Pagkompleto sa Imong Misyon

6.0

Pasiuna

Andama ang imong kaugalingon karon sa pagpadayon sa imong kinabuhi isip usa ka disipulo ni Jesukristo ug isip usa ka matinud-anon nga miyembro sa Ang Simbahan ni Jesukristo sa mga Santos sa Ulahing mga Adlaw kon ikaw mopauli na sa panimalay ug samtang imong tumanon ang imong misyon sa kinabuhi.

6.1

Magpabilin nga Konektado

Padayona ang pakig-istorya niadtong imong natudloan ug gikatrabaho sa imong misyon, lakip sa imong mga lider sa misyon. Suportahi ug palig-una sila pinaagi sa imong mga pulong ug mga ehemplo, ug sauloga ang importanteng mga panghitabo sa ilang mga kinabuhi.

6.2

Pagpauli sa Panimalay gikan sa Imong Misyon

Tungod kay magpabilin kang usa ka misyonaryo hangtod nga ikaw ma-release sa imong presidente sa stake, ikaw gilaoman nga mosunod sa tanang sumbanan sa misyonaryo hangtod niana nga panahon. Hunahunaa ang pag-uli diretso sa panimalay. Kini importante kaayo ilabi na kon ikaw nagserbisyo sa usa ka nasod nga dili imong kaugalingong nasod diin ang panginahanglan sa visa gipatuman. Ang paglangay sa imong pag-uli mahimong makapalisod sa umaabot nga mga misyonaryo sa pag-angkon og visa sa pagbiyahe. Kon ikaw makigkita sa imong pamilya sa imong pagbiyahe pauli, pakitambag ug pangayo daan og direksyon gikan sa imong presidente sa misyon.

Dili mahimo nga imong kompletohon ang imong misyonaryo nga pagserbisyo diha sa laing misyon o mohangyo nga magpabalhin ngadto sa laing misyon human sa imong petsa sa pag-release aron makauban ang usa ka paryente.

Kon makauli ka na, pakigsabot sa imong presidente sa stake aron ma-release sa labing dali nga panahon.

Sa pag-uli gayod dayon, pagpahiling alang sa tuberculosis, bisan kon ikaw gikuhaan na og test sa wala pa ang imong misyon ug walay mga simtoma.

6.3

Pagserbisyo ug Paglambo Human sa Imong Misyon

Kon makabalik ka na sa panimalay, padayon sa pagsunod sa mga sumbanan sa ebanghelyo. Siguroha nga:

Mag-ampo ug magtuon sa mga kasulatan kada adlaw.
Motambong ug mosalmot diha sa kaugalingong ward o ward sa young single adult.
Mangita og mga oportunidad sa pagserbisyo diha sa templo kon adunay usa nga duol ra.
Motambong sa institute o sa mga klase sa relihiyoso nga edukasyon.
Magtinguha og edukasyon ug mga oportunidad sa panarbaho pinaagi sa Simbahan ug ubang mga kapanguhaan.

Magpakabuhi aron nga imong masinati ang matang sa kalipay nga gihulagway diha sa Basahon ni Mormon sa dihang si Alma nga Batan-on nakahimamat sa isig ka misyonaryo sa ulahing bahin sa kinabuhi:

“Ug karon nahinabo nga samtang si Alma nagpanaw gikan sa yuta sa Gideon paingon sa habagatan nga bahin, layo ngadto sa yuta sa Manti, tan-awa, sa iyang katingala, siya nagkasugat uban sa anak nga mga lalaki ni Mosiah nga nagpanaw paingon sa yuta sa Zarahemla.

“… Busa si Alma nalipay sa hilabihan sa pagkakita sa iyang mga kaigsoonan; ug unsa ang labaw nga nakadugang sa iyang hingpit nga kalipay, sila nagpabilin sa gihapon nga iyang mga kaigsoonan diha sa Ginoo; oo, ug sila nag-anam og kalig-on diha sa kasayoran sa kamatuoran; kay sila mga tawo nga mabuot og salabotan ug sila misiksik sa mga kasulatan sa kakugi, nga sila unta masayod sa pulong sa Dios.

“Apan kini dili ang tanan; sila naghatag ngadto sa ilang kaugalingon ngadto sa tuman nga pag-ampo, ug pagpuasa; busa sila adunay espiritu sa pagpanagna, ug espiritu sa pagpadayag, ug kon sila nagtudlo, sila nagtudlo uban sa gahom ug pagtugot sa Dios” (Alma 17:1–3).