20.

Te mau ’ātivite

20.1

Te mau fā

E ’āmui mai te mau ’ātivite a te ’Ēkālesia i te mau melo o te ’Ēkālesia ’e ia vetahi ’ē mai te « hō’ē ato’a rā ’oire e te feiā mo’a » (Ephesia 2:19). Teie i muri nei te mau ’ōpuara’a nō te mau ’ātivite :

• Patu i te fa’aro’o ia Iesu Mesia.

• Hōro’a i te ’oa’oa ’e fa’aitoito i te tāhō’ēra’a.

• Fa’afāna’o i te mau rāve’a nō te tupura’a ta’ata hō’ē.

• Ha’apūai i te ta’ata hō’ē ’e te ’utuāfare.

• Tauturu i te mau melo ’ia ’āmui i roto i te ’ohipa nō te fa’aorara’a ’e te fa’ateiteira’a (hi’o 1.2).

Teie te tahi mau hi’ora’a nō te mau ’ātivite a te ’Ēkālesia :

• Te ’ohipa tāvinira’a ’o tē ha’amaita’i ia vetahi ’ē ’e ’o tē patu i te tā’amura’a i roto i te huira’atira.

• Te ’ohipa misiōnare, te ’ohipa hiero, ’e te ’ohipa ’ā’amu ’utuāfare.

• Te mau rāve’a nō te fa’ananea i te ’aravihi nō te fa’arava’ira’a iāna iho ’e nō te fa’aterera’a.

• Te ’ite ha’api’ira’a ’e te fa’aineinera’a nō te tōro’a ’ohipa.

• Te mau ’ātivite nā rāpae.

• Te mau rāve’a nō te fa’arahi i te mau tārēni ’e te māuruuru nō te anoihi ta’ere.

• Te ’ohipa tū’aro ’e te fa’a’eta’etara’a tino.

• Te fa’ahanahanara’a i te mau ’ōro’a ta’a ’ē, mai te mau mahana fa’afa’aeara’a ’aore rā te mau ’ohipa ’ā’amu nō te ’Ēkālesia ’aore rā nō te fenua iho.

Mai tei fa’a’ohipahia i roto i teie buka arata’i, te parau ’ātivite a te ’Ēkālesia e ’ātivite ïa tei pāturuhia e te hō’ē ’āmuira’a, te hō’ē pupu autahu’ara’a, ’aore rā te tahi ’āvirira’a a te ’Ēkālesia.

20.2

Fa’anaho i te mau ’ātivite

Hou ’a fa’anaho ai i te hō’ē ’ātivite, e feruri te feiā fa’atere i te mau hina’aro pae vārua ’e pae mātēria o te mau melo. E ’imi te feiā fa’atere i te arata’ira’a a te Vārua ’ia fa’aoti ana’e rātou e aha te huru ’ātivite e tauturu i te pāhono i te reira mau hina’aro.

20.2.1

Hōpoi’a nō te fa’anahora’a i te mau ’ātivite

Nō te mau ha’amāramaramara’a nō ni’a i te fa’anahora’a i te mau ’ātivite titi ’e te mau ’ātivite titi rau, hi’o 20.3.

E nehenehe e fa’anaho i te mau ’ātivite pāroita mai teie i muri nei, mai te au i te mau hina’aro i reira :

• E nehenehe te ’āpo’ora’a pāroita e hi’o i te fa’anahora’a o te reira.

• E nehenehe te ’āpo’ora’a pāroita e fa’aue i te tahi mau ’āvirira’a ta’a ’ē ’ia tauturu i te fa’anahora’a i te hō’ē ’ātivite ’aore rā hau atu.

• Mai te mea e hina’arohia ’e mai te mea e nava’i te mau melo, e nehenehe te ’episekōpora’a e fa’anaho i te hō’ē tōmite ’ātivite nā te pāroita. E nehenehe te feiā ’āpī e pi’ihia ’ei melo nō te tōmite. E rave teie tōmite i te ’ohipa i raro a’e i te fa’aterera’a a te ’āpo’ora’a pāroita. E fa’aue te ’āpo’ora’a pāroita i te hō’ē o tōna mau melo ’ia fārerei tāmau i te tōmite ’ātivite.

Nō te mau ha’amāramaramara’a nō ni’a i te fa’anahora’a i te mau ’ātivite a te feiā ’āpī pāroita, hi’o 10.2.1.3 ’e 11.2.1.3.

20.2.2

Ani i te mau ta’ata ato’a ’ia ’āmui mai

Te feiā e fa’anaho i te mau ’ātivite, e ti’a ia rātou ’ia toro i te rima i te mau ta’ata ato’a, te mau melo ’āpī iho ā rā, te mau melo paruparu, te feiā ’āpī, te feiā pa’ari ’ōtahi, te feiā huma, ’e te mau ta’ata nō te tahi atu mau fa’aro’o. ’Ia vai ara te feiā fa’anaho i te mau fifi pae tino o te feiā e haere mai. ’Ia vai ara ato’a rātou i te ta’a-’ē-ra’a i roto i te ta’ere ’e te reo.

Te feiā e fa’anaho i te mau ’ātivite, e ’imi rātou i te mau rāve’a ’ia fa’aō mai i te feiā e ’āmui mai. ’Ei hi’ora’a, e nehenehe rātou e ani i te mau melo ’e ia vetahi ’ē ’ia fa’a’ohipa i tō rātou ’ite ’e tā rātou mau tārēni i roto i te ’ātivite.

Noa atu ē e riro ē e ha’amaita’ira’a te ha’aputuputura’a i roto i te mau ’ātivite, ’eiaha rā te mau melo e mana’o ē, e mea tītauhia ’ia tae mai i te mau ’ātivite ato’a. ’Eiaha te mau ’ātivite e tu’u i te hōpoi’a faufa’a ’ore i ni’a i te feiā fa’atere ’e te mau melo.

20.2.3

Te fa’aturera’a

’Ia fa’ateitei ’e ’ia tūra’i ho’i te mau ’ātivite a te ’Ēkālesia i te parau nō te « mea maita’i, ’e te fa’ahiahia, ’e te ro’o maita’i, ’e tē poupouhia ra » (Hīro’a fa’aro’o 1:13) e ti’a ai. E’ita te mau mea e ’ore e tū’ati i te mau ha’api’ira’a a te ’Ēkālesia e tu’uhia i roto i te mau ’ātivite. E’ita e nehenehe e tu’u i roto i te mau ’ātivite te rāve’a ha’apararera’a ti’a ’ore ’aore rā, te tahi atu ’ohipa fa’a’āreareara’a ti’a ’ore, ’e e hi’o-atu-ra-hia te reira ’ei ’ohipa fāri’ihia.

’Aita te mau mea e pāto’i nei i te Parau pa’ari e fa’ati’ahia i roto i te mau ’ātivite a te ’Ēkālesia ’aore rā i roto i te mau fare a te ’Ēkālesia. E’ita e nehenehe i te mau ta’ata pa’a’ina, pa’a’ina i te ’ava ’aore rā i te rā’au ta’ero, ’ia ’āmui mai i te mau ’ātivite a te ’Ēkālesia. Mai te mea e tupu te reira huru ’ohipa, e pāhono te feiā fa’atere ma te aumihi.

20.2.4

Te au māite ’e te raura’a

E hi’o te feiā fa’atere i te au māite o te mau ’ātivite, ma te tu’u ato’a i te ’ohipa tāvinira’a, te anoihi ta’ere, ’e te mau ’ātivite i te pae tino (hi’o 20.1). ’Ia fāna’o te mau melo i te ’āmui mai i roto i te mau ’ātivite e auhia e rātou. ’Ia pāturu ato’a rātou ia vetahi ’ē i roto i tō rātou mau mea e auhia e rātou.

E hōro’a mai te mau tuha’a i muri nei i te hi’ora’a nō te mau ’ātivite maita’i.

20.2.4.1

’Ohipa tāvinira’a

E fa’afāna’o te mau ’ohipa tāvinira’a i te mau rāve’a nō te fa’a’ite i te here ia vetahi ’ē, nō te fāri’i i te ’oa’oa nō te tauturura’a ia rātou, ’e nō te ha’amaita’i i te orara’a huira’atira.

Tei roto i teie mau ’ātivite te fārereira’a i te mau ta’ata ma’i ’aore rā tei vai ’ōtahi noa, te fa’a’una’unara’a i te mau fare ’e te mau ’āua o te ’Ēkālesia, ’e te ’āmuira’a i roto i te mau ’ōpuara’a nō te huira’atira. I te vahi tē vai ra, e fa’a’ite mai te JustServe.org i te mau rāve’a tāvinira’a i te huira’atira.

’Ia ha’apa’o te mau ’ātivite ’ohipa tāvinira’a i te mau arata’ira’a pārurura’a (hi’o 20.7.6.1).

20.2.4.2

Te anoihi ta’ere

E fa’afāna’o te anoihi ta’ere i te mau rāve’a i te mau melo nō te fa’ananea ’e nō te fa’a’ite i tō rātou mau tārēni. E fa’ananea ato’a teie mau ’ātivite i te mana’o ’āpī, te ti’aturi, ’e te ravera’a ’āmui. ’O te mau ’ohipa ïa mai i te mau hōho’a pēni ’e te mau ’ohipa rima’i, te mau fa’a’ite’itera’a tārēni, ’aore rā te ’ori, te pehe ’e te ha’utira’a ta’ata ora. ’O te mau ’ohipa ato’a mai te fa’ahanahanara’a ta’ere, te mau ’ōro’a mahana fa’afa’aeara’a, ’aore rā te ’ā’amu o te ’Ēkālesia i reira iho ’e ’aore rā te ’ā’amu rahi o te ’Ēkālesia.

20.2.4.3

Te ’ohipa fa’a’ana’anatae, te ea, te fa’a’eta’etara’a tino ’e te tū’aro

E fa’aitoitohia te mau melo, ’ei ta’ata hō’ē, ’ei ’utuāfare, ’e ’ei pupu ’Ēkālesia, ’ia ’āmui i roto i te mau ’ātivite ’o tē tauturu i te ea maita’i ’e te tino maita’i. E nehenehe te tahi mau ’ohipa fa’a’ana’anatae a te ’Ēkālesia e fa’anahohia ’ia ti’a i te mau melo o te ’utuāfare ’ia ’āmui pauroa mai.

Nō te mau ha’amāramaramara’a nō ni’a i te mau tū’aro, hi’o 20.5.9.

20.2.5

Tārena i te mau ’ātivite

’Ia fa’anaho-ātea-maita’i-hia te mau ’ātivite a te ’Ēkālesia, mai te mea e nehenehe. E fa’aara noa te feiā fa’atere i te mau metua nō te mau ’ātivite e ravehia nō te mau tamari’i ’e te feiā ’āpī.

E fa’atupuhia te mau ’ātivite i te hō’ē hora tano. ’Eiaha te reira ’ia maoro roa i te fa’aoti, ’ia nehenehe i te feiā i ’āmui mai ’ia ho’i i te fare ma te maita’i.

Mai te mea e fa’atupuhia te hō’ē ’ātivite i roto i te hō’ē fare purera’a ’aore rā i te hō’ē vāhi patuhia e te ’Ēkālesia, ’ia tāpa’ohia te i’oa nā mua a’e, ’eiaha te umeumera’a tārenara’a ’ia tupu.

E fa’ahereherehia te mau pō mōnirē nō te mau ’ātivite ’utuāfare (hi’o 20.5.3).

20.2.6

Te ’aufaura’a i te mau ’ātivite

’Ia ’ōhie ’e te māmā ’e te moni ’ore roa ato’a te rahira’a o te mau ’ātivite e ti’a ai. Nō te mau ha’amāu’ara’a ato’a, e mea tītauhia ’ia fa’ati’ahia nā mua a’e e te ’episekōpora’a ’aore rā te peresidenira’a titi.

’Ohipa mātauhia, ’eiaha te mau melo e ’aufau nō te rave i te mau ’ātivite. Nō te mau ture ’e te mau arata’ira’a nō ni’a i te ’aufaura’a i te mau ’ātivite, hi’o 20.6.

20.3

Te mau ’ātivite titi, titi rau ’e a te ārea

20.3.1

Te mau arata’ira’a rahi

E ravehia te rahira’a o te mau ’ātivite a te ’Ēkālesia i roto i te pāroita. Tē fa’aitoito-ato’a-hia nei te feiā fa’atere ’ia fa’atupu i te mau ’ātivite titi ’e titi rau, i terā ’e terā taime, mai te peu e tauturu te reira i te fa’atupura’a i te mau ’ōpuara’a i roto i te 20.1.

E mea maita’i iho ā rā te mau ’ātivite titi ’e titi rau nō te feiā ’āpī, nō te mau melo ’ōtahi, ’e nō te mau vahine, i roto iho ā rā i te mau vāhi e mea iti roa te mau melo. E nehenehe te mau ’ātivite titi ’e titi rau tei fa’anaho-maita’i-hia e fa’a’ā’ano atu ā i te auhoara’a. E hi’o te feiā fa’atere e aha te mau hina’aro o te feiā tā rātou e tāvini nei ’e e feruri rātou ē, e tauturu ānei teie mau ’ātivite i te pāhono i te reira mau hina’aro. I muri iho e fa’atae teie nau feiā fa’atere i te mau ’ātivite i te peresidenira’a titi.

20.3.2

Mau ’ātivite a te titi

Nā te mau peresidenira’a Feiā ’Āpī Tamāroa, Feiā ’Āpī Tamāhine, Sōtaiete Tauturu, ’e Paraimere e ha’amata i te ’ohipa fa’anahora’a i te mau ’ātivite titi nō tā rātou mau ’āvirira’a.

Nā te tōmite feiā ’āpī pa’ari ’ōtahi nō te titi e ha’amata i te ’ohipa fa’anahora’a i te mau ’ātivite titi nō te feiā ’āpī pa’ari ’ōtahi.

Mai te mea ’ua fa’anahohia te hō’ē tōmite feiā pa’ari ’ōtahi nō te titi, nā te mau melo o te tōmite e ha’amata i te ’ohipa fa’anahora’a i te mau ’ātivite nō te feiā pa’ari ’ōtahi.

Mai te mea ’ua fa’anahohia te hō’ē tōmite ’ātivite nō te titi, e nehenehe rātou e fa’anaho i te mau ’ātivite titi ’e e riro ’ei tauturu nō te mau ’āvirira’a o te titi i roto i te fa’anahora’a i tā rātou mau ’ātivite mai tei fa’ata’ahia i roto i te 20.3.2.1.

E tītauhia te parau fa’ati’a a te peresidenira’a titi nō te mau ’ātivite ato’a o te titi. E fa’aauhia te reira i roto i te mau rurura’a ’āpo’ora’a titi.

E fa’aara ātea te feiā fa’atere o te titi i te feiā fa’atere o te pāroita nō te mau ’ātivite a te titi. E ha’apāpū ato’a rātou ē, e fa’ananea te mau ’ātivite titi i te mau ’ātivite a te pāroita, ’eiaha rā ’ia riro mai ’ei umeumera’a nā rātou.

20.3.2.1

Tōmite ’ātivite nō te titi

E nehenehe te peresidenira’a titi e fa’anaho i te hō’ē tōmite ’ātivite nō te titi nō te tauturu i te ’āpo’ora’a titi ’ia fa’anaho i te mau ’ātivite a te titi. Te tōmite ’ātivite nō te titi, ’o te hō’ē ïa peresideni (hō’ē melo nō te ’āpo’ora’a teitei) ’e te mau melo nō te tōmite (hi’o 20.3.2.2 ’e 20.3.2.3). E nehenehe ato’a te peresidenira’a titi e ani i te tahi atu mau melo ’ia tauturu nō te fa’anaho i te hō’ē ’ātivite, ’aore rā hau atu.

20.3.2.2

Peresideni nō te tōmite ’ātivite nō te titi

Mai te mea e fa’anaho te peresidenira’a titi i te hō’ē tōmite ’ātivite nō te titi, e fa’aue rātou i te hō’ē melo o te ’āpo’ora’a teitei ’ia riro ’ei peresideni nō te tōmite. Teie tāna mau hōpoi’a :

• Tāpe’a i te hō’ē tārena nō te mau ’ātivite titi.

• Arata’i i te mau melo o te tōmite i roto i te fa’aineinera’a i te mau ’ātivite a te titi.

• Vauvau i te hō’ē tāpura faufa’a nō te mau ’ātivite a te titi i te peresidenira’a titi hou te ha’amatara’a o te matahiti tāta’itahi. ’Aita te mau ’ātivite a te mau ’āvirira’a nō te titi e fa’aōhia i roto i teie tāpura faufa’a.

• Tāvini ’ei tauturu nō te feiā fa’atere ’āvirira’a nō te titi, ’ia fa’anaho rātou i te mau ’ātivite.

20.3.2.3

Te mau melo nō te tōmite ’ātivite nō te titi

E nehenehe te hō’ē melo nō te peresidenira’a titi ’aore rā, te hō’ē melo ’āpo’ora’a teitei i fa’auehia, e pi’i i te mau melo ’ia tāvini i roto i te tōmite ’ātivite nō te titi. E tāvini rātou i raro a’e i te fa’aterera’a a te peresideni o te tōmite. E tauturu te mau melo o te tōmite i te fa’anahora’a ’e i te fa’atupura’a i te mau ’ātivite i roto i te titi.

20.3.3

Te mau ’ātivite titi rau ’e a te ārea

I roto i te tahi mau vāhi e mea iti te feiā ’āpī, e ti’a i te feiā fa’atere ’ia fa’atupu i te tahi taime i te mau ’ātivite titi rau nā te feiā ’āpī, ’ia fāna’o te feiā ’āpī i te ha’amātau i te ta’ata o te hō’ē pupu rahi a’e. E nehenehe ato’a te mau ’ātivite ārea nō te feiā ’āpī e fa’atupuhia i terā taime ’e terā taime.

’Ia fa’atupu-pinepine-hia te mau ’ātivite titi rau nō te feiā ’āpī pa’ari ’ōtahi, ’e ’eiaha te putuputura’a e tītau rahi i te taime ’e te ha’amāu’ara’a. E nehenehe ato’a te mau ’ātivite ārea nō te feiā ’āpī pa’ari ’ōtahi e fa’atupuhia i terā taime ’e terā taime.

Nō te mau ha’amāramaramara’a nō ni’a i te mau ’ātivite titi rau nō te mau melo ’ōtahi, hi’o 14.2.1.3.

’Ia vai ’ōhie ’e te rau te huru te mau ’ātivite titi rau.

Mai te mea e mana’o te mau peresideni titi ē, e ha’amaita’i te hō’ē ’ātivite titi rau i te mau melo nō tā rātou mau titi, e nehenehe rātou e ani i te parau fa’ati’a a te peresidenira’a ārea. Hou rātou ’a vauvau ai i te hō’ē ’ātivite titi rau, e fa’aoti te mau peresideni titi ē, ’o te rāve’a maita’i roa ānei nō te pāhono i te mau hina’aro tei ’itehia e rātou. E hi’o te mau peresideni titi i te moni, te taime, ’e te rāterera’a e tītauhia nō te ’ātivite. E feruri ato’a rātou i te pārurura’a (hi’o 20.7.6).

E nehenehe te mau rurura’a nō te fa’aau i te fa’anahora’a o te mau ’ātivite titi rau e ravehia nā mua a’e ’e ’aore rā, i muri a’e i te mau rurura’a ’āpo’ora’a ārea ’e te mau rurura’a ’āpo’ora’a fa’aaura’a (hi’o 5.2.3 ’e 5.2.4). Mai te mea e hina’arohia, e nehenehe e ani i te tahi atu mau ti’a fa’atere—mai te mau peresideni Sōtaiete Tauturu, Feiā ’Āpī Tamāroa, ’e Feiā ’Āpī Tamāhine—’ia haere mai.

E nehenehe te peresidenira’a ārea e fa’aue i te mau peresideni titi ’aore rā i te mau Hitu ’Ahuru ārea ’ia fa’atere i te mau tōmite ’o tē fa’anaho ’e ’o tē rave i te mau ’ātivite titi rau ’aore rā a te ārea. E nehenehe te mau peresidenira’a titi e pi’i i te mau melo o tā rātou mau titi ’ia tāvini i roto i teie mau tōmite.

E ravehia te moni nō te ’aufau i te mau ’ātivite titi rau, i roto i te tāpura faufa’a a te mau titi i ’āmui mai. E ravehia te moni nō te ’aufau i te mau ’ātivite ārea, i roto i te tāpura faufa’a a te ārea ’aore ra a te pū fa’atere a te ’Ēkālesia, mai te mea e fa’ati’ahia.

20.3.4

Ha’apa’o i te mau ture nō te rāterera’a a te ’Ēkālesia

E mea ti’a i te mau ’ātivite titi, titi rau ’e a te ārea ’ia ha’apa’o i te mau ture nō te rāterera’a a te ’Ēkālesia (hi’o 20.7.7). E ha’apa’o te mau ’āmuira’a JSF i te mau ture nō te rāterera’a a te ’Ēkālesia maori rā e hōro’a te hō’ē fa’atere nō te JSF i te tahi atu mau arata’ira’a.

20.4

’Āmuira’a feiā ’āpī

Ha’amata i te ’āva’e Tēnuare o te matahiti e ra’ehia tō rātou 14 matahiti, e tītau-manihini-hia te feiā ’āpī tamāroa ’e te feiā ’āpī tamāhine ’ia ’āmui mai i roto i te hō’ē ’āmuira’a feiā ’āpī. E fa’atupuhia te mau ’āmuira’a feiā ’āpī hō’ē taime i te matahiti tāta’itahi i roto i te pāroita ’aore rā te titi. E nehenehe ato’a te reira e fa’atupuhia nō te titi rau ’aore rā nō te ārea. I te matahiti e fa’auehia te feiā ’āpī ’ia haere i te ’āmuira’a JSF, ’eiaha te mau titi ’e te mau pāroita e fa’atupu i te mau ’āmuira’a feiā ’āpī.

Te mau fā nō te mau ’āmuira’a feiā ’āpī, ’o te tauturura’a ïa i te feiā ’āpī ’ia :

• Patu i te fa’aro’o ia Iesu Mesia.

• Ha’apūai i te ’itera’a pāpū.

• Fa’ahotu i te mau tārēni.

• Fa’ahoa i te hoa ’āpī.

• ’Ārearea e te feiā ’āpī hō’ē ā huru ti’aturira’a ’e fa’aturera’a.

E nehenehe ato’a te feiā ’āpī e ha’api’i i te ’aravihi nō te fa’aterera’a ’a tauturu ai rātou i te fa’anaho i te mau ’āmuira’a feiā ’āpī.

E fa’anahohia ’e e fa’aterehia te mau ’āmuira’a feiā ’āpī pāroita nā te ’āpo’ora’a feiā ’āpī pāroita, i raro a’e i te fa’aterera’a a te ’episekōpora’a (hi’o 29.2.6). E tītau te ’episekōpora’a i te parau fa’ati’a a te peresidenira’a titi nō te mau ’ōpuara’a nō te ’āmuira’a feiā ’āpī pāroita.

E fa’anahohia ’e e fa’atupuhia te mau ’āmuira’a feiā ’āpī titi e te tōmite fa’atere feiā ’āpī o te titi (hi’o 29.3.10). E ani-manihini-roa-hia te feiā ’āpī ’ia tauturu i te tōmite ’ia au i tei mara’a ia rātou.

E ’aufauhia te mau ’āmuira’a feiā ’āpī i ni’a i te tāpura faufa’a a te titi ’aore rā a te pāroita. ’Eiaha te mau melo e anihia ’ia ’aufau nō te mau ’āmuira’a feiā ’āpī (hi’o 20.6).

’Ia fa’anaho ana’e te feiā fa’atere ’e te feiā ’āpī i te hō’ē ’āmuira’a feiā ’āpī, e ha’apa’o rātou i te mau fa’aturera’a i roto i teie pene ’e te mau arata’ira’a i muri nei :

• Mā’iti i te hō’ē parau tumu nō te ’evanelia, mai te hō’ē ’īrava pāpa’ira’a mo’a, ’o tē fa’auru i te feiā ’āpī ’e ’o tē tauturu ia rātou ’ia hāro’aro’a i te mau tītaura’a o te ’āmuira’a. E nehenehe e fa’a’ohipa i te parau tai’o matahiti a te feiā ’āpī o te ’Ēkālesia ’ei parau tumu nō te ’āmuira’a. ’Ia ha’amana te ’episekōpora’a ’aore rā te peresidenira’a titi i te parau tumu.

• Fa’anaho i te mau ’ātivite e tū’ati i ni’a i te parau tumu.

• Fāri’i i te parau fa’ati’a a te ’episekōpora’a ’e ’aore rā a te peresidenira’a titi nō te mau ta’ata a’o ’e te mau ’ātivite ato’a. ’Ei melo nō te ’Ēkālesia ’o tē ha’api’i nā roto i te Vārua te feiā a’o. Hi’o 38.8.17 nō te tahi atu mau arata’ira’a nō ni’a i te feiā a’o.

• Mai te mea ’ua fa’anahohia te hō’ē ’ohipa nō te sābati, ’ia tano te reira nō te mahana sābati. E fa’ati’ahia te mau rurura’a ’itera’a pāpū, te mau ’āparaura’a ’e te ’episekōpora’a, ’aore rā te mau rurura’a mai te reira. Terā rā, ’eiaha te mau purera’a ’ōro’a e ravehia—’e e’ita te ’ōro’a mo’a e fa’aterehia—i rāpae i te mau fare purera’a o te pāroita ’aore rā te titi. ’Aita ana’e, e tītau-roa-hia ē ’ei ’ātivite nā te ’Ēkālesia ’e ’ua ha’amana te peresidenira’a ārea i te reira. ’Eiaha te mau pupu e rātere i te mahana sābati, nō te haere ’e nō te ho’i mai nā te ’āmuira’a feiā ’āpī.

• Ha’apāpū ē, e feiā pa’ari e ha’apa’o i te feiā ’āpī i te mau taime ato’a (hi’o 20.7.1).

• Ha’apa’o i te mau arata’ira’a pārurura’a ato’a i roto i te 20.7.6.

E anihia i te feiā fa’atere ta’ata pa’ari ’ia haere mai i te roara’a o te ’āmuira’a, mai te mea e haere ia rātou. ’O te mau melo ïa nō te ’episekōpora’a ’aore rā te peresidenira’a titi, te peresidenira’a Feiā ’Āpī Tamāhine pāroita ’aore rā titi, ’e te peresidenira’a Feiā ’Āpī Tamāroa. E nehenehe ato’a te mau tauturu ha’amāramarama nō te Feiā ’Āpī Tamāhine ’e te Feiā ’Āpī Tamāroa o te pāroita e tītau-manihini-ato’a-hia ’ia haere mai.

20.5

Te mau ture ’e te mau arata’ira’a nō te mā’itira’a ’e te fa’anahora’a i te mau ’ātivite

E ha’apāpū te feiā fa’atere ē, e ha’apa’ohia te mau ture ’e te mau arata’ira’a i muri nei nō te mā’itira’a ’e te fa’anahora’a i te mau ’ātivite a te ’Ēkālesia.

20.5.1

Te mau ’ātivite tapiho’ora’a ’aore rā poritita

’Aita te mau ’ātivite nō te tapiho’ora’a ’aore rā nō te ’ohipa poritita e fa’ati’ahia (hi’o 35.5.2).

20.5.2

Te mau ’orira’a ’e te pehe

I roto i te mau ’orira’a ato’a, ’ia tauturu te ’ahu, te fa’anehenehera’a, te mōrī, te huru ’ori, te mau parau, ’e te pehe i te fa’atupu i te hō’ē vāhi i reira te Vārua o te Fatu e nehenehe ai e parahi mai (hi’o i te buka iti Nō te pūai o te feiā ’āpī).

E fa’a’ohipa te feiā fa’atere i te Performance Contract [Parau fa’aau nō te ha’uti] ’ia tihepu ana’e rātou i te hō’ē pupu, hō’ē pupu ’upa’upa, ’aore rā i te hō’ē ta’ata ha’uti pehe uira [DJ]. E tauturu teie parau fa’aau i te ha’apāpū ē, e mea tano te arata’ira’a ’e te pehe nō te mau ’orira’a a te ’Ēkālesia. E rave te feiā fa’atere i te mau fa’aaura’a pāpū, ma te pāpa’i i te reira, nō te tītau i te feiā e ha’uti i te pehe ’ia ha’apa’o i te mau fa’aturera’a a te ’Ēkālesia i roto i te mau ’ātivite a te ’Ēkālesia.

20.5.3

Te mau pō monirē

Tē fa’aitoitohia nei te mau melo ’ia fa’atupu i te mau ’ātivite ’utuāfare i te mōnirē ’aore rā, i te tahi atu taime. ’Aita e fa’atupuhia te mau ’ātivite, te mau purera’a, ’aore rā, te mau purera’a bāpetizora’a i muri a’e i te hora 6 i te ahiahi i te mōnirē.

E ha’apāpū te feiā fa’atere ē, ’ua tāpirihia te mau fare purera’a a te ’Ēkālesia ’e te tahi atu mau vāhi i te mau pō mōnirē. ’Eiaha te mau tāmā’ara’a ’e te mau ’ātivite mai te reira e fa’atupuhia i roto i te mau fare a te ’Ēkālesia i te mau pō mōnirē.

Fa’anahora’a ta’a ’ē, e nehenehe te mau pāroita feiā ’āpī pa’ari ’ōtahi ’e te mau pāroita feiā pa’ari ’ōtahi e fa’atupu i te mau ’ātivite i te pō Monirē, i roto ato’a i te mau fare a te ’Ēkālesia. E nehenehe ato’a e fa’ati’a i te reira mai te peu e topa te pō matahiti ’āpī i te mōnirē (hi’o 20.5.4).

20.5.4

Te mau ’ātivite nō te pō matahiti ’āpī

Mai te mea e fa’anaho te hō’ē pāroita ’aore rā te hō’ē titi i te hō’ē ’ātivite nō te pō matahiti ’āpī, ’e mai te mea e topa te reira i te mahana mā’a, te sābati ’aore rā te mōnirē, e ha’apa’o te feiā fa’atere i te mau arata’ira’a i muri nei.

Mahana mā’a. E nehenehe te peresideni titi e tārena i te hō’ē sābati ’ē atu nō te mahana ha’apaera’a mā’a. E nehenehe te ’ātivite e ma’iri atu i te tu’ira’a pō. Terā rā, e’ita te reira e maoro roa i te fa’aoti, ’ia ti’a i te mau ta’ata ’ia haere i te purera’a i te sābati.

Sābati. E nehenehe e fa’anaho i te mau ’ātivite a te ’Ēkālesia nō te mahana mā’a 30 nō Tītema. E fa’a’ohipahia te mau arata’ira’a o te paratarāfa i nā mua atu. E nehenehe e fa’aitoito i te mau ’utuāfare ’ia fa’ahanahana i te pō matahiti ’āpī i tō rātou fare. ’Ia tano te mau ’ātivite nō te mahana sābati.

mōnirē. E nehenehe te peresideni titi ’aore rā te ’episekōpo e fa’ati’a i te fa’a’ohipara’a i te mau fare a te ’Ēkālesia i te pō mōnirē.

20.5.5

Te mau ’ātivite i te pō ē ao noa atu

E tītauhia te parau fa’ati’a a te mau metua ’aore rā a te ta’ata tīa’i nō te mau ’ātivite ato’a a te ’Ēkālesia i te pō ē ao noa atu, nō te feiā ’āpī (hi’o 20.7.4).

E mea tītauhia nō te mau ’ātivite ’āmui nā te feiā ’āpī tamāroa ’e te feiā ’āpī tamāhine, i te pō ē ao noa atu, ’ia fa’ati’ahia e te ’episekōpo ’e te peresideni titi. Mai te reira ato’a nō te mau ’ātivite nā te mau tāne ’e te mau vahine ’ōtahi o te ’Ēkālesia. ’Ia varavara te reira mau ’ātivite e ti’a ai. Te tahi hi’ora’a, ’o te mau ’āmuira’a feiā ’āpī ïa, te mau ’āmuira’a JSF, ’aore rā te mau tere hiero e tītau i te tere ātea roa.

E fa’ata’a ’ē i te vāhi ta’otora’a o te tāne ’e te vahine, nō te feiā haere ’ātivite ’e nō te feiā fa’atere ato’a ho’i. Terā rā, e nehenehe te hō’ē nā ta’ata fa’aipoipo e ta’oto i roto i te hō’ē ā piha ’aore rā fare ’ie. Te feiā ’āpī tāta’itahi tōna iho ro’i ’aore rā pūtē ta’oto.

I te rahira’a o te taime, e’ita te hō’ē taure’are’a e fa’aea i roto i te fare ’ie ’aore rā te piha o te hō’ē ta’ata pa’ari maori rā o tōna metua ’aore rā tōna tīa’i terā ta’ata pa’ari. E nehenehe e fa’ati’a i te reira mai te mea e piti a’e ta’ata pa’ari i roto i te fare ’ie ’aore rā i roto i te piha, hō’ē ā ’āpeni e te feiā ’āpī.

Mai te mea e fa’aea te feiā fa’atere pa’ari ’e te feiā ’āpī i roto i te tahi atu ā vāhi i te pō ē ao noa atu, mai te hō’ē fare na’ina’i, tītauhia e piti a’e ta’ata pa’ari i roto i te fare tāta’itahi, ’e e ti’a ia rātou ’ia riro ’ei hō’ē ā ’āpeni ē te feiā ’āpī.

I roto i te mau ’ātivite ato’a a te ’Ēkālesia e tupu i te pō ē ao noa atu, tītauhia e piti a’e feiā fa’atere ta’ata pa’ari.

Tītauhia te hō’ē fāito nūmera tano, nō te mau ta’ata pa’ari e mau nei i te autahu’ara’a, ’ia ti’a mai i te mau taime ato’a i roto i te mau ’ātivite i te pō ē ao noa atu, nō te tauturura’a ’e te pārurura’a. Nō te mau ’ātivite Feiā ’Āpī Tamāhine, e mea tītauhia i te mau taea’e tei mau i te autahu’ara’a ’ia fa’aea i roto i te hō’ē vāhi ’ē i tō te feiā ’āpī tamāhine.

E fa’a’ī te feiā fa’atere i te ’api parau Planification d’une manifestation [Fa’anaho i te hō’ē ’ohipa ’e te hō’ē ’ātivite], nō te mau ’ātivite ato’a i te pō ē ao noa atu.

’Aita e fa’ati’ahia te mau ’ātivite i te pō ē ao noa atu i roto i te mau fare purera’a ’e te mau ’āua fare purera’a a te ’Ēkālesia.

Nō te mau ha’amāramaramara’a hau atu, hi’o « FAQ – Que dois-je faire [E aha tē rave] ? » i ni’a ChurchofJesusChrist.org.

20.5.6

Te fa’ahōho’ara’a i te Atuara’a

’Eiaha e fa’ahōho’a i te Atua ’e i te Vārua Maita’i i roto i te mau purera’a, te mau ha’utira’a teata ta’ata ora, ’aore rā, te mau ta’urua hīmenera’a.

Mai te mea e fa’ahōho’ahia te Fa’aora, ’ia ravehia ïa te reira ma te tura rahi e te hanahana. ’O te mau tāne hi’ora’a tura ana’e tē ferurihia nō te reira tuha’a. ’Eiaha te ta’ata e fa’ahōho’a i te Fa’aora e hīmene ’aore rā e ’ori. ’Ia paraparau ana’e ’oia, e fa’a’ohipa noa ’oia i te mau fa’ahitira’a parau a te Fa’aora i roto i te mau pāpa’ira’a mo’a. I te hope’a o te ha’utira’a, e mea ti’a iāna ’ia taui ’oi’oi iāna i roto i tōna ’ahu mātau.

’Eiaha te mau tamari’i e fa’ahōho’a i te Fa’aora i roto i te mau ha’utira’a teata ta’ata ora maori rā, i roto noa i te ha’utira’a nō te Fānaura’a.

20.5.7

Te mau pure ’e te mau purera’a i roto i te mau ’ātivite

E ’īritihia te mau ’ātivite ato’a nā roto i te hō’ē pure, ’e mai te mea e tano, nō te fa’aoti ato’a. E nehenehe e rave i te hō’ē hīmene, te hō’ē mana’o pae vārua, ’aore rā te hō’ē a’ora’a a te hō’ē ti’a fa’atere ’aore rā te hō’ē ta’ata i ’āmui mai.

20.5.8

Te ha’apa’ora’a i te mahana sābati

’Aita te mau pūhapara’a a te ’Ēkālesia, te mau ’ohipa tū’aro, ’aore rā te mau ’ātivite ’āreareara’a e tārenahia i te sābati. Eiaha te mau pupu feiā ’āpī ’e vetahi ’ē ato’a e rātere i te mahana sābati, nō te haere ’e nō te ho’i mai nā te pūhapara’a ’aore rā nā te ’āmuira’a feiā ’āpī.

Fa’anahora’a ta’a ’ē, mai te peu e fifi rahi te pārurura’a ’aore rā te mau ha’amāu’ara’a nō te rātere mai, e nehenehe te tahi mau ’ātivite feiā ’āpī e tārenahia i muri noa iho i te mau purera’a i te sābati. E fa’ata’a-’ē’hia teie mau ’ātivite i te mau hora purera’a i te sābati. ’Ia ha’apa’o te reira i te vārua o te sābati. E tītauhia te parau fa’ati’a a te ’episekōpo ’e a te peresideni titi.

20.5.9

Te tū’aro

E fa’afāna’o te mau ’ātivite tū’aro a te ’Ēkālesia i te rāve’a nō te fa’a’eta’etara’a tino ’e te fa’ahoara’a. E fa’aitoito te reira i te ’āpitira’a i terā ’ohipa, te vārua tū’aro ’e te fa’arahira’a i te ’aravihi. ’Ia tupu te tata’ura’a i roto i te ’ātivite, ’ia hi’o-roa-hia ē ’aita e tātama’ira’a. ’Ia fāna’o maita’i te tā’āto’ara’a i roto i te hō’ē pupu ’ia ha’uti, noa atu te fāito ’aravihi.

Nā te peresidenira’a titi e hi’o i te mau ’ātivite tū’aro e ravehia i roto i tā rātou titi. E ha’amau ato’a rātou i te mau arata’ira’a ’o tē (1) fa’ata’a i te fāito matahiti e ti’a ai i te feiā ha’uti ’ia ’āmui mai i roto i te mau tū’aro a te ’Ēkālesia ’e ’o tē (2) fa’ata’a i te ti’ara’a o te ta’ata ha’uti. ’Ia ravehia te reira mau fa’aotira’a nā mua a’e i te ha’amatara’a o te pu’e tau ha’utira’a.

Mai te mea e fa’atupuhia te mau ’ātivite tū’aro titi rau, nā te peresidenira’a ārea ’aore rā te mau Hitu ’Ahuru ārea i fa’auehia e hi’o i te reira. E fa’aterehia teie mau ’ātivite e te mau ta’ata ’aravihi nō te ’ohipa tū’aro tei pi’ihia e te mau ti’a peresideni titi tei fa’auehia e te peresidenira’a ārea. ’Aita e fa’ati’ahia te mau tata’ura’a tū’aro i te fāito o te ārea.

’Aita te mau ta’ata e ’āmui mai i roto i te mau ’ātivite tū’aro a te ’Ēkālesia e tītauhia ’ia riro ’ei melo nō te ’Ēkālesia. Terā rā, tē noho nei rātou i roto i te mau ’ōti’a o terā ’āmuira’a ’e tē fāri’i nei rātou ’ia ha’apa’o i te mau ture ’e te mau arata’ira’a a te ’Ēkālesia i roto i te mau ’ātivite.

Mai te mea e fa’a’ohipahia te mau piriaro pupu, ’ei piriaro au noa ïa ’e te moni ’ore ’e te tano nō te ’ātivite. E nava’i noa te mau piriaro ’ū ’aore rā te mau piriaro nā ni’a iho. E ’aufauhia te mau ’ahu ha’utira’a e te tāpura faufa’a a te titi ’aore rā a te pāroita.

’Aita e fa’aitoitohia nei te ’ōperera’a rē ’aore rā te ’ōperera’a feti’a, nō te pupu ’e nō te ta’ata hō’ē.

20.5.10

Te mau tere hiero

E fa’anahohia te mau tere hiero i roto i te pāroita ’aore rā te titi, ’e i roto i tō rātou iho mata’eina’a hiero i fa’auehia.

’Aita te mau tere pāroita ’aore rā titi i te mau hiero i rāpae’au i tō rātou mata’eina’a hiero e fa’aitoitohia nei. E tītauhia, nō teie mau tere, te parau fa’ati’a a te peresidenira’a titi. E tītau-ato’a-hia, nō te mau tere hiero, haere i te pō ē ao noa atu, te parau fa’ati’a a te peresidenira’a titi.

’Ia fa’atura te mau tere hiero i te mau ture nō te rāterera’a i roto i te 20.7.7. ’Ia fa’atura-ato’a-hia, nō te mau tere hiero, haere i te pō ē ao noa atu, i te mau fa’aturera’a i roto i te 20.5.5.

20.5.11

Te mau ’ātivite e ’ore e fa’ati’ahia

E’ita e nehenehe i te mau ’āmuira’a nō te ’Ēkālesia e pāturu i te mau ’ātivite ’aita e tū’ati i te mau arata’ira’a i roto i teie pene. Oia ho’i :

• Te mau ’ātivite ’o tē fa’atupu i te pēpē rahi ’aore rā te ma’i (hi’o 20.7.6).

• Te mau ’ātivite e tītauhia te ha’amāu’ara’a ’aore rā te mau rāterera’a rahi roa (hi’o 20.7.7).

• Te mau fa’anahora’a fa’a’eta’etara’a tino ’aita te pehe, te mau paraparau, te ’ahu ’aore rā, te tahi atu mau mea, e tano i te mau ture a te ’Ēkālesia.

Mai te mea e uira’a tā te hō’ē ’episekōpo nō ni’a i te tanora’a te hō’ē ’ātivite, e ui ’oia i te peresideni titi. E nehenehe te mau peresideni titi e fa’atae i te mau uira’a i te peresidenira’a ārea.

20.6

Te mau ture ’e te mau arata’ira’a nō te ’aufaura’a i te mau ’ātivite

E ha’apāpū te feiā fa’atere ē, e ha’apa’ohia te mau fa’aturera’a ’e te mau arata’ira’a i muri nei nō te ’aufaura’a i te mau ’ātivite ato’a a te ’Ēkālesia.

20.6.1

Te mau ’ātivite e ’aufauhia e te tāpura faufa’a a te pāroita ’aore rā a te titi

E fa’a’ohipahia te tāpura faufa’a a te pāroita ’aore rā a te titi nō te ’aufau i te mau ’ātivite ato’a—ta’a ’ē noa atu paha ïa te mau mea i tāpurahia i roto i te 20.6.2.

E ’ere nā te mau melo e hōro’a i te moni nō te mau mātēria, te mau tauiha’a, te tārahura’a tauiha’a ’e te tīteti, ’aore rā, nō te tere ātea. E nehenehe te mau melo e ’āfa’i mai i te mā’a mai te mea e ’ere i te hōpoi’a teimaha.

20.6.2

Te ’aufaura’a i te mau pūhapara’a a te feiā ’āpī

Mai te mea e’ita e nava’i te tāpura faufa’a a te pāroita ’aore rā a te titi nō te mau ’ātivite i tāpurahia i raro nei, e nehenehe te feiā fa’atere e ani i te feiā e ’āmui mai ’ia ’aufau i te hō’ē tuha’a ’aore rā i te tā’āto’ara’a o te reira :

• Hō’ē pūhapara’a roa tāmatahiti nā te Autahu’ara’a a Aarona, ’aore rā te hō’ē ’ātivite mai te reira.

• Hō’ē pūhapara’a roa tāmatahiti nā te feiā ’āpī tamāhine, ’aore rā te hō’ē ’ātivite mai te reira.

• Hō’ē mahana pūhapara’a tāmatahiti ’aore rā te hō’ē ’ātivite mai te reira, nā te mau tamari’i nō te Paraimere, mai te 8 matahiti ē te 11 matahiti.

’Eiaha te mau ha’amāu’ara’a ’aore rā te mau rātere nō te hō’ē pūhapara’a tāmatahiti ’ia rahi roa. ’Eiaha te nava’i ’ore te moni a te hō’ē ta’ata e fa’a’ere iāna i te haerera’a.

Mai te mea e’ita e nava’i te moni i roto i te tāpura faufa’a a te pāroita ’e a te titi, ’e tae noa atu te moni i hōro’ahia mai e te feiā e haere i te pūhapara’a, e nehenehe te ’episekōpo e fa’ati’a i te hō’ē ’imira’a moni nō te pāroita i te mau matahiti hō’ē. ’Ia ha’apa’o teie ’ohipa i te mau arata’ira’a i roto i te 20.6.5.

Nō te ha’amāramaramara’a nō ni’a i te ’aufaura’a i te mau ’ohipa rarahi titi rau ’aore rā a te ārea nā te feiā ’āpī pa’ari ’ōtahi, hi’o 14.2.1.3.

20.6.3

Te ’aufaura’a i te mau ’āmuira’a JSF

E nehenehe te feiā ’āpī e anihia ’ia hōro’a i te hō’ē tino moni nō te haere i te ’āmuira’a JSF (Nō te pūai o te feiā ’āpī). Mai te mea ē, nō te ’aufaura’a i te moni i tītauhia e ’ere te hō’ē taure’are’a i te haere atu, e nehenehe te ’episekōpo e fa’a’ohipa i te tāpura faufa’a a te pāroita nō te ’aufau i te tā’āto’ara’a ’aore rā i te hō’ē tuha’a o teie ha’amāu’ara’a. Hi’o FSY.ChurchofJesusChrist.org.

20.6.4

Te ’aufaura’a i te mau mātēria ’e te mau tauiha’a

Mai te mea e nehenehe, e ’aufauhia te mau mātēria ’e te mau tauiha’a e hina’arohia e te pāroita nō te pūhapara’a matahiti a te feiā ’āpī i te tāpura faufa’a a te pāroita. Mai te mea e’ita e nava’i teie faufa’a moni, e nehenehe te ’episekōpo e fa’ati’a i te hō’ē ’imira’a moni nā te pāroita, hō’ē i te matahiti hō’ē. ’Ia ha’apa’o teie ’ātivite i te mau arata’ira’a i roto i te 20.6.5.

Te mau mātēria ’e te mau tauiha’a e ho’ohia mai nā roto i te tāpura faufa’a a te pāroita ’aore rā te moni o te ’imira’a moni, nō te fa’a’ohipa-noa-ra’a ïa i te ’Ēkālesia. E ’ere nō te fa’a’ohipara’a ’e te ta’ata hō’ē.

20.6.5

Te mau ’ohipa ’imira’a moni

Tei mātauhia, e ’aufauhia te mau ha’amāu’ara’a nō te mau ’ātivite titi ’e pāroita e te tāpura faufa’a e vai ra. Terā rā, e nehenehe te hō’ē peresideni titi ’aore rā te hō’ē ’episekōpo e fa’ati’a i te hō’ē ’ohipa ’imira’a moni i te matahiti tāta’itahi nō te mau ’ōpuara’a i muri nei :

• Nō te tauturu i te ’aufaura’a i te mau ’ātivite i tāpurahia i roto i te 20.6.2.

• Nō te tauturu i te ho’o mai i te mau mātēria tā te ’āmuira’a e hina’aro nō te mau pūhapara’a matahiti mai tei fa’ata’ahia i roto i te 20.6.4.

Mai te mea e fa’atupuhia te hō’ē ’imira’a moni, ’ia noa’a mai ïa te tahi faufa’a ’aore rā te tahi tāvinira’a pāpū.

E hi’o maita’i te feiā fa’atere ē e ’ōperehia te moni i noa’a mai ma te ti’a. ’Ua fa’ata’ahia te tāpura faufa’a nō te mau pupu Autahu’ara’a a Aarona mai te au i te rahira’a o te feiā ’āpī tamāroa i roto i te pāroita. ’Ua fa’ata’ahia te tāpura faufa’a nō te feiā ’āpī tamāhine mai te au i te rahira’a o te feiā ’āpī tamāhine i roto i te pāroita.

Nā te ta’ata iho e fa’aoti e tauturu i te ’imira’a moni. E hi’o maita’i te feiā fa’atere ē e’ita te mau melo e fa’ahepohia ’ia tauturu.

Te mau ’āmuira’a e turu i te hō’ē ’imira’a moni, ’eiaha rātou e fa’atīani ’aore rā e tītau nā rāpae i tō rātou mau ’ōti’a. ’Eiaha ato’a rātou e pātōtō haere i te mau ’ūputa nō te ho’o i tā rātou mau tauiha’a ’aore rā mau ’ohipa.

Teie te mau hi’ora’a nō te mau ’ohipa ’imira’a moni e’ita e fa’ati’ahia :

• Te mau ’ohipa e fa’atutehia.

• Te mau ’ohipa e ravehia e te ta’ata ’aufauhia, e rave ’ohipa ānei ’aore rā nā roto i te parau fa’aau.

• Te ’ohipa fa’a’ana’anataera’a e ’aufau te titi ’aore rā te pāroita i te feiā ha’uti nō tā rātou ’ohipa.

• Te ho’ora’a i te mau tao’a ’aore rā te mau ’ohipa a te hō’ē taiete tapiho’ora’a.

• Te mau perē hi’o tano mai te mau tāvirira’a tano tauiha’a ’aore rā te mau tāvirira’a tano moni, ’e te perē tāpa’o pitopito (bingo).

• Te mau ’ohipa ataata.

Nō te mau parau fa’ati’a ta’a ’ē, e ani ïa i te peresidenira’a ārea.

20.7

Te mau ture ’e te mau arata’ira’a pārurura’a nō te mau ’ātivite

E hi’o maita’i te feiā fa’atere ē e ha’apa’ohia te mau ture ’e mau arata’ira’a pārurura’a i muri nei i roto i te mau ’ātivite ato’a a te ’Ēkālesia.

20.7.1

Feiā pa’ari e ha’apa’o

Tītauhia ’ia tae mai e piti a’e ta’ata pa’ari i roto i te mau ’ātivite ato’a a te ’Ēkālesia e fa’atupuhia nā te mau tamari’i ’e te feiā ’āpī. E hina’arohia paha te tahi atu mau ta’ata pa’ari mai te au i te rahira’a o te pupu, te ’aravihi e tītauhia nō te ’ātivite, ’aore rā nō te tahi atu mau tumu. Tē fa’aitoitohia nei te mau metua ’ia tauturu.

E rave te tā’āto’ara’a o te feiā e ’ohipa nā muri i te mau tamari’i ’e te feiā ’āpī, i te ha’api’ipi’ira’a nō te pārurura’a i te mau tamari’i ’e te feiā ’āpī. Hi’o ProtectingChildren.ChurchofJesusChrist.org.

20.7.2

Te fāito matahiti tei tītauhia nō te ’āmui i roto i te mau ’ātivite feiā ’āpī

Ma te parau fa’ati’a a tō rātou mau metua, e nehenehe te feiā ’āpī e haere i te mau pūhapara’a i te pō ē ao noa atu, i te ha’amatara’a nō Tēnuare o te matahiti e ti’ahia ai tō rātou matahiti i te 12. E nehenehe rātou e haere i te mau ’orira’a, te mau ’āmuira’a feiā ’āpī, ’e te mau ’āmuira’a JSF e ha’amata i te ’āva’e Tēnuare o te matahiti e ti’a ai tō rātou matahiti i te 14.

20.7.3

Te parau pārurura’a

20.7.3.1

Te parau pārurura’a nō tōna iho pere’o’o

Hi’o 20.7.7.

20.7.3.2

Te parau pārurura’a nō te ea ’e nō te ’ati

I te mau fenua e rave rahi o te ao nei, tē vai nei te parau pārurura’a nō te ea ’e nō te ’ati nā roto mai i te mau paoti ’ohipa ’aore rā te mau fa’anahora’a a te fa’aterera’a hau. Nō te mau melo e parau pārurura’a tā rātou, ’ia fāri’i rātou i te tā’āto’ara’a o tō te reira pārurura’a, mai te mea noa atu e pēpē rātou i roto i te hō’ē ’ātivite a te ’Ēkālesia, hou ’a tītau ai i te tauturu a te parau pārurura’a a te ’Ēkālesia nō te mau ’ātivite (hi’o 20.7.3.4).

20.7.3.3

Te parau pārurura’a hōpoi’a tīvira nōna iho

Tē a’o nei te ’Ēkālesia i te mau melo ’e te feiā fa’atere ’o tē hi’o i te mau ’ātivite a te ’Ēkālesia ’ia pāruru ia rātou, mai te mea e nehenehe, nā roto i te ravera’a i te hō’ē parau pārurura’a hōpoi’a tīvira fāito tano. E nehenehe te reira pārurura’a e roa’a nā roto i te pārurura’a fatu fare ’aore rā te tahi atu mau fa’aturera’a. Nō te mau ha’amāramaramara’a hau atu, hi’o « FAQ – Que dois-je faire [E aha tē rave] ? » i ni’a ChurchofJesusChrist.org.

20.7.3.4

Te fa’anahora’a tauturu utuutu ma’i nō te mau ’ātivite a te ’Ēkālesia

I te Fenua Marite ’e i Tanata, e fa’afāna’o te fa’anahora’a tauturu utuutu ma’i nō te mau ’ātivite a te ’Ēkālesia (CAMA) i te tauturu hau i te pae nō te rapa’aura’a ma’i ’e te niho, nō te mau pēpē e tupu i roto i te hō’ē ’ātivite a te ’Ēkālesia. E fa’afāna’o ato’a te reira i te tauturu hunara’a ma’i mai te mea e tītauhia. ’Ua fa’ata’ahia teie fa’anahora’a nō te fa’ananea, ’eiaha rā nō te mono i te parau pārurura’a ea ’e te ’ati a te hō’ē ta’ata. Nō te mau ha’amāramaramara’a hau atu, hi’o « FAQ – Que dois-je faire [E aha tē rave] ? » i ni’a ChurchofJesusChrist.org.

Mai te mea e tupu te hō’ē fifi i roto i te hō’ē ’ohipa i fa’aterehia e te ’Ēkālesia, e hi’o te feiā fa’atere ē, e hina’arohia ānei te CAMA. E nehenehe te mau ti’a fa’atere ato’a e fa’a’ite mai i te hō’ē fifi i tupu i ni’a i te fa’anahora’a rahi nō te fa’a’ite i te hō’ē fifi, incidents.ChurchofJesusChrist.org. Mai te mea e fa’a’ite te ti’a fa’atere ē, e tītauhia te rapa’aura’a hau atu i te tauturu mātāmua, e fa’aarahia ïa te ’episekōpo ’e e fāri’i ’oia i te mau ha’amāramaramara’a nō te tāpa’ora’a. E hi’o te ’episekōpo i te rāve’a a te ta’ata ’ia ’aufau i tāna iho mau ha’amāu’ara’a nā roto i te tahi atu mau rāve’a, mai tāna iho parau pārurura’a ’aore rā te tahi atu mau rāve’a. E nehenehe ’oia e fa’ati’a i te fa’a’ohipara’a i te faufa’a moni CAMA mai te mea e mana’o ’oia e mea tano te reira.

Nō te tahi atu ā mau ha’amāramaramara’a, hi’o i te Church Activity Medical Assistance Handbook [Buka arata’i nō te tauturu utuutu ma’i nō te mau ’ātivite a te ’Ēkālesia. Nō te fāri’i i teie buka arata’i, ’a paraparau ia :

Deseret Mutual Benefit Administrators

P.O. box 45530

Salt Lake City, UT 84145-0530

Niuniu : 1-801-578-5650 or 1-800-777-1647

Rata uira : [e-mail]

Tahua natirara : dmba.com/churchactivity

20.7.3.5

Te parau ha’apāpū pārurura’a

Pinepine te ’Ēkālesia i te anihia ’ia hōro’a i te parau fa’a’ite pārurura’a nō te mau ’ātivite. Tītauhia te reira nō te mau fa’aaura’a tārahura’a, te mau fa’aaura’a ’aore rā te mau fa’ati’ara’a e tū’ati i te mau ’ātivite.

I te Fenua Marite ’e i Tanata, e nehenehe te feiā fa’atere e fāri’i i te hō’ē parau ha’apāpū pārurura’a i ni’a i te InsuranceCertificates.ChurchofJesusChrist.org. I rāpae i te Fenua Marite ’e Tanata, e paraparau te feiā fa’atere i te piha tōro’a nō te ārea. Teie tē tu’u i roto i te mau tītaura’a :

• Te i’oa ’e te vāhi o te ’āvirira’a e tītau nei i te ha’apāpūra’a nō te pārurura’a.

• Te fa’ata’ara’a e aha te fare ’e tōna vāhi, mai te mea e fare tārahu.

• Te fāito pārurura’a hōpoi’a.

• Te tahi atu mau ha’amāramaramara’a tano nō ni’a i te ’ātivite.

’Ia fa’anaho ātea te feiā fa’atere ’ia taimehia nō te fa’aineine i te mau parau ha’apāpū.

20.7.4

Te parau fa’ati’a a te mau metua

E’ita te mau tamari’i ’e te feiā ’āpī e ’āmui mai i roto i te hō’ē ’ātivite a te ’Ēkālesia ma te parau fa’ati’a ’ore a tō rātou nā metua ’aore rā tō rātou mau tīa’i. Nō te mau ’ātivite a te ’Ēkālesia e fa’aea i te pō ē ao noa atu, ’aore rā e tere ātea, ’aore rā ’ua hau atu te ataatara’a, e mea tītauhia te parau fa’ati’a pāpa’ihia. Pēnei a’e nō te tahi mau ’ātivite e tītauhia te tahi atu ā fa’anahora’a nō te fa’aiti i te ataatara’a. ’Ia riro noa te pārurura’a ’ei māna’ora’a rahi. Hi’o 20.7.6.1.

E hōro’a te mau metua ’e te mau tīa’i i te reira parau fa’ati’a maoti te tu’urimara’a i te Parau fa’ati’a ’e fa’ati’amāra’a utuutu ma’i. E ti’a i te ta’ata e fa’atere i te ’ātivite ’ia fāri’i i te parau tu’urimara’a a te ta’ata tāta’itahi e ’āmui mai.

20.7.5

Te fa’a’itera’a i te hāmani-’ino-ra’a

E fa’a’itehia i te ti’a mana tīvira te mau hāmani-’ino-ra’a ato’a e tupu i roto i te hō’ē ’ātivite a te ’Ēkālesia. ’Ia fārerei-’oi’oi-hia te ’episekōpo. Tei roto te mau arata’ira’a nō te mau melo i te 38.6.2.7. Tei roto te mau arata’ira’a nō te mau ’episekōpo i te 38.6.2.1.

Nō te tātarara’a nō parau hāmani-’ino-ra’a, hi’o 38.6.2.3 ’e 38.6.2.4.

20.7.6

Te mau fa’anahora’a pārurura’a, te pāhonora’a ’ati ’e te mau fa’a’itera’a i te ’ati i tupu

20.7.6.1

Te mau fa’anahora’a pārurura’a

E hi’opo’a te feiā fa’atere ’e te mau ta’ata ato’a i te mau ’ātivite nō te ha’apāpū ē, e mea iti roa te ataatara’a nō te tino ’e te ea. E mea ti’a ato’a i te mau ’ātivite ’ia fa’aiti mai i te ’ino i ni’a i te mau mātēria. I roto i te mau ’ātivite, e ’imi te feiā fa’atere i te mau rāve’a ato’a nō te ara i te pārurura’a te fifi tīa’i-’ore-hia. Ma te fa’aineinera’a pāpū ’e te pe’era’a i te mau arata’ira’a nō te pārurura’a te fifi tīa’i-’ore-hia, e nehenehe te feiā fa’atere e fa’aiti roa i te tumu nō te mau ’ati.

’Ia tano te ha’api’ipi’ira’a ’e te ta’ata ha’apa’o nō te mau ’ātivite. ’Ia tano ato’a te reira i te fāito matahiti, te ’aravihi ’e te pa’ari o te feiā e haere mai.

E ha’api’i te feiā fa’atere i te mau ta’ata ato’a i te mau ’ohipa pārurura’a nō te ’ātivite. Mai te mea ē, e tītauhia te ’aravihi pae tino ’aore rā te ’ite ta’a ’ē, e tītauhia paha ’ia fāri’ihia te tahi ha’api’ipi’ira’a ta’a ’ē ’aore rā ’ia fa’a’ohipahia te ta’ata ’o te reira tāna tōro’a.

’Ia vai ineine noa te feiā fa’atere nō te mau taime rū. ’Ia ’ite a’ena ato’a rātou nāhea i te paraparau i te mau muto’i ’e i te mau pū nō te ’ati rū. Nō te mau ha’amāramaramara’a hau atu, hi’o « FAQ – Que dois-je faire [E aha tē rave] ? » i ni’a ChurchofJesusChrist.org.

20.7.6.2

Te pāhonora’a ’ati

Mai te mea e tupu mai te hō’ē ’ati ’aore rā e pēpē te hō’ē ta’ata i te vāhi fatuhia e te ’Ēkālesia ’aore rā, i roto i te hō’ē ’ātivite a te ’Ēkālesia, e ha’apa’o te feiā fa’atere i te mau arata’ira’a i muri nei, mai te mea e tano :

• Hōro’a i te tauturu mātāmua. Mai te mea e hina’aro te hō’ē ta’ata i te tahi atu ā utuutura’a, ’a niuniu atu i te piha rūra’a ma’i. ’A paraparau ato’a i te metua, te tīa’i, ’aore rā i te tahi atu fēti’i piri ’e te ’episekōpo ’aore rā te peresideni titi.

• Mai te mea e mo’e ’aore rā, e pohe te hō’ē ta’ata, ’a fa’aara ’oi’oi i te mau mūto’i. Rave ’āmui ’e rave maihe ’e ’o rātou.

• Hōro’a i te tauturu i te pae manava.

• ’Eiaha e fa’aitoito ’aore rā e fa’ataiā i te ta’ata i te parau nō te horora’a i mua i te ture. ’Eiaha e parau fafau atu nā ni’a i te i’oa o te ’Ēkālesia.

• Ha’aputu ’e tāpe’a i te i’oa o te mau ’ite, te mau ha’amāramaramara’a hono, te mau fa’ati’ara’a nō te ’ohipa i tupu, ’e te mau hōho’a.

• Fa’a’ite i te ’ati (hi’o 20.7.6.3).

20.7.6.3

Te fa’a’itera’a i te ’ati i tupu

’Ia fa’a’itehia te mau ’ohipa i muri nei i ni’a i te tahua natirara incidents.ChurchofJesusChrist.org. Nā te ’episekōpo, te peresideni titi, ’aore rā te melo tāna e fa’aue ’e ’o tei ’ite i te fifi, e rave ’oi’oi i te parau fa’a’ite.

• ’Ua tupu te hō’ē ’ati ’aore rā ’ua pēpē te hō’ē ta’ata i ni’a i te hō’ē vāhi fatuhia e te ’Ēkālesia ’aore rā i te hō’ē ’ātivite a te ’Ēkālesia.

• ’Ua mo’e te hō’ē ta’ata i ’āmui mai i te ’ātivite a te ’Ēkālesia.

• ’Ua ’ino te hō’ē vāhi unuma, te hō’ē vāhi matara i te huira’atira ’aore rā te hō’ē vāhi fatuhia e te ’Ēkālesia i te taime nō te hō’ē ’ātivite a te ’Ēkālesia.

• Tē parauhia ra ē, ’aore rā tē mana’ohia ra ē e horohia te ’ohipa i mua i te ture.

Mai te mea i roto i te hō’ē ’ohipa, e tupu te hō’ē ’ati rahi, te pohe, ’aore rā e mo’e te ta’ata, e rave ’oi’oi te peresideni titi, te ’episekōpo, ’aore rā te melo tāna e fa’aue i te hō’ē o te mau ’ohipa i muri nei :

• I te Fenua Marite ’aore rā i Tanata, e tāniuniu nā mua ’oia i te piha ha’apa’o ’ati i te pū fa’atere o te ’Ēkālesia (1-801-240-4049 ’aore rā 1-800-453-3860, rēni 2-4049 ; i muri a’e i te mau hora ’ohipa ’aore rā, i te mau hope’a hepetoma, ’a niuniu i te 1-801-240-1000 ’aore rā, te 1-800-453-3860, ’e nā te ta’ata pāhono e paraparau atu i te hō’ē ti’a i reira rā). I muri iho, ’a paraparau i te peresidenira’a ārea.

• I rāpae i te Fenua Marite ’e Tanata, ’a niuniu i te piha tōro’a nō te ārea.

E fa’a’ite ato’a te peresideni titi ’aore rā te ’episekōpo i te fa’atere ’atu’atu fare a te ’Ēkālesia, i te mau pēpē ’e te mau ’ino i tupu i te mau fare ’aore rā i te mau vāhi i patuhia e te ’Ēkālesia.

Nō te mau ha’amāramaramara’a hau atu, hi’o « FAQ – Que dois-je faire [E aha tē rave] ? » i ni’a ChurchofJesusChrist.org.

20.7.6.4

Te pārurura’a ’e te mau uira’a

Mai te mea e pēpē te hō’ē ta’ata i roto i te hō’ē ’ohipa a te ’Ēkālesia, e hi’o te feiā fa’atere ē, e tano ānei e fa’a’ohipa i te Fa’anahora’a tauturu utuutu ma’i nō te mau ’ātivite a te ’Ēkālesia (hi’o 20.7.3.4).

I te tahi taime, e uira’a paha tā te peresideni titi ’aore rā tā te ’episekōpo nō ni’a i te mau fifi pārurura’a ’aore rā te mau parira’a i ni’a i te ’Ēkālesia. Nā te peresideni titi (’aore rā te ’episekōpo i raro a’e i tāna fa’aterera’a) e fa’atae i te reira mau uira’a i te piha ha’apa’o ’ati, ’aore rā i te piha tōro’a nō te ārea.

20.7.7

Te mau tere

E hōro’a te ’episekōpo ’aore rā te peresideni titi i te parau fa’ati’a nō te mau tere nō te mau ’ātivite a te ’Ēkālesia. ’Eiaha te tere e tu’u i te hōpoi’a teimaha i ni’a i te mau melo. ’Aita te tere-ātea-ra’a nō te mau ’ātivite e fa’aitoitohia nei.

I te tahi mau taime ta’a ’ē, e nehenehe te hō’ē peresideni titi ’aore rā te hō’ē ’episekōpo e mana’o ē, ’ua tano terā tere ātea nō te ’ātivite. E feruri ’oia nā roto i te pure i te mau maita’i pae vārua o te ’ātivite, te ho’o ’e te huru o te reira i ni’a i te mau ’utuāfare. Mai te mea e fāri’i ’oia i te reira tere, ’eiaha nā te mau melo iho e amo i te mau ha’amāu’ara’a nō te reira.

’Ia tū’ati te huru tere ’e te fa’a’ohipara’a i te mau arata’ira’a i roto i teie tuha’a, i rotopū i te mau ’āmuira’a o te hō’ē ā ’āpo’ora’a ārea, ’aore rā ’āpo’ora’a fa’aaura’a. E nehenehe te mau peresideni titi e ’āparau ’e e fa’aoti i roto i te mau rurura’a ’āpo’ora’a fa’aaura’a, i te huru ravera’a i te mau tere.

E fa’a’ī te feiā fa’atere i te ’api parau Planification d’une manifestation [Fa’anaho i te hō’ē ’ohipa ’e te hō’ē ’ātivite], nō te mau ’ātivite e tītau i te tere ātea.

Mai te mea nō te hō’ē ’ātivite feiā ’āpī a te ’Ēkālesia e tere ātea ’aore rā e pūhapara’a i te pō ē ao noa atu, tītau-roa-hia i te mau metua ’aore rā te tīa’i ’ia hōro’a i te parau fa’ati’a pāpa’i nō tā rātou mau tamari’i e haere atu (hi’o 20.7.4). Tītauhia te feiā pa’ari pāpū nō te ha’apa’o (hi’o 20.7.1).

Mai te mea e nehenehe, e fa’a’ohipa te mau pupu o te ’Ēkālesia i te faura’o ’uta ta’ata a te hō’ē taiete nō te tere ātea. ’Ei faura’o uta ta’ata ma te pātana ’e te parau pārurura’a hōpoi’a tīvira.

’Ia tere te mau pupu a te ’Ēkālesia nā ni’a i tō rātou iho mau pere’o’o uira, tītau-roa-hia ’ia tere maita’i te pere’o’o. E tu’u te ta’ata tāta’itahi i tōna hātua pāruru. ’Ei ta’ata pa’ari ’e te pāpū te ta’ata fa’ahoro pereo’o. ’Ei parau pārurura’a hōpoi’a tīvira fāito tano nō te mau pere’o’o ’e te mau ta’ata fa’ahoro ato’a. ’Ia ravehia te fa’anahora’a tano nō te ha’apāpū ē, e vai ara ’e te ha’apa’o noa te feiā fa’ahoro pere’o’o. I te mau taime ato’a e nehenehe, ’eiaha te hō’ē ta’ata pa’ari ’ia vai ’ōna ana’e ’e te hō’ē taure’are’a i roto i te pere’o’o uira maori rā e tamari’i nāna.

’Eiaha te mau ’āvirira’a a te ’Ēkālesia e fatu ’aore rā e ho’o mai i te mau pere’o’o uira ’aore rā te pere’o’o uta ta’ata nō te mau tere pupu.

’Eiaha te hō’ē tāne ’e te hō’ē vahine e rātere rāua ana’e nō te haere i te mau ’ātivite, i te mau rurura’a ’aore rā i te mau fa’auera’a ’ohipa a te ’Ēkālesia maori rā ’ua fa’aipoipohia rāua te tahi i te tahi, ’aore rā e ta’ata ’ōtahi rāua.

Nō te mau ha’amāramaramara’a hau atu, hi’o « FAQ – Que dois-je faire [E aha tē rave] ? » i ni’a ChurchofJesusChrist.org.

20.8

Te mau ture fa’aterera’a nō te ’ātivite

E hi’o te feiā fa’atere ē e ha’apa’ohia te mau fa’aturera’a ’e te mau arata’ira’a i muri nei ’ia fa’atere ana’e i te mau ’ātivite ato’a a te ’Ēkālesia.

20.8.1

Te mau mātēria pāruruhia e te copyright (parau fatura’a)

Hi’o 38.8.10.

20.8.2

Tārahu i te mau fare e ’ere nā te ’Ēkālesia, nō te mau ’ātivite

Mai te mea ē ’aita e tano te mau fare a te ’Ēkālesia nō te hō’ē ’ātivite titi ’aore rā te hō’ē ’ātivite titi rau, e nehenehe te tahi fare e tārahuhia ma te parau fa’ati’a a te peresideni titi. E ha’apa’ohia te reira mau tītaura’a e te fa’atere ’atu’atu fare a te ’Ēkālesia.

E nehenehe te mau ’āmuira’a i reira e anihia ’ia fa’a’ite i te ha’apāpūra’a nō te parau pārurura’a hōpoi’a tīvira, ’ia tārahu rātou ’aore rā ’ia fa’a’ohipa ana’e rātou i te mau fare e ’ere nā te ’Ēkālesia. Nō te mau ha’amāramaramara’a e nāhea ’ia noa’a te hō’ē parau ha’apāpū pārurura’a, hi’o 20.7.3.5.

20.8.3

Te mau ’ātivite e nehenehe e tutehia

E ara maita’i te feiā fa’atere ē, ’eiaha te mau ’ātivite e ha’afifi i te ti’ara’a tute ’ore a te ’Ēkālesia. Nō te mau arata’ira’a, hi’o 34.8.1.