21.

Te aupurura’a

21.0

’Ōmuara’a

Te aupurura’a, ’o te tāvinira’a ïa ia vetahi ’ē mai tā te Fa’aora i rave (hi’o Mataio 20:26–28). I here na ’oia, i ha’api’i na, i pure na, i tāmāhanahana ’e i ha’amaita’i na i te feiā ’ati a’e iāna (hi’o Te ’Ohipa 10:38). ’Ei pipi nā Iesu Mesia, tē ’imi nei tātou ’ia aupuru i te mau tamari’i a te Atua.

Tē hina’aro nei te Fatu i te mau melo ato’a o tāna ’Ēkālesia ’ia fāri’i i te reira huru aupurura’a. Nō reira, e fa’auehia te mau taea’e nō te autahu’ara’a ’ei taea’e aupuru nō te ’utuāfare tāta’itahi. E tu’uhia te mau tuahine aupuru nā te tuahine pa’ari tāta’itahi. E tauturu teie mau fa’auera’a ’ohipa i te ha’apāpū ē, tē ha’amana’ohia ra ’e tē ha’apa’ohia ra te mau melo o te Ēkālesia (hi’o Moroni 6:4).

Te aupurura’a, ’o te hō’ē ïa rāve’a faufa’a roa nō te ha’apa’o i te nā fa’auera’a ’ia here i te Atua ’e ’ia here i tō tātou ta’ata tupu (hi’o Mataio 22:36–40). E rāve’a faufa’a rahi ato’a nō te tauturu i te fa’atupura’a i te ’ohipa nō te fa’aorara’a ’e te fa’ateiteira’a.

E tauturu te mau peresidenira’a pupu peresibutero ’e Sōtaiete Tauturu i te mau taea’e ’e te mau tuahine aupuru ’ia ha’api’i mai nāhea i te aupuru ia vetahi ’ē. E hōro’a ato’a mai rātou i te fa’aurura’a, te arata’ira’a ’e te pāturura’a. E nehenehe rātou e rave i te reira i roto i te mau uiuira’a aupurura’a (hi’o 21.3), i roto i te mau purera’a i te sābati, ’e i roto i tā rātou iho mau ’āparaura’a. E ’imi rātou i te fa’aurura’a i roto i te mau pāpa’ira’a mo’a, teie pene, ’e i ni’a ia ministering.ChurchofJesusChrist.org.

21.1

Te mau hōpoi’a a te mau tuahine ’e te mau taea’e aupuru

Tē ti’a nei te mau tuahine ’e te mau taea’e aupuru nō te Fatu. E tauturu ato’a rātou i te mau melo ’ia putapū i te here ’e te pāturura’a a te ’episekōpo ’e a te feiā fa’atere nō te Sōtaiete Tauturu ’aore rā, nō te pupu autahu’ara’a. Tītauhia ia rātou ’ia « ha’apa’o » i te mau melo o te ’Ēkālesia ’e « ’ia pārahi noa i pīha’i iho ia rātou ’e ’ia fa’aitoito ia rātou » (Te Ha’api’ira’a Tumu ’e te mau Fafaura’a 20:53).

Tei te mau tuahine ’e te mau taea’e aupuru te mau hōpoi’a i muri nei, ’ia au i te mau ta’ata ’e te mau ’utuāfare tei tu’uhia nā rātou :

• Tauturu ia rātou ’ia ha’apūai i tō rātou fa’aro’o i te Metua i te ao ra ’e ia Iesu Mesia.

• Tauturu ia rātou ’ia fa’aineine nō te rave ’e nō te ha’apa’o i te mau fafaura’a mo’a ’e te Atua, ’a fāri’i ai i te mau ’ōro’a. Mai te mea e hina’arohia, tauturu i te mau metua ’ia fa’aineine i tā rātou mau tamari’i nō te fāri’i i te mau ’ōro’a ’e nō te ha’apa’o i te mau fafaura’a.

• Hāro’aro’a i te mau hina’aro ’e hōro’a i te here, te aupurura’a ’e te tāvinira’a mai tō te Mesia te huru. Pūpū i te tauturu ’e te tāmāhanahanara’a i roto i te mau tau e tupu te mau hina’aro pae vārua ’e pae mātēria tino. ’Āparau i te mau hina’aro i roto i te mau uiuira’a aupurura’a ’e i te tahi atu taime.

• Tauturu ia rātou ’ia fa’arava’i ia rātou iho i te pae vārua ’e i te pae mātēria.

Nō te tahi atu ā ha’amāramaramara’a nō ni’a i te mau hōpoi’a a te mau tuahine ’e te mau taea’e aupuru, hi’o Iakobo 1:27, Mosia 23:18, ’e Te Ha’api’ira’a Tumu ’e te mau Fafaura’a 20:47, 59.

E ’imi te mau tuahine ’e te mau taea’e aupuru i te arata’ira’a a te Vārua nā roto i te pure. E paraparau ato’a rātou i te feiā tā rātou e tāvini nei nō te hāro’aro’a nāhea i te tauturu maita’i a’e ia rātou ’ia pāhono i tō rātou mau hina’aro.

E fa’aau te mau tuahine ’e te mau taea’e aupuru i tā rātou mau tauto’ora’a i ni’a i te mau hina’aro ’e te vaira’a o te feiā tā rātou e tāvini nei. Tē fa’aitoitohia nei ’ia fārerei tino roa i te ta’ata, mai te au iho ā ïa i te fāito pārurura’a, te āteara’a, ’e te peu. E nehenehe ato’a te mau tuahine ’e te mau taea’e aupuru e toro i te rima nā roto i te tahi atu mau rāve’a. ’Oia ho’i te niuniu, te niuniu video, te poro’i uira, te rata uira, te rata, te rāve’a ha’apararera’a sōtiare, te fārereira’a i te fare purera’a, ’e te mau ’ohipa tāvinira’a.

E mau hina’aro paha e’ita e nehenehe i te mau taea’e ’e te mau tuahine aupuru ’ia pāhono ’o rātou ana’e. I taua taime ra, e paraparau rātou i te hō’ē melo nō te peresidenira’a Sōtaiete Tauturu ’aore rā pupu peresibutero.

21.2

Te fa’anahora’a i te aupurura’a

I hōro’a te Fa’aora i tāna mau pipi i te mau fa’auera’a ’ohipa ta’a ’ē mau (hi’o Luka 10:1–17 ; hi’o ato’a 4.2.6 i roto i teie buka arata’i). Mai te au i teie hōho’a, e fāri’i tātou i te mau fa’auera’a ’ohipa nō te aupuru i te tahi mau ta’ata ’e te mau ’utuāfare ta’a ’ē. E ravera’a nahonaho i te aupurura’a ra, e noa’a ïa i te ta’ata tāta’itahi te rāve’a au ’ia putapū i te here o te Fa’aora.

21.2.1

Hōro’a i te mau fa’auera’a ’ohipa

E feruri te mau peresidenira’a pupu peresibutero ’e Sōtaiete Tauturu nā roto i te pure i te mau fa’auera’a ’ohipa nō te mau taea’e ’e te mau tuahine aupuru. E hi’o rātou i te mau pūai ’e te mau hina’aro o te mau melo. E feruri ato’a rātou i te mau hina’aro o te mau tamari’i i roto i te ’utuāfare. Tōna tanora’a, e fa’aue rātou i e piti taea’e ’aore rā e piti tuahine ’ei pupu. E tītau rātou i te ha’amanara’a a te ’episekōpo nō te mau pupu aupuru ’e te mau fa’auera’a ’ohipa.

’Ia rave ana’e rātou i teie mau fa’aotira’a, e feruri te feiā fa’atere i tei mau mea i muri nei :

• ’Ia tu’uhia te mau taea’e ’e te mau tuahine aupuru itoito maita’i nā te mau melo e hina’aro rahi a’e tō rātou. ’Oia ho’i, te mau melo ’āpī, te mau metua ’ōtahi, te mau vahine ’ivi, te mau tāne ’ivi ’e te mau melo paruparu.

• E nehenehe te feiā ’āpī e tāvini ’ei hoa nō te feiā pa’ari mai te au i te mau arata’ira’a i roto i te 21.2.2.

• E nehenehe te tāne ’e tāna vahine fa’aipoipo e fa’auehia ’ia aupuru ’āmui i te hō’ē ta’ata ’aore rā te hō’ē ’utuāfare.

• E aupuru te mau peresidenira’a titi ’e te mau ’episekōpora’a i te mau melo ato’a o te titi ’aore rā, o te pāroita. Nō reira, i te rahira’a o te taime, ’aita rātou e tu’uhia ’ei taea’e aupuru. E fa’aoti te peresideni titi ē, e tu’u-ato’a-hia ānei te mau melo ’āpo’ora’a teitei ’e te mau pātereareha i ni’a i te tōro’a.

’Ia oti te ha’amanara’a a te ’episekōpo, e hōro’a te hō’ē melo nō te peresidenira’a pupu peresibutero i te fa’auera’a ’ohipa i te mau taea’e aupuru, ’e tae noa atu i te feiā ’āpī tamāroa. E hōro’a te hō’ē melo nō te peresidenira’a Sōtaiete Tauturu i te fa’auera’a ’ohipa i te mau tuahine aupuru, ’e tae noa atu i te feiā ’āpī tamāhine.

E paraparau teie feiā fa’atere i te mau taea’e ’aore rā i te mau tuahine aupuru nō ni’a i te mau pūai, te mau hina’aro ’e te mau fifi a te feiā tā rātou e aupuru atu. E fa’aitoito te feiā fa’atere i te mau taea’e ’aore rā, te mau tuahine aupuru ’ia māramarama i te mau hina’aro o te feiā tei tu’uhia nā rātou, ’ei reira e ’imi ai i te fa’aurura’a e nāhea i te tāvini maita’i a’e.

’Aita te mau taea’e ’e te mau tuahine aupuru e pi’ihia, e pāturuhia ’e e fa’ata’ahia. Tā rātou tāvinira’a, e tuha’a ïa nō te fafaura’a tā rātou i rave i te bāpetizora’a (hi’o Mosia 18:8–11).

21.2.2

Te mau fa’auera’a aupurura’a nā te feiā ’āpī

Noa atu ā ’aita rātou i fāri’i i te tahi fa’auera’a aupurura’a, e aupuru te feiā ’āpī ia vetahi ’ē nā roto i te tāvinira’a ia rātou mai te Mesia te huru. E nehenehe te tāvinira’a a te feiā ’āpī ’ei tuahine ’aore rā ’ei taea’e aupuru, e riro ’ei tuha’a faufa’a rahi nō te fa’aotira’a i te ’ohipa nō te fa’aorara’a ’e te fa’ateiteira’a.

E nehenehe te hō’ē taure’are’a tamāhine e tāvini ’ei hoa aupuru nō te hō’ē tuahine nō te Sōtaiete Tauturu, mai te mea ’ua hina’aro terā tamāhine ’e e ti’a iāna ’ia tāvini. E nehenehe ’oia e ha’amata i te tāvini ’ia tae’ahia tōna 14 matahiti. E paraparau te peresidenira’a Sōtaiete Tauturu i terā tamāhine ’e tōna nā metua ’e te peresidenira’a Feiā ’āpī tamāhine, ’a feruri ai i te mau fa’auera’a aupurura’a.

Pinepine ē, e ha’amaita’ira’a nō te hō’ē tuahine ’ia aupuru mai te hō’ē tamāhine ’āpī iāna. E nehenehe ato’a te reira e riro ’ei ha’amaita’ira’a nō te tamāhine ’āpī.

E tāvini te hō’ē tamāroa ’ei hoa aupuru nō te hō’ē taea’e nō te Autahu’ara’a a Melehizedeka, ’ia fa’atōro’ahia ’oia i te tōro’a ha’api’i ’aore rā tahu’a. Nā te ’episekōpo e fa’aoti ē, e mea ti’a mā ānei terā tamāroa, ’e ’ua fa’aineine ānei ’oia nō te fa’atōro’ara’a. (Hi’o 10.1.3.2.) E paraparau te peresidenira’a pupu peresibutero i terā tamāroa ’e tōna nā metua ’e te ’episekōpora’a, ’a feruri ai i te mau fa’auera’a aupurura’a.

I te tahi taime, e nehenehe te feiā ’āpī e tu’uhia ’ei hoa toru nō te pupu aupuru. E nehenehe te feiā fa’atere e fa’aue i te feiā ’āpī ’ia tauturu i te tahi pae, ’aore rā i te tā’āto’ara’a o te mau ta’ata ’e o te mau ’utuāfare tei tu’uhia nā te pupu aupuru.

’Aita tā te feiā ’āpī e taea’e ’aore rā e tuahine aupuru. E fāri’i rātou i te aupurura’a nā roto mai i te mau taea’e aupuru o tō rātou ’utuāfare. E aupuru ato’a tō rātou peresidenira’a piha tamāhine ’aore rā pupu autahu’ara’a ’e te feiā fa’atere pa’ari, ia rātou. Mai te mea e ’ere tō rātou nā metua i te melo nō te ’Ēkālesia, ’e ’aita e pāto’i nei i te fa’anahora’a aupurura’a, e nehenehe te peresidenira’a pupu peresibutero e fa’aue ē, e nā taea’e aupuru nō terā ’utuāfare. Mai te reira ato’a, e nehenehe te peresidenira’a Sōtaiete Tauturu e fa’aue ē, e nā tuahine aupuru nō te metua vahine.

Te arata’ira’a a te ’Ēkālesia e fa’ahepo ra e piti ta’ata pa’ari pāpū i pīha’i iho i te feiā ’āpī, e ’ere ïa nō te mau hoa aupurura’a. Terā rā, e fa’a’ohipa te feiā fa’atere i te pa’ari ’e e ’imi rātou i te fa’aurura’a ’ia fa’aue ana’e rātou i te feiā ’āpī ’ei hoa nō te feiā pa’ari. E tītau ato’a rātou i te arata’ira’a a te ’episekōpo. ’Ia tu’u-ana’e-hia te hō’ē taure’are’a ’ei hoa nō te hō’ē ta’ata e ’ere i tōna metua, e ha’apāpū te feiā fa’atere ē, ’aita te mau metua e pāto’i i terā fa’auera’a ’ohipa.

E ’ape te mau hoa aupurura’a ta’ata pa’ari i te mau ’ohipa e fa’atupu i te mana’o huru ’ē. E ha’apa’o maita’i rātou i te mau taime ’o rāua to’opiti ana’e. E tauturu rātou i te feiā ’āpī, ’ia ataata ’ore ’e te ho’ona tā rātou ’ohipa aupurura’a.

21.2.3

Te mau misiōnare rave tāmau

Mai te mea e fāri’i te peresideni misiōni, e nehenehe te mau misiōnare rave tāmau e tauturu i te aupurura’a. E nehenehe te feiā fa’atere nō te pāroita e tītau i tāna parau fa’ati’a nā roto i te peresideni titi. I te rahira’a taime, e fa’auehia te mau misiōnare rave tāmau ’ia aupuru i te mau melo ’āpī, i te mau ’utuāfare tuha’a melo ’e i te mau melo paruparu.

21.3

Mau uiuira’a aupurura’a

’Ua rave te Fa’aora i te hō’ē uiuira’a ’ōhie ’e te hōhonu ia Petero ra, nō ni’a i te fa’a’amura’a i tāna mau māmoe (hi’o Ioane 21:15–17). E nehenehe ato’a te mau uiuira’a aupurura’a e riro mai te reira te huru. E noa’a ato’a i te feiā fa’atere ’ia fa’a’ite i te hō’ē hi’ora’a nō te aupurura’a.

E uiui te peresideni pupu peresibutero ’e tōna nā tauturu i te mau taea’e aupuru. E uiui te peresideni Sōtaiete Tauturu ’e tōna nā tauturu i te mau tuahine aupuru. E nehenehe te hō’ē tāne ’e tāna vahine fa’aipoipo e aupuru ’āmui, e fārerei i te feiā fa’atere pupu peresibutero ’aore rā i te feiā fa’atere Sōtaiete Tauturu, ’aore rā to’opiti.

E ravehia teie mau uiuira’a hō’ē a’e taime i te toru ’āva’e tāta’itahi. E nehenehe te reira e fa’atupuhia i te mau huru taime ato’a i roto i nā toru ’āva’e. Te mea au a’e, e fārerei tino i nā ta’ata o te pupu, nō te mau uiuira’a. E rave-ato’a-hia te feiā ’āpī e fa’auera’a aupurura’a tā rātou, mai te mea e nehenehe.

’Aita e tītauhia te mau uiuira’a aupurura’a roroa roa nō te manuia. Te fā, ’oia ho’i :

• Paraparau nō ni’a i te mau pūai, te mau hina’aro, ’e te mau fifi o te mau ta’ata ’e te mau ’utuāfare tei tu’uhia nā rātou.

• ’Āparau i te mau rāve’a nō te tauturu i te mau ta’ata ’ia fa’aineine nō te fāri’i i te mau ’ōro’a mai te mea e tītauhia.

• Feruri e nāhea te pupu peresibutero, te Sōtaiete Tauturu, te ’āpo’ora’a pāroita ’e vetahi ’ē e nehenehe ai e tauturu.

• Ha’api’i ’e fa’aitoito i te mau taea’e ’e te mau tuahine aupuru.

Mai te hō’ē uiuira’a i te tahi, e paraparau te mau taea’e ’e te mau tuahine aupuru i te feiā fa’atere mai te mea e hina’arohia. E fa’a’ite ’āfaro rātou i te mau parau ’ōmo’e i te ’episekōpo.

E fa’a’ohipa te feiā fa’atere i te Rāve’a tauturu a te ti’a fa’atere ’e te pāpa’i parau [DDG] nō tā rātou parau fa’a’ite nō te mau uiuira’a aupurura’a.

21.4

Fa’aau i te mau tauto’ora’a aupurura’a

E amo ’āpīpiti te Sōtaiete Tauturu ’e te pupu peresibutero i te ’ohipa aupurura’a. E rave rātou i teie ’ohipa ma te tāhō’ē.

E ruru ’āmui te mau peresidenira’a Sōtaiete Tauturu ’e te mau peresidenira’a pupu peresibutero hō’ē a’e taime i te toru ’āva’e. E hi’o rātou i te mea tā rātou i ’apo mai i roto i te mau uiuira’a aupurura’a (hi’o 21.3). E fa’aau ato’a rātou i te mau fa’auera’a aupurura’a. Tei nā peresideni e piti te hōpoi’a nō te fa’anahora’a ’e nō te fa’aterera’a i te rurura’a.

I roto i te mau ’āmuira’a e mea iti te mau melo itoito, e nehenehe te mau peresidenira’a Sōtaiete Tauturu ’e pupu peresibutero e fa’aoti ’eiaha e tu’u to’opiti, te tuahine aupuru ’e te taea’e aupuru, nō te tahi o te mau melo. E rave ’āmui te feiā fa’atere i te reira fa’aotira’a ’e e tītau rātou i te ha’amanara’a a te ’episekōpo. Mai te mea e tu’uhia te tuahine aupuru nā te hō’ē tuahine, ’aita rā e taea’e aupuru, e hi’o maita’i te feiā fa’atere ē, e ta’ata tāna e nehenehe e ani i te hō’ē ha’amaita’ira’a autahu’ara’a.

E ruru ’āmui te mau peresideni Sōtaiete Tauturu ’e pupu peresibutero i te ’episekōpo, hō’ē a’e taime i te toru ’āva’e. E ’āparau rātou i te mau hina’aro o te mau melo o te pāroita. E paraparau ato’a rātou i te mau tauira’a e nehenehe e rave i roto i te mau fa’auera’a aupurura’a.

Mai te mea e tītauhia, e paraparau te mau peresideni Sōtaiete Tauturu ’e pupu peresibutero i te ’āpo’ora’a pāroita, i te tahi mau parau tei fa’a’itehia mai e te mau tuahine ’e te mau taea’e aupuru. ’Ia nā reira rātou, e fa’atura rātou i te mau tītaura’a a te mau melo nō te ’ōmo’e. Mai tei fa’aauhia e te ’episekōpo, e rave te ’āpo’ora’a pāroita i te mau fa’anahora’a nō te tāvini ’e nō te ha’amaita’i i te mau melo o te pāroita. E paraparau ato’a te ’āpo’ora’a feiā ’āpī pāroita nō ni’a i te aupurura’a (hi’o 29.2.6).