“6. Stek Lidasip,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“6. Stek Lidasip,” Jeneral Hanbuk.
Pikja
lida i stap toktok long famli
6.
Stek Lidasip
6.1
Ol Stamba Tingting blong Wan stek
Aesea i tokbaot Saeon blong lata-dei, we i olsem wan tenet, o wan tabenakol we ol stek oli holem taet (luk long Aesea 33:20; 54:2). Tedei Jos i oganaes folem ol stek. Wanwan stek i gat fulap wod mo wan stek presiden i lidim.
Lod i stanemap ol stek blong mekem ol pipol blong Hem “oli kam wanples” mo blong “oli save difendem olgeta, mo blong oli stap long wan sef ples,” oli haed long wol ia (Doktrin mo Ol Kavenan 115:6). Ol memba mo ol lida long wan stek oli wok tugeta blong tekpat long wok blong God blong fasin blong sevem man mo hemia blong kam olsem wan god, i hapen (luk long 1.2).
6.2
Stek Presidensi
Stek presiden nao i holem ol prishud ki blong lidim wok blong Jos insaed long stek (Luk long 3.4.1). Hem, wetem tufala kaonsela blong hem, oli stap olsem wan stek presidensi. Oli kea long ol memba blong stek wetem lav long olgeta, mo oli stap helpem olgeta blong kam ol tru man blong stap folem Jisas Kraes.
Stek presiden i gat fofala stamba responsabiliti ia:
Hem i prisaeding hae pris insaed long stek.
Hem i lidim wok blong God blong fasin blong sevem man mo fasin blong kam olsem wan god insaed long stek.
Hem i jeneral jaj.
Hem i lukluk ova ol wok blong kipim ol rekod, lukaotem ol faenens, mo ol propeti.
From se stek presiden nao i holem ol prishud ki, hem i holem sam responsabiliti we oli blong hemwan nomo, we hem i no save givimaot. Sapos stek presiden i no save mekem ol responsabiliti ia, wan kaonsela i save mekem wok long ples blong hem blong sot taem, bae i no mekem nomo sapos i gat wan not i stap samples insaed long hanbuk ia, we i talem olsem. Stek presiden o kaonsela blong hem i toktok wetem Eria Presidensi sapos hem i gat ol kwestin abaot wan kaonsela we i stap mekem wok long bihaf blong stek presiden.
Stek presiden i givimaot plante wok long ol narawan. Olgeta ia i gat ol kaonsela blong hem, ol hae kaonsela, ol lida blong ol oganaesesen blong stek, stek eksekutiv sekretari, mo stek klak mo ol asisten stek klak.
6.2.1
Prisaeding Hae Pris
Stek Presiden i stamba stek lida long saed blong spirit. Hem i soem spirit we stek i wok folem taem we hem i mekem wok blong Lod “wetem wan hat we i tabu” (Mosaea 18:12). Hem i tijim mo leftemap tingting blong yumi.
Wan stek presiden i wan fetful disaepol blong Jisas Kraes. Hem i stap tru long ol kavenan blong hem. Hem i stap fetful long waef blong hem mo famli blong hem. Hem i stap wan eksampol blong stret mo gud fasin long ol pikinini blong hem, long stek, mo long komuniti. Ol kaonsela blong hem, oli ol man we oli gat semmak fasin.
Stek presiden i soem rod mo i givim kaonsel long ol bisop mo ol nara lida insaed long stek.
6.2.1.1
Melkesedek Prishud
Ol memba blong stek presidensi oli prisaed ova long olgeta we oli kasem Melkesedek Prishud insaed long stek.
Stek Hae Pris Kworom. Stek presiden, hem i stek hae pris kworom presiden. Hem mo ol kaonsela blong hem, oli stap olsem presidensi blong kworom ia. Insaed long stek hae pris kworom, i gat ol hae pris ia:
Bisop mo ol kaonsela blong hem
Ol Hae Kaonsela
Ol stek petriak we oli wok
Ol memba blong kworom blong ol hae pris bambae oli stap mit wetem kworom blong ol elda sapos oli no gat wok blong mekem long nara ples. Luk long 29.3.5 blong gat moa infomesen abaot miting blong Kworom blong ol hae pris
Kworom blong Ol Elda Stek presidensi i gat responsabiliti blong ol kworom blong ol elda (luk long 8.3.3.1).
Ol Melkesedek Prishud Odinesen. Stek presiden i lukluk ova long wok blong pasem Melkesedek Prishud. Hem i lukluk ova long odinesen long ol ofis blong elda mo hae pris (luk long 18.10.4).
6.2.1.2
Ol Bisoprik
Stek presidensi i mit wetem ol niu bisoprik blong givim instraksen long olgeta i no longtaem afta we oli singaotem olgeta. Afta long hemia, hem i givim instraksen mo i leftemap tingting blong ol bisop long taem blong ol intaviu we stap holem oltaem wetem olgeta, long taem blong ol miting, mo ol narafala taem moa.
Ol memba blong stek presidensi oli givim instraksen long ol bisoprik long saed blong responsabiliti blong olgeta ova long olgeta we oli kasem Aronik Prishud, mo ova long ol yang woman.
6.2.1.3
Stek Petriak
Stek presiden i lukaotem wok blong wan stek petriak. Hem i gat wan rilesensip we i kolosap wetem hem. Blong gat moa infomesen abaot fasin blong singaotem mo supavaesem stek petriak, luk long 6.6.
6.2.1.4
Ol Kaonsel, Ol Komiti, mo Ol Miting
Stek presiden i prisaed ova long hae kaonsel mo stek hae kaonsel. Hem i lidim tu stek adalt lidasip komiti (luk long 29.3.9). Hem i givim wok long ol kaonsela blong hem blong lukluk ova long olgeta samting ia:
Stek singgel adalt komiti (long ples we oli oganaesem wan)
Wanwan stek presiden i wan memba blong wan kodineting kaonsel (luk long 29.4).
Stek presidensi i mekem plan blong ol stek miting we oli stap long lis insaed long 29.3. Stek presiden i prisaed long ol stek miting ia; sapos wan Eria Seventi, o wan Jeneral Atoriti i kam, hem nao i prisaed. Ol kaonsela blong hem oli save lidim ol miting ia. Oli save prisaed tu sapos stek presiden i no stap.
6.2.1.5
Ol Koling mo Ol Rilis
Ol responsabiliti blong stek presiden long saed blong ol koling mo ol rilis, oli putumaot gud olgeta insaed long japta 30. Hem i save givim, long ol kaonsela, mo ol hae kaonsela blong hem, wok ia blong givimaot ol koling mo mekem ol rilis, olsem we oli putum insaed long 30.8. Stek presiden, hem nomo i givimaot ol koling ia: Long sam, hem i mas kasem apruvol fastaem olsem we oli putum i stap.
Ol Kaonsela insaed long Stek Presidensi Taem oli singaotem wan niu stek presiden, prisaeding Jeneral Atoriti o Eria Seventi i singaotem mo i setem apat ol kaonsela blong hem, we niu stek presiden ia i givim nem blong olgeta. Taem i nid blong rilisim o singaotem wan kaonsela long wan stek presidensi we i stap finis, stek presiden ia i sendem ol nem tru long Risos blong Ol Lida mo Klak (RLK). Hem i save intaviu, singaotem, mo setem apat wan kaonsela—o rilisim wan kaonsela—afta we hem i kasem apruvol we i kam long Fas Presidensi.
Stek Petriak. Stek presiden i save mekem intaviu, i save singaotem, mo odenem wan petriak afta we hem i kasem wan leta blong Kworom blong Olgeta Twelef Aposol. Luk long 6.6.1.
Ol Bisop. Stek presidensi i givim nem blong ol brata we bae oli singaotem olgeta olsem ol bisop. Hem i givim nem blong olgeta bisop tu we bae oli rilis. Hem i sendem rikwes ia i go tru long RLK. Stek presiden i save singaotem (givim koling), odenem, mo setem apat wan bisop, o i save rilisim wan bisop afta we hem i kasem leta blong Fas Presidensi we i givim hem raet blong mekem hemia. Hem i givim tu ol prishud ki we oli kam wetem koling ia. Luk long 30.7.
Ol Presiden blong Kworom blong Ol Elda. Stek presiden i singaotem mo i setem apat ol presiden blong kworom blong ol elda. Hem i toktok fastaem wetem ol bisop. Hem i givim tu ol prishud ki we oli kam wetem koling ia. Luk long 8.3.3.1.
Stek Rilif Sosaeti Presiden. Stek presiden i singaotem mo i setem apat wan sista blong i givim seves olsem presiden blong Rilif Sosaeti.
Ol stek presiden we oli no save yusum RLK, oli mas kontaktem eria ofis blong sendem nem i go taem we i nid blong mekem.
6.2.1.6
Ol Stek Oganaesesen mo Ol Program
Stek presiden i gat responsabiliti blong lukluk ova long stek Rilif Sosaeti. Hem i givim wok long ol kaonsela responsabiliti blong lukaotem ol oganaesesen long stek, blong O Yang Man, Ol Yang Woman, Praemeri, mo Sandei Skul.
Ol memba blong stek presidensi oli mit oltaem wetem ol presidensi blong ol oganaesesen we oli kasem wok blong lukaotem olgeta. Long ol miting ia, oli:
Meksua se ol presidensi oli andastanem ol responsabiliti blong olgeta.
Kaonsel tugeta abaot ol nid blong ol lida long ol oganaesesen ia.
Taem we oli singaotem wan niu stek oganaesesen presidensi, bae stek presidensi ia i serem kaonsel mo visen blong lidim olgeta long seves blong olgeta.
Long Yunaeted Stet mo Kanada, niu oganaesesen presidensi ia bae i kasem trening tu we i kam long jeneral oganaesesen kaonsel (luk long 5.1.2). Long ol nara eria, niu presidensi i save kasem trening long wan eria oganaesesen advaesa (luk long 5.2.5.1). Oli mekem hemia anda long daereksen blong stek presidensi. Wan memba blong stek presidensi, o wan hae kaonsela we i kasem wok ia, i atendem miting ia.
Stek presiden tu i givim wok long ol kaonsela blong hem blong lukluk ova long ol program blong stek olsem we i nid blong mekem. Sam long ol program ia, i gat:
Seminari mo Institiut.
Program blong ol yang singgel adalt mo ol singgel adalt.
Ol stek aktiviti.
Miusik.
Ol mitinghaos bilding.
Ol memba blong stek presidensi i mit oltaem wetem ol komiti, ol hae Kaonsela, mo ol speselis long ol program ia we oli kasem wok blong lukaotem olgeta.
Pikja
yang woman lidasip miting
6.2.1.7
Komunikesen (Ol Pablik Afea)
Stek presidensi i lidim ol wok blong komunikesen insaed long stek. Ol memba blong stek presidensi i gat fasfala responsabiliti ia blong gat gud nem mo gud fasin insaed long komuniti. Oli lukaot blong bildimap ol gudfala rilesensip wetem ol lida blong gavman mo komuniti.
Stek presiden nao i stap olsem stamba man blong Jos we bae i toktok long media olsem nius, long saed blong ol samting we i tajem stek. Hem i save givim wok ia long wan narawan taem i nid.
Stek presiden, o wan kaonsela we hem i givim wok long hem i save oganaesem mo i save lukluk ova long wan stek komunikesen kaonsel. Kaonsel ia i helpem ol lida blong Jos blong bildimap ol gudfala rilesensip wetem ol lida blong gavman mo komuniti. Hem i helpem tu ol lida ia blong toktok long wan wei we i wok gud wetem ol memba blong Jos mo wetem pablik.
Komunikesen kaonsel, insaed i save gat wan stek komunikesen daerekta, ol asisten daerekta, mo ol speselis, olsem we i nid. Stek presiden, o wan kaonsela, o hae kaonsela we oli givim wok ia long hem nao i singaotem mo i setem hem apat.
I gat tu wan komunikesen kaonsel long kodineting kaonsel level (luk long 29.4). Hem i wok anda long daereksen blong wan Eria Seventi, mo wan komunikesen daerekta nao i lidim. Komunikesen kaonsel ia i help blong kodinetem ol rilesensip, ol samting we i hapen, mo ol problem we i hapen ova long ol baondri blong stek. Daerekta blong kaonsel ia i givim sapot mo trening long stek komunikesen kaonsel.
Komunikesen kaonsel ia, i wok defren long hemia long Eria blong Yuta. Ol Eria Seventi long Eria blong Yuta oli save givim long ol stek presiden ol ditel abaot laen ia blong wok.
Stap Lidim Wok blong God blong Fasin blong Sevem Man mo Fasin blong Kam Olsem Wan God, insaed long Stek
Stek presiden i prisaed ova long wok blong God blong fasin blong sevem man mo fasin blong kam olsem wan god, insaed long stek (luk long japta 1). Hem i givim instraksen mo i leftemap tingting blong ol lida long stek mo wod, mo ol memba, long wok ia. Ol kaonsela blong hem mo ol nara lida, oli helpem hem.
Hem i helpem ol memba blong laef folem gospel mo kam antap long paoa blong olgeta long saed blong spirit. Hem i tijim olgeta blong prea mo stadi long ol skripja. Mo tu, hem i tijim olgeta abaot ol kavenan we bambae oli mekem taem bae oli kasem ol odinens blong fasin blong sevem man mo kam olsem wan god. Hem i leftemap tingting blong olgeta blong givim ona oltaem long ol kavenan blong olgeta.
Stek presiden i mekem ol famli oli kam strong moa. Hem i leftemap tingting blong prea mo lanem gospel tugeta, mo hemia i tekem haos naet tu. Hem i tijim, tru long toktok, mo tu, tru long eksampol, se ol koling, oli save mekem olgeta, mo semtaem, mekem ol famli responsabiliti. Hem i meksua tu se ol aktiviti blong Jos oli sapotem ol traehad blong ol papa mo mama blong resemap ol pikinini long stret mo gud fasin.
Antap long wok blong stap helpem ol memba blong stap laef folem gospel, stek presiden i lukluk ova long ol nara pat blong wok blong God blong fasin blong sevem man mo fasin blong kam olsem wan god. Eksampol:
Hem i helpem ol brata blong stap rere blong kasem Melkesedek Prishud (luk long 18.10.1).
Hem i lidim ol wok blong kea long olgeta we oli stap long nid insaed long stek (luk long 22.9.1
Hem i lukluk ova long misinari wok insaed long stek mo i leftemap tingting blong ol memba blong serem gospel (luk long 23.4).
Hem i lukluk ova long ol wok blong mekem ol niu memba insaed long stek oli kam strong moa (luk long 23.4).
Hem i intaviu long ol kandidet blong mekem misinari seves (luk long 24.4.2).
Hem i lukluk ova long wok blong tempol mo famli histri wok insaed long stek (luk long 25.3.1).
Hem i helpem ol memba blong oli rere blong kasem ol odinens blong tempol (luk long 27.1).
Wetem presidensi blong Rilif Sosaeti, hem i givim instraksen mo i sapotem presidensi blong kworom blong ol elda, mo presidensi blong Rilif Sosaeti long wod long saed blong ol responsabiliti blong olgeta long saed blong misinari wok (luk long 23.5.2) mo tu, long saed blong famli histri wok (luk long 25.2.2).
6.2.3
Jeneral Jaj
Stek presiden i jeneral jaj insaed long stek (luk long Doktrin mo Ol Kavenan 107:71–74). Hem i holem ol prishud ki blong kasem insperesen mo mekem ol desisen long saed blong gudlaef blong spirit mo blong laef blong ol memba blong stek. Long rol ia, hem i gat olgeta responsabiliti ia:
I mekem ol intaviu blong faenemaot se wan i klin inaf olsem we i stap long aotlaen long 31.2. Hem i save givim raet tu long ol kaonsela blong hem blong lidim ol intaviu (luk long 31.2.2).
Hem i mit wetem ol memba blong stek we oli stap lukaotem help long saed blong spirit, we oli gat ol hevi problem blong olgetawan, o, we oli mekem ol series sin. Blong kasem samfala gaedlaen, luk long 31.1.
Hem i holem ol membasip kaonsel taem we ol memba oli mekem ol series sin (luk long japta 32
Long ol situesen we i nidim blong Fas Presidensi i apruvum, stek presiden i mas lukluk mo tingting gud long rikwes ia. Hem i intaviu long man o woman ia blong talemaot hamas hem i klin inaf.
Afta long intaviu, stek presiden i putum wan aplikesen i go long Fas Presidensi sapos nomo, we hem i save askem blong oli apruvum. Hem i tokbaot ol risen blong sapot blong hem.
Stek presiden i lukluk ova long ol rekod, ol faenens, mo ol propeti insaed long stek. Hem i save givim plante long ol wok we i go wetem ol rekod, mo faenens i go long ol kaonsela mo klak blong hem. Hem i givim wok long wan hae kaonsela blong hem i stap olsem stek bilding ripresentativ, mo blong hem i help blong lukluk ova long ol propeti.
Luk long olgeta japta ia blong kasem moa infomesen:
Wanem i defren bitwin Atoriti blong Ol Distrik Presiden mo hemia blong Ol Stek Presiden
Insaed long wanwan distrik we i gat memba, i gat wan we i holem Melkesedek Prishud, we oli singaotem hem olsem distrik presiden. Hem i holem ol ki blong prishud we i nid blong prisaed (luk long 3.4.1.1). Hem i stap olsem wan stek presiden be, wetem olgeta samting ia we oli defren i stap:
Oli singaotem hem, mo oli setem hem apat; misin presiden nao i mekem hemia afta we hem i kasem apruvol blong Eria Presidensi (luk long 30.8.4). Wan Jeneral Atoriti o wan Eria Seventi bae i singaotem mo setem apat wan stek presiden (luk long 30.8.3).
Hem i save wan elda o wan hae pris. Wan stek presiden i mas wan hae pris.
Hem i no presiden blong hae pris kworom. Ol kaen kworom olsem, oli stap oganaesem olgeta nomo insaed long ol stek.
Wan distrik presiden i prisaed ova long evri man we i holem prishud insaed long distrik. Be, misin presiden hem i prisaeding hae pris.
Wetem raet blong misin presiden, distrik presiden i save intaviu wan brata blong oli odenem hem i kam wan elda. Raet ia, hem i mas kasem blong wanwan situesen. Wan distrik presiden, o wan we i stap anda long daereksen blong hem, i save (1) presentem wan brata blong oli sastenem hem, mo (2) mekem odinesen blong hem (luk long 18.10.1.3, 18.10.3, mo 18.10.4). Be, wan distrik presiden i no save odenem ol petriak, ol hae pris, o ol bisop.
Wetem apruvol blong misin presiden, wan distrik presiden i save setem apat ol branj presiden (luk long 18.11). Raet ia, hem i mas kasem blong wanwan situesen.
Hem i no rilisim ol fultaem misinari. Be, wetem wan memba blong misin presidensi, hem i save tekpat long rilis intaviu. Sapos travel mo taem i mekem se i had tumas blong wan memba blong misin presidensi i rilisim wan spesifik misinari, misin presiden i save givim raet long distrik presiden blong mekem olsem (luk long 24.8.2).
Hem i no holem ol intaviu blong tempol rekomen, o i no saenem ol tempol rekomen (luk long 26.3.1).
Hem i no holem wan membasip kaonsel sapos misin presiden i no givim raet long hem (luk long 32.9.5).
Plante taem, hem i no gat daerek toktok wetem Eria Presidensi. Be, hem i wok tru long misin presidensi.
Long sam spesel situesen, oli save givim raet long wan distrik presiden blong hem i sendem nem, i setem apat, mo i rilisim ol misinari. Mo tu, hem i save givim raet blong mekem ol intaviu blong tempol rekomen mo saenem ol rekomen. Oli save givim raet long hem tu blong setem apat ol kaonsela blong hem. Sapos Eria Presidensi i filim se hem i save wan distrik presiden i save kasem atoriti ia, oli sendem nem blong hem i go long Fas Presidensi. Sapos oli kasem apruvol, hem i blong man ia nomo, be i no blong posisen ia. Taem oli singaotem wan niu distrik presiden, atoriti ia we oli bin givim finis, i no pas i go long niuwan.
6.4
Stek Eksekutiv Sekretari, Ol Asisten Stek Eksekutiv Sekretari, Stek Klak, mo Ol Asisten Stek Klak
6.4.1
Stek Eksekutiv Sekretari mo Ol Asisten Stek Eksekutiv Sekretari
Stek presiden, o wan kaonsela we hem i givim wok long hem, mo i singaotem mo i setem apat wan stek eksekutiv sekretari. Hem i mas holem Melkesedek Prishud mo gat wan tempol rekomen we i laef.
Eksekutiv sekretari i gat olgeta responsabiliti ia:
Hem i mit wetem stek presidensi mo i rere ol ajenda olsem we oli givim wok ia long hem.
Hem i wan memba blong stek kaonsel mo hem i atendem ol hae kaonsel miting. Olsem we stek presidensi i talem long hem, hem i folemap ol wok we oli givimaot finis long ol miting ia.
Hem i kodinetem ol bisnis blong stek bitwin stek presidensi, hae kaonsel, mo ol nara lida blong stek.
Hem i putum taem blong ol apoenmen blong stek presidensi.
Hem i talem long stek presidensi abaot ol memba we oli stap go long militeri, o oli stap finis long militeri seves. Anda long daereksen blong stek presidensi, hem i save help blong kodinetem Jos trening blong ol memba blong stek we oli stap go insaed long militeri (luk long 38.9.3).
Hem i givim trening long ol niu wod eksekutiv sekretari stret afta we oli singaotem olgeta. Hem i gogohed blong givim instraksen long olgeta, taem we i nid.
Pasem ol mesej we i kam long ol wokman mo volontia blong Jos i go long ol stret lida long stek mo wod, olsem we stek presiden i givim instraksen blong mekem (luk long 38.8.9).
Oli save singaotem wan o tu (2) asisten klak blong stek, olsem we i nid. Wan memba blong stek presidensi i singaotem mo i setem apat olgeta ia. Ol brata ia oli mas gat wan tempol rekomen we i laef i stap.
6.4.2
Stek Klak mo Ol Asisten Stek Klak
Stek klak, bae stek presiden o wan kaonsela we oli givim wok ia long hem, i singaotem mo setem apat klak ia. Hem i wan memba blong stek kaonsel. Oli save singaotem tu ol asisten stek klak. Stek presiden o wan kaonsela we oli givim wok ia long hem, i save singaotem mo setem olgeta apat. Ol responsabiliti ia blong stek klak, mo ol asisten stek klak, oli tokbaot olgeta long 33.3.2 mo 33.3.3.
6.5
Hae Kaonsel
Stek presidensi i singaotem 12 hae pris blong oli stap insaed long stek hae kaonsel (luk long Doktrin mo Ol Kavenan 102:1; 124:131). Sapos oli singaotem wan elda blong i stap long hae kaonsel, oli odenem hem i kam wan hae pris bifo oli setem hem apat.
Anda long daereksen blong stek presidensi, ol hae kaonsela oli help blong lukluk ova long wok blong God blong fasin blong sevem man o fasin blong kam olsem wan god. Ol responsabiliti blong olgeta, oli putum olgeta long olgeta seksen ia.
Hae kaonsel i no mit olsem wan grup, be nomo sapos wan memba blong stek presidensi i stap blong i prisaed.
6.5.1
Ripresentem Stek Presidensi
Stek presidensi i givim wok long wan hae kaonsela blong ripresentem olgeta long wanwan wod insaed long stek.
Mo tu, stek presidensi i givim wok long wan hae kaonsela blong i lukaot long wanwan kworom blong ol elda insaed long stek. Long rol ia, ol hae kaonsela oli soem wok long ol niufala presidensi blong kworom blong ol elda we oli jes singaotem olgeta. Hemia i tekem blong givim ol instraksen we oli stap long ol japta 1–4 mo 8 insaed long hanbuk ia.
Ol hae kaonsela we oli gat wok ia blong lukaot long ol kworom blong ol elda, oli mit oltaem wetem ol lida blong kworom blong mekem olgeta samting ia:
Lanem nid blong olgeta.
Givim sapot.
Tijim olgeta long ol responsabiliti blong olgeta, wetem hemia blong misinari wok (luk long 23.5.2mo wok blong tempol mo famli histri (luk long 25.2.2).
Pasem infomesen i go long stek presidensi.
Toktok raon long wei blong helpem ol memba blong kworom we oli nidim blong kasem nekis odinens. Infomesen ia i stap blong ol lida blong kworom blong ol elda insaed long RLK.
Olsem we i nid, o oli invaetem olgeta blong mekem, oli sta long ol miting blong kworom blong ol elda, mo miting blong presidensi blong kworom. Samtaem, presidensi blong kworom i save invaetem hae kaonsela blong go wetem olgeta taem oli stap givhan long ol memba blong wod.
Taem we oli invaetem o givim wok ia long olgeta, ol hae kaonsela oli go long ol miting blong bisoprik mo wod kaonsel.
Stek presidensi i save givim wok long ol hae kaonsela blong i givim instraksen long olgeta pipol ia wetem ol responsabiliti blong olgeta long saed blong wok blong tempol mo famli histri mo misinari wok.
Ol presidensi blong kworom blong ol elda
Ol wod misin lida
Ol wod lida blong tempol mo famli histri wok
Oli save givim wok long wan o moa long wan hae kaonsela blong lidim ol bigfala hadwok ia insaed long ol stek. Be, evri hae kaonsela oli gat responsabiliti blong lukaot long ol wod mo kworom blong ol elda we oli bin givim long wanwan long olgeta blong lukaotem.
Ol hae kaonsela oli kaonsel wetem stek presidensi, mo oli sastenem desisen blong olgeta blong odenem ol brata i go long ol ofis blong elda mo hae pris. Stek presiden i save givim raet long ol hae kaonsela blong oli ripresentem hem taem we oli stap odenem ol man long ol ofis ia. Ol hae kaonsela ia, oli meksua se oli mekem odinens ia long stret fasin.
Ol hae kaonsela oli kaonsel tu wetem stek presidensi mo oli sapotem ol desisen blong olgeta blong givimaot ol koling long ol memba. Stek presidensi i save givim raet long ol hae kaonsela blong givimaot sam koling, presentem sam memba blong oli sastenem olgeta, mo setem sam memba apat. (Luk long 30.8.)
Stek presidensi i givim wok long ol hae kaonsela blong oli wok wetem stek Yang Woman mo Praemeri oganaesesen. Taem wan memba blong stek presidensi i mit wetem wan long ol presidensi ia, hae kaonsela tu i stap long miting ia. Ol hae kaonsela we oli kasem wok ia, oli stap tu long ol stek lidasip miting blong ol oganaesesen ia.
Stek presidensi i save givim wok long ol hae kaonsela blong oli help wetem ol program we oli putum long lis long 6.2.1.6. Oli save asaenem tu, wan hae kaonsela blong help wetem ol nid blong ol memba wetem disabiliti (luk long 38.8.27).
Stek presidensi i save givim wok long ol hae kaonsela blong oli ripresentem olgeta taem oli givim toktok long ol sakramen miting, o long ol nara ples. Stek presidensi nao i talemaot hamas taem bae oli go givim toktok. I no nid blong ol hae kaonsela oli givim toktok long sakramen miting long evri manis. Stek presidensi i save givim wok tu long ol memba blong presidensi blong wan stek oganaesesen blong i givim toktok long ol miting ia (luk long 6.7.1 mo 6.7.2).
Pikja
sam man oli stap toktok
6.5.2
Givim Seves insaed long Ol Stek Kaonsel mo Komiti
Evri hae kaonsela i givim seves insaed long stek kaonsel.
Hem i folem ol semfala fasin blong wok olsem long wan stek membasip kaonsel (luk long 32.9.2).
Stek presidensi i givim wok long ol hae kaonsela blong oli givim seves long ol nara komiti,. Eksampol. Ol hae kaonsela we oli givim wok ia long olgeta blong oli wok wetem ol kworom blong ol elda, oli givim seves long stek adalt lidasip komiti (luk long 29.3.9).
6.5.3
Givim Seves Olsem Ol Lida blong Stek Oganaesesen
Stek presidensi i singaotem mo i setem apat wan hae kaonsela blong hem i stap olsem stek Yang Man presiden (luk long 6.7.2). Oli singaotem mo setem apat wan nara hae kaonsela blong i stap olsem stek Sandei Skul Presiden (luk long 6.7.1).
6.6
Stek Petriak
Wan petriak i wan ofis insaed long Melkesedek Prishud. Oli singaotem mo odenem ol petriak blong oli givim ol petriakel blesing i go long ol memba blong Jos we oli klin inaf. Seksen ia i givim aotlaen blong ol responsabiliti we stek presiden i gat long stek petriak. Blong gat moa infomesen abaot ol petriakel blesing, luk long olgeta ples ia:
Luk Infomesen mo Ol Tingting blong Ol Petriak blong kasem infomesen abaot:
Ol petriak we oli putum olgeta se, oli no wok i stap.
Petriak we oli muv i go long wan nara stek.
6.6.1
Singaotem, Sastenem, mo Odenem wan Stek Petriak
Wan petriak i mas wan man we i klin inaf mo i holem Melkesedek Prishud. Hem i mas gat raep tingting long wei we hem i andastanem gospel mo i mas save filim Spirit. Hem i mas kasem petriakel blesing blong hem finis. Plante taem, hem i gat 55 yia o moa. Hem i mas wan mared man taem oli singaotem hem.
Kworom blong Olgeta Twelef Aposol i lidim wok blong singaotem ol stek petriak (luk long Doktrin mo Ol Kavenan 107:39). Stek presiden i save givim nem blong huia blong singaotem. Hem i sendem rikwes ia i go tru long RLK. Taem hem i wantem sendem nem ia i go, stek presiden i mas livim kaekae mo prea blong Spirit i soem rod long hem. Ol kaonsela blong hem, oli mas agri wetem nem we i stap blong sendem i go.
Sapos Kworom blong Olgeta Twelef Aposol i apruvum nem ia, stek presiden i save kasem raet blong mekem intaviu mo singaotem petriak. Afta, hem i presentem nem blong petriak blong oli sastenem hem long wan jeneral sesen blong nekis stek konfrens.
Stek presiden i odenem petriak ia. Hem i no givim responsabiliti ia long wan kaonsela blong hem. Mo tu, i no mas gat wan narawan i stanap wetem hem long taem blong odinesen blong wan petriak. Oli odenem fastaem wan niu petriak i go long ofis ia, mo afta, oli setem hem apat blong givim seves long wan spesifik stek. Wan petriak we oli bin odenem hem finis, be oli putum se hem i no wok, mo oli putum hem long wok ia bakegen, bae i no nid blong oli odenem hem bakegen. Be, oli setem hem apat.
Odinesen ia bae oli rekodem insaed long RLK bifo petriak i ia i save go onlaen blong luk ol tul blong wok blong ol petriak.
Wan petriak we i stap mekem wok i wan memba blong kworom blong hae pris mo i tekpat long ol kworom miting (luk long 29.3.5
6.6.2
Singaotem Nambatu Stek Petriak
Plante taem, bae Kworom blong Olgeta Twelef Aposol i no save agri blong oli singaotem nambatu petriak blong wan stek, be nomo sapos petriak we i stap wok i no save givim namba blong ol blesing we oli askem long hem. Mo tu, Kworom blong Olgeta Twelef Aposol i no stap oltaem apruvum blong gat wan moa petriak from se wan stek:
I kavremap wan ples we i bigwan.
I tekem ol memba we oli no toktok mama lanwis blong stek.
Sapos, insaed long wan stek, i gat ol memba we oli toktok ol defren lanwis, ol bisop mo ol stek presidensi oli save givim raet long olgeta blong go luk wan petriak long wan stek kolosap, we i save givim blesing ia long stret lanwis blong memba ia.
Pikja
yangfala gel i stap kasem blesing
6.6.3
Givim Instraksen long Wan Niu Stek Petriak we Oli Jes Singaotem
Stek presiden i givim instraksen long wan niu petriak we oli jes singaotem bifo petriak i stat blong givim ol blesing. Hem i tijim petriak long saed blong hamas ofis blong hem i tabu mo i blong kasem revelesen. Hem i lukluk gud i gobak wetem petriak, long ol instraksen we oli stap long ol ples ia:
Infomesen mo Ol Tingting blong Ol Petriak
Wol Lidasip Trening Miting: Petriak
6.6.4
Supavaesem Wok blong Wan Stek Petriak
Stek presiden i prisaed ova long stek petriak mo i supavaesem wok blong hem olsem we oli putum klia long Infomesen mo Ol Tingting blong Ol Petriak. Hem i no save givim responsabiliti ia long wan long ol kaonsela blong hem. Wan petriak i mas gat wan rilesensip we i gud mo i kolosap wetem stek presiden blong hem.
Stek presiden i mit wetem petriak tu (2) taem long wan yia. Tufala i toktok tu raon long ol filing blong petriak abaot wok, helt mo gudlaef blong famli blong hem, mo eni nara mata we petriak i stap lukaotem o i nidim kaonsel long hem.
Tu taem long wan yia, stek presiden i luklukbak long ol blesing we petriak i bin givim. Olsem we i nid, stek presiden i save givim ol jeneral tingting abaot wanem i stap insaed long ol petriakel blesing.
Stek presiden i meksua se olgeta we oli kasem petriakel blesing, oli kasem pepa kopi blong blesing blong olgeta kwiktaem. Stek presiden i meksua se evri blesing ia, oli sendem i go long ol hedkwota blong Jos. Bae oli sendem ol blesing i go tru long Petriakel Blesing Sistem long ChurchofJesusChrist.org Taem we i no posibol blong go long sistem ia, bae oli mas sendem ol blesing ia tru long postofis i go long ol adres, hemia wan taem long evri sikis manis. Bae oli sendem i go long adres ia:
Church History Library
Attn: Patriarchal Blessings
15 East North Temple Street
Salt Lake City, UT 84150-1600
6.6.5
Ol Petriakel Blesing Oli Konfidensiol
Blong protektem mo kipim ol petriakel blesing oli konfidensiol, stek presiden i meksua se petriak i givim kopi blong blesing ia long hem we i kasem blesing, mo i sendem blesing ia i go long ol hedkwota blong Jos, mo hem i bin kasem infomesen se wanem we hem i sendem, olgeta long hedkwota oli kasem, nao bae hem i mas katem mo sakem evri pepa, mo dilitim evri lektronik kopi blong blesing ia. Petriak i meksua se oli dilitim ol blesing ia long kompiuta blong hem, mo oli no save faenembak.
6.6.6
Ol Petriak we Oli Singaotem Olgeta long Wan Nara Posisen long Jos
Oli no save singaotem wan petriak long wan posisen insaed long administresen blong Jos, be nomo sapos Kworom blong Olgeta Twelef i apruvum koling ia bifo. Ol posisen ia i tekem wan memba blong bisoprik; hae kaonsel; o stek, misin, o tempol presidensi. Sapos oli apruvum, nao petriak i kam wan petriak we i no save mekem wok.
Oli save singaotem wan petriak blong i givim seves long ol nara koling, mo i no nidim apruvol blong Kworom blong Olgeta Twelef Aposol. Hem i save stap olsem wan man blong mekem siling, o olsem wan tempol odinens wokman.
6.6.7
Hem we I Raetem Ol Petriakel Blesing
Stek presiden o wan long ol kaonsela blong hem i save singaotem, mo setem apat wan memba blong stek we i gat skil, blong i taepem ol petriakel blesing, sapos petriak i no save taepem olgeta hemwan, mo sapos hem i laekem olsem. Oli save singaotem moa long wan blong help blong raet o taep.
Hem we i raet o taep, i kasem woning ia se evri blesing i tabu mo i konfidensiol. Hem we i raet o taep, o petriak i no save mekem eni kopi blong eni blesing. (Luk long 6.6.5.)
6.7
Ol Stek Oganaesesen
Stek Rilif Sosaeti, Stek Yang Woman, Stek Praemeri, mo Stek Sandei Skul, mo Stek Yang Man oganaesesen, wan presiden nao i lidim olgeta. Oli mekem hemia anda long daereksen blong stek presidensi. Long ol stek we oli bigwan, wan oganaesesen presiden i save givim nem blong wan o tu kaonsela mo wan sekretari blong oli givim seves wetem hem. Stek presidensi i tingting long ol nem ia we oli givim i kam.
Ol stamba responsabiliti blong ol lida ia, oli blong helpem stek presidensi, mo blong oli givim instraksen mo sapot long ol presidensi blong ol oganaesesen long wod. Oli no go mekem ol wok we i mas hapen long level blong wod, o long level blong famli. Ol no krietem sam moa responsabiliti blong oganaesesen presidensi blong wod.
6.7.1
Stek Rilif Sosaeti, Yang Woman, Praemeri, mo Sandei Skul presidensi
Stek presiden i singaotem mo i setem apat wan sista blong i givim seves olsem stek presiden blong Rilif Sosaeti. Hem o wan kaonsela we hem i givim wok ia long hem i singaotem mo i setem apat ol sista ia blong oli stap olsem stek Yang Woman mo Praemeri Presiden. Sapos oli singaotem ol kaonsela mo ol sekretari tu, wan memba blong stek presidensi o wan hae kaonsela we i kasem wok ia i singaotem mo i setem olgeta apat.
Stek presiden i singaotem mo i setem apat wan sista wan hae kaonsela blong i givim seves olsem stek Sandei Skul presiden.
Ol memba blong presidensi ia oli gat olgeta responsabiliti ia:
Givim Seves insaed long Ol Stek Kaonsel (ol presiden nomo). Tekpat long ol bigfala wok blong bildimap fet mo mekem wan man, woman mo famli i kam strong moa insaed long stek.
Oli soem wok long ol niu oganaesesen presidensi blong wod we oli jes singaotem olgeta. Hemia i tekem blong givim ol instraksen we oli stap long ol japta1–4 long hanbuk ia mo japta long saed blong oganaesesen blong olgeta.
Givim sapot mo instraksen we i gogohed. Toktok wetem ol presidensi blong ol oganaesesen oltaem blong lanem ol nid blong olgeta, blong toktok raon long ol nid blong ol memba we oli wok blong olgeta, mo oli pasem infomesen we i kam long stek presidensi. Arenjem wetem ol lida blong wod blong visitim olgeta wanwan taem long taem blong miting blong olgeta.
Givim instraksen long ol presidensi blong ol oganaesesen long taem blong ol stek lidasip miting (luk long 29.3.4). Plante taem, oli holem olgeta wan taem long wan yia. Stek presidensi i save givim raet blong holem wan nambatu miting sapos bae i no hevi long olgeta we bae oli tekpat. Ol bisop oli save askem blong i gat moa instraksen blong ol presidensi blong ol oganaesesen blong wod.
Kaonsel tugeta oltaem long ol presidensi miting blong olgeta (sapos oli singaotem ol kaonsela) Toktok oltaem wetem memba blong stek presidensi we i responsibol blong seves ia blong olgeta.
Go long kodineting kaonsel miting taem we Eria Seventi i invaetem olgeta (luk long 29.4).
Toktok long ol sakramen miting o ol nara miting taem we stek presidensi i invaetem olgeta blong mekem.
Long ol stek we oli bigwan, sendem ol nem i go long stek presidensi, hemia ol nem blong ol kaonsela blong oli singaotem olgeta blong givim seves long ol oganaesesen blong olgeta, olsem we i nid. Blong gat ol gaedlaen, luk long 30.1.1 mo 30.1.5.
Stek Rilif Sosaeti, Stek Yang Woman, mo Stek Praemeri presidensi, wanwan taem oli save mekem plan from ol kombaen aktiviti blong oganaesesen blong olgeta. Ol aktiviti ia, insaed i save gat evri woman, yang woman, mo gel we oli gat 8 yia i go antap, we oli stap long stek. Ol kaen aktiviti ia, oli save holem long ol maltistek. Presidensi i kaonsel tugeta blong givim sapot long ol kombaen aktiviti, i go long stek presidensi (luk long 20.3.1). Ol kaen aktiviti olsem bae i tekem ples blong wan long ol stek Rilif Sosaeti aktiviti (luk long 6.7.1.1).
6.7.1.1
Sam Moa Stek Rilif Sosaeti Presidensi Responsabiliti
Stek Rilif Sosaeti presiden i gat olgeta responsabiliti ia:
Hem i stap long stek adalt lidasip komiti (luk long 29.3.9). Sapos oli singaotem wan sekretari, bae oli invaetem hem tu.
Tijim ol presiden blong wod Rilif Sosaeti long saed blong ol prinsipol blong givhan mo fasin blong stap kea long olgeta we oli stap long nid. Helpem olgeta blong andastanem rol blong olgeta blong stap helpem ol bisop wetem ol samting long saed blong laef ia mo fasin blong stap indipenden.
Tijim ol presidensi blong wod Rilif Sosaeti abaot ol responsabiliti blong olgeta long saed blong misinari wok (luk long 23.5.2) mo long saed blong tempol mo famli histri wok (luk long 25.2.2).
Mekem ol yang singgel adalt sista insaed long stek oli kam strong moa. Sapos stek i gat wan yang singgel adalt komiti, wan memba blong presidensi ia i stap insaed long komiti ia. Hemia i tru semmak sapos stek i gat wan stek singgel adalt komiti. (Luk long 14.1.1.2.)
Hem i kodinetem ol hadwok blong Rilif Sosaeti long stek long taem blong ol imejensi.
Anda long daereksen blong stek presidensi, oli plan mo bae oli kareaot wan o long tu stek Rilif Sosaeti miting evri yia wetem ol sista long Rilif Sosaeti insaed long stek. Ol kaonsel miting ia, oli holem olgeta anda long daereksen blong stek presidensi. Olgeta ia, i save gat seves, klas, projek, konfrens, o ol woksop. Stek presidensi blong Rilif Sosaeti i save mekem ol komiti blong help sapos i gat nid.
6.7.1.2
Sam Moa Stek Yang Woman Presidensi Responsabiliti
Stek Yang Woman presidensi i gat olgeta responsabiliti ia:
Givim seves long stek yut lidasip komiti (luk long 29.3.10). Sapos oli singaotem wan sekretari, bae oli invaetem hem tu.
Anda long daereksen blong stek presidensi, hem i mekem plan mo kodinetem stek Yang Woman aktiviti mo kamp.
6.7.1.3
Sam Moa Stek Praemeri Presidensi Responsabiliti
Wanwan taem stek Praemeri Presidensi i save mekem plan blong holem sam aktiviti blong ol pikinini we oli gat 8 kasem 11 yia. Ol aktiviti ia, oli save ol aktiviti blong ol gel, ol boe, o tugeta. Oli folem ol gaedlaen we oli stap long 12.2.1.3.
Pikja
Woman we i stap wok wetem ol pikinini
6.7.1.4
Sam Moa Stek Sandei Skul Presidensi Responsabiliti
Stek Sandei Skul presidensi i gat olgeta responsabiliti ia:
Oli stap olsem ol speselis long stek blong mekem ol wok blong kam antap long fasin blong lanem mo tijim gospel.
Oli kodinetem ol risos senta long stek taem we i gat (luk long 13.7.2).
6.7.2
Stek Presidensi blong Ol Yang Man
Stek presidensi i singaotem mo i setem apat wan hae kaonsela blong hem i stap olsem stek Yang Man presiden. Ol memba blong hae kaonsel we oli kasem wok blong lukaot long Ol Yang Woman mo Praemeri, oli save singaotem mo setem apat olgeta blong stap olsem ol kaonsela blong hem.
Long ol bigfala stek, wan o tu man we oli holem Melkesedek Prishud we oli kamaot long stek, oli save singaotem olsem ol kaonsela. Oli save singaotem wan we i holem prishud blong stap olsem wan sekretari (luk long 6.7.3). Stek Yang Man presiden i givim nem blong wan blong singaotem hem. Blong gat ol gaedlaen, luk long 30.1.1 mo 30.1.5. Ol kaonsela mo sekretari ia, oli singaotem olgeta mo oli setem apat olgeta tru long wan memba blong stek presidensi o wan hae kaonsela we i kasem wok ia.
Stek Yang Man presidensi i gat olgeta responsabiliti ia:
I stap insaed long stek kaonsel (presiden nomo, be nomo sapos ol kaonsela blong hem oli ol hae kaonsela) Tekpat long ol bigfala wok blong bildimap fet mo mekem wan man, woman mo famli i kam strong moa insaed long stek.
Stap olsem wan risos long bisoprik long ol responsabiliti blong olgeta long ol brata blong Aronik Prishud. Hemia i save helpem olgeta blong oli andastanem diuti blong olgeta long kworom blong Aronik Prishud, olsem we stek presiden i askem olgeta.
Kaonsel tugeta oltaem long presidensi miting blong olgeta. Toktok oltaem wetem memba blong stek presidensi we i gat responsabiliti from seves ia blong olgeta.
Givim seves long stek yut lidasip komiti (luk long 29.3.10). Sapos oli singaotem wan sekretari, bae oli invaetem hem tu.
Anda long daereksen blong stek presidensi, mekem plan mo kodinetem wan stek Aronik Prishud aktiviti mo kamp.
Toktok long ol sakramen miting o ol nara miting taem we stek presidensi i invaetem olgeta blong mekem.
Go long kodineting kaonsel miting taem we Eria Seventi i invaetem olgeta (luk long 29.4).
Stek Yang Man Presidensi i no save holem wan stek lidasip miting. Instraksen blong olgeta ia we oli gat responsabiliti blong lukaot long ol kworom blong Aronik Prishud, oli givim long ol stek prishud lidasip miting (luk long 29.3.3).
Ol stek oganaesesen sekretari, plante taem oli singaotem olgeta nomo insaed long ol stek we oli bigwan. Wan memba blong stek presidensi, o wan hae kaonsela we i kasem wok ia, i save singaotem ol stek aktiviti daerekta. Anda long daereksen blong ol presiden blong ol stek oganaesesen, oli save gat olgeta responsabiliti ia:
Stap rere long ol ajenda blong ol presidensi miting.
Tekem not long ol miting mo folemap ol wok we oli givimaot.
Kipim ol nara rekod mo oli rere long ol ripot olsem we presidensi i askem.
Helpem presidensi blong rere long yia bajet oganaesesen blong olgeta. I kaontem mo rekodem ol mane we oli spendem.
I givim trening long ol wod oganaesesen sekretari taem oli givim wok ia long olgeta. Insaed i save gat ol instraksen long fasin blong kipim ol rekod mo givim ripot blong atendens.