“6. Te Kairiiri n te Titeiki,” Aeniboki ni Kabuta: Te Beku n Ana Ekaretia Iesu Kristo Ibukiia Aika Itiaki ni Boong aika Kaitira (2024).
“6. Te Kairiiri n te Titeiki,” Aniboki ni Kabuta.
Tamnei
e taetaenikawai te tia kairiiri nakon te utu
6.
Kairiiri n te Titeiki
6.1
Te Kantaninga ibukin te Titeiki
Itaia e kabwarabwaraa Tion ni boong aika kaitira bwa te ooning ke te tabanaeko ae kamatoaaki man titeiki (taraa Itaia 33:20; 54:2). N te bong aei ao te Ekaretia e baireaki nakon titeiki. Titeiki n tatabeua nako iai inanoia uoote ao e kairaki iroun te beretitenti n te titeiki.
Te Uea e katei titeiki ibukin “ikotakin ni kabane” Ana aomata ao “ibukin te otanga ao … te kamanomano” man te aonaaba (Reirei ao Berita aika Tabu 115:6). Membwa ao taan kairiiri n te titeiki a uaia ni ira Ana mwakuri te Atua ibukin te kamaiuaki ao te karietataaki (taraa 1.2).
6.2
Beretitentii n te Titeiki
Te beretitenti n te titeiki e taui kiingin te nakoanibonga ni kaira ana mwakuri te Ekaretia inanon te titeiki (taraa 3.4.1). Ngaia ma ana kauntira a katea te beretitentii n te titeiki. A tabe ibukiia kaain te titeiki ma te tangira, ni buokiia bwa a na riki bwa taan iriira Iesu Kristo ni koaua.
Te beretitenti n te titeiki iai aua oin tabena n reirei aikai:
Ngaia bon te tia tararua n ibonga ae rietata n te titeiki.
E kairi Ana mwakuri te Atua ibukin te kamaiuaki ao te karietataaki n te titeiki.
Ngaia te tia moti ni kabuta.
E tararuai rekooti, taekan te mwane, ao bwaai.
Bukina bwa iai iroun te bereitenti n te titeiki kiing ibukin te nakoanibonga, tabeua taabe bon ti tabena ao akea riki ae kona ni karaoia. Ngkana e aki kona ni karaoi, e kona te kauntira n onea mwiina ni karaoi ana mwakuri ma ti are e taekinaki n te aeniboki aei. Te beretitenti n te titeiki ke a na kauntira e na reitaki ma te Beretitentii n te Aono ngkana iai ana titiraki ibukin te kauntira are e bonomwi ibukin te beretitenti n te titeiki.
Te beretitenti n te titeiki e na tibwai mwakuri aika mwaiti nakoia tabeman. N aron ana kauntira, kauntira aika rietaata, taan kairiiri n ana bootaki te titeiki, te tia koroboki ni kakoroi mooti n te Titeiki, ao te kiraaka n te titeiki ao te kiraaka n ibuobuoki n te titeki.
6.2.1
Te Ibonga Ae Rietata n Tararua
Te beretitenti n te titeiki bon te moan tia kairiri n te tamnei n te titeiki. E katea te banna ni katooto ibukin te titeiki man karaoakin ana mwakuri te Uea “ma te nano ae itiaki” (Motiaea 18:12). E anga reirei ao e kakukureia.
Te beretitenti n te titeiki bon ana reirei ae kakaonimaki Iesu Kristo. E bwaina te kokoaua nakon ana berita aika tabu. E kakaonimaki nakon kaainabana ao ana utu. E katea te banna ni katooto ae kororaoi ibukiia ana utu, te titeiki, ao te botannaomata. Ana kauntira bon mwaane aika titebo anuaia.
Te beretitenti n te titeiki e katauraoi kairiiri nakoia bitiobi ao taan kairiiri tabeman n te titeiki.
6.2.1.1
Nakoanibonga ae te Merekitereka
Te bereitentii n te titeiki a tararuaia ni kabane naake iai irouia te Nakoanibonga ae te Merekitereka inanon te titeiki.
Kooram Ibukia Ibonga Aika Rietata n te Titeiki. Te beretitenti n te titeiki bon te beretitenti n aia kooram ibonga aika a rietata n te titeiki. Ngaia ma ana kauntira bon beretitentii n te kooram anne. Te kooram ibukia ibonga aika rietata n te titeiki a raonaki ma ibonga aika rietata aikai:
Bitiobi ma aia kauntira
Kauntira aika rietata
Te tamanuea ae mwakuri ngkai
Membwa n te kooram n ibonga ae rietaata a na irii bootaki n aia uoote ngkana aki katabeaki n taabo riki tabeua.
Kooram n Unimwaane. Te beretitentii n te titeiki iai tabena ibukiia kaain te kooram n unimwaane (taraa 8.3.3.1).
Katabuakin te Nakoanibonga ae te Merekitereka. Te beretitenti n te titeiki e tararua aron kanakoakin te Nakoanbonga ae te Merekitereka. E tararuai naba katabu nakon nakoa n unimwaane ao ibonga aika rietaata (taraa 18.10.4).
6.2.1.2
Taian Bitiobiriki
Te beretitenti n te titeiki e na botaki ma bitiobiriki aika boou n reireiniia imwiin naba te tai are a tia ni weteaki iai. E reitinako n reirei ao ni kaungaia bitiobi n tain intawiu, bootaki, ao ni bwaai riki tabeua.
Membwa n te beretitentii n te titeiki a reireiniia bitiobiriki n aia mwakuri ibukiia ake iai irouia te Nakoanibonga ae te Aaron ao ataeinnaine.
6.2.1.3
Tamanuea n te Titeiki
Te beretitenti n te titeiki e tararua a na mwakuri te tamanuea n te titeiki. E karikirakea te reitaki ae tamaroa ma ngaia. Ibukin rongorongon wetean ao tararuaan te tamanuea n te titeiki, taraa 6.6.
6.2.1.4
Kauntira, Komete, ao Bootaki
Te beretitenti n te titeiki ngaia are e kaira te kauntira ae rietaata ao te kauntira n te titeiki. E kaira naba te komete n te kairiiri irouia kairake n te titeiki (taraa 29.3.8). E anganiia ana kauntira bwa a na tararuai bwaai aikai:
Te komete n te kairiiri irouia kairake n te titeiki (taraa 29.3.9)
Aia komete kairake ibukiia ikawai aika tuai iein n te titeiki
Aia komete kairake aika a tuai iein n te titeiki (te tabo are e baireaki iai)
Ni kabane titeiki beretitenti bon kaain te kauntira ni babaire (taraa 29.4).
Te beretitenti n te titeiki e bairei bootaki n te titeiki ake a koreaki inanon 29.3. Te beretitenti n te titeiki e tararuai bootaki n te titeiki ma ti ngkana e iri te Mataniwi ni Kabuta ke te Itingaun te Aono. A kona ana kauntira ni kairii bootaki aikai. A kona naba n tararuaia ngkana akea te beretitenti n te titeiki.
6.2.1.5
Weewete ao Kamotirawa
Katabean te titeiki beretitenti ibukin weewete ao kamotirawa a kabwarabwaraaki inanon mwakoro 30. E kona ni mwiokoia ana kauntira ao kauntira aika rietata bwa a na anga taian nakoa ao kamotirawa n aron are e kabwarabwaraaki inanon 30.8. Te beretitenti n te titeiki e na kanakoi wewete aikai. Ibukiia tabeman, e riai moa ni karekea te kariaia n aron ae noraki.
Kauntira n te Beretitentii n te Titeiki. Ngkana e weteaki te titeiki beretitenti ae boou, te Mataniwii ni Kabuta ke te Itingaun n te Aono ae tararua e na weteia ao ni kaokoroia ana kauntira, ake a kanakoaki araia iroun te titeiki beretitenti ae boou. Ngkana e na kamotirawaaki ke ni weteaki te kauntira nakon te beretitentii n te titeiki ae ngkai, e na kanakoa te rekomenteition te titeiki beretitenti rinanon Leader and Clerk Resources (LCR). E kona ni karaoa te intawiu, wewete ao ni kaokoroa te kauntira—ke ni kamotirawa te kauntira—imwiin karekean te kariaia man te Moan ni Beretitentii.
Te Tamanuea n te Titeiki. Te beretitenti n te titeiki e na kona n intawiu, ni wetea, ao ni katabua te tamanuea imwiin karekean te kariaia man te Kooram n te Tengaun ma Uoman. Taraa 6.6.1.
Bitiobi. Te beretitenti n te titeiki e anga araia mwaane ake a na weteaki bwa bitiobi. E na rekomente naba kamotirawakiia. E na kanakoi beeba ni kariaia rinanon te LCR. E kona ni wetea, katabua, ao ni kamatoa te bitiobi—ke ni kamotirawa te bitiobi—imwiin karekean te kariaia man te Moan Beretitentii. E na kanakoi naba kiing n te nakoanibonga ae irekereke ma te wewete aei. Taraa 30.7.
Beretitenti n te Kooram n Unimwaane. Te beretitenti n te titeiki e na weteia ao ni kamatoaia beretitenti n te kooram ni unimwaane. E na reitaki moa ma bitiobi. E na kanakoi naba kiing n te nakoanibonga ae irekereke ma te wewete aei. Taraa 8.3.3.1.
Te Beretitenti n te Bootaki n Aine n te Titeiki. Te beretitenti n te titeiki e na wetea ma ni katabua te beretitenti n te Bootaki n Aine n te titeiki.
Beretitentii n te titeiki ake aki kona ni kabongana te LCR a riai n reitaki ma aobitin te aono ni karaoi beba ni kariaia ngkana e kainnanoaki.
6.2.1.6
Bootaki n te Titeiki ao Burokuraem
Te beretitenti n te titeiki iai tabena ibukin Bootaki n Aine n te titeiki. E anganiia ana kauntira tabeia ibukiia Ataeinimwaane, Ataeinnaine, Moanrinan, ao bootaki n te Reirei n Tabati n te titeiki.
Membwa n te titeiki beretitentii ana bootaki n tainako ma beretitentii n taian bootaki ake a katabeaki nako iai. N taian bootaki aikai, a na:
Kakoaua ae a mataata raoi beretitentii n tabeia.
Bootaki n reirei iaon kainnanoia taan kairiiri n taian bootaki.
Ngkana e weteaki te beretitentii n ana bootaki te titeiki ae boou, te beretitentii n te titeiki e tibwauai reirei ao iango ni kaotaia n aia mwakuri n ibuobuoki.
N te United States ao Canada, e kona naba te bootaki ni beretitentii ae boou ni karekei kamataata man te bootaki ni kauntira ae tabangaki (taraa 5.1.2). N aono ake tabeua, e kona naba te beretitentii ae boou ni karekei kamataata mairoun te aetuwaitia n bootakin te aono (taraa 5.2.5.1). Te kamataata aei e mena iaan ana kairiiri te beretitentii n te titeiki. Te membwa n te titeiki beretitentii ke te kauntira ae rietaata are mwiokoaki e iria.
Te beretitenti n te titeiki e na anga naba te mwioko nakoia a na kauntira bwa a na tararua a na burokuraem te titeiki ngkana e kainnanoaki. A kona n raonaki bwaai aikai ma:
Te tieminari ao te intitute.
Burokuraem ibukiia kairake ikawai aika tuai iein.
Waaki ni kakukurei n te titeiki.
Katangitang.
Autinibotaki Batiritii.
Membwa n te beretitenti n te titeiki a na bootaki n tainako ma komete, kauntira aika rietaata, ao tibetieriti inanon burokuraem ake a tia ni katabeaki iai.
Tamnei
aia bootaki ataeinnaine ni kairiiri
6.2.1.7
Te Reitaki (Bwaburiki Abeati)
Te beretitentii n te titeiki e bairei aron waaki n reitaki n te titeiki. Membwa n te beretitenti n te titeiki iai tabeia aika kakawaki bwa a na tei ibukin te Ekaretia n te komiuniti. A na kakaea te anga ae a na kona ni karekea te reitaki ae tamaroa ma taan kairiiri n te komiuniti.
Te beretitenti n te titeiki bon te moan tia taetae ibukin te Ekaretia nakon te tabo ni kareke rongorongo iaon bwaai ake a kaineti ma te titeiki. E kona n tibwaua te tabe aei ngkana e kainnanoaki.
E kona te beretitenti n te titeiki ke te kauntira ae e a tia ni mwiokoaki ni bairea ao n tararua te kauntira n reitakiia n te titeiki. Te kauntira aei e na buokia taan kairiiri n te Ekaretia ni karekea te reitaki ma kaain te kaawa ao te kominuniti. E na buokiia taan kairiiri aikai ni kanakoraoa aia reitaki ma kaain te Ekaretia ao te botanaomata.
Te kauntira n te reitaki e na karina te taraekita n te reitaki n te titeiki, taraekita n ibuobuoki, ao te tibetieriti ngkana e kainnanoaki. A bon weteaki ma ni kaokoroaki iroun te beretitenti n te titeiki ke te kauntira ae mwiokoaki ke kauntira aika rietaata.
Iai naba te kauntira n reitaki n ana karinan te kauntira ni babaire (taraa 29.4). E waaki iaan a na kairiiri te Itingaun n te Aono ao e kairaki iroun te taraekita n te reitaki. Te kauntira n reitaki aei e buokia ni kanakoraoa te reitaki, bwaai aika a na karaoaki, ao kangaanga aika a irekereke titeiki aika e riaon teuana mwaitina. Te taraekita n te kauntira aei e anga boutoka ao kataneiai nakoia a na kauntira n reitaki te titeiki.
Aron tein te kauntira n reitaki e kaokoro n Aonon Utah. Itingaun n te Aono n Aonon Utah a kona ni katauraoia beretitenti n titeiki ma bwanin rongorongon te mwakuri aei.
Kairan Ana Mwakuri te Atua Ibukin te Kamaiuaki ao te Karietataaki n te Titeiki
E tararuaa Ana mwakuri te Atua te beretitenti n te titeiki ibukin te kamaiuaki ao te karietataaki n te titeiki (taraa mwakoro 1). E anga te kaetieti ao e kaungaia taan kairiiri n te titeiki ao uoote ao membwa n te mwakuri aei. A na kauntira ao taan kairiiri ake tabeman a na buokia.
E buokiia membwa ni maiuakina te euangkerio ao ni karikirakea korakoran tamneia. E reireiniia n tataro ao ni kamatebwai booki aika tabu. E reireiniia naba taekan berita aika a na karekei ngkana a karekei otenanti n te kamaiu ao n te karietataaki. E kaungaia bwa a na karinei aia berita.
Te beretitenti n te titeiki e kakorakoraia utu. E kaungaia bwa a na tataro ao ni botaki n reirei taekan te euangkerio, ao n tain te botaki n utu n te tairiki. E reirei n te taeka ao n te banna ni katooto ae a kona wewete n te Ekaretia ni kakoroaki bukiia n aki bitii man taben te utu. E na kakoaua naba bwa waaki ni kakukurei inanon te Ekaretia a na boutokaa aia kekeiaki kaaro ni karikirakeia natiia n te kawaiae raoiroi.
Irarikin are buokaia membwa bwa a na maiuakina te euangkerio, e na tararuai iteran Ana mwakuri te Atua te beretitenti n te titeiki ibukin te kamaiuaki ao n te karietataaki inanon te titeiki. Te katooto, e na:
Buokiia taari ni katauraoia ni karekea te Nakoanibonga ae te Merekitereka (taraa 18.10.1).
E na kairi mwakuri n tabeakiniia naake a kainnano n te titeiki (taraa 22.9.1
Tararua te mwakuri ni mitinare n te titeiki ao ni kaungaiia membwa bwa a na tibwaua te euangkerio (taraa 23.5).
Tararuai mwakuri ni kakorakoraia membwa aika a boou inanon te titeiki (taraa 23.5).
Karaoa te intawiu ibukin te mwakuri ni mitinare (taraa 24.4.2).
Tarai mwakuri n te tembora ao n rongorongon te utu n te titeiki (taraa 25.3.1).
Buokiia membwa ni katauraoia ni karekei aia otenanti n te tembora (taraa 27.1).
Ma te beretitentii n te Bootaki n Aine n te titeiki, reireiniia ao boutokaia kaain te kooram n unimwaane ao te beretitentii n te Bootaki n Aine ni katabeaia ibukin te mwakuri ni mitinare (taraa 23.6.2) ao te mwakuri n te tembora ao n rongonrongon te utu (taraa 25.2.2).
6.2.3
Te Tia Moti Ni Kabuta
Te beretitenti n te titeiki bon te tia moti ni kabuta n te titeiki (taraa Reirei ao Berita aika Tabu 107:71–74). E tauii kingin te nakoanibonga ni karekei kairi mai karawa ao ni karaoi babaire ni kaineti ma aron maiuia n tamnei ao n rabwataia membwa n te titeiki. N te tabe aei, iai tabena n aron aikai:
Karaoi intawiu ibukin n aron ae kabwarabwaraaki inanon 31.2. E kona naba ni kariaia ana kauntira bwa a na karaoi intawiu aika riai ni karaoaki (taraa 31.2.2).
Marooro membwa n te titeiki aika a ukoukori kairiiri n te tamnei, aika iai aia kaangaanga aika a rangi ni kangaanga, ke ake a tia ni karaoi buure aika kakaiaki. Ibukin taian kainibaire, taraa 31.1.
Karaoi membwatibu kauntira ibukiia membwa ngkana a tia membwa ni karaoi buure aika kakaiaki (taraa mwakoro 32
Ni bwaai ake e kainnanoaki iai te kariaia man te Moan Beretitentii, te beretitenti n te titeiki e karaua raoi ni iangoa te bwai are e tangiraki. E intawiuna te aomata n taraa aron taun teuanne ke neienne.
Imwiin te intawiu, te beretitenti n te titeiki e kanakoa te beeba are e kanoaia nakon te Moan Beretitentii ti ngkana e kona ni kanakoa taekana ibukin te kariaia. E kabwarabwara bukina ngkai e anga ana boutoka.
Te beretitenti n te titeiki e tararuai rekooti, taekan te mwane, ao bwain te titeiki. E kona n anga angiin te mwakuri n aron te mwakuri ma rekooti ao te mwane nakoia ana kauntira ao ana kiraaka. E mwiokoa te kauntira ae rietata bwa e na riki bwa te tia tei ibukin kateitei n te titeiki ao ni ibuobuoki n tararuai bwaai nako.
Kaokoro imarenan aia Kariaia Beretitenti n te Mwakoro ao Ma Beretitenti n te Titeiki
N aia mwakoro membwa n tatabeua nako, te aomata are iai irouna te Nakoanibonga ae te Merekitereka e na weteaki bwa te beretitenti n te mwakoro. Iai irouna kiing n te nakoanibonga aika a kainnanoaki n te tararua (taraa 3.4.1.1). E beku riki kanga n aron te beretitenti n te titeiki ma kaokorona aikai:
E weteaki ao e kaokoroaki iroun te beretitenti n te mition, imwiin kariaiakakana iroun te Beretiteintii n te Aono (taraa 30.8.4). E weteaki te titeiki beretitenti ao e kaokoroaki iroun te Mataniwi ni Kabuta ke te Itingaun n te Aono (taraa 30.8.3).
Te beretitenti n te mwakoro e kona n ae te unimwaane ke te ibonga ae rietata. E riai te beretitenti n te titeiki bwa te ibonga ae rietaata.
Te beretitenti n te mwakoro tiaki ngaia te beretitenti n te kooram n ibonga ae rietaata. A baireaki kooram aikanne ti inanon taian titeiki.
Te beretitenti n te mwakoro e tararua iaoia ni kabane naake iai irouia te nakoanibonga n te mwakoro. E ngae n anne, te mition beretitenti ngaia te ibonga n tararua.
Man ana kariaia te beretitenti n te mition, te beretitenti n mwakoro e kona n intawiuna te tari ni katabuaki bwa te unimwaane. Te kariaia aio e riai n anga ni kaineti ma aroia n tatabeman. Te beretitenti n te mwakoro ke temanna iaan ana kairiiri e kona naba (1) ni kaota te tari ibukin kamatoaana ao (2) ni karaoa te katabu (taraa 18.10.1.3, 18.10.3, ao 18.10.4). Ma, te beretitenti n te mwakoro e aki kona ni katabua te tamanuea, ibonga aika rietaata, ke bitiobi.
Man ana kariaia te beretitenti n te mition, te beretitenti n te mwakoro e kona ni karaoa te kaokoroaki ibukin te beretitenti n te mwaanga (taraa 18.11). Te kariaia aio e riai n anga ni kaineti ma aroia n tatabeman.
E aki kamotirawaia mitinare aika bwanin aia tai. E ngae n anne, e kona n iria ma te membwa n te beretitenti n te mition n tain te intawiu ni kamotirawa. Ngkana te mwananga ke tianakin te tai e karika te kangaanga iroun te membwa n te beretitenti n te mition ni kamotirawa te mitinare anne, te beretitenti n te mition e kona ni kariaia te beretitenti n te mwakoro bwa e na karaoia (taraa 24.8.2).
Te beretitenti n te mwakoro e aki karaoi intawiu ibukin beeba ni kariaia nakon te tembora ke n tiainai beeba ni kariaia nakon te tembora (taraa 26.3.1).
E aki baronga te kauntira n te membwatibu ti ngkana e kariaiakaki iroun te beretitenti n te mition (taraa 32.9.5).
E aki taneiai ni mwakuri ma te Beretitentii n te Aono. Irarikina, e mwakuri rinanon te beretitenti n te mition.
Ni kangaanga aika onoti, e kona te beretitenti n te mwakoro ni kariaiakaki ni kariaia, ni katabua, ao ni kamotirawaia mitinare. E kona naba ni kariaiakaki ni karaoi intawiu ibukin beeba ni kariaia nakon te tembora ao n tiaina te beeba ni kariaia anne. E kona naba ni kariaiakaki ni kaokoroia ana kauntira. Ngkana e namakinna te Beretitentii n te Aono bwa e riai ni karekea te kariaiakaki aei, a na anga arana nakon te Moan Beretitentii. Ngkana e kanakoaki te kariaia, te kariaiakaki anne bon nakon te aomata tiaki te nakoa. Ngkana e a tia ni weteaki te beretitenti ae boou, te kariaiakaki aei e aki kanakoaki nakoina.
6.4
Te Tia Koroboki ni Kakoroi Mwiin Mooti n te Titeiki, Kauoman n Tia Koroboki ni Kakoroi Mwiin Mooti n te Titeiki, Te Kiraaka n te Titeiki, ao Kauoman ni Kiraaka n te Titeiki
6.4.1
Te Tia Koroboki ni Kakoroi Mwiin Mooti n te Titeiki ao Kauoman n Tia Koroboki ni Kakoroi Mwiin Mooti n te Titeiki
Te beretitenti n te titeiki ke te kauntira ae e mwiokoaki e wetea ao e kaokoroa te tia koroboki ni kakoroi mwiin mooti n te titeiki. E riai n iai irouna te Nakoanibonga ae te Merekitereka ao ni iai ana beeba ni kariaia nakon te tembora ae tuai bane taina.
Iai taben te tia koroboki ni kakoroi mooti n aron aikai:
Bootaki ma te beretitenti n te titeiki ao ni katauraoi akenta n aron are e a tia n tuangaki.
Beeku bwa te membwa n te kauntira n te titeiki ao n irii bootaki n te kauntira ae rietaata. N aron tuangakina iroun te beretitenti n te titeikii, ririmwiin mwioko ake a karaoaki inanon boowi aikai.
Tararuai mwakuri n te titeiki imarenaia beretitentii n te titeiki, te kauntira ae rietata, ao tabeman riki taan kairiiri n te titeiki.
Bairei naba tain marooro ibukiia beretitentii n te titeiki.
Kaongoa te beretitentii n te titeiki ibukiia membwa ake a rin n te taanga ni ngkana e angaraoi ke ake a kaman rin n te taanga ni ngkana e angaraoi. Iaan ana kairiiri te beretitentii n te titeiki, ibuobuoki ni kamataata ibukiia membwa n te titeiki ake a rin n te taanga ni buaka ngkana e angaraoi (taraa 38.9.3).
Karaoi kataneiai nakoia taan koroboki ni kakoroi mooti ni waekoa imwiin te tai are a weteaki iai. Katauraoi kaetieti aika a teimatoa ngkana a kainnanoaki.
E kanakoi rongorongo ake a karekeaki mai irouia taan mwakuri n te Ekaretia ao taan ibuobuoki nakoia naake e bon kaineti nakoia ae taan kairiiri n te titeiki ao n te uoote, n aron tuangana iroun te beretitenti n te titeiki (taraa 38.8.9).
Temanna ke uoman aika kauoman n tia koroboki ni kakoroi mwiin moti a na weteaki ngkana a kainnanoaki. A weteaki man kaokoroaki iroun te membwa n te beretitentii n te titeiki. Taari aikai a riai ni iai aia beeba ni kariaia nakon te tembora ae tuai bane taina.
6.4.2
Te Kiraaka n te Titeiki ao Tia Ibuobuoki ni Kiraaka n te Titeiki
Te kiraaka n te titeiki e weteaki man kaokoroaki iroun te titeiki beretitenti ke te kauntira are e mwiokoaki. Bon te membwa n ana kauntira te titeiki. E kona naba te tia ibuobuoki ni kiraaka n te titeiki ni weteaki. Te beretitenti n te titeiki ke te kauntira ae mwiokoaki e weteia ao e katabuia. Ana mwakuri te kiraaka n te titeiki ao te tia ibuobuoki ni kiraaka n te titeiki a kabwarabwaraaki inanon 33.3.2 ao 33.3.3.
6.5
Te Kauntira Ae Rietaata
Te titeiki beretitentii e weteia 12 ibonga aika rietaata ni kaaina te kauntira ae rietaata n te titeiki (taraa Reirei ao Berita aika Tabu 102:1; 124:131). Ngkana e weteaki te unimwane ni mwakuri n te kauntira ae rietata, e kamatoaaki bwa te ibonga ae rietata imwain ae e kamatoaki.
Iaan ana kairiiri te titeiki Beretitentii, kauntira aika rietaata a ibuobuok ma Ana mwakuri te Atua ibukin te kamaiuaki ao te karietataaki n te Titeiki. A kabwarabwaraaki tabeia inanon mwakoro aikai.
Te kauntira ae rietata a na aki bootaki n te kurubu ti ngkana te membwa n te beretitenti n te titeiki e mena ikekei n tararua.
6.5.1
Onean Mwiin te Titeiki Beretitentii
Te beretitentii n te titeiki e mwiokoa temanna te kauntira ae rietaata nakon uoote n tatabeua nako inanon te titeiki.
Te beretitentii n te titeiki e katabea naba te kauntira ae rietaata irouia kaain te kooram n unimwaane n tatabeua nako inanon te titeiki. Inanon te tabe aio, kauntira aika rietaata a kataneiaia beretitentii n te kooram ni unimwaan aika tibwa weteaki. E raonaki aio ma katauraoan kaetieti man mwakoro 1–4 ao8 n te aeniboki aei.
Kauntira aika rietaata aika a katabeaki nakoia kaain te kooram n unimwaane a na botaki n tainako ma taan kairiiri n te kooram n unimwaane ni karaoi bwaai aikai:
N atai kainnanoia.
Anga te boutoka.
Reireiniia tabeia, n raonaki ma ake ibukin te mwakuri ni mitinare (taraa 23.6.2) ao te mwakuri n te tembora ao n rongorongon te utu (taraa 25.2.2).
Kanakoi rongorongo man te beretitenti n te titeiki.
Maroroakinna bwa ko na kanga ni buokiia membwa n te kooram aika a kainnanoa aia otenanti are imwiina. Te rongorongo aei e tauraoi nakoia taan kairiiri n te kooram n unimwaane iaon te LCR.
N aron ae kainnanoaki ke ni kaoaki, a kaei botakin te kooram n unimwaane ao te kooram n te beretitentii. N reken taina, te beretitentii n te kooram e kona ni kaoa te kauntira ae rietaata bwa e na raoniia ngakana a nako ni karaoa te ibuobuoki nakoia kaain te uoote.
Ngkana a kaoaki ke n anganaki te mwakuri, kauntira aika rietaata a na irii bootakin te bitiobiriki ao te kauntira n te uoote.
Te beretitenti n te titeiki a kona n angan te kauntira ae rietaata bwa e na tuangiia aomata aikai aia mwakuri ibukin te tembora ao rongorongon te utu ao te mwakuri ni mitinare:
Beretitentii n aia kooram unimwaane
Taan kairiiri n te mition n te uoote
Taan kairiiri ibukin te uoote n te tembora ao rongorongon te utu
Temanna ke e raka riki kauntira aika rietaata a kona ni katabeaki bwa a na kairi mwakuri aikai inanon te titeiki. E ngae n anne, kauntira aika rietaata ni kabane aikai tabeia ibukin uoote ao kooram n unimwaane ake a tia ni mwiokoaki iai.
Kauntira aika rietata ana maroroakina aron ao ni kamatoai ana babaaire te titeiki Beretitentii ni katabuia taari nakon nakoa n te unimwane ao te ibonga ae rietata. Te beretitenti n te titeiki e kona ni kariaia te kauntira ae rietaata n onea mwiina ngkana a katabuaki mwaane nakon aobitin te unimwane ao te ibonga ae rietata. Kauntira aika rietaata aikai a na kakoaua bwa a karaoaki raoi otenanti.
Kauntira aika rietaata a na reirei naba ma te beretitenti n te titeiki ao ni kamatoai aia babaire ni kamatoai aia wewete nakoia membwa. Te beretitenti n te titeiki a na kariaia kauntira aika rietaata ni kanakoi tabeua wewete, uotiia membwa tabeman bwa a na kamatoaaki, ao ni katabuia tabeman membwa. (Taraa 30.8.)
Te beretitentii n te titeiki e na katabeia kauntira aika rietata ni mwakuri ma te bootaki n Ataeinnaine ao te Monrinan n te titeiki. Ngkana te membwa n te beretitentii n te titeiki e bowi ma temanna man beretitentii aikai, te kauntira aika rietaata e na ira naba te bowi aio. Kauntira aika rietaata ake a mwiokoaki a na iri naba boowi ni kairiiri n te titeiki ibukin bootaki aikai.
Te beretitentii n te titeiki e kona ni katabeia kauntira aika rietaata bwa a na ibuobuoki ma burokuraem aika koreaki inanon 6.2.1.6. A koba naba n angan te kauntira ae rietaata bwa e na ibuobuoki ma kainnanoia membwa aika mwauku (taraa 38.8.27).
Te titeiki Beretitentii e na kona ni katabea ana kauntira ae rietata n onea mwiia n taetaena inanon bootakin toa ao katauraoi ake tabeua. Te beretitenti n te titeiki e na bairea mwaitin taian taetae aikai. E bon aki riai nakoia kauntira aika rietaata bwa a na taetae ni bootakin te toa ni katoa namwakaina. Te beretitentii n te titeiki e kona naba ni mwiokoia membwa n te beretitentii ni bootaki nako n te titeiki bwa a na taetae n aron baireaia aikai (taraa 6.7.1 ao 6.7.2).
Tamnei
mwaane a taetaenikawai
6.5.2
Mwakuri iaon taian Kauntira ao Komete n te Titeiki
Ni kabane kauntira aika a rietaata a mwakuri n te kauntira n te titeiki.
N ni kangaanga aika tianaki, kauntira aika reitaata a na irii membwatibu kauntira n te titeiki (see 32.9.2).
Te titeiki Beretitentii e na katabeia kauntira aika rietata ni beku iaon komete ake tabeua n aron kainanoakina. Te katooto, kauntira aika rietaata aika a mwiokoaki bwa a na mwakuri ma kooram n unimwaane a beku n te komete ni kairiiri irouia ikawai n te titeiki (taraa 29.3.8).
6.5.3
E beku bwa Taan Kairiiri ni Bootakin te Titeiki
Te beretitenti n te titeiki e na wetea ma ni kaokoroa te kauntira ae rietaata n riki bwa te beretitenti n Bootaki n Ataeinimwaane n te titeiki (taraa 6.7.2). A wetea ao ni kaokoroa temanna riki te kauntira ae rietaata bwa e na riki bwa te beretitenti n te Reirei n Tabati n te titeiki (taraa 6.7.1).
6.6
Tamanuea n te Titeiki
Te tamanura bon te nakoa inanon te Nakoanibonga ae te Merekitereka. A weteaki ao a katabuaki tamanuea bwa a na anga kakabwaia n te tamanuea nakoia membwa aika a tau n te Ekaretia. Te tiekition aio e kabwarabwarai taben te beretitenti n te titeiki ibukin te tamanuea n te titeiki. Ibukin rongorongon taekan ana kakabwaia te tamanuea, tarai booki aika oti aikai:
Bootaki n Reirei ao Kataneiai ni Katobibia te Aonaaba: Te Tamanuea
Taraa Rongorongo ao Katautau ibukiia Tamanuea ibukin rongorongon:
Tamanuea ake anganaki te aki onimakinaki n anga te kakabwaia n nakoana.
Tamanuea ake a mwaing nakon te titeiki teuana.
6.6.1
Wetean, Kamatoan, ao Katabuakin te Tamanuea n te Titeiki
E riai te tamanuea n tau ni karekea te Nakoanibonga ae te Merekitereka. E riai n tau otana n te eaungkerio ao ni kainamakina te Tamnei. E na riai n tia ni karekea ana kakabwaia n te tamanuea. N aron ae bwainaki e riai ni koro ana ririki 55 ke e raka riki. E riai n tia ni mareaki ngkana e weteaki.
Te Kooram n te Tengaun ma Uoman e kaira te wewete ibukin te tamanuea n te titeiki (taraa Reirei ao Berita aika Tabu 107:39). E kona n anga aran ana aomata te beretitenti n te titeiki are e na weteaki. E na kanakoi beeba ni kariaia rinanon te LCR. Ngkana e karaoa te beba ni kariaia, e riai te beretitentii n te titeiki n aki mamatam ao n tataro ibukin kairakina iroun te Tamnei. A riai a na kauntira ni kariaia te beba ni kariaia.
Ngkana te Kooram n Abotoro n te Tengaun ma Uoman a kariaia te beba ni kariaia, e kona te beretitenti n te titeiki ni kariaiakaki bwa e na intawiuna ao ni wetea te tamanuea. Imwiina e na uotarake aran te tamanuea ibukin te kamatoa n te tetere ni kabuta n ana maungatabu te titeiki are imwiina.
Te beretitenti n te titeiki e na katabua te tamanuea. E na aki anganako te tabe aei nakon te kauntira. Akea temanna ae riai n tei ma ngaia n tain te katabu. Te tamanuea ae boou e na katabuaki moa nakon te nakoa anne ao imwiina e na kamatoaki bwa e na beku n te titeiki ae onoti. Te tamanuea are e a tia ni katabuaki are e a tia ni manga okira nakoana e na aki manga katabuaki. E ngae n anne, e a tia ni kamatoaaki.
E riai te katabu n tauaki mwiina inanon te LCR imwain ae manga kona te tamanuea n nakon bwaai ni mwakuri n te aonrain ibukiia tamanuea.
Te tamanuea ae mwakuri ngkai bon kaain te kooram n te titeiki irouia ibonga aika a rietaata.
6.6.2
Wetean te Kauoman n Tamanuea n te Titeiki
Te Kooram n te Tengaun ma Uoman a taneiai n aki kariaia weteakin te kauoman tamanuea ibukin te titeiki ni karokoa temanna te tamanuea e aki kona n anga mwaitin kakabwaia aika a butiaki. Ke te Kooram n te Tengaun ma Uoman e na kariaia temanna riki te tamanuea bukina bwa te titeiki:
E bon rangi ni bubura a na tabo.
Raoniia membwa ake aki taetae n te taetae are angiia ae a taetae iai.
Ngkana te titeiki e kariniia membwa aika a kakaokoro aia taetae, bitobi ao beretitentii n te titeiki a na anga aia kariaia n nakon te tamanuea n te titeiki ae uakaan riki are e kona n anga te kakabwaia n oin ana taetae te membwa.
Tamnei
te ataeinnaine e karekea te kakabwaia
6.6.3
Reireian te Tamanuea ae e a Tibwa Weteaki n te Titeiki
Te beretitenti n te titeiki e na reireina te tamanuea ae tibwa weteaki imwain ae anga kakabwaia. E reireina te tamanuea tabun, ao aron kakawakin nakoana. E rinanon raoi kaetieti ma te tamananuea inanon booki aikai:
Rongorongo ao Katautau ibukiia Tamanuea
Bootaki n Reirei ao Kataneiai ni Katobibia te Aonaaba: Te Tamanuea
6.6.4
Kairan ana Mwakuri te Tamanuea n te Titeiki
Te beretitenti n te titeiki e na tararua ana mwakuri te tamanuea ake a kabwarabwaraaki inanon Information and Suggestions for Patriarchs (Rongorongo ao Katautau ibukiia Tamanuea). E aki anga te tabe aio nakon temanna a na kauntira. Te Tamanuea e na buokaki man reitakina ae kaan ma ana beretitenti n te titeiki.
Te beretitenti n te titeiki e na boowi ma te tamanuea uoua te tai n te ririki. A maroroakin a na namakin te tamanuea ibukin te mwakuri, maiun ao a na warebea te utu, ao bwaai riki tabeua ake e kainnanoa te reirei iaona.
Tao ni katoa uoua te tai n te ririki, te beretitenti n te titeiki e na rinanoi kakabwaia ake e a tia n anga te tamanuea. N aron kainnanoana, e na kona ni kataua aron kanoan ana kakabwaia te tamanuea.
Te beretitenti n te titeiki e na kakoaua bwa kakabwaia ake a koreaki a anganaki taan karekea n akea te iremwe. E na kakoaua naba bwa a na bane ni kanakoaki kakabwaia ni kabane nakon ana etekuata te Ekaretia. A riai ni kanakoaki kakabwaia rinanon te Te Tititem n Ana Kakabwaia te Tamanuea iaon ChurchofJesusChrist.org. Ngkana e aki kona te tititem aei n ataaki, a riai kakabwaia ni merinaki nakon aetureti aikai teuana inanon onoua namwakaina:
Church History Library
Attn: Patriarchal Blessings
15 East North Temple Street
Salt Lake City, UT 84150-1600
6.6.5
Kainakin ana Kakabwaia te Tamanuea
Te beretitenti n te titeiki e na kakoaua bwa imwiin are e a tia te tamanuea n angan te aomata are e karekea katotoon ana kakabwaia te tamanuea ao ni kanakoa nakon ana etukuata te Ekaretia, ni kabane beeba ake tabeua ao katooto n te iti a bane n tia ni kanakoaki ke ni kamaunaaki. E na kakoaua te tamanuea bwa kakabwaia ake a kamaunaaki man a na kaombiuta aki kona ni manga anaaki.
6.6.6
Tamanuea Ake A Weteaki nakon te Nakoa Teuana n te Ekaretia
E na aki kona ni weteaki te tamanuea nakon ana tabo n tararua te Ekaretia ma ti ngkana a kariaia te wewete i mwain karaoana te Kooram n Abotoro n te Tengaun ma Uoman. A raonaki nakoa aikai iroun te membwa n te bitiobiriki, te kauntira ae rietaata, ke te titeiki, mition, ke te beretitentii n te tembora. Ngkana e a kanakoaki te kariaia, te tamanuea e na anganaki te nakoa ma e na aki karaoia.
E kona te tamanuea ni weteaki n nakoa ake tabeua n akea te kariaia man te Kooram n te Tengaun ma Uoman. E kona naba ni beku bwa te tia kabaebae ke te tia mwakuri iaon otenanti n te tembora.
6.6.7
Tauan Mwiin ana Kakabwaia te Tamanuea
Te beretitenti n te titeiki ke temanna mai irouia a na kauintira e na wetea ao ni kamatoa te membwa man te titeiki ae tau, ao e konabwai ni koroi a na kakabwaia te tamanuea, ti ngkana e kona te tamanuea ni koroi bon irouna ao e tangiria ni karaoia. E kona n ae reke iaon temanna te tia koroboki ae na weteaki ngkana e kainnanoaki.
E riai te tia korea te korea te taeka ni kauringaki bwa kakabwaia ni kabane a tabu ao a riai ni karabaaki n aki taekinaki. Akea katotoon te kakabwaia ae na tuaki iroun te tia korea te taeka ke te tamanuea. (Taraa 6.6.5.)
6.7
Bootaki n te Titeiki
Bootaki n Aine, Ataeinnaine, Moanrinan, Reirei n Tabati, ao Ataeinimwaane n te titeiki a bane ni kairaki iroun te beretitenti. Beretitenti aikai a beku iaan ana kairiiri te beretitentii n te titeiki. N titeiki aika bubura, te beretitenti n te bootaki e kona n tabeka aran temanna ke uoman kauntira ao te tia koroboki bwa e na beku ma teuanne ke neienne. Te beretitentii n te titeiki e na iangoi aara akanne.
Oin raoi tabeia taan kairiiri aikai bwa a na buoka te beretitenti n te titeiki ao n reireina ao ni boutokaia beretitentii ni bootakin te uoote. Ana aki kakoroa bukin te tabe are na kakoroaki nanona n te uoote ke n te utu. A na aki naba karekei katabeaia riki tabeua ibukiia beretitentii ni bootakin te uoote.
6.7.1
Beretitentii n te Bootaki n Aine, Ataeinnaine, Moanrinan, ao Reirei n Taabati n te titeiki
Te beretitenti n te titeiki e na wetea ma ni katabua te titita bwa e na riki bwa te beretitenti n te Bootaki n Aine n te Titeiki. Teuanne ke te kauntira are e a tia ni mwiokoaki e na weteia ao ni kamatoaia titita ake a na riki bwa beretitenti irouia Ataeinnaine ao te Moanrinan n te titeiki. Ngkana kauntira ao taan koroboki a weteaki, te membwa n te beretitentii n te titeiki ke te kauntira ae rietaata are e a tia ni mwiokoaki e weteia ao ni kamatoaia.
Te beretitenti n te titeiki e na wetea ma ni kaokoroa te kauntira ae rietaata n riki bwa te beretitenti n te Reirei n Tabati.
Kaain te beretitentii aikai iai tabeia n aron aikai:
Beku n ana kauntira te titeiki (ti beretitenti). Ibuobuoki nakon mwakuri ni karekea te onimaki ao ni kakorakoraia n tatabemaniia ao aia utu inanon te titeiki.
A butimwaia beretitentii n ni botakin te uoote aika tibwa weteaki. E raonaki aei ma katauraoakin kaetieti man mwakoro 1–4 n te aeniboki aei ao te mwakoro ibukin aia bootaki.
Imwiin boutoka ao reirei aika reitinako. Reitaki ma beretitentii ni bootakin te uoote n taainako n atai kainanoia, ni maroroakina kainanoia membwa ake a beku ibukiia, ao n taekin rongorongo man te beretitenti n te titeiki. Baireia ma taan kairiiri n te uoote ni kaei aia boowi ao aia kiraati n taainako.
Reireiniia kaain te beretitentii ni botakin te uoote n tain aia bowi taan kairiiri n te titeiki (taraa 29.3.4). Aio e kakaraoaki teuana te tai n te ririki. Te beretitentii n te titeiki e kona ni kariaia te kuoua ni botaki ngkana e na akea te kangaanga ae na kona n riki nakoia naake a iria. A kona bitiobi ni bubuti kaetieti riki tabeua ibukiia beretitentii ni bootakin te uoote.
A na uaia ni botaki n reirei n tainako n oin aia bootaki ni beretitentii (ngkana a weteaki kauntira). Reitaki n tainako ma te membwa n te beretitentii n te titeiki are e tabeakina aia mwakuri.
Kaei bootaki n te kauntira ni babaire ngkana ko kaoaki iroun te Itingaun n te Aono (taraa 29.4).
Taetae n tain bootakin te toa ao bootaki riki tabeua ngkana ko kaoaki iroun te beretitentii n te titeiki.
N titeiki aika bubura, kanakoi beba ni kariaia nakon te beretitenti n te titeiki ibukiia kauntira ao tabeman riki ake a na waeteaki bwa a na beku n aia botaki ngkana e kainnanoaki. Ibukin taian kairi, taraa 30.1.1 ao 30.1.5.
Te Bootaki n Aine n te titeiki, Ataeinnaine, ai beretitentii n te moanrinan a na bairei waaki ni kakukurei aika ikotaki ibukin aia botaki. Waaki ni kakukurei aikai a kona n raonaki ma aine, kairake n aine, ao ataeinnaine 8 ke ae raka riki ana ririki n te titeiki. A kona naba aekan waaki ni kakukurei aikanne ni karaoaki n titeiki aika mwaiti. Beretitentii a na botaki ni marooro n reirei ni kanakoi waaki ni kakukurei aika ikotaki nakon te beretitentii n te titeiki (taraa 20.3.1). Waaki ni kakukurei aikanne e na onea mwiin teuana aia waaki ni kakukurei te bootaki n aine n te titeiki (taraa 6.7.1.1).
6.7.1.1
Taben Riki Tabeua te Beretitentii n te Bootaki n Aine n te Titeiki
Aikai taben riki te beretitentii n te Bootaki n Aine n te titeiki:
Beku n ana komete ni kairiiri ikawai n te titeiki (taraa 29.3.8). Ngkana e weteeaki te tia koroboki, e kaoaki naba neienne.
Reireiniia beretitenti n te Bootaki n Aine n te uoote n te mwakuri n ibuobuoki ao tabeakinaia naake iai kainnanoia. Buokiia bwa a na ataa tabeia ni buokiia bitiobi ma bwaai n rabwata ao n riki n toronibwai.
Reireiniia kaain te beretitenti n te Bootaki n Aine n te uoote n tabeia ibukin te mwakuri ni mitinare (taraa 23.6.2) ao te mwakuri n te tembora ao n rongorongon te utu (taraa 25.2.2).
Kakorakoraia titita aika kairake n ikawai aika tuai iein n te titeiki. Ngkana iai ana komete te kairake ni ikawai aika a tuai n iein, te membwa n te beretitentii e na mwakuri iaona. E bon koaua naba aio ngkana te titeiki iai te komete ibukiia ikawai aika tuai iein. (Taraa 14.1.1.2.)
E tararuai naba aia kekeiaki Bootaki n Aine n tain kabuanibwai aika karina.
Te beretitentii n te Bootaki n Aine n te titeiki, a na kona ni bairei ao ni karaoa teuana ke uoua bootakin te Bootaki n Aine ni katoa ririki ibukiia titita inanon te titeiki. Boowi aikai a karaoaki iaan a na kaetieti te beretitentii n te titeiki. A kona n raonaki ma te mwakuri n ibuobuoki, taian kiraati, mwakuri aika katauaki, maungatabu, ao uekitiaobu. Te beretitentii n te Bootaki n Aine n te titeiki e na kona ni katei komete n ibuobuoki n aron kainanoana.
6.7.1.2
Taben Riki te Beretitentii n Ataeinnaine n te Titeiki
Te beretitentii n te bootaki n Ataeinnaine iai tabena n aron aikai:
E beku n aia komete ni kairiiri kairake n te titeiki (taraa 29.3.9). Ngkana e weteeaki te tia koroboki, e kaoaki naba neienne.
Iaan a na kaetieti te beretitentii n te titeiki, e bairei ao ni babairei aia waaki ni kakukurei ao ni kaembwa Ataeinnaine.
6.7.1.3
Taben Riki te Beretitentii n te Moanrinan n te Titeiki
Te beretitentii n te Moanrinan n te titeiki e kona ni bairei waaki ni kakukurei n te titeiki ibukiia ataei aika 8 nakon 11 aia ririki. A kona waaki ni kakukurei aikai ibukiiia ataeinnaine, ataeinimwaane, ke ni kauoua. A na irii kainibaire inanon 12.2.1.3.
Tamnei
a mwakuri aine ma ataei
6.7.1.4
Taben Riki te Beretitentii n te Reirei n Tabati n te Titeiki
Te beretitentii n te Reirei n Taabati n te titeiki iai riki tabena aikai:
A mwakuri bwa tibeiteriti inanon a na kekeiaki te titeiki ni karikirakea kamatebwaian ao reiakinan te euangkerio.
Bairei tienta ni bwaai inanon te titeiki ngkana e kona (taraa 13.7.2).
6.7.2
Te Beretitentii n te Bootaki n Ataeinimwaane n te Titeiki
Te beretitenti n te titeiki e na wetea ma ni kaokoroa te kauntira ae rietaata n riki bwa te beretitenti n Bootaki n Ataeinimwaane n te titeikii. Te membwa n te kauntira ae rietaata are a katabeaki nakon te Bootaki n Ataeinnaine ao te Moanrinan a kona ni beku bwa ana kauntira.
N te teiteiki ae bubura, temanna ke uoman ake iai irouia te Nakoanibonga ae te Merekitereka man te titeiki a kona ni weteaki bwa kauntira. E kona naba are iai irouna te nakoanibonga ni weteaki naba bwa te tia koroboki (taraa 6.7.3). Te beretitenti n te bootaki n Ataeinimwaane n te titeiki e na anga aran are e na weteaki. Ibukin taian kairi, taraa 30.1.1 ao 30.1.5. Kauntira ao te tia koroboki a weteaki ao ni kamatoaki iroun te membwa n te beretitentii n te titeiki ke te kauntira ae rietaata are mwiokoaki.
Te beretitenti irouia ataeinimwaane n te titeiki iai tabena n aron aikai:
Beku n ana kauntira te titeiki (ti beretitenti, ti ngkana ana kauntira kaain te kauntira aika rietaata). Ibuobuoki nakon mwakuri ni karekea te onimaki ao ni kakorakoraia n tatabemaniia ao aia utu inanon te titeiki.
Ibuobuoki nakon te bitiobiriki n aia mwakuri ibukiia taari n te Nakoanibonga ae te Aaron. E kona n raonaki ma buokaia bwa a na ataa aia mwakuri ibukin kooram n te Nakoanibonga ae te Aaron, n aron ae e tuangiia te beretitenti n te titeiki.
Marooro n tainako n oin aia bootaki ni beretitentii. Reitaki n tainako ma te membwa n te beretitentii n te titeiki are iai tabena ibukin aia ibuobuoki.
E beku n aia komete ni kairiiri kairake n te titeiki (taraa 29.3.9). Ngkana e weteaki te tiakoroboki, e kaoaki naba.
Iaan a na kaetieti te beretitentii n te titeiki, bairei ao barongai a na waaki ni kakukurei ao a na kaembwa te Nakoanibonga ae te Aaron n te titeiki.
Taetae n tain bootakin te toa ao bootaki riki tabeua ngkana ko kaoaki iroun te beretitentii n te titeiki.
Kaei bootaki n te kauntira ni babaire ngkana ko kaoaki iroun te Itingaun n te Aono (taraa 29.4).
Aia beretitentii Ataeinimwaane n te titeiki e na aki karaoa te bootaki ni kairiiri n te titeiki. Kaetieti ibukiia naake iai tabeia ibukin kooram n te Nakoanibonga ae te Aaron e kanakoaki ni bootakin te kairiiri n te nakoanibonga (taraa 29.3.3).
Taan koroboki n a na botaki te titeiki a weteaki n tainako inanon titeiki aika bebura. Te membwa n te titeiki beretitentii ke te kauntira ae rietaata are e katabeaki e na kona ni wetea ao ni katabua ao ni kamatoaia. Iaan aia kairiiri beretitenti n ana bootaki te titeiki, a kona ni karekei tabeia n aron aikai:
A katauraoi akenta ibukin ana bootaki nako te beretitentii.
E koroboki n tain bowiin te beretitentii ao e korei mwiin taabe.
Kawakin rekooti ake tabeua ao ni katauraoi ribooti n aron are bubuti te beretitentii.
Buokiia beretitentii ni katauraoa te kataumwane ni katoa ririki ibukin aia botaki. Tauan mwiin kabanemwane.
Katauraoa te kataneiai ibukin bootaki n tia koroboki n te uoote are a katabeaki iai. E na kona ni kairaki ma te kaetieti iaon tauan mwiin ao ribootinakin te rooroko.
