi?

Basaha:Mga Artikulo sa Hugot nga Pagtuo 1:13 ug Job 27:5 (naa sa tuo)

“Kami nagtuo sa pagkamatinuoron.”

Mga Artikulo sa Hugot nga Pagtuo 1:13

“Hangtud nga ako mamatay dili ko gayud isalikway ang pagkahingpit sa kasingkasing [kaligdong] gikan kanako.”

Job 27:5

Kalihokan

Magbuhat nga kamo ra, graduhi ang inyong kaugalingon sa mosunod nga mga aspeto.

Butangi og Numero sa Atubangan sa Kada Item aron Mapakita kon Unsa Kasagad Kamong Molihok Niining Paagiha.
1 = dili gayud, 2 = usahay, 3 = kasagaran, 4 = kanunay
___1. Akong gituman ang tanan nakong mga saad, mga commitment, ug mga pakigsaad.
___2. Ako hingpit nga matinuoron sa mga butang nga akong gisulti ug sa mga rekord nga akong gitipigan.
___3. Ako wala mopasulabi aron himoon ang mga butang nga makita nga mas maayo kay sa kon unsa kini.
___4. Akong iuli ang tanan nga akong hulaman ug dili manghilabut og mga butang nga dili ako.
___5. Ako hingpit nga matinuoron sa akong kapikas diha sa akong mga pulong ug mga lihok.
___6. Ako dili gayud manikas, bisan kon ako nasayud nga dili ko masakpan.
___7. Kon makakita ko og butang nga dili ako, ako kining iuli sa tag-iya.
___8. Ako kanunay mobayad sa kwarta nga akong gihulam.

Hisguti:Basaha ang Mosiah 4:28 (naa sa tuo) ug ang kinutlo gikan ni Elder Joseph B. Wirthlin (sa pahina 25). Ngano nga ang pagbayad sa utang o loan sa negosyo o estudyante (sama sa PEF loan) kabahin sa personal nga integridad?

“Ug ako manghinaut nga kamo kinahanglan mahinumdom, nga bisan kinsa taliwala kaninyo ang manghulam sa inyong silingan kinahanglan mouli gayud sa butang nga iyang gihulaman, sumala niana nga siya miuyon, kay kon dili kamo makabuhat og sala; ug tingali nga kamo makahimo sa inyong silingan sa pagbuhat usab og sala.”

Mosiah 4:28

“Ang kaligdong nagpasabut nga kanunayng maghimo kon unsa ang husto ug maayo, bisan unsa pa man ang hinanaling mga sangputanan. Nagpasabut kini nga magmatarung gikan gayud sa kahiladman sa atong kalag, dili lamang diha sa atong mga lihok apan, mas importante, diha sa atong mga hunahuna ug kasingkasing. … Ang ginagmayng pagpamakak, ginagmayng pagpanikas, o ginagmayng pagpamintaha dili madawat sa Ginoo. … Ang kinadak-ang ganti sa kaligdong mao ang kanunay nga pagpakig-uban sa Espiritu Santo, … [kinsa mao ang] mogiya kanato sa tanan natong buhaton.”

Joseph B. Wirthlin, “Personal Integrity,” Ensign, Mayo 1990, 30, 32, 33

I-commit:I-commit nga himoon ang mosunod nga mga buluhaton sa semana. I-tsek ang box kon makompleto ninyo ang matag buluhaton:

• Palamboa ang usa sa walo ka mga aspeto nga inyong gigraduhan sa ibabaw.

• Ipaambit ang inyong nakat-unan karon mahitungod sa kaligdong ngadto sa inyong pamilya o mga higala.