9.

Sōtaiete Tauturu

9.1

Te fā ’e te fa’anahonahora’a

E tauturu te Sōtaiete Tauturu i te mau tamari’i a te Atua ’ia fa’aineine nō te ho’i i mua i tōna ’aro. ’Ei mau tamāhine nā te mau metua i te ao ra, e « ha’amāramarama » te mau melo o te Sōtaiete Tauturu « i te mau pāpa’ira’a mo’a » e « fa’aitoito i te ’ēkālesia », e fa’ateitei i te ’ā’au, ’e e « ha’apa’o i te mau fafaura’a tā [rātou] i fa’aau ra » (Te Ha’api’ira’a Tumu ’e te mau Fafaura’a 25:7, 13).

9.1.1.

Fā

E ’āvirira’a te Sōtaiete Tauturu tei ha’amauhia e te Atua nō te mau vahine pa’ari ato’a o te ’Ēkālesia. ’Ua ha’api’i te peropheta Iosepha Semita ē, te fā a te Sōtaiete Tauturu ’o te fa’aorara’a ïa i te mau vairua ’e te tāmarūra’a i te māuiui. ’Ua parau ’oia ē, ’aita te ’Ēkālesia a Iesu Mesia i fa’anaho-hope-hia e tae roa, ’ua fa’anahohia te mau tuahine.

E ’ohipa ’āmui te mau melo o te Sōtaiete Tauturu nō te taurutu i te rave-fa’aoti-ra’a i te ’ohipa nō te fa’aorara’a ’e te fa’ateiteira’a. E tāvini rātou ia vetahi ’ē, e rave i te mau hōpoi’a e tū’ati i tā rātou fafaura’a, e patu i te hō’ēra’a, ’e e ’apo mai ’e e ora i te ha’api’ira’a tumu.

Te parau poro a te Sōtaiete Tauturu ’oia ho’i, « E ’ore roa te aroha e mou » (1 Korinetia 13:8). E ’itehia teie parau poro i ni’a i te ’āti’a tītiro a te Sōtaiete Tauturu.

9.1.2

Te ti’ara’a melo i roto i te Sōtaiete Tauturu

Te Sōtaiete Tauturu ’o te hō’ē ïa autuahinera’a nō te orara’a tā’āto’a. Te mau tuahine pa’ari ato’a mai te 18 matahiti e hau atu, e melo rātou nō te Sōtaiete Tauturu. E melo rātou noa atu ē, ’aita rātou e haere mai nei i te mau purera’a a te Sōtaiete Tauturu.

E nehenehe te hō’ē feiā ’āpī tamāhine e ha’amata i te ’āmui mai i roto i te Sōtaiete Tauturu i te 18ra’a o tōna matahiti. E paraparau ’oia i tōna nā metua ’e i te ’episekōpo nō ni’a i te taime ti’a. I te 19ra’a o tōna matahiti ’aore rā, ’a haere ai ’oia i rāpae i te ’utuāfare, mai te haerera’a i te fare ha’api’ira’a tuatoru ’aore rā, e tāvini i te hō’ē misiōni, e ti’a ’ia ’āmui mai ’oia i roto i te Sōtaiete Tauturu.

Te mau vahine fa’aipoipohia i raro mai i te 18 matahiti, e melo ato’a rātou nō te Sōtaiete Tauturu.

Nō te mau ha’amāramaramara’a nō ni’a i te mau metua fa’aipoipo-’ore-hia i raro mai i te 18 matahiti, ’a hi’o 38.1.5.

9.1.3

Te fa’atanora’a i te mau hina’aro o te fenua iho

Vetahi mau pāroita e rave rahi vahine pa’ari ha’apa’o tō roto. Nō teie mau pāroita, e nehenehe te ’episekōpo ’e te peresideni titi e fa’ati’a ’ia ha’amauhia hau atu i te hō’ē noa Sōtaiete Tauturu o te pāroita. E peresidenira’a tō te Sōtaiete Tauturu tāta’itahi. Mai te mea e nehenehe, e mea ti’a ’ia vai i roto i te Sōtaiete Tauturu tāta’itahi, te mau melo nō te mau matahiti rau ’e e mau ’itera’a rau.

9.2

Te ’āmuira’a i roto i te ’ohipa nō te fa’aorara’a ’e te fa’ateiteira’a

Tē ani nei te Atua i te mau ta’ata ato’a ’ia haere mai i te Mesia ra ’e ’ia ’āmui mai i roto i te ’ohipa nō te fa’aorara’a ’e te fa’ateiteira’a nā roto i :

• Te orara’a i te ’evanelia a Iesu Mesia.

• Te ha’apa’ora’a i te feiā i roto i te fifi.

• Te anira’a i te mau ta’ata ato’a ’ia fāri’i i te ’evanelia.

• Te tāhō’ēra’a i te mau ’utuāfare nō te tau mure ’ore.

E fa’anaho te feiā fa’atere o te Sōtaiete Tauturu i te mau purera’a i te sābati, te mau ’ātivite, te ’ohipa aupurura’a, te tāvinira’a, ’e te tahi atu mau ’ohipa nō te tauturu i te mau vahine ’ia ’āmui mai i roto i te ’ohipa nō te fa’aorara’a ’e te fa’ateiteira’a. E ’ohipa te mau melo o te Sōtaiete Tauturu ’e o te pupu peresibutero ma te tāhō’ē, nō te rave fa’aoti i teie ’ohipa.

Nō te ha’amāramaramara’a hau atu, nō ni’a i te ’ohipa nō te fa’aorara’a ’e te fa’ateiteira’a, ’a tuatāpapa i te pene 1.

9.2.1

Te orara’a i te ’evanelia a Iesu Mesia

E turu te feiā fa’atere o te Sōtaiete Tauturu i te mau melo i roto i te orara’a i te ’evanelia a Iesu Mesia. E ha’apāpū rātou i te fa’a’ohipara’a i te fa’aro’o, te tātarahapara’a, te fa’arahira’a i te fa’arava’ira’a iāna iho, ’e te ravera’a i te mau fafaura’a ’e te Atua ma te fāri’ira’a i te mau ’ōro’a. Tei roto te ’ōro’a hiero i teie mau ’ōro’a. Hi’o 1.2.1.

9.2.1.1

Te ’apora’a i te ’evanelia i te fare

’Ia ’apo ana’e mai ’e ’ia ora ana’e te mau melo i te ’evanelia i te fare, e hōhonu atu ā tō rātou fa’afāriura’a i te Metua i te ao ra ’e ia Iesu Mesia. E fa’aitoito te feiā fa’atere o te Sōtaiete Tauturu i te mau tuahine ’ia tuatāpapa i te mau pāpa’ira’a mo’a ’e i te mau parau a te mau peropheta, te ta’ata hō’ē ’e tō rātou ’utuāfare. E fa’ananea te Mai, peʼe mai—nō te ta’ata hō’ē ʼe te ʼutuāfare ’e te tahi atu mau rāve’a taururu i tā rātou tuatāpaparaʼa.

E rāve’a faufa’a roa te mau purera’a pō ’utuāfare nō te ’apo mai i te ’evanelia i te fare. Mātauhia e fa’atupuhia te reira i te hepetoma tāta’itahi, i te sābati, i te pō monire, ’aore rā, i te tahi atu taime. E ravehia i roto te mau pure, te tuatāpapara’a ’evanelia, te mau ’itera’a pāpū, te mau hīmene ’e te mau ’ātivite ’ārearea.

9.2.1.2

Te ’apora’a mai i te ’evanelia i roto i te mau purera’a a te Sōtaiete Tauturu

Te mau ’ōpuara’a o te mau purera’a a te Sōtaiete Tauturu i te sābati, teie ïa i muri nei :

• Ha’apūai i te fa’aro’o.

• Patu i te hō’ēra’a.

• Ha’apūai i te mau ’utuāfare ’e te mau nohora’a.

• Fa’anahora’a i te mau rāve’a nō te rave fa’aoti i te mau ’ohipa nō te fa’aorara’a ’e te fa’ateiteira’a.

E tupu teie mau purera’a i te piti ’e te maha o te sābati o te ’āva’e. Nō te roara’a e 50 minuti. E fa’anaho te peresidenira’a o te Sōtaiete Tauturu i teie mau purera’a. Nā te hō’ē melo nō te peresidenira’a e arata’i.

E ha’amata te purera’a ma te arata’ira’a te hō’ē melo o te peresidenira’a i te mau ’ohipa. ’Ei hi’ora’a, e nehenehe te mau tuahine e ’āparau ’āmui nō ni’a i te rave-fa’aoti-ra’a i te ’ohipa nō te fa’aorara’a ’e te fa’ateiteira’a. E ti’a ’ia hōro’ahia i te taime tano nō te ha’api’ira’a ’e te ’āparaura’a pāpū i te ’evanelia.

E fa’atumuhia te mau purera’a a te Sōtaiete Tauturu i ni’a i te mau tumu parau o te hō’ē ’aore rā, hau atu mau a’ora’a nō te ’āmuira’a rahi i ma’iri iho nei. Nā te peresidenira’a o te Sōtaiete Tauturu e mā’iti nā roto i te pure, i te mau parau poro’i e ’āparau, ’ia au i te mau hina’aro o te mau tuahine. E nehenehe i te mau hīmene e hīmenehia nō te ha’amaita’i i te ha’api’ira’a. E mea ti’a i te mau purera’a ’ia fa’aotihia nā roto i te hō’ē pure.

Nō te mau ha’amāramaramara’a hau atu, hi’o ComeFollowMe.ChurchofJesusChrist.org.

9.2.1.3

Te mau ’ātivite

E fa’anaho te mau peresidenira’a o te Sōtaiete Tauturu i te mau ’ātivite. ’Ia ha’apūai teie mau ’ātivite i te mau tuahine ’e ’ia hōro’a ia rātou i te mau rāve’a nō te tāvini ’āmui. ’Ia ravehia te rahira’a o te mau ’ātivitie i te mau taime ta’a ’ē atu i te sābati ’aore rā, i te mau pō mōnirē.

Nā te peresideni o te Sōtaiete Tauturu e hi’opo’a i teie mau ’ātivite. E nehenehe ’oia e ani i te hō’ē tauturu ’aore rā, i te tahi atu tuahine ’ia arata’i i te fa’aineinera’a ’e i te fa’atupura’a i te reira (hi’o 9.3.4). E paraparau te mau peresidenira’a i te mau ’ātivite ’e te ’episekōpo ’ei tuha’a nō tā rātou fa’aineinera’a.

9.2.2

Te ha’apa’ora’a i te feiā tei hina’aro i te tauturu

’Ei feiā pe’e ia Iesu Mesia, e hōpoi’a nā te mau tuahine ’ia toro i te rima here i te feiā i roto i te fifi. ’Ei ta’ata hō’ē ’e ’ei Sōtaiete Tauturu, e ’imi rātou i te mau rāve’a nō te tāvini ia vetahi ’ē i roto i te pāroita ’e i te huira’atira. I te vāhi e roa’a te JustServe.org e hōro’a mai te reira i te mau rāve’a nō te tāvinira’a i te huira’atira.

Nō te tahi atu mau ha’amāramaramara’a nō ni’a e nāhea te mau melo o te Sōtaiete Tauturu ’e o te pupu peresibutero i te ha’apa’o i te feiā i roto i te fifi, hi’o 22.6.2.

9.2.2.1

Te aupururaʼa

Te aupurura’a ’o te ha’apa’ora’a ïa ia vetahi ’ē mai tā te Fa’aora e na reira. E fāri’i te mau tuahine i te mau fa’auera’a nō te aupurura’a nā roto mai i te peresidenira’a o te Sōtaiete Tauturu. Nō te tahi atu mau ha’amāramaramara’a, ’a hi’o pene 21.

9.2.2.2

Te mau hina’aro tau poto

E ’imi te mau tuahine aupuru ’ia māramarama ’e ’ia pāhono i te mau hina’aro o te feiā tā rātou e tāvini ra. E tītau paha te mau melo i te tauturu nō te tau poto i te taime o te ma’i, te fānaura’a, te pohera’a, te ’erera’a i te ’ohipa, ’e te tahi atu mau huru tupura’a.

Mai te mea e tītauhia, e ani te mau tuahine aupuru i te tauturu i te peresidenira’a o te Sōtaiete Tauturu. E nehenehe te peresidenira’a e ani ’ia pi’ihia te hō’ē ti’a’au ’ohipa tāvinira’a nō te fa’anaho i teie mau tauto’ora’a (hi’o 9.3.4).

E fa’anaho te Sōtaiete Tauturu ’e te pupu peresibutero i te mau tauto’ora’a nō te pāhono i te mau hina’aro tau poto (hi’o 22.3.2). E nehenehe te ’episekōpo e hōro’a i te tauturu ha’apaera’a mā’a rū mai te mea e tītauhia.

I te tahi mau vāhi, tei te mau ’episekōpo te mā’itira’a nō te hōro’a i te mau melo i roto i te fifi, te tāpura poro’i tao’a a te ’episekōpo, nō te mā’a ’e nō te tahi atu mau tauiha’a tumu. I te rahira’a taime, e fa’aue te ’episekōpo i te peresideni o te Sōtaiete Tauturu ’ia fārerei i te mau melo ’e ’ia fa’a’ī i te tāpura poro’i tao’a. Teie rā, e nehenehe ato’a ’oia e fa’aue i te peresideni o te pupu peresibutero. E nehenehe te hō’ē tauturu i roto i te peresidenira’a o te Sōtaiete Tauturu ’aore rā o te pupu peresibutero e fa’auehia, mai te mea e’ita te peresideni e vata. E fa’aho’i atu teie ta’ata fa’atere tei fa’auehia i te parau poro’ira’a tao’a tei fa’a’īhia i te ’episekōpo ra, nō tāna parau fa’ati’a.

Nō te mau ha’amāramaramara’a hau atu, ’a hi’o 22.6.2 ’e « Te mau rāve’a tōtauturu » i roto Te rāve’a tauturu a te feiā fa’atere ’e te pāpa’i parau [DDG].

9.2.2.3

Te mau hina’aro tau roa ’e te fa’arava’ira’a iāna iho

I raro a’e i te fa’anahora’a a te ’episekōpo, e tauturu te mau peresidenira’a o te Sōtaiete Tauturu ’e o te pupu peresibutero i te mau melo e hina’aro tau roa tō rātou ’e te fa’arava’ira’a iāna iho. E ha’api’i rātou i te mau parau tumu o te fa’arava’ira’a iāna iho i te pae tino ’e i te pae vārua. ’A hi’o te pene 22 ’e « Te fa’arava’ira’a iāna iho » i roto i te fa’anahora’a Vaira’a buka ’evanelia.

Mai te mea e hina’aro te hō’ē ta’ata ’aore rā, te hō’ē ’utuāfare i te tauturu, e paraparau ’āmui te peresideni o te Sōtaiete Tauturu ’e te peresideni o te pupu peresibutero, i raro a’e i te fa’anahora’a a te ’episekōpo, e nāhea ’ia tauturu (hi’o 22.4).

E tauturu te peresideni o te Sōtaiete Tauturu, te peresideni o te pupu peresibutero, ’aore rā, te tahi atu ti’a fa’atere, i te ta’ata ’aore rā, i te ’utuāfare ’ia hāmani i te hō’ē Fa’anahora’a nō te fa’arava’ira’a iāna iho. E nehenehe ato’a te mau tuahine ’aore rā, te mau taea’e aupuru e tauturu i te reira fa’anahora’a. Pinepine te tahi atu mau melo nō te Sōtaiete Tauturu ’aore rā nō te pupu peresibutero, e mau ’aravihi ’aore rā e mau ’itera’a tō rātou ’o tē nehenehe e tauturu. Te mau ta’ata ato’a e tauturu mai, ’ia tāpe’a ’ōmo’e noa rātou i te mau ha’amāramaramara’a. Nō te mau ha’amāramaramara’a hau atu, hi’o 22.3.3 ’e 22.8.

9.2.2.4

’Ia pohe ana’e te hō’ē melo o te pāroita

’Ia pohe ana’e te hō’ē melo o te pāroita, e pūpū te peresidenira’a o te Sōtaiete Tauturu ’e te peresidenira’a o te pupu peresibutero i te tāmāhanahana ’e te tauturu. I raro a’e i te arata’ira’a a te ’episekōpo, e nehenehe rātou e tauturu i te ’ohipa nō te hunara’a.

Mai te mea e nehenehe, te mau melo pohe tei fāri’i i tō rātou ’ōro’a hiero, ’ia hunahia ’aore rā ’ia tūtu’ihia rātou i roto i tō rātou ’ahu hiero. Nā te tāne fa’aipoipo e fa’a’ahu i te tino o tāna vahine ’aore rā nā te hō’ē vahine melo nō te ’utuāfare tei fāri’i i tōna ’ōro’a hiero. Mai te mea ’aita e vai ra te hō’ē melo o te ’utuāfare ’aore rā ’aita e hina’aro e rave i te fa’a’ahura’a, e nehenehe te ’episekōpo e ani i te peresideni o te Sōtaiete Tauturu ’ia ani i te hō’ē tuahine tei rave i tōna ’ōro’a hiero, ’ia fa’a’ahu i te tino ’aore rā ’ia hi’opo’a i te fa’a’ahura’a. Nō te tahi atu mau ha’amāramaramara’a, ’a hi’o 38.5.8.

E tāmau noa te mau peresidenira’a o te Sōtaiete Tauturu ’e o te pupu peresibutero, te mau taea’e ’e te mau tuahine aupuru, ’e vetahi ’ē i te pūpū i te tāmāhanahana ’e te tauturu i muri a’e i te hunara’a.

9.2.3

Te anira’a i te mau ta’ata ato’a ’ia fāri’i i te ’evanelia

E hōpoi’a nā te mau melo o te Sōtaiete Tauturu ’ia ani manihini i te mau ta’ata ato’a ’ia fāri’i i te mau ha’amaita’ira’a o te ’evanelia a Iesu Mesia (hi’o Mosia 18:9). E rave rātou i te reira nā roto i te fa’a’itera’a i te ’evanelia, te ha’apūaira’a i te mau melo ’āpī, ’e te torora’a i te rima i te feiā e ’ere i te mea itoito roa i roto i te ’Ēkālesia.

I roto i te mau ’āpo’ora’a a te peresidenira’a ’e te Sōtaiete Tauturu, e paraparau te peresidenira’a o te Sōtaiete Tauturu i te mau rāve’a e nehenehe ai i te mau tuahine e ani i te mau ta’ata ato’a ’ia fāri’i i te mau ha’amaita’ira’a o te ’evanelia.

E fa’aue te peresideni o te Sōtaiete Tauturu i te hō’ē melo o te peresidenira’a, e tauturu i te arata’i i te ’ohipa misiōnare a te melo i roto i te pāroita. E ’ohipa ’oia i pīha’i iho i te melo o te peresidenira’a o te pupu peresibutero tei fa’ata’ahia nō te fa’anaho i te reira mau tauto’ora’a (hi’o 23.5.1).

E ’āmui atu te melo o te peresidenira’a o te Sōtaiete Tauturu tei fa’ata’ahia i roto i te mau ’āpo’ora’a fa’anahora’a, nō te fa’anaho i te mau anira’a ato’a nō te fāri’i i te mau ha’amaita’ira’a o te ’evanelia. Nā te ti’a fa’atere misiōni o te pāroita, e melo paha nō te peresidenira’a o te pupu peresibutero, e arata’i i te mau ’āpo’ora’a fa’anahora’a hepetoma. Te fā o teie mau ’āpo’ora’a ’o te fa’anahora’a ïa i te anira’a i te mau ta’ata ato’a ’ia fāri’i i te mau ha’amaita’ira’a o te ’evanelia. E ’āmui ato’a mai te mau misiōnare pāroita, hō’ē tauturu i roto i te pupu tahu’a, hō’ē melo nō te peresidenira’a o te piha a te feiā ’āpī tamāhine pa’ari a’e, ’e te mau misiōnare rave tāmau.

9.2.4

Te tāhō’ēra’a i te mau ’utuāfare nō te tau mure ’ore

E turu te mau melo nō te Sōtaiete Tauturu i te mau melo i roto i te tāhō’ēra’a i te mau ’utuāfare nō te tau mure ’ore. ’Oia ho’i :

• Te ravera’a i te mau fafaura’a ’e te Atua nā roto i te fāri’ira’a i te mau ’ōro’a, tae noa atu te ’ōro’a hiero.

• Te ravera’a i te ’ohipa hiero ’e te ’ā’amu ’utuāfare (hi’o 1.2.4).

I roto i te mau ’āpo’ora’a a te peresidenira’a o te Sōtaiete Tauturu, e ’āparau te peresidenira’a o te Sōtaiete Tauturu i te mau rāve’a e ti’a ai i te mau tuahine ’ia ’āmui mai i roto i teie mau tauto’ora’a.

E fa’aitoito te peresidenira’a i te mau tuahine ’ia ha’api’i mai nō ni’a i te ’ā’amu o tō rātou ’utuāfare ’e nō ni’a i te mau fafaura’a ’e te mau ’ōro’a o te hiero. E fa’aitoito ato’a rātou i te mau tuahine ’ia haere tāmau i te hiero, i te vāhi e nehenehe ’ia nā reira.

E fa’ata’a te peresideni o te Sōtaiete Tauturu i te hō’ē melo o te peresidenira’a nō te tauturu i te arata’i i te ’ohipa hiero ’e te ’ā’amu ’utuāfare i roto i te pāroita. E ’ohipa ’oia i pīha’i iho i te melo o te peresidenira’a o te pupu peresibutero i fa’ata’ahia nō te fa’anaho i te reira mau tauto’ora’a (hi’o 25.2.2).

E ’āmui mai te melo o te peresidenira’a o te Sōtaiete Tauturu tei fa’ata’ahia i roto i te mau ’āpo’ora’a fa’anahora’a, nō te fa’anaho i te ’ohipa hiero ’e te ’ā’amu ’utuāfare. E fa’atupu-tāmau-hia teie mau ’āpo’ora’a. Nā te ti’a fa’atere nō te hiero ’e nō te ’ā’amu ’utuāfare o te pāroita, e melo paha nō te peresidenira’a pupu peresibutero, e arata’i i te mau ’āpo’ora’a fa’anahora’a nō te hiero ’e te ’ā’amu ’utuāfare (hi’o 25.2.7). E ’āmui ato’a mai te hō’ē tauturu nō te pupu o te mau tahu’a, hō’ē melo nō te peresidenira’a o te piha a te feiā ’āpī tamāhine pa’ari roa a’e, ’e te mau ta’ata ha’apa’o nō te ’ohipa hiero ’e te ’ā’amu ’utuāfare.

9.3

Te feiā fa’atere o te Sōtaiete Tauturu

9.3.1

’Episekōpo

Tei mātauhia e fārerei te ’episekōpo i te peresideni o te Sōtaiete Tauturu hō’ē taime i te ’āva’e. E ’āparau rāua i te ’ohipa nō te fa’aorara’a ’e te fa’ateiteira’a, tae noa atu i te ’ohipa tāvinira’a a te mau tuahine aupuru. E paraparau ato’a rāua i (1) te haerera’a i mua ’e te mau hina’aro o te mau tuahine i roto i te pāroita ’e (2) te mau purera’a a te Sōtaiete Tauturu, te ha’api’ira’a, ’e te mau ’ātivite.

9.3.2

Te peresidenira’a o te Sōtaiete Tauturu

9.3.2.1

Te pi’ira’a i te hō’ē peresidenira’a o te Sōtaiete Tauturu

E pi’i te ’episekōpo i te hō’ē vahine ’ei peresideni nō te Sōtaiete Tauturu o te pāroita. Mai te mea e nava’i te rahi o te ’āmuira’a, e ani ’oia iāna hō’ē ’aore rā, e piti vahine ’ei nā tauturu nōna. E feruri te ’episekōpora’a i tāna anira’a ’e e fa’ahaere i te mau pi’ira’a.

Nā te hō’ē melo o te ’episekōpora’a e vauvau atu i te mau melo o te peresidenira’a i roto i te hō’ē purera’a ’ōro’a nō te pāturura’a. Nā te ’episekōpo e fa’ata’a i te peresideni o te Sōtaiete Tauturu. Nā te hō’ē melo o te ’episekōpora’a e fa’ata’a i tōna nā tauturu.

E vauvau atu te ’episekōpo ’aore rā, hō’ē o tōna nā tauturu i te mau tuahine tei pi’ihia nō te tahi atu mau pi’ira’a o te Sōtaiete Tauturu, nō te pāturura’a i roto i te purera’a a te Sōtaiete Tauturu. Hi’o 9.3.3 ’e 9.3.4.

E nehenehe te tahi mau ’āmuira’a na’ina’i ’aita tō rātou e peresideni Feiā ’Āpī Tamāhine ’aore rā, peresideni Paraimere. I roto i teie mau ’āmuira’a, e tauturu te peresideni o te Sōtaiete Tauturu i te mau metua ’ia fa’anaho i te ha’api’ira’a nō te feiā ’āpī ’e nō te mau tamari’i.

9.3.2.2

Te mau hōpoi’a

Teie i muri nei te mau hōpoi’a a te peresideni o te Sōtaiete Tauturu. E tauturu tōna nā tauturu iāna.

• E tāvini i roto i te ’āpo’ora’a pāroita. E tāvini ’oia ’ei (1) melo nō te ’āpo’ora’a ’o tē tauturu i te pāhonora’a i te mau hina’aro i roto i te pāroita ’e e ’imi i te mau rāve’a ’e (2) ’ei ti’a nō te Sōtaiete Tauturu (hi’o 29.2.5).

• E arata’i i te mau tauto’ora’a a te Sōtaiete Tauturu nō te ’āmui mai i roto i te ohipa nō te fa’aorara’a ’e te fa’ateiteira’a (hi’o pene 1).

• E fa’anaho ’e e hi’opo’a i te ’ohipa tāvinira’a a te mau tuahine aupuru. E ti’a’au i te mau fa’auera’a o te aupurura’a ’e te peresidenira’a o te pupu peresibutero, ma te putuputu hō’ē taime i te toru ’āva’e. E tītau i te parau fa’ati’a a te ’episekōpo nō te mau fa’auera’a nō te aupurura’a. E rave i te mau uiuira’a nō te aupurura’a hō’ē a’e taime i te toru ’āva’e. Hi’o pene 21.

• I raro a’e i te arata’ira’a a te ’episekōpo, ’a paraparau i te mau melo pa’ari o te pāroita. ’O te ’episekōpo ana’e te a’o i te mau melo o te pāroita nō ni’a i te parau nō te ti’a-mā-ra’a, te hāmani-’ino-ra’a ’e te parau fa’ati’a nō te fa’a’ohipa i te moni ha’apaera’a mā’a. Hi’o Te mau rāve’a tauturu nō te a’o.

• Ia te peresidenira’a o te pupu peresibutero, e tauturu i te arata’ira’a i te mau tauto’ora’a i roto i te pāroita nō te ani i te mau ta’ata ato’a, ’ia fāri’i i te mau ha’amaita’ira’a o te ’evanelia (hi’o 8.2.3 ’e 9.2.3).

• Ia te peresidenira’a o te pupu peresibutero, e tauturu i te arata’ira’a i te ’ohipa hiero ’e te ’ā’amu ’utuāfare i roto i te pāroita (hi’o 8.2.4 ’e 9.2.4).

• E fa’aau i te mau tauto’ora’a a te Sōtaiete Tauturu nō te ha’apūai i te mau tuahine feiā ’āpī pa’ari i roto i te pāroita, tei ’ore i fa’aipoipohia ’e tei fa’aipoipohia. E nehenehe te hō’ē tauturu e fa’ata’ahia nō te tāvini i pīha’i iho i te feiā ’āpī pa’ari ’ōtahi (hi’o 14.1.2.2).

• E farerei ’oia i te melo tāta’itahi o te Sōtaiete Tauturu hō’ē a’e taime i te matahiti. E tāu’aparau ’oia i te ora maita’i o te tuahine ’e tōna ’utuāfare.

• E ha’api’i ’oia i te mau tuahine i tā rātou hōpoi’a nō te fafaura’a.

• E hi’opo’a ’e e tauturu ’oia ’ia ha’amaita’i i te ha’api’ira’a i roto i te Sōtaiete Tauturu (hi’o pene 17).

• E fa’anaho ’e e arata’i i te mau putuputura’a a te Sōtaiete Tauturu.

• E hi’opo’a i te mau ’ātivite a te Sōtaiete Tauturu (hi’o 9.2.1.3).

• E tauturu ’oia i te feiā ’āpī tamāhine ’ia fa’aineine nō te ’āmui mai i roto i te Sōtaiete Tauturu (hi’o 9.4).

• E hi’opo’a i te mau tāpura i’oa a te Sōtaiete Tauturu, te mau parau fa’a’ite, te faufa’a moni (hi’o DDG. ChurchofJesusChrist.org). E nehenehe te hō’ē pāpa’i parau e tauturu (hi’o 9.3.3).

E ha’api’i te peresidenira’a o te Sōtaiete Tauturu titi i te peresidenira’a o te Sōtaiete Tauturu pāroita nō ni’a i teie mau hōpoi’a. E nehenehe rātou e rave i te reira i roto i te ’āpo’ora’a a te feiā fa’atere o te titi ’e nā roto i te haerera’a i roto i te mau ’āpo’ora’a a te peresidenira’a o te Sōtaiete Tauturu a te pāroita (hi’o 29.3.4).

Nā roto i tāna tāvinira’a, e pāturu te peresideni o te Sōtaiete Tauturu o te pāroita i te ’episekōpo ’ia fa’atumu i ni’a i te feiā ’āpī ’e i ni’a i tāna mau hōpoi’a hō’ē roa.

9.3.2.3

Te ’āpo’ora’a a te peresidenira’a

E putuputu tāmau te peresidenira’a o te Sōtaiete Tauturu ’e te pāpa’i parau. Nā te peresideni e arata’i i te reira mau ’āpo’ora’a. Teie te mau mea e nehenehe e tu’u i roto i te tārena ’ohipa :

• Fa’anaho nāhea i te ha’apūai i te mau tuahine ’e tō rātou ’utuāfare.

• Fa’anaho nāhea i te tauturu i te rave-fa’aoti-ra’a i te ’ohipa nō te fa’aorara’a ’e te fa’ateiteira’a.

• E fa’aau i te ’ohipa misiōnare ’e te ’ohipa hiero ’e te ’ā’amu ’utuāfare.

• Pāhono i te parau a’o ’e te mau fa’auera’a a te ’episekōpo.

• Pāhono i te mau fa’auera’a nō roto mai i te mau rurura’a ’āpo’ora’a pāroita.

• Feruri nā roto i te pure i te mau fa’auera’a nō te aupurura’a.

• Hi’o fa’ahou i te mau ha’amāramaramara’a nō roto mai i te mau uiuira’a nō te aupurura’a. Fa’anaho i te mau rāve’a nō te ’ite mai i te mau vāhi pūai ’e e tauturu i te pāhonora’a i te mau hina’aro. (Hi’o pene 21.)

• E feruri i te mau tuahine nō te tāvini i roto i te mau pi’ira’a ’e te mau fa’ata’ara’a ’ohipa a te Sōtaiete Tauturu.

• E fa’anaho i te mau putuputura’a ’e te mau ’ātivite a te Sōtaiete Tauturu.

9.3.3

Te pāpa’i parau

E nehenehe te peresidenira’a o te Sōtaiete Tauturu e ani i te hō’ē tuahine ’ia tāvini ’ei pāpa’i parau nō te Sōtaiete Tauturu. Nā te hō’ē melo nō te ’episekōpora’a e pi’i iāna, e vauvau iāna i roto i te hō’ē purera’a a te Sōtaiete Tauturu, nō te pāturura’a ’e e fa’ata’a iāna.

Teie i muri nei te mau hōpoi’a a te pāpa’i parau :

• E fa’aineine i te tārena ’ohipa nō te mau ’āpo’ora’a a te peresidenira’a ’e te mau ’āpo’ora’a a te Sōtaiete Tauturu.

• E pāpa’i i te ’ohipa e parauhia i roto i te mau ’āpo’ora’a ’e e hi’o i te mau tītaura’a ’ohipa.

• E tārena i te mau uiuira’a nō te aupurura’a (hi’o 21.3).

• E fa’aineine ’e e hāpono i te mau parau fa’a’ite toru ’āva’e, nō te taera’a mai te ta’ata i te purera’a ’e te rahira’a uiuira’a i ravehia nō te aupurura’a.

• E tauturu i te fa’aineine i te tāpura faufa’a nō te matahiti ’e ’ia hi’o i te mau ha’amāu’ara’a.

9.3.4

Te tahi atu mau pi’ira’a

E nehenehe te mau pi’ira’a hau atu i muri nei e riro ’ei tauturura’a. E paraparau te ’episekōpo ’e te peresideni o te Sōtaiete Tauturu e hina’arohia ānei te reira.

• Te mau ’orometua nō te ha’api’i i roto i te mau purera’a a te Sōtaiete Tauturu i te sābati.

• Te ti’a’au nō te ’ohipa tāvinira’a nō te tauturu i te fa’anaho ’e i te fa’atupu i te tāvinira’a i te feiā i roto i te fifi (hi’o 9.2.2.2). E nehenehe ato’a e pi’i i te mau tauturu ’e te mau melo nō te tōmite.

• Hō’ē ti’a’au nō te ’ātivite nō te tauturu i te fa’anaho ’e i te fa’atupu i te mau ’ātivite a te Sōtaiete Tauturu (hi’o 9.2.1.3). E nehenehe ato’a e pi’i i te mau tauturu ’e i te mau melo nō te tōmite.

• Te mau tauturu pāpa’i parau nō te tauturu i te pāpa’i parau o te Sōtaiete Tauturu.

• Te mau pāpa’i parau nō te aupurura’a nō te fa’anaho i te mau uiuira’a o te aupurura’a ’e nō te tauturu i te fa’aineine i te mau parau fa’a’ite toru ’āva’e.

Mai te mea e hina’arohia teie mau pi’ira’a ’e te tahi atu mau pi’ira’a, e ani te peresidenira’a o te Sōtaiete Tauturu i te mau tuahine ’ia tāvini. E fa’atae rātou i teie mau anira’a i te ’episekōpora’a. Mai te mea e fāri’i te ’episekōpora’a, nā te hō’ē melo o te ’episekōpora’a e pi’i ia rātou. E vauvau atu ’oia ia rātou i roto i te hō’ē purera’a a te Sōtaiete Tauturu nō te pāturura’a ’e e fa’ata’a ia rātou.

Mai te mea e hina’arohia, e nehenehe te peresidenira’a o te Sōtaiete Tauturu e tītau i te mau tuahine ’ia tauturu i te mau tauto’ora’a a te Sōtaiete Tauturu, nā roto i te tahi atu mau rāve’a. ’Aita e tītauhia ’ia pi’i ’e ’ia fa’ata’a i te mau tuahine e fa’auera’a ’ohipa tau poto tā rātou.

9.4

Tauturura’a i te feiā ’āpī tamāhine ’ia fa’aineine nō te ’āmui atu i roto i te Sōtaiete Tauturu

E ’ohipa te peresidenira’a o te Sōtaiete Tauturu ’e te feiā ’āpī tamāhine, tō rātou mau metua, ’e te feiā fa’atere o te Feiā ’Āpī Tamāhine, nō te tauturu i te feiā ’āpī tamāhine ’ia fa’aineine nō te ’āmui mai i roto i te Sōtaiete Tauturu.

E hōro’a ato’a te feiā fa’atere i te mau rāve’a tāmau i te feiā ’āpī tamāhine ’e i te mau tuahine nō te Sōtaiete Tauturu, nō te ha’amaita’i atu i te mau tā’amura’a. Te tāvini-’āmui-ra’a ’ei mau tuahine aupuru ’o te hō’ē ïa rāve’a faufa’a roa nō te fa’atupu i te mau tā’amura’a.

E tauturu te feiā fa’atere i te feiā ’āpī tamāhine ’ia māramarama i tā rātou mau hōpoi’a e tū’ati i te mau fafaura’a. Mai te mea e mea maita’i ’ia tu’u i te hō’ē feiā ’āpī tamāhine nō te aupuru i te hō’ē tuahine ta’a ’ē, e nehenehe ’oia e fa’ata’ahia ’ei tuahine aupuru i te taime e hina’aro ’oia, e ti’a iāna ’ia rave, ’e ’ua nava’i tōna pa’ari. E nehenehe ’oia e fa’ata’ahia ’ia tae’ahia tōna matahiti i te 14. E tāvini te feiā ’āpī tamāhine ’ei mau hoa nō te mau tuahine o te Sōtaiete Tauturu (hi’o 21.2.2).

I te taime ’a tomo mai ai te feiā ’āpī pa’ari i roto i te Sōtaiete Tauturu, e hōro’a te peresidenira’a o te Sōtaiete Tauturu ia rātou i te mau rāve’a nō te tāvini ’e nō te fa’a’ite i tō rātou pūai. E tauturu ato’a te peresidenira’a ia rātou ’ia fa’aineine nō te rave ’e nō te ha’apa’o i te mau fafaura’a mo’a o te hiero (hi’o 27.1.1).

9.5

Te feiā fa’atere nō te Sōtaiete Tauturu titi

E pi’i ’e e fa’ata’a te peresideni titi i te hō’ē tuahine ’ei peresideni nō te Sōtaiete Tauturu titi. Mai te mea e titi rahi, e ani ’oia hō’ē ’aore rā, e piti vahine nō te tāvini ’ei tauturu, ’e te tahi atu nō te tāvini ’ei pāpa’i parau. Nā te hō’ē melo o te peresidenira’a titi ’aore rā, hō’ē melo nō te ’āpo’ora’a teitei e pi’i ’e e fa’ata’a i teie mau vahine. Nō te mau ha’amāramaramara’a nō ni’a i te mau hōpoi’a a te peresidenira’a o te Sōtaiete Tauturu titi ’e te pāpa’i parau, hi’o 6.7.1 ’e 6.7.3.

E putuputu tāmau te peresideni titi (mātarohia hō’ē taime i te ’āva’e) ’e te peresideni o te Sōtaiete Tauturu titi ’aore rā, te peresidenira’a. E paraparau ’āmui rātou nō ni’a i te ’ohipa nō te fa’aorara’a ’e te fa’ateiteira’a. E ’āparau ato’a rātou i (1) te haerera’a i mua ’e te mau hina’aro o te mau tuahine i roto i te titi ’e i (2) te mau putuputura’a a te Sōtaiete Tauturu, te ha’api’ira’a, ’e te mau ’ātivite.

E ha’api’i te peresidenira’a o te Sōtaiete Tauturu titi i te mau peresidenira’a o te Sōtaiete Tauturu pāroita i tā rātou mau hōpoi’a nō te ’ohipa misiōnare ’e te ’ohipa hiero ’e te ’ā’amu ’utuāfare. E rave rātou i te reira i raro a’e i te fa’aterera’a a te peresidenira’a o te titi. ’Ua fa’ata’ahia te mau melo o te ’āpo’ora’a teitei nō te tauturu. Hi’o 23.1 ’e 25.2.

Mai te mea tē vai ra tā te titi hō’ē tōmite feiā ’āpī pa’ari ’ōtahi, e tāvini te hō’ē melo o te peresidenira’a o te Sōtaiete Tauturu titi i roto i te reira tōmite. Mai te reira ato’a mai te mea tē vai ra hō’ē tōmite feiā pa’ari ’ōtahi i roto i te titi. (Hi’o 14.1.1.2.)

9.6

Te mau arata’ira’a ’e te mau fa’aturera’a hau atu

9.6.1

Te mau melo huma

E hōro’a te peresidenira’a o te Sōtaiete Tauturu i te ’atu’atura’a ta’a ’ē i te mau melo huma. Nō te mau ha’amāramaramara’a nō ni’a i te tauturura’a i teie mau melo, hi’o disability.ChurchofJesusChrist.org ’e 38.8.26.

9.6.2.

Te ’itera’a i te tai’o ’e te pāpa’i

Mai te mea e hina’arohia, e ’ohipa te peresidenira’a o te Sōtaiete Tauturu ’e te ’episekopo, te peresidenira’a o te pupu peresibutero ’e te ’āpo’ora’a pāroita nō te tauturu i te mau melo ’ia ha’api’i mai i te tai’o ’e i te pāpa’i.