“28. O Sauniga o le Malumalu mo Ē ua Maliliu,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020).

“28. Sauniga o le Malumalu mo Ē ua Maliliu,” Tusitaulima Aoao.

Ata

faatanoa o le vai papatisoga

28.

Sauniga o le Malumalu mo Ē ua Maliliu

28.0

O Le Faatomuaga

O le tuufaatasia o aiga mo le faavavau o se vaega lea o le galuega a le Atua mo le faaolataga ma le faaeaga (tagai i le 1.2). O sauniga e faatinoina i totonu o malumalu ua mafai ai e aiga ona faatasia mo le faavavau ma lagonaina le atoaga o le olioli i le afio’aga o le Atua.

Mo fanau a le Tama Faalelagi ina ia toe foi atu ia te Ia, e tatau ia i latou taitoatasi ona salamo, ia agavaa e maua sauniga o le faaolataga ma le faaeaga, ma faamamalu feagaiga e o faatasi ma sauniga taitasi. O sauniga nei o le faaolataga ma le faaeaga:

Papatisoga.
Faamauga ma le meaalofa o le Agaga Paia.
Faaeeina atu o le Perisitua Mekisateko ma le faauuina i se tofi (mo alii).
O le faaeega paia o le malumalu (e aofia ai le sauniga amata).
Faamauga i le malumalu.

Na silafia e le Tama Faalelagi o le toatele o Ana fanau o le a le mauaina nei sauniga i le taimi o o latou olaga faaletino. Sa Ia saunia se isi auala mo i latou e maua ai sauniga ma osia ai feagaiga ma Ia. I totonu o malumalu, e mafai ona faatino ai sauniga e ala i le fai ma sui [mo se ua maliu]. O lona uiga e maua e se tagata o loo soifua ia sauniga e fai ma sui mo se tasi ua maliu. I le lalolagi o agaga, e mafai e tagata ua maliliu ona filifili e talia pe teena sauniga na faatinoina mo i latou (tagai i le Mataupu Faavae ma Feagaiga 138:19, 32–34, 58–59).

O sauniga o le faaolataga ma le faaeaga e le manaomia pe faia mo i latou o e le mafai ona tali atu mo i latou lava i lenei olaga (tagai i le 18.1, 28.3.2, ma le 28.3.3).

Ua uunaia tagata o le Ekalesia e faailoa tauaiga ua maliliu o ē e le’i mauaina sauniga o le faaolataga ma le faaeaga. Ona faatino lea e tagata o le Ekalesia ia sauniga e fai ma sui o na tauaiga. (Tagai i le Malaki 4:5–6; 1 Korinito 15:29; Mataupu Faavae ma Feagaiga 2:1–3; 128:15–18; tagai foi i le 25.1 i le tusitaulima lenei.)

Afai e le’i saunia e tagata ni igoa o aiga mo galuega faalemalumalu (tagai i le 28.1.1), o igoa o tagata ua maliliu o ē e manaomia sauniga o le a tuuina atu i le malumalu.

E uunaia tagata o le Ekalesia ina ia auai soo atu i le malumalu pe a faatagaina ai e o latou tulaga, pe o latou faatinoina sauniga sui mo o latou lava tauaiga po o tagata o loo saunia e le malumalu o latou igoa.

E faamanuiaina tagata o le Ekalesia pe a latou faatinoina sauniga o le malumalu mo ē ua maliliu. A o faatinoina sauniga sui, e mafai ona latou manatunatu i a latou lava feagaiga o le malumalu ma lo latou tautinoga e tausia na feagaiga.

E fesoasoani peresitene o siteki ma epikopo i tagata o le Ekalesia ia maua ni aafiaga lelei i le faatinoina o sauniga o le malumalu. Latou te faia lea mea e ala i le aoao atu o le faavae faaleaoaoga faavae o galuega faalemalumalu ma faamautinoa ua malamalama tagata o le Ekalesia i taiala mo lenei galuega. Tagai i le mataupu 25 mo nisi faamatalaga.

28.1

Taiala Aoao mo le Faatinoina o Sauniga Sui

O tagata ua maliliu o ē ua ta‘i 8 tausaga pe matutua atu i le taimi na maliliu ai, e i ai sauniga sui e mafai ona faatinoina mo i latou. Sei vagana ai e pei ona ta’ua i le 28.3, e mafai ona faatinoina sauniga sui mo tagata uma ua maliliu i le taimi lava e mavae ai le 30 aso mai lo latou aso na maliu ai pe afai e faatatau ai se tasi o sauniga nei:

E auina atu e se tagata vavalalata o le tauaiga o lē ua maliu (toalua e le’i tatalaina le faaipoipoga, fanau matutua, mātua, po o se uso/tuafafine/tuagane) le igoa mo sauniga o le malumalu.
O le faatagaga e faatino ai sauniga e maua mai se tagata vavalalata o le tauaiga o lē ua maliu (toalua e le’i tatalaina le faaipoipoga, fanau matutua, mātua, po o se uso/tuafafine/tuagane).

Afai e leai se tasi o tulaga o i luga e faatatau i ai, e mafai ona faatinoina sauniga sui o le malumalu i le 110 tausaga talu ona mavae le fanau mai o le tagata ua maliu.

Mo nisi faamatalaga, tagai i tusiga nei i le FamilySearch.org (o le mauaina o tusiga e manaomia ai le saini e alu i totonu o le FamilySearch.org):

28.1.1

Sauniaina o Igoa o Tagata ua Maliliu mo Sauniga o le Malumalu

E tele punaoa o loo maua e fesoasoani ai i tagata o le Ekalesia e faailoa ai tauaiga ua maliliu o ē manaomia sauniga e faatinoina mo i latou (tagai i le 25.4 ma le 28.3). O taitai nei e fesoasoani i tagata o le Ekalesia e aoao pe faapefea ona saunia igoa o tagata o le aiga ua maliliu mo sauniga o le malumalu:

Au peresitene o le korama a toeaina ma le Aualofa a le uarota (tagai i le 25.2.2)
Taitai o malumalu ma talafaasolopito o aiga a le uarota (tagai i le 25.2.3)
Faufautua mo malumalu ma talafaasolopito o aiga (tagai i le 25.2.4)

I nofoaga e mafai ai, o faamatalaga e faailoa ai tagata o le aiga ua maliliu e tatau ona taina i totonu o le FamilySearch.org a o le’i faatinoina sauniga o le malumalu (tagai i le 25.4.2).

28.1.1.1

Auina Atu o Igoa o Tagata o le Aiga

Pe a auina atu igoa mo sauniga sui o le malumalu, e masani lava, e tatau i tagata o le Ekalesia ona auina atu na o igoa o tagata latou te aiga i ai.

28.1.1.2

Auina Atu o Igoa o Tagata Lauiloa ma Vaega e Le‘i Faatagaina

E masani lava, e le tatau i tagata o le Ekalesia ona auina atu igoa i le FamilySearch.org mai vaega nei:

Tagata lauiloa
Igoa na ao mai galuega faatino o le sailia o igoa e le’i faamaonia
Tagata na aafia fua i le Fasiotiga Tele o Tagata Iutaia

Mo nisi faamatalaga, tagai i le tusiga lenei i luga o le FamilySearch: “E mafai ona ou faia galuega o le malumalu mo tagata na aafia fua i le Fasiotiga Tele o Tagata Iutaia?”

28.1.2

O Ai e Mafai Ona Auai i Sauniga mo Ē ua Maliliu

O tagata uma o le Ekalesia o loo i ai se pepa faataga o le malumalu o loo aoga e mafai ona auai i papatisoga ma faamauga mo ē ua maliliu. O tagata o le Ekalesia ua maua faaeega paia o loo i ai se pepa faataga aoga o le malumalu e mafai ona auai i sauniga uma mo ē ua maliliu. Tagai i le 26.3.

28.1.3

Auai o Tagata o le Ekalesia E I Ai Manaoga Faapitoa Faaletino pe Faaleatamai

O tagata o le Ekalesia e i ai manaoga faapitoa, e mafai ona latou faia galuega faalemalumalu mo ē ua maliliu pe afai latou te:

Umia se pepa faataga o aoga o le malumalu (tagai i le 28.1.2).
I ai le gafatia faaleatamai e malamalama ai i le sauniga.
Mafai ona vaaia i latou lava, pe o loo o mai faatasi foi ma se tauaiga po o se uo e itupa tutusa o loo i ai se pepa faataga o le malumalu ma e mafai ona tuuina atu le fesoasoani pe a manaomia.

Tagai i le 27.1.3 ma le 27.2.1.3.

28.1.4

Faatulagaina

Atonu e manaomia e tagata o le Ekalesia ona faia se taimi faatulagaina a o le’i faatinoina sauniga mo ē ua maliliu. Tagai i le temples.ChurchofJesusChrist.org mo faamatalaga e faafesootai ai malumalu taitasi ma tulaga manaomia mo taimi faatulagaina.

28.1.5

Fesoasoaniga mo Faaliliuga po o le Faamatalaupu

Tagai i le 27.1.4.

28.1.6

Laei e Ofu Atu i le Malumalu

Tagai i le 27.1.5.

28.1.7

Tausiga o le Fanau

Tagai i le 27.1.6.

28.2

Faatinoina o Sauniga o le Malumalu mo Tagata ua Maliliu

O vaega nei o loo faamalamalama atu ai sauniga o loo faatinoina e ala i le fai ma sui mo tagata ua maliliu i totonu o malumalu. Pe a faatinoina sauniga sui, e mafai e se tagata o le Ekalesia ona fai ma sui mo na o se tagata ua maliu e tutusa le itupa na fanau mai ai ma le tagata o le Ekalesia.

O sauniga o le malumalu mo e ua maliliu e masani ona faatinoina i le faasologa lenei:

Papatisoga
Faamauga
Faauuga i le Perisitua Mekisateko (mo alii)
Sauniga Amata
Faaeega Paia
Faamauga

Afai ua mae’a sauniga mo e ua maliliu ae lei faia i le faasologa, e le manaomia ona toe faatinoina. E amata ona aoga pe a faamaeaina ia sauniga e muai manaomia.

28.2.1

Papatisoga ma Faamauga mo Ē ua Maliliu

Soo se tagata o le ekalesia e i ai se pepa faataga aoga o le malumalu e mafai ona valaaulia e auauna atu i se tofiga se tasi pe sili atu i le potu papatiso. O nisi o tofiga e mafai ona aofia ai:

Galue e fai ma tagata sui mo papatisoga.
Galue o se molimau mo papatisoga sui.
Galue e fai ma tagata sui mo faamauga.
Fesoasoani i tagata ulu.
Tufatufaina o laei ma solo.
Fesoasoani e faamaumau sauniga o le papatisoga ma faamauga i le polokalama komepiuta.

Afai latou te mananao ai, o tagata o le ekalesia o e fai ma sui e mafai ona filifili e faia na o papatisoga pe na o faamauga.

E mafai ona valaaulia i latou e umia le Perisitua Mekisateko ma ositaulaga i le Perisitua Arona e faatino ia papatisoga mo ē ua maliliu. E mafai foi ona valaaulia i latou e umia le Perisitua Mekisateko e taitai i faamauga mo ē ua maliliu.

E na o alii ua maua faaeega paia e mafai ona valaaulia e:

Avea ma tusi talafaamaumau i le vaipapatiso.
Avea ma tusi talafaamaumau o le faamauga.

O vaega faatulagaina e pei o aiga, uarota, ma siteki, e mananao e auai i le faatinoga o sauniga i le potu papatiso, e masani ona vave faatulaga ma le malumalu a o le’i taitai oo i ai (tagai i le 28.1.4). E toatasi pe sili atu tagata matutua e i ai pepa faataga aoga o le malumalu e tatau ona o faatasi ma nei vaega.

28.2.2

Faaeega Paia (E Aofia ai Sauniga Amata)

Pe a faatinoina faaeega paia sui mo ē ua maliliu, o le vaega o le sauniga amata o le faaeega paia e ese le taimi e faatino ma tusi faamaumauina ai (tagai i le 27.2). Soo se tagata ua maua faaeega paia o i ai se pepa faataga aoga o le malumalu e mafai ona fai ma sui ina ia maua nei sauniga.

28.2.2.1

Faamaoniaina o Sauniga e Manaomia e Maua ai le Faaeega Paia

O se tagata ua maliu e tatau ona papatisoina ma faamauina, a le o le taimi o soifua i le olaga, ia pe faia foi e ala i sauniga sui, a o le’i faia faaeega paia, e aofia ai le vaega o le sauniga amata e faatinoina mo ia.

O nisi taimi, pe a uma ona maua e se tagata ua maliu le faaeega paia e ala i se tasi sa fai ma sui, e iloa mulimuli ane o le papatisoga ma le faamauga na ia mauaina a o soifua e le mafai ona faamaoniaina. I lena tulaga, e tatau ai ona papatisoina ma faamauina le tagata e ala i le sauniga sui. E le toe manaomia ona faatinoina le faaeega paia pe a maea se papatisoga ma se faamauga sui.

28.2.3

Faamauina i le Toalua ma le Faamauina o Fanau i Matua

I totonu o le malumalu, e mafai ona faamauina tagata ua maliliu i taitoalua o ē na latou faaipoipo i ai a o soifua i le olaga (tagai i le 38.4.1.3 pe afai o loo soifua pea se tasi o le toalua ma le 38.4.1.7 pe afai ua maliliu uma i laua). O tagata ua maliliu e mafai foi ona faamauina a latou fanau o loo soifua pe ua maliliu ia i latou (tagai i le 38.4.2.2). O se tagata ua maua faaeega paia o loo i ai se pepa faataga aoga o le malumalu e mafai ona fai ma sui mo sauniga o faamauga.

O sauniga o le papatisoga, faamauga, sauniga amata, ma le faaeega paia e ao ona faatinoina, a le o le taimi o soifua i le olaga ia po o le sauniga sui, a o le’i mafai ona faamauina se tagata ua maliu i se toalua po o ona matua (tagai i le 28.2). Peitai, o se tagata na maliu a o le’i atoa le 8 tausaga pe sa le’i mafai foi ona tali atu mo ia lava a o soifua e le manaomia ona maua se isi lava sauniga a o le’i faamauina i ona matua (tagai i le 18.1, 28.3.2, ma le 28.3.3).

Ata

potu o faamauga

28.3

Tulaga Faapitoa

O le vaega lenei o loo faamalamalama ai tulaga e le ono faatatau i ai nisi o taiala o loo i le 28.1 .

28.3.1

O Tamaiti e Maliliu a o le’i Fananau Mai (Tamaiti e Maliliu i le Manava ma Fafano)

E le manaomia pe faatinoina sauniga o le malumalu mo tamaiti e maliliu a o le’i fananau mai. Mo nisi faamatalaga, tagai i le 38.7.3.

28.3.2

Tamaiti e Maliliu a o lei Atoa le Valu Tausaga

E togiolaina tamaiti laiti e ala i le Togiola a Iesu Keriso ma “faaolaina i le malo selesitila o le lagi” (Mataupu Faavae ma Feagaiga 137:10). Mo lenei mafuaaga, e leai se papatisoga po o se faaeega paia e faatinoina mo se tamaitiiti na maliu a o le’i aulia le 8 tausaga. Peitai, o faamauga i matua e mafai ona faatinoina mo fanau o ē e le’i fananau mai i le feagaiga pe le’i mauaina lena sauniga a o soifua i le olaga (tagai i le 18.1).

28.3.3

O Tagata Ua Maliliu E Le Atoatoa le Malosi Faaleatamai

O sauniga o le malumalu e mafai ona faatinoina mo tagata ua maliliu o ē ua iloa e mafai ona tali atu mo i latou lava (tagai i le Mataupu Faavae ma Feagaiga 20:71). E mafai foi ona faatinoina sauniga o le malumalu mo tagata e le o mailoa lo latou tulaga o le tali atu mo i latou lava.

Afai ua iloa manino o se tagata ua maliu e lē atoatoa le malosi faaleatamai ma e lē mafai ona tali atu mo ia lava, na pau le sauniga e faatino o le faamauina lea i matua (tagai i le 38.2.4). E na o le pau le taimi e faia ai pe afai e le’i fanau mai le tagata i le feagaiga pe sa le’i faamauina i ona matua a o soifua o ia. E le manaomia pe faatinoina isi sauniga o le malumalu tusa lava pe sa soifua le tagata i le 8 tausaga pe matua atu.

28.3.4

O Tagata Ua Manatu ua Maliliu

E mafai ona faatinoina sauniga o le malumalu mo se tagata ua manatu ua maliu. E le mafai ona faatinoina ia sauniga seiloga ua mavae le 10 tausaga talu ona manatu ua maliu le tagata pe ua tautino mai faaletulafono ua maliu. O lenei aiaiga faavae e faatatau i tagata a le o:

Leiloa i le taua pe ua leiloa i le sami.
Nimo [pe leiloa] i lalo o tulaga e iloagofie ai le oti ae e leai se tino na maua mai.

I isi tulaga uma o tagata leiloloa, e mafai ona faatinoina sauniga o le malumalu pe a atoa le 110 tausaga talu ona mavae le fanau mai o le tagata.

E mafai e le peresitene o le siteki ona faafesootai le Matagaluega o le Malumalu pe afai e i ai ni ana fesili e uiga i lenei aiaiga faavae:

Imeli: TempleDepartment@ChurchofJesusChrist.org

28.3.5

O Tagata Na Soloia Mai le Avea Ai ma Tagata o le Ekalesia pe Ua Faamavae Mai le Avea Ai ma Tagata Auai

Afai na soloia tagata mai le avea ma tagata o le Ekalesia pe na faamavae mai le avea ma tagata o le Ekalesia a o lei maliliu i latou, e manaomia le faamaoniga a le Au Peresitene Sili a o le’i mafai ona faatinoina sauniga o le malumalu e aofia ai le toe fuataiina o faamanuiaga mo i latou pe a talafeagai. E mafai e se tagata o le aiga ona saili atu i lenei faamaoniga i se tusi i le Ofisa o le Au Peresitene Sili pe a mavae le tausaga e tasi talu ona maliu le tagata. E tatau ona faamatala atu i le tusi ia tulaga. E le manaomia ai se fomu. E mafai e le epikopo po o le peresitene o le siteki ona fesoasoani i lenei talosaga pe a manaomia ai.

28.3.5.1

Toe Faaulufaleina Mai o Tagata ua Maliliu O Ē Sa Le’i Maua Faaeega Paia

O tagata ua maliliu sa le’i mauaina faaeega paia ae o ē ua soloia mai le avea ma tagata o le Ekalesia po o ē na faamavae mai le avea ma tagata o le Ekalesia, e mafai ona toe faaulufale mai e ala i le papatisoga ma le faamauga. E manaomia le faamaoniga a le Au Peresitene Sili, e pei ona ta’ua i le 28.3.5. O nei tagata ua maliliu e le manaomia ona toe faamauina i o latou matua pe afai na fananau mai i le feagaiga pe na faamauina foi i o latou matua a o soifua.

28.3.5.2

Toefuataiga o Faamanuiaga o le Malumalu mo Tagata Na Maua Faaeega Paia

O tagata ua maliliu na maua faaeega paia ae na soloia le avea ma tagata o le Ekalesia po o ē na faamavae mai le avea ma tagata o le Ekalesia ma na toe faaulufaleina mai mulimuli ane e ala i le papatisoga ma le faamauga e faatoa mafai ona mauaina o latou perisitua ma faamanuiaga o le malumalu e ala i le sauniga o le toefuataiga o faamanuiaga. O na tagata e le faauuina i soo se tofi o le perisitua pe toe faia faaeega paia, talu ai o nei faamanuiaga e toefuataiina e ala i lenei sauniga.

E pei ona ta‘ua i le 28.3.5, e manaomia le faamaoniga a le Au Peresitene Sili e faatino ai lenei sauniga mo tagata ua maliliu. Mo faamatalaga e uiga i le faatinoina o lenei sauniga mo e o loo ola, tagai i le 32.17.2.