Dagiti Libro ken Adalen
Kapitulo 3: Ni Jesucristo, ti Napili a Dadaulo ken Mangisalakantayo

Ni Jesucristo, ti Napili a Dadaulo ken Mangisalakantayo

Kapitulo 3

Ladawan
Cropped portion of Carl Bloch's painting depicting Christ sitting at a table with the two men with whom He walked on the road to Emmaus.

Kinasapulan ti Maysa a Mangisalakan ken Dadaulo

  • Apay a kasapulan a panawantayo idi ti sidong ti Nailangitan nga Ama? Apay a kasapulantayo ti maysa a Mangisalakan?

Idi naidatag kadatayo ti plano para iti pannakaisalakantayo iti lubong ti espiritu sakbay daytoy a biag, kasta unay ti ragsaktayo isu a nagdir-itayo iti rag-o (kitaen iti Job 38:7).

Naawatantayo a nasken a panawantayo ti nailangitan a pagtaengantayo iti maysa a panawen. Saantayo nga agnaed iti sidong ti Nailangitan nga Amatayo. Bayat ti pannakayadayotayo manipud Kenkuana, agbasoltayo amin ket sumagmamano kadatayo ti mayaw-awan iti dalantayo. Am-ammo ken ay-ayaten ti Nailangitan nga Amatayo ti tunggal maysa kadatayo. Ammona a kasapulantayo ti tulong, isu a nagplano Isuna iti maysa a wagas a mangtulong kadatayo.

Kinasapulantayo ti maysa a Mangisalakan nga agikaro kadagiti basbasoltayo ken mangisuro kadatayo no kasano ti agsubli iti Nailangitan nga Amatayo. Kinuna ti Ama, “Asino ti ibaonko?” Abraham 3:27). Kinuna ni Jesucristo, a naawagan iti Jehova, “Adtoyak, ibaonnak” (Abraham 3:27; kitaen met iti Moises 4:1–4).

Natallugod ni Jesus nga immay iti daga, intedna ti biagna para kadatayo, ken inawatna iti Bagina dagiti basbasoltayo. Tinarigagayanna, kas iti Nailangitan nga Amatayo, a pumilitayo no agtungpaltayo met laeng kadagiti bilin ti Nailangitan nga Ama. Ammona a nasken a nawayatayo nga agpili tapno mapaneknekan a maikaritayo iti pannakaitan-ok. Kinuna ni Jesus, “Ama, maaramid ti pagayatam, ket kukuam ti gloria iti agnanayon” (Moises 4:2).

Immay met ni Satanas, a maawagan iti Lucifer, a kunkunana, “Adtoy, adtoyak, ibaonnak, siakto ti anakmo, ken subbotekto amin a sangkataw-an, tapno awan ti mapukaw nga uray no maysa a kararua, ket awan duadua nga aramidek, gapuna itdem ti panagraemmo” (Moises 4:1). Kayat ni Satanas a pilitennatayo amin a mangaramid iti pagayatanna. Iti babaen ti planona, saantayo a mapalubosan nga agpili. Ikkatenna ti wayawaya a pumili nga inteden ti Amatayo kadatayo. Kayat ni Satanas nga adda kenkuana ti amin a dayaw para iti pannakaisalakantayo. Iti babaen ti naisingasing a planona, napaay koma ti panggeptayo nga umay iti daga (kitaen iti Teachings of Presidents of the Church: David O. McKay [2003], 207).

Ni Jesucristo, ti Napili a Dadaulo ken Mangisalakantayo

  • Bayat ti panangbasam iti daytoy a benneg, panunotem maipapan kadagiti riknam para iti Mangisalakan.

Kalpasan a nangngeganna ti panagsao dagiti agpada nga annakna, kinuna ti Nailangitan nga Ama, “Ibaonko ti immun-una” (Abraham 3:27).

Napili ken naisakbay a naordenan ni Jesucristo nga agbalin a Mangisalakantayo. Salaysayen ti adu a nasantuan a kasuratan maipapan iti daytoy (kitaen, kas pagarigan, iti 1 Pedro 1:19–20; Moises 4:1–2). Salaysayen ti maysa a nasantuan a kasuratan kadatayo a nabayag sakbay a nayanak ni Jesus, nagpakita Isuna iti maysa a propeta ti Libro ni Mormon a maawagan iti kabsat a lalaki ni Jared ket kinunana: “Adtoy, siak ti naisagana manipud iti pamuon ti lubong a mangsubbot kadagiti taok. Adtoy, siak ni Jesucristo. … Siak ti pagtaudan ti biag ti amin a tao, ken iti agnanayon, kasta met dagiti mamati iti naganko” (Ether 3:14).

Idi nagnaed ni Jesus iti daga, insurona: “Bimmabaak manipud langit, saan a tapno aramidek ti pagayatak, no di ti pagayatan ti nangibaon kaniak. …Ta daytoy ti pagayatan ti amak, a tunggal maysa a makakita iti Anak, ket mamati kenkuana, adda koma biagna nga agnanayon: ket isu pagungarekto iti kamaudianan nga aldaw” (Juan 6:38, 40).

Ti Gubat idiay Langit

Gapu ta pinili ti Nailangitan nga Amatayo ni Jesucristo nga agbalin a Mangisalakantayo, nagpungtot ni Satanas ket nagalsa. Adda gubat idi idiay langit. Nakiranget ni Satanas ken dagiti pasurotna a maibusor ken ni Jesucristo ken dagiti pasurotna. Dagiti pasurot ti Mangisalakan ket “inabakda ni [Satanas] gapu iti dara ti Kordero, ken gapu iti sao ti pammaneknekda” (Apocalipsis 12:11).

Iti daytoy a dakkel a panagalsa, napapanaw ni Satanas ken ti amin nga espiritu a simmurot kenkuana manipud iti sidong ti Dios ket naitapuakda manipud iti langit. Apagkatlo a paset dagiti pangen ti langit ti nadusa gapu iti panangsurotda ken ni Satanas (kitaen iti DkK 29:36). Naipaidam kadakuada ti karbengan nga umawat kadagiti mortal a bagi.

Gapu ta addatayo iti daga ken addaan kadagiti mortal a bagi, ammotayo a pinilitayo ti sumurot ken ni Jesucristo ken ti Nailangitan nga Amatayo. Adda met ni Satanas ken dagiti pasurotna iti daga, ngem kas espiritu. Saanda a nalipatan no asinotayo, ken addada iti aglawlawtayo iti inaldaw, a mangsulsulisog kadatayo ken manggargari kadatayo nga agaramid kadagiti banag a saan a makaay-ayo iti Nailangitan nga Amatayo. Iti biagtayo sakbay daytoy a biag, pinilitayo ti mangsurot ken ni Jesucristo ken mangawat iti plano ti Dios. Nasken nga ituloytayo ti mangsurot ken ni Jesucristo ditoy daga. Babaen laeng ti panangsurot Kenkuana a makapagsublitayo iti nailangitan a pagtaengantayo.

  • Iti ania a wagwagas nga agtultuloy ita nga agdama ti Gubat iti Langit?

Addaantayo kadagiti Pannursuro ti Mangisalakan a Suroten

  • Panunotem maipapan kadagiti pannursuro ti Mangisalakan a nakaimpluensian kenka.

Manipud idi punganay, impalgaken ni Jesucristo ti ebangheliona, a mangibaga kadatayo no ania ti nasken nga aramidentayo tapno makasubli iti Nailangitan nga Amatayo. Iti naituding a panawen immay Isuna a Mismo iti daga. Insurona ti plano ti pannakaisalakan ken pannakaitan-ok babaen iti balikasna ken babaen iti wagas a panagbiagna. Impasdekna ti Simbaanna ken ti priesthoodna iti daga. Inawatna iti Bagina dagiti basbasoltayo.

Babaen iti panangsurot kadagiti pannursurona, matawidtayo ti maysa a lugar iti celestial a pagarian. Inaramidna ti pasetna a tumulong kadatayo a makasubli iti nailangitan a pagtaengantayo. Adda iti tunggal maysa kadatayo ita no aramidentayo ti pasettayo ken agbalin a maikari iti pannakaitan-ok.

Dagiti Mainayon a Nasantuan a Kasuratan