9.

Bootaki n Aine

9.1

Te Kantaninga ao taian Bootaki

Te Bootaki n Aine e buokiia natin te Atua ni katauraoi n oki Nakoina. Ngkai naati aine irouia ara karo i karawa, kaain te Bootaki n Aine a “kabwarabwarai koroboki aika a tabu,” “kaunga te ekaretia,” a tabekirake naano, ao a “kawakini berita aika tabu [ake a tia] ni karaoi” (Reirei ao Berita aika Tabu 25:7, 13).

9.1.1

Kantaninga

Te Bootaki n Aine bon te bootaki ae roko mai ieta ibukiia aine aika a ikawai n te Ekaretia. Te Burabeti Iotebwa Timiti e reirei bwa oin te kantaninga n te Bootaki n Aine bon kamaiuakiia tamnei ao kabebetean rawawata. E taekinna bwa Ana Ekaretia Iesu Kristo e tuai bwanin raoi ni karokoa ae e tei te rabwata n aine.

Kaain te Bootaki n Aine a bootaki ni mwakuri ni buokia ni kakoroa nanon Ana mwakuri te Atua ibukin te kamaiuaki ao te karietataaki. A beku ibukiia tabeman, a karaoi tabeia ake a berita nako iai, a karekea te bonnano, ao a reiakina man maiuakina te reirei ae tabu.

Ana botoniango te Bootaki n Aine bon “E Bon Aki Bwaka te Tangira” (1 Korinto 13:8). Te botoniango aei e kaota oin taben te Bootaki n Aine.

9.1.2

Membwatibu n te Bootaki n Aine

Te Bootaki n Aine bon te itaritari irouia aine ae akea tokina. Ni kabane aine aika ikawai 18 te ririki ao iaona bon kaain te Bootaki n Aine. Bon kaaina e ngae ngke a aki kona ni kakaea Boootakin te Bootaki n Aine.

Te ataeinnaine e kona ni kaaina te Bootaki n Aine ni koron 18 ana ririki. E marooro ma ana karo ao ana bitiobi ibukin taina ae riai. N ana ririki ae 19 ke mwaingina man mweengana, ibukin kaean te kuura n reirei ae rietaata ke te mwakuri ni mitinare, e riai ni kaaina te Bootaki n Aine.

Aine aika a tia ni mareaki iaan 18 te ririki bon kaain naba te Bootaki n Aine.

Ibukin rongorongoia kaaro aika tuai mareaki iaan 18 te ririki, taraa 38.1.5.

9.1.3

Kangaraoakina nakon Kainnanon te Tabo

Tabeua uoote e bon rang bubura mwaitiia aine aika ikawai ake a kakaonimaki. N uoote aikai, te bitiobi ao te beretitenti n te titeiki e anga te kariaia ibukin katean ae raka iaon teuana te Bootaki n Aine n te Uoote. Ni kabane Bootaki n Aine iai oin ana beretitentii. Ngkana e kona, Bootaki n Aine n tatabeua e riai ni irengan kaaina n aekan rooro nako ao n aia taneiai.

9.2

Irakin Ana Mwakuri te Atua Ibukin te Kamaiuaki ao te Karietataaki

E kaoiia ni kabane te Atua bwa ana nakon Kristo ao n ibuobuoki n Ana mwakuri ni kamaiu ao te karietataaki man:

• Maiuakinan ana euangkerio Iesu Kristo.

• Tararuakiia naake iai kainnanoia.

• Kaoakiia ni kabane bwa a na karekea te euangkerio.

• Bootakiia utu n te tai ae akea tokiia.

A bairei bootaki n te Tabati, waaki ni kakukurei, mwakuri ni ibuobuoki, ao tabeua riki mwakuri ni buokiia aine ni karaoa Ana mwakuri te Atua ibukin te kamaiuaki ao te karietataaki taan kairiiri n te Bootaki n Aine . A boonnano ni mwakuri Kaain te Bootaki n Aine ao aia kooram unimwaane ni buokia ni katia te mwakuri aei.

Ibukin rongorongon riki Ana mwakuri te Atua ibukin te kamaiuaki ao te karietataaki, kamatebwaia mwakoro 1.

9.2.1

Maiuakinan Ana Euangkerio Iesu Kristo

Taan kairiiri n te Bootaki n Aine a boutokaia membwa ni maiuakinan ana euangkerio Iesu Kristo. A katerea kamwakuran te onimaki, te rairanano, te riki n toronibwai, ao karaon berita aika tabu ma te Atua man karekean otenanti. Otenanti aikai raona naba te entaumente n te tembora. Tara 1.2.1.

9.2.1.1

Reiakin te Euangkerio n te Mweenga

Ngkana membwa a reiakina ao a maiuakina te euangkerio n te mweenga, e na kamatoaki riki rairakiia nakon Tamara are i Karawa ao Iesu Kristo. Taan kairiiri n te Bootaki n Aine a kaungaia aine bwa a na kamatebwai koroboki aika a tabu ao aia taeka burabeti aika maiu, n tatabemaniia ma aia utu. Nakomai, Iriirai ao booki ni ibuobuoki tabeua a kona ni karakai riki aia kamatebwai.

Bootaki n utu bon te kawai ae kakaawaki n reiakina te euangkerio n te mweenga. A bon kakaraoaki ni katoa wiki n te Tabati, Moanibong, ke te bong riki teuana. Kanoana bon te tataro, kamatebwaian te euangkerio, kaoti koaua, te anene, ao takakaro.

9.2.1.2

Reiakinan te Euangkerio n Bootakin te Bootaki n Aine

Te Bootaki n Aine a bootaki n te Tabati ibukin bukina aikai:

• Kakorakoraan te onimaki.

• Karekean te boonano.

• Kakorakoraia utuu.

• Te ikarekebai ni mwakuri ni buoka ana mwakuri te Atua ibukin te kamaiuaki ao te karietataaki.

Bootaki a karaoaki n te kauoua ao te kaaua n Tabati n te namwakaina. Maanna bon 50 te miniti. Te beretitentii n te Bootaki n Aine e bairei bootaki aikai. Kaain te beretitentii e kairia.

E moanaki te bootaki ma te tataro. Ngkanne kaain te beretitentii a kairiia aine ni kaai ni marooro inanon nimaua ke tebwina te miniti iaon kakaewneako, kainnano, ao tibwanga aika a riai. Kabotoan te iango iaon te Tia Kamaiu inanon te marooro aei e na buokiia aine ni karikirakea aia koaua, ni karekei otenanti n te tembora, kawakin berita aika tabu, ao ni karikirakei aroia n riki bwa ana reirei. Te beretitentii n te Bootaki n Aine a na rinei atuu n reirei ni marooroakin baika a kaineti ma kainnanoia aine.

Imwin anne ao E riai n tau te tai ibukin reiakinan ao marooroakinan te euangkerio. E riai katuruan te iango iaon atuu n reirei iaon teuana te marooro ke a mwaiti riki man te maungatabu ni kabuta ae nako. A riai kaain te bereitentii n te Bootaki n Aine n tataromwaaka n rinei marooro man te maungatabu ake a na maroroakin nakoia aine. A karaoi rinerine aikai ni kaineti ma kainnanoia aine.

A kona n aneneaki Anene n taromauri ni kanakoraoa te reirei.

A riai bootaki nako ni kainaki ma te tataro.

N tabetai ao a kona n ikotaki kaain te Bootaki n Aine ao te kooram n unimwaane in te ibukin te reirei n Tabati. Bootaki aikai a barongaaki iroun te bitiobiriki ao te Bootaki n Aine ao te kooram n unimwaane.

Ibukin rongorongona riki, taraa “To Sit in Council.”

9.2.1.3

Waaki ni kakukurei

Taian Beretitentii n te Bootaki n Aine a kona ni bairei waaki ni kakukurei. E tararuai waaki ni kakukurei te beretitenti. E kona ni mwiokoa ana kauntira ke temanna te aine bwa e na kaira te babaire ao ni karaoa nanona (taraa 9.3.4). Taian beretitentii a maroroakini waaki ni kakukurei ma te bitiobi bwa kanoan aia babaire.

A riai waaki ni kakukurei ni kakorakorai nanoia aine ni karaoi ao ni kawakin berita aika tabu ao n anganaki tibwaingaia n ikotaki ao ni beku ni kabane. A riai waaki ni kakukurei ni buoka ni kakoroa bukin ana kantannga te Bootaki n Aine (taraa 9.1 ao 9.1.1). Ibukin rongorongon waaki ni kakukurei n Bootaki n Aine, taraa 6.7.1.

9.2.2

Tararuakiia Naake Iai Kainnanoia

Ngkai taan iriira Iesu Kristo, iai tabeia aine n taben nanoia ma te tangira naake a kainnano. N tatabemaniia ao n te Bootaki n Aine, a ukori kawai ni beku ibukiia tabeman n te uoote ao n te kaawa. Ngkana e bon tauraoi, JustServe.org e anga iango ibukin waaki n ibuobuoki.

Ibukin rongorongon riki aroia kaain te Bootaki n Aine ao aia kooram unimwaane n tabeakiniia naake a kainnano, taraa 22.6.2.

9.2.2.1

Mwakuri n Ibuobuoki

Te mwakuri n ibuobuoki bon tabeakinaia tabeman n aron are e na karaoia te Tia Kamaiu. A karekei tabeia aine n te mwakuri n ibuobuoki mairoun te beretitenti n te Bootaki n Aine. Ibukin rongorongona riki, taraa mwakoro 21.

9.2.2.2

Kainnano ibukin te Tai ae Uarereke

Aine n te mwakuri n ibuobuoki a kakaea ao a tobwai kainnanoia naake a beku ibukiia. A kona membwa ni kainnanoa te ibuobuoki ibukin te tai ae uarereke n tain te aoraki, te bung, te mate, buan te mwakuri, ao tabeua riki taai.

Ngkana e kainnanoaki, aine n te mwakuri n ibuobuoki a butiia te beretitenti n aia Bootaki Aine bwa e na ibuobuoki. E kona te beretitentii n anga aran te mataniwi ibukin karaoan te ibuobuoki ni bairei waaki aikai (taraa 9.3.4).

Te Bootaki n Aine ao aia kooram unimwaane a ikarekebai n tobwai kainnano ibukin te tai ae uarereke (taraa 22.3.2). E kona te bitiobi n anga te ibuobuoki man te angabwai n aki mamatam ngkana e riai.

N tabeua taabo, iai aia kona bitiobi n buokiia membwa ake a kainnano n ana oota te bitiobi ibukin te amwarake ao tabeua riki bwaai. N angiin te tai te bitiobi e katabea te beretitentii n te Bootaki n Aine bwa e na reitaki ma membwa ao ni kanoa te booma ibukin te oota. Ma, e kona naba ni mwiokoa te beretitenti n aia kooram unimwaane. Te kauntira n te Bootaki n Aine ke te beretitenti n aia kooram unimwaane e kona ni mwiokoaki ngkana akea te beretitenti. Te tia kairiri are mwiokoaki e anga te booma are e a tia arona nakon te bitiobi ibukin ana kariaia.

Ibukin riki rongorongona, taraa 22.6.2 ao “Welfare Resources” inanon Leader ao Clerk Resources.

9.2.2.3

Kainnano ae Maan Taia ao te Riki n Toronibwai

N aron barongaana iroun te bitiobi, te beretitentii n te Bootaki n Aine ao aia kooram unimwaane a buokiia membwa ni kainnanoia aika a maan taia ao te riki n toronibwai. A anga tuua iaon reirei n te riki n toronibwai iaon te maiu n rabwata ao te maiu n tamnei. Tara mwakoro 22 ao “Te Riki n Toronibwai” n te Gospel Library app.

Ngkana iai te aomata ke te utu ae kainnanoa te ibuobuoki, a marooro beretitentii n te Bootaki n Aine ao n aia kooram unimwaane, n aron barongaana iroun te bitiobi, bwa tera aia ibuobuoki (taraa 22.4).

Te beretitenti n aia Bootaki n Aine, te beretitenti n aia kooram unimwaane, ke temanna te tia kariiri e buoka temanna ke te utu ni karaoa ana Babaire n Riki n Toronibwai. Aine ao Taari n te mwakuri n ibuobuoki a kona naba n ibuobuoki n te babaire. N angiin te tai, tabeman membwa n te Bootaki n Aine ao aia kooram unimwaane iai aia rabakau ke aia atatai aika a kona n ibuobuoki iai. Aomata ni kabane ake a ibuobuoki ana kaini taekan rongorongo aikai. Ibukin riki rongorongona, taraa 22.3.3 ao 22.8.

9.2.2.4

Ngkana e Mate Kaain te Uoote

Ngkana e mate kaain te uoote, te beretitentii n te Bootaki n Aine ao n aia kooram unimwaane e anga te karaunano ao te ibuobuoki. Iaan ana kairiri te bitiobi, a kona n ibuobuoki ma te taunimate.

Ngkana e kona, membwa ake a tia ni mate ake a tia ni karekei aia entaumente a na taunaki ke ni kabuekaki rabwataia ma kunnikain te tembora. Rabwatan te aine e na kunnikaiakaki iroun buuna ke iroun te aine ae kaain te utu ae e a tia n entaute. Ngkana akea kaain te utu ae tauraoi ke e aki tangiria ni karaoa te kunnikai, te bitiobi e na tuanga te beretitenti n te Bootaki n Aine bwa e na kaoa te aine ae e a tia n entaute bwa e na kunikaia te rabwata ke n taraa aron karinakin te kunnikai. Ibukin rongorongo riki tabeua, taraa 38.5.10.

Beretitentii n te Bootaki n Aine ao aia kooram unimwaane, taari ao aine n te mwakuri n Ibuobuoki, ao tabeman a reitanako n anga te karaunano ao te ibuobuoki imwin te taunimate.

9.2.3

Kaoakiia ni Kabane Bwa Ana Karekea te Euangkerio

Kaain te Bootaki n Aine iai tabeia bwa a na kaoiia aomata ni kabane ni karekei ana kakabwaia ana euangkerio Iesu Kristo (taraa Motiaea 18:9). A karaoa aei man tibwauan te euangkerio, kakorakoraia membwa aika boou, ao taben nanoaia naake a aki rang kakaonimaki. Taraa 23.2 ao 23.3.

Ni bowin te beretitentii ao te Bootaki n Aine, te beretitentii n te Bootaki n Aine e marooroakini kawai ake a kona iai aine ni kaoiia aomata ni kabane ni karekei ana kakabwaia te euangkerio. Taraa 23.1.1, 23.1.2, ao 23.1.3.

Te beretitenti n te Bootaki n Aine e mwiokoa te membwa n te beretitentii bwa e na ibuobuoki n tibwauan te euangkerio n te uoote. E mwakuri ma te membwa are e mwiokoaki man te beretitentii n aia kooram unimwaane ni karaoi mwakuri aikai (taraa 23.6.2).

Te membwa are mwiokoaki man te beretitentii n aia Bootaki Aine e na ira te bootaki ni marooro ni katoa wiiki n ikarekebai ni kaoia aomata ni kabane bwa a na karekei kakabwaia n te euangkerio. Te tia kairiiri n te mition n te uoote, are e kona n ae te membwa n te beretitentii n te kooram ni unimwaane, e kairi bootaki ni babaire aikai. Mitinare n te uoote, te tia ibuobuoki n te kooram n ibonga, temanna man te beretitentii ibukin aia Kiraati Ataeinnaine ake a ikawai, ao mitinare aika bwanin aia tai. Taraa 23.4.

9.2.4

Katiteuanakiia Utu ibukin te Tai ae Akea Tokina

Kaain te Bootaki n Aine a boutokaia membwa ni katiteuanaia utu ibukin te tai ae akea tokiia. N raonaki ma:

• Karaoan berita aika tabu ma te Atua man karekean otenanti, n aron te entaumente n te tembora.

• Karaon te mwakuri n te tembora ao n rongorongon te utu (taraa 1.2.4).

Ni bowin te beretitentii ao te Bootaki n Aine, te beretitentii n te Bootaki n Aine e marooroakini kawai ake a kona iai aine ni kaoiia aomata ni bane ni karaoi mwakuri aikai. A bairei naba kawai kaain te Beretitentii ni buokiia membwa ni karikirakea otaia n te ao nanoia ni karekei otenanti aika tabu ao ni karaoi berita aika tabu ma te Atua inanon te tembora. A kaungaia aine bwa a na kabatia te nako n nebonebo inanon te tembora ngkana e kona.

E na kaungaia aine te beretitentii bwa a na reiakina rongorongoia aia utu. A buokiia membwa aika boou ao aika a karairaki, kaain te Bootaki n Aine aika boou, ao mitinare aika tibwa weteaki bwa a na kakaei ao ni katauraoi araia aia bakatibu ibukin otenanti n te tembora.

Te beretitenti n te Bootaki n Aine e mwiokoa te membwa n te beretitentii bwa e na ibuobuoki ni kaira te mwakuri n te tembora ao n rongorongon te utu n te uoote. E mwakuri ma te membwa are e mwiokoaki man te beretitentii n aia kooram unimwaane ni karaoi mwakuri aikai (taraa 25.2.2

Te membwa are mwiokoaki man te beretitentii n te Bootaki n Aine e irii bowi ni babaire ni baronga aron karaoan te mwakuri n te tembora ao n rongorongon te utu. Bootaki aikai a kakaraoaki n tainako. Te tia kairiiri ibukin te tembora ao rongorongon te utu n te uoote, ae kona n ae te membwa n te beretitentii n te kooram n unimwaane, e na kairi bootaki n te tembora ao n rongorongon te utu (taraa 25.2.7). Kaain naba te bootaki bon te tia ibuobuoki n te kooram n ibonga, te membwa n te beretiitentii n aia kiraati Ataeinaine ake kabanea n ikawai, ao taan rabakau ibukin te tembora ao n rongorongon te utu.

9.3

Taan Kairiri n te Bootaki n Aine

9.3.1

Bitiobi

E bowi te bitiobi ma te beretitenti n te Bootaki n Aine ni katoa namwakaina. A maroroakina Ana mwakuri te Atua ibukin te kamaiuaki ao te karietataaki, n raonaki ma aia ibuobuoki aine n te mwakuri n ibuobuoki. A maroroakina naba (1) rikirakeia ao kainnanoia aine n te uoote (2) bowin te Bootaki n Aine, kiraati, ao waaki ni kakukurei.

9.3.2

Beretitentii n te Bootaki n Aine

9.3.2.1

Wetean te Beretitenti n te Bootaki n Aine

Te bitiobi e wetea temanna te aine bwa e na beku bwa te beretitenti n te Bootaki n Aine. Ngkana e a tau buburan te iunite, e uotarake aran temanna ke uoman aine nakon te bitiobiriki bwa e na beku bwa ana kauntira. Te Bitiobiriki e na iangoi aara ake e anganaki ao ni kanakoa te wewete.

Te membwa man te bitiobiriki e uotarake araia kaain te beretitentii n tain bootakin te toa ibukin te kamatoa. Te bitiobi e katabua te Beretitenti n te Bootaki n Aine. A kona kaain te bitiobiriki ni katabuia ana kauntira.

Tabeua iunite aika uarereke akea iai te beretitenti n Bootaki n Ataeinaine ke te Moanrinan. N taian Iunite aikai, te beretitenti n te Bootaki n Aine e kona ni buokiia kaaro ni bairei reirei ibukia kairake ao ataei.

9.3.2.2

Taabe

Aikai taben te beretitenti n te Bootaki n Aine. A na buokia ana kauntira.

• Ngaia kaain te kauntira n te uoote. E beku bwa (1) kaain te kauntira are tobwai kainnano n te uoote ao e kakaei tobwaan kangaanga ao (2) te tia tei ibukin te Bootaki n Aine (taraa 29.2.5).

• Kaira ana waaki te Bootaki n Aine n ibuobuoki ni ira Ana mwakuri te Atua ibukin te kamaiuaki ao te karietataaki (taraa mwakoro 1).

• E bairei ao n tararua aia ibuobuoki aine n te mwakuri n ibuobuoki. E karaoa te tabe ibukin te mwakuri n ibuobuoki ma te beretitentii n aia kooram unimwaane, are a bowi iai teuana te tai n te kuata. E ukora ana kariaia te bitiobi ibukin taabe n te mwakuri n ibuobuoki. E karaoai intawiu ibukin te mwakuri n ibuobuoki tao teuana n te kuata. Taraa mwakoro 21.

• Iaan ana kairiiri te bitiobi, marooro ma te membwa ae ikawai n te uoote (taraa 31.1 ao 31.3). Ti te bitiobi ae na marooro ma membwa n te Ekaretia iaon kororaoia, bwainikirinaki, ao kariaia ni kabonganakin mwaane n aki mamatam. Taraa Counseling Resources. Ibukin rongorongon taekan te bwainikirinaki, taraa 38.6.2.

• N raona te beretitentii n aia kooram unimwaane, e ibuobuoki ni kairi waaki n te uoote ni buokiia aomata ni bane ni karekei ana kakabwaia te euangkerio (taraa 8.2.3ao 9.2.3

• Ma te beretitentii n te kooram n unimwaane, e ibuobuoki ni kaira te mwakuri n te tembora ao n rongorongon te utu (taraa 8.2.4 ao 9.2.4).

• Bairei aia mwakuri kaain te Bootaki n Aine ni kakorakoraia aine aika a kairake ni ikawai ae a tuai iein ao a tia ni mare. Temanna te kauntira e kona ni katabeaki ni beku ma kairake n ikawai aika tuai iein (taraa 14.1.2.2).

• E reitaki ma kaain te Bootaki n Aine n tatabemaniia tao teuana te tai n te ririki. A maroroakina aron te aine ao ana utu.

• Reireiniia aine mwiokoaia ibukin berita aika tabu ao kakabwaia, n ikotaki ma kakabwaia ake a roko man mwaakan ana nakoanibonga te Atua (taraa 3.5 ao 3.6). Buokiia bwa a na ataa te mwaaka, kamanoaki, kaetieti, kimwareirei, ao te rau are e a roko man karikirakean te reitaki n te berita ae tabu ma Tamara are i karawa ao Iesu Kristo.

• E tararuaa ao e buoka katamaroan te anga reirei n te Bootaki n Aine (taraa mwakoro 17).

• E bairei ao ni kairi bootakin nako te Bootaki n Aine.

• E tararuai aia waaki ni kakukurei kaain te Bootaki n Aine (taraa 9.2.1.3).

• Buokiia ataeinaine ni katauraoi n ira buakon te Bootaki n Aine (taraa 9.4).

• E tararuai rekootin te Bootaki n Aine, ribooti, ao te mwane (taraa LCR.ChurchofJesusChrist.org). E kona n ibuobuoki te tia koroboki (taraa 9.3.3).

Te beretitenti n te Bootaki n Aine n te titeiki e reireina te beretitenti n te Bootaki n Aine n te uoote taekan taabe aikai. A kona ni karaoa aei n tain bootaki ni kairiiri n te titeiki, aia bootaki beretitentii n te Bootaki n Aine, ao karaoan aia kakawari ma beretitenti n te Bootaki n Aine (taraa 29.3.4).

Rinanon ana beku, te beretitenti n aia Bootaki n Aine n te uoote e boutoka te bitiobi ni kabanea ana tai irouia te roronrikirake ao taben te bitiobi aika a onoti.

9.3.2.3

Bowin te Beretitentii

Te beretitentii n te Bootaki n Aine ao te tia koroboki e mwaiti aia tai ni bowi. Te beretitenti e kairi bowi aikai. Aikai bwaai aika a kona n rin inanon te akenta:

• Babaire ni kakorakoraia aine ao aia utu.

• Babaire iaon aron buokan katiaan Ana mwakuri te Atua ibukin te kamaiuaki ao te karietataaki.

• Karaoan te mwakuri ni mitinare ao te mwakuri n te tembora ao te mwakuri n rongorongon te utu.

• Karaoi tibwanga ao taabe mairoun te bitiobi.

• Karaoi taabe man kauntiran te uoote.

• E iangoi taabe ibukin te mwakuri n ibuobuoki ma te tataro.

• E rinanoi rongorongon intawaiu ibukin te mwakuri n ibuobuoki. E bairei kawai ni kinai korakora ao e ibuobuoki n tobwai kainnano. (Tara mwakoro 21.)

• E taraia aine ake a kona ni beku n nakoa ao n taabe.

• Bairei bootakin te Bootaki n Aine ao waaki ni kakukurei.

9.3.3

Tia koroboki

Te beretitentii n te Bootaki n Aine e kona n anga aran te aine are e na beku bwa te tia koroboki n te Bootaki n Aine. E wetea neienne te membwa n te bitiobiriki, e uotarake arana n tain bootakin te toa ibukin te kamatoa, ao e kamatoaa.

E kona ni kakanoa taben te tia koroboki n aikai:

• E karaoi akenta ibukin bowin te beretitentii ao bowin te Bootaki n Aine.

• E koroboki n tain te bowi ao e korei mwiin taabe.

• Katei tain intawiu n te mwakuri n ibuobuoki (taraa 21.3).

• E katauraoa ao e kanakoa ana ribooti n te kuata iaon te roroko ao mwaitin intawaiu ibukin te mwakuri n ibuobuoki ake a karaoaki. Ibukin ribooti n te Roroko ao a riai ni karinaki araia aine ake a beku n te Moanrinan ao n te Bootaki n Ataeinnaine.

• E ibuobuoki ni katauraoa te kataumwane n te ririki ao e taui mwiin kabanemwane.

9.3.4

Weewete ao Katabeaki Riki Tabeua

Nakoa aika tabeua aikai a kona ni ibuobuoki. Te bitiobi ao te beretitenti n aia Bootaki Aine a marorokinna aron kainnanoakiia.

• Taan reirei n te Bootaki n Aine n te Tabati.

• Te mataniwi n te mwakuri ni ibuobuoki bwa e na ibuobuoki ni babaire ao ni karaoi ibuobuoki nakoia aomata ake a kainnano (taraa 9.2.2.2). Taan ibuobuoki ao kaain te komete a kona naba ni weteaki.

• Te mataniwi ibukin waaki ni kakukurei bwa e na ibuobuoki ni bairei ao ni karaoi ana waaki ni kakukurei te Bootaki n Aine (taraa 9.2.1.3). Taan ibuobuoki ao kaain te komete a kona naba ni weteaki.

• Kauoman n tia koroboki bwa a na buoka te tia koroboki n te Bootaki n Aine.

• Taan koroboki n te mwakuri n ibuobuoki bwa a na bairei tain intawiu ibukin te mwakuri n ibuobuoki ao n ibuobuoki ni katauraoa te ribooti ibukin te kuata.

Ngkana nakoa aikai ke tabeua riki a kainnanoaki, te beretitentii n aia Bootaki Aine e anga araia aine ake a na beku. A anga aara aikai nakon te bitiobiriki. Ngkana e kariaia te bitiobiriki, kaain te bitiobiriki e weteiia. E uotarake araia ibukin te kamatoa ni bootakin te toa ao e kamatoaia.

N aron kainnanoana, te beretitenti n aia Bootaki n Aine e kona n mwiokoia aine bwa a na buoka ana waaki te Bootaki n Aine ni kawai riki tabeua. Mwioko aikai a na iai inanona bwaai aikai:

• Buokaia ataeinnaine ni katauraoia ni kaaina te Bootaki n Aine

• Ni beku bwa te tia rabakau ibukiia aine n aro aika a onoti, n aroia aine ake a mate buuia, kairake n ikawai, ke tiina ma natiia aika a uarereke

Taian titita ake a katabeaki n te tai ae uarereke aki kainanoaki bwa a na weteaki ao ni katabuaki.

9.4

Buokiia Ataeinnaine ni Katauraoia ni Kaaina te Bootaki n Aine

Te beretitentii n te Bootaki n Aine e mwakuri ma ataeinnaine, aia karo, ao taan kairiiri n te Bootaki n Ataeinaine ni buokiia ataeinnaine ni katauraoi n ira buakon te Bootaki n Aine.

Taan kairiiri aikai a anga taai ibukin te ataeinnaine ao aine n te Bootaki n Aine ni karekea te reitaki. Te uaia ni beku bwa aine n ibuobuoki bon te kawai ae kakaawaki ni karekea te reitaki.

Taan kairiiri a buokiia ataeinnaine n oota n tabeia ake a berita nako iai. Ngkana e na rang ibuobuoki aron ana mwakuri n ibuobuoki te ataeinnaine nakon temanna te aine, e kona ni katabeaki bwa te aine n ibuobuoki ngkana e tauraoi, e kona, ao e tau nako iai. E kona ni katabeaki ni moa man te ririki are e koro iai 14 ana ririki. Ataeinnaine a beku bwa toaia aine n te Bootaki n Aine (taraa 21.2.2).

Ngkana kairake n ikawai a kaaina te Bootaki n Aine, te beretitentii n te Bootaki n Aine e anganiia aia tai ni beku ao ni tibwaua korakoraia. Te beretitentii e kona naba ni buokiia ni katauraoi ni karaoi ao ni kawakin berita n te tembora aika tabu (taraa 27.1.1).

9.5

Taan kairiri n te Bootaki n Aine n te Titeiki

Te beretitenti n te titeiki e na wetea ma ni katabua te aine bwa e na mwakuri bwa te beretitenti n te Bootaki n Aine n te Titeiki. Ngkana e tau buburan te titeiki, te aine are e rineaki e na aanga aran temanna ke uoman aine aika ikawai bwa ana beku bwa kauntira ao temanna ae e na beku bwa te tia koroboki. A weteaki aine aikai ao ni katabuaki iroun te membwa n te beretitentii n te titeiki ke te kauntira ae rietaata are e a tia ni mwiokoaki. Ibukin rongorongon taben te beretitentii n te Bootaki n Aine n te titeiki ao te tia koroboki, taraa 6.7.1 ao 6.7.3.

A bootaki ni katoatai te beretitenti n te titeiki (ni katoa namwakaina) ma te beretitenti n te Bootaki n Aine n te titeiki ke ma beretitentii. A uaia ni marooro i aon Ana mwakuri te Atua ibukin te kamaiuaki ao te karietataaki. A maroroakina naba (1) rikirakeia ao kainnanoia aine n te titeiki (2) bowin te Bootaki n Aine, kiraati, ao waaki ni kakukurei.

Te beretitentii n te Bootaki n Aine n te titeiki e na tuangiia kaain te beretitentii n te Bootaki n Aine n te uoote tabeia bwa a na ibuobuoki ni kaira te mwakuri n te uoote ibukin te mwakuri n ibuobuoki, tibwauaan te euangkerio, ao katiteuanaakiia utu ibukin te maiu ae akea tokina rinanon te mwakuri n te tembora ao n rongorongon te utu (taraa 1.2.4). A karaoa aei iaan ana kairiiri te beretitentii n te titeiki. A mwiokoaki kauntira aika rietaata bwa a na ibuobuoki. Taraa 23.1 ao 25.2.5.

Ngkana iai n te titeiki aia komete kairake n ikawai, kaain te beretitentii n te Bootaki n Aine n te titeiki e beku iai. Te boraoi e bon eti ngkana te titeiki iai te komete ibukiia ikawai aika tuai iein. (Taraa 14.1.1.2.)

9.6

Kainibaire ao Kaetieti Aika Karinaki

9.6.1

Kaain te aro ae aki Toamau

Te beretitentii n te Bootaki n Aine e anga te tararua ae onoti nakoia membwa ake aki toamau. Ibukin rongorongon aron buokaia membwa aikai, taraa disability.ChurchofJesusChrist.org; taraa naba 38.8.27 i nanon te aeniboki aei.

9.6.2

Konabwai ni wareware ao ni koroboki

Ngkana e kainnanoaki, te beretitentii n te Bootaki n Aine e mwakuri ma te bitiobi, te beretitenti n aia kooram unimwaane, ao kauntiran te uoote ni buokiia membwa n reiakina te wareware ao te koroboki.