Dagiti Libro ken Adalen
Kapitulo 25: Panagayuno

Panagayuno

Kapitulo 25

Ladawan
A Fijian man in an outdoor setting. He is holding a copy of the scriptures and has his eyes closed in prayer.

Kasano ti Umno a Panagayuno

  • Ania ti mabalintayo nga aramiden tapno mapagbalintayo a naragsak a padas ti panagayuno?

Manipud pay idi panawen ni Adan nagay-ayunon dagiti tao ti Dios tapno matulongan ida nga umasideg Kenkuana ken tapno agrukbabda Kenkuana. Impakita ni Jesus ti kinapateg ti panagayuno babaen ti bukodna a pagwadan (kitaen iti Lucas 4:1–4). Babaen ti paltiing iti ud-udina nga aldaw maammuantayo a namnamaen pay laeng ti Apo a masansan nga agayuno ken agkararag dagiti taona (kitaen iti DkK 88:76).

Ti panagayuno ket kayatna a sawen ti saan a pannangan ken yiinum. Nasayaat ti masansan a panagayuno para iti bagitayo ken tumulong nga agbalin a naregregta dagiti panunottayo.

Insuro kadatayo ti Mangisalakan a ti panagayuno nga addaan iti panggep ket dakdakkel ti kaipapananna ngem ti saan a pannangan ken yiinum. Nasken pay nga ipamaysatayo ti maipapan kadagiti naespirituan a banag.

Nasken nga Agkararagtayo No Agayunotayo

Ti kararag ket napateg a paset ti panagayuno. Iti unos ti nasantuan a kasuratan, agpada a nadakamat ti panagkararag ken panagayuno. Nasken a mabuyogan iti napasnek a panagkararag ti panagayunotayo, ken nasken a rugian ken gibusantayo ti panagayunotayo iti panagkararag.

Nasken nga Agayunotayo nga Addaan iti Panggep

Mabalin nga addaan iti adu a panggep ti panagayuno. Mabalintayo a parmeken dagiti pagkapsutan wenno parikut babaen ti panagayuno ken panagkararag. No dadduma mabalin a tarigagayantayo ti agayuno ken agkararag tapno dumawat iti tulong wenno tarabay para kadagiti dadduma, a kas iti maysa a miembro ti pamilia a masaksakit ken agkasapulan iti bendision (kitaen iti Mosiah 27:22–23). Babaen ti panagayuno mabalintayo a maammuan ti kinapudno dagiti banag a kas iti napasamak ken ni propeta Alma iti Libro ni Mormon. Kinunana: “Nagayuno ken nagkararagak iti adu nga aldaw tapno maammuak dagitoy a banag. Ket ita ammok a pudno dagitoy; agsipud ta impasimudaag kaniak ti Apo a Dios babaen ti Nasantuan nga Espiritu” (Alma 5:46).

Mabalintayo ti agayuno tapno matulongan dagiti dadduma a mangawat iti kinapudno. Mabalin a matulongannatayo ti panagayuno kadagiti panawen ti panagleddaang ken panagun-unnoy (kitaen iti Alma 28:4–6). Matulongannatayo ti panagayuno nga agbalin a napakumbaba ken makarikna nga as-asidegtayo iti Nailangitan nga Amatayo (kitaen iti Helaman 3:35).

Nasken a ti panggeptayo iti panagayuno ket saan nga agpasindayaw kadagiti dadduma. Imbalakad ti Apo:

“Ket inton agayunokayo, saankayo a kasla kadagiti managinsisingpet a naliday: ta baliwanda ti rupada, tapno agparangda a nagayuno kadagiti tattao.

“Pudno kunak kadakayo, Inawatdan ti gunggonada.

“Ngem sika, inton agayunoka, lanaam ti ulom ket agdiram-oska; tapno di maiparang kadagiti tattao nga agay-ayunoka” (Mateo 6:16–18).

Nasken a naragsaktayo no agayunotayo ken saantayo nga ipadamag kadagiti dadduma ti panagayunotayo.

  • Kasano nga impluensiaan ti tignaytayo ti padastayo no agayunotayo?

Ti Aldaw a Panagayuno

Adda aldaw a panagayuno dagiti Santo iti Ud-udina nga Aldaw iti maysa a Domingo iti tunggal bulan. Iti daytoy nga aldaw saantayo a mangan wenno uminum iti dua nga agsaruno a pannangan. No mangantayo iti pangrabii iti Sabado, nasken a saantayo a mangan wenno uminum agingga iti pangrabii iti Domingo.

Nasken nga agayuno ti amin a miembro a makabael ti bagida. Nasken nga allukoyentayo dagiti annaktayo nga agayuno kalpasan ti pannakabuniagda, ngem ditay kaano man piliten ida. Ti aldaw a panagayuno ket maysa a naisangsangayan nga aldaw a panangipakumbabatayo iti bagbagitayo iti sango ti Apo babaen ti panagayuno ken panagkararag. Daytoy ti aldaw a panagkararag para iti pannakapakawan dagiti basoltayo ken para iti bileg a mangparmek kadagiti bidduttayo ken mangpakawan kadagiti dadduma.

Iti Domingo a panagayuno, agtitipon a sangkamaysa dagiti miembro ti Simbaan ket makiranudda iti sakramento. Papigsaenda ti bagbagida ken ti tunggal maysa babaen ti panangiburayda iti pammaneknek iti miting ti panagayuno ken panagpaneknek.

  • Kasano a naparaburanka iti panangibinglaymo iti pammaneknekmo iti miting ti panagayuno ken panagpaneknek? Kasano a naparaburanka iti pannakangngegmo kadagiti dadduma a nangibinglay kadagiti pammaneknekda?

Dagiti Daton iti Panagayuno

  • Apay a mangtedtayo kadagiti daton iti panagayuno?

No agayunotayo iti tunggal bulan, kiddawen kadatayo ti Apo a tulongantayo dagiti agkasapulan. Maysa a wagas a panangaramid iti daytoy ket babaen ti panangted iti umno a turay wenno awtoridad ti priesthood iti kuarta a nagastostayo koma iti taraon para iti dua a pannangan. Nasken a mangtedtayo a siwawadwad agingga a kabaelantayo. Babaen kadagiti datontayo iti panagayuno agbalintayo nga agkadua iti Apo iti panangipaay kadagiti kasapulan dagiti nakurapay a kakabsattayo.

Mabendisionantayo No Agayunotayo

  • Ania dagiti bendision a maawattayo no siuumno nga agayunotayo?

Insurat ni Isaias, maysa a propeta iti Daan a Tulag, ti maipapan kadagiti adu a kari ti Apo kadagiti agayuno ken tumulong kadagiti agkasapulan. Maikari kadatayo ti kappia, nasaysayaat a salun-at, ken naespirituan a pannarabay. Ibaga kadatayo ni Isaias maipapan kadagiti bendision a sumangbay no agayunotayo: “Iti kasta agbannawagto ti lawagmo a kas iti agsapa, ket ta isasalun-atmo sumantakto a sisisiglat unay; ket ta kinalintegmo mapanto iti sangoanam; ti dayag ni Jehova isunto ti agaywan iti malikudam. Iti kasta umawagkanto, ket ni Jehova sumungbatto; umkiskanto, ket isu kunaennanto, Addaak ditoy” (Isaias 58:8–9).

Pasayaaten ti panagayuno ti biagtayo ken mangted kadatayo iti nayon a pigsa. Tulongannatayo nga agbiag a mayannurot kadagiti dadduma pay a pagbatayan ti ebanghelio gapu ta ad-adda a yasidegnatayo iti Apo.

Isuronatayo ti Panagayuno iti Panagteppel iti Bagi

Tulongannatayo ti panagayuno a makagun-od iti tibker ti pakinakem. No agayunotayo a siuumno, masursurotayo nga agteppel kadagiti paggarteman ken tarigagaytayo. Napigpigsatayo bassit babaen iti panangipaneknektayo iti bagbagitayo nga adda panagteppeltayo. No suruantayo dagiti annaktayo nga agayuno, maaddaandanto iti naespirituan a pigsa a mangparmek iti ad-adu pay a pannulisog nga umayto iti biagda.

Mangted kadatayo ti Panagayuno iti Naespirituan a Bileg

No agayunotayo a nainsiriban ken nainkararagan, mapapigsatayo ti pammatitayo. Babaen dayta a pammati maaddaantayto iti dakdakkel a nespirituan a bileg. Kas pagarigan, isalaysay ni Alma (maysa a propeta iti Libro ni Mormon) ti estoria ti pannakipagkitana manen kadagiti annak a lallaki ni Mosiah adun a tawen kalpasan ti namilagruan a pannakapasurotda. Nakarikna isuna iti napalalo a ragsak idi naammuanna a napatibkerda ti pammatida ken naaddaanda iti dakkel a naespirituan a bileg. Nagun-odda daytoy a bileg gapu ta “ad-adun ti panagkararagda iti bagbagida, ken panagayuno; ngarud adda kadakuada ti espiritu ti pammadto, ken ti espiritu ti paltiing” (Alma 17:3).

Mangaskasaba idin dagiti annak a lallaki ni Mosiah iti unos ti 14 a tawen kadagiti Lamanite. Gapu ta nagayuno ken nagkararag dagiti annak a lallaki ni Mosiah, ninayonan ti Espiritu ti Apo ti bileg dagiti balikasda. Daytoy ti nangted kadakuada iti dakkel a balligi iti aramidda a kas misionario. (Kitaen iti Alma 17:4.)

Kinuna ti Mangisalakan kadagiti agayuno a siuumno, “Ni Amam, a makakita iti nalimed, gunggonaannakanto” (Mateo 6:18).

  • Kasano a mabalin a nayonan ti panagayuno ti naespirituan a bilegtayo tapno mapagkedkedantayo dagiti pannulisog? tapno makaawat iti paltiing? tapno makaaramid kadagiti nalinteg a tignay?

Dagiti Mainayon a Nasantuan a Kasuratan