Faaopoopoga 1

Taiala mo le Fatuina o Gaoioiga Faaopoopo e Aoao Mai Ai

A o e mafaufau i manaoga o i latou o lau vasega, e mafai ona e faailoa se vaega mai le Tala’i La’u Talalelei e te lagona e taua ae e le o talanoaina i nei anomea o le kosi. E mafai ona fesoasoani lenei taiala ia te oe e fatu ai se aafiaga patino e aoao ai mo lau vasega.

Vaega Autu mo Gaoioiga e Aoao Mai ai

E tolu vaega autu mo gaoioiga aoao taitasi i lenei kosi: (1) suesue, (2) faata’ita’i, ma le (3) faatulaga se sini. O taiala nei e mafai ona fesoasoani ia te oe e faaaoga ai nei vaega autu i gaoioiga faaopoopo e aoao mai ai e te fatuina mo lau vasega.

Suesue

Fuafua po o a mea o le a suesueina e tagata aoao

• O a parakalafa mai le Tala’i La’u Talalelei o le a e valaaulia tagata aoao e suesue i ai?

  • Ia manatua le faatapulaaina o le taimi. E masani lava, e sili atu le taulai atu i se vaega itiiti ma alu loloto atu nai lo le taumafai e talanoaina le tele o mea. Ia mautinoa e tele se taimi e tuu ai mo le faataitaiina ma le faaaogaina.

• Pe o i ai ni mau po o ni faamatalaga mai taitai o le Ekalesia e mafai ona faaaoga e lagolago ai pe faaleleia ai mea o loo suesueina e tagata aoao mai le Tala’i La’u Talalelei?

Fuafua pe faapefea ona suesue tagata aoao

• E mafai faapefea ona e fesoasoani i tagata aoao ia iloa le taua o lenei vaega o le Tala’i La’u Talalelei? Pe o i ai se faataitaiga, vaaiga faata’ita’i, fesili, tala, ata, aafiaga patino, po o se vitio puupuu o le a fesoasoani e saunia ai i latou mo le aoaoina?

• O a ni fesili atonu e te fesili ai? (Faamaumau nisi o fesili e mafai ona fesoasoani i tagata aoao e suesue ai o latou manatu ma lagona.)

Pe o le a galulue na o tagata o le vasega, faatasi ma paga, po o se vaega toalaiti?

Faataitai

• O le a se mea e mafai ona faia e tagata o le vasega e faataitai ai mea ua latou aoaoina? Mo se faataitaiga, e mafai ona e:

  • Tuu atu i tagata aoao se taimi e faamatala ai pe aoao atu mea sa latou suesueina i a latou lava upu.

  • Tuu atu se vaaiga faata’ita’i ma fai atu i tagata o le vasega e faaaoga mea ua latou aoaoina e fesoasoani ai i le tagata o loo i le vaaiga faata’ita’i.

Faatu se sini

Faaiu le gaoioiga e aoao ai i le valaauliaina o tagata o le vasega e faatu se sini e faatatau i mea na latou aoaoina. Mafaufau e tuuina atu ni nai faataitaiga o sini e ono mafai ona latou faatutuina. Ona tuu atu lea i tagata aoao se taimi e tusifaamaumau ai a latou sini.