1
Ang Imong Kasinatian sa Pagka-Full-Time nga Misyonaryo
1.0
Pasiuna
Ang imong misyon wala gayod magsugod sa adlaw nga ikaw gi-set apart ug dili motapos sa adlaw nga ikaw i-release. Ang usa ka misyon dili sama sa pagsul-ob og uniporme sa pang-trabaho o sa pang-eskwela sa buntag aron huboon lang kini inig tapos sa adlaw. Sukad sa panahon nga ikaw nabunyagan, ikaw nabutang na sa dalan sa pakigsaad nga padulong ngadto sa mahangtoron nga kamaya, kalipay, ug kalinaw. Ang imong full-time nga kasinatian sa misyon mahimong usa ka makausab nga panghitabo apan kinahanglan usab nga mahimong mahinungdanon nga bahin sa imong kasinatian sa misyon sa kinabuhi.
Kon tan-awon sa mahangtoron nga panglantaw, ang imong kasinatian sa full-time nga misyon labaw pa sa usa ka checkbox nga markahanan—kini usa ka pamaagi sa pagpadayon sa tibuok kinabuhi nga pagka-disipulo ni Jesukristo.
Si Propeta Joseph Smith namalandong sa mga panalangin ug mga pribilehiyo nga atong maangkon sa higayon nga makahukom kita nga mahimong kabahin niining talagsaong buhat sa kaluwasan. Nangutana siya sa nahaunang mga Santos, “Mga kaigsoonan [ug mga sister], kita dili ba mopadayon sa hilabihan nga mahinungdanon nga katuyoan? Padayon ug ayaw pagsibog. Pagmaisogon, mga kaigsoonan [ug mga sister]; ug sa kanunay, ngadto sa kadaogan! Himoa ang inyong mga kasingkasing nga magmaya, ug paglipay sa hilabihan” (Doktrina ug mga Pakigsaad 128:22).
Tagamtama ang imong kasinatian sa pagka-misyonaryo samtang ikaw mohigugma sa Dios ug mohigugma sa imong silingan. Mao kini ang panahon sa paglipay ug sa pagsinati og malungtaron nga kalipay ug kalinaw pinaagi ni Jesukristo.
1.1
Pagkamasulundon
Ang tinuod nga mga disipulo ni Jesukristo mga masulundon. Ang Manluluwas nagtudlo, “Kon nahigugma kamo kanako, tumana ninyo ang akong mga sugo” (Juan 14:15). Ang pagtuman sa mga sugo nagpasabot nga ikaw andam ug matinud-anon sa pagbuhat sa unsay gipangayo sa Ginoo tungod kay ikaw nahigugma Kaniya ug ikaw mobuhat usab sa ingon uban sa “kamaya” (Mga Taga Colosas 1:11) ug “malipayon ug mapaubsanong kasingkasing” (Mga Buhat 2:46).
Si Jesukristo mao ang ehemplo sa hingpit nga pagkamatinud-anon. Gibuhat lang Niya ang kabubut-on sa Amahan. Sunda Siya pinaagi sa pagbuhat sa imong labing maayo sa pagtuman sa tanan Niyang mga sugo ug sunda ang mga sumbahan sa misyonaryo. Ang pagkamatinud-anon ug pagkamasulundon nagpasabot usab nga maningkamot ka nga makat-on, motubo, ug molambo; mokoriher dayon sa mga sayop; ug modawat og personal nga responsibilidad sa imong mga aksyon.
Ang imong mga lider sa misyon kanunay nga motabang kanimo nga makat-on unsaon sa paggamit sa mga baroganan niini nga tamdanan nga basahon.
Ikaw mahimong labing luwas kon mosunod ka sa mga sugo ug sa mga sumbanan sa misyonaryo ug mogamit sa sentido komon. Apan timan-i nga bisan kon nagtuman ka sa mga sugo, mahimong makasinati ka og kasamok, balatian, o kadaot (tan-awa sa Juan 16:33). Ang Manluluwas nakasinati sa tanan niining mga butanga (tan-awa sa Alma 7:11–12; Doktrina ug mga Pakigsaad 122:8), ug Siya nagsaad, “Dili Ko kamo biyaan nga daw mga ilong tuwapos. Mobalik ako kaninyo” (Juan 14:18).
Ang Dios nahigugma kanimo. Pilia ang pagtuman sa mga sugo tungod kay ikaw nahigugma sa Dios. Ayaw pagsulay sa pagpakigsabot sa Ginoo ug maglaom og piho nga mga panalangin pinaagi sa pagpailin-ilin unsay gikinahanglan diha nimo. Ang mga kinahanglanon nga gilaoman nga imong sundon giaprobahan sa Unang Kapangulohan ug sa Korum sa Napulog Duha ka Apostoles ug makita dinhi niini nga mga sumbanan. Pananglitan, ayaw pagsulay sa pakighaylo sa Ginoo pinaagi sa pagbangon og mas sayo, sa pagpalta og kaon o pag-inom (lapas sa binulan nga pagpuasa), o sa paglaktaw og usa ka adlaw sa pagpangandam.
1.2
Mga Sumbanan sa Kinabuhi
Ang Dios nagdapit kanimo sa pagpahinungod sa imong kaugalingon ngadto Kaniya sa tibuok nimong kinabuhi. Ang mga sumbanan sa misyon sama sa personal nga pagtuon, paghimo og tumong, ug ang matarong nga paggamit sa teknolohiya mopanalangin sa imong kinabuhi diha sa imong misyon ug makatabang kanimo sa tibuok nimong kinabuhi.
Tugoti ang mga sugo diha sa mga kasulatan, ang mga baroganan diha sa Isangyaw ang Akong Ebanghelyo: Usa ka Giya ngadto sa Misyonaryo nga Pangalagad, (2019), ug ang mga sumbanan sa misyonaryo nga gilatid dinhi niining basahon mahimong giya nga mga baroganan sa tibuok kinabuhi. Samtang magsunod ka sa mga sugo ug mga sumbanan sa Dios, Siya motudlo, mopanalangin, ug mogiya kanimo sa tibuok nimong kinabuhi.