bunyaganan

28.

Mga Ordinansa sa Templo alang sa Namatay na

28.0

Pasiuna

Ang paghiusa sa mga pamilya alang sa kahangtoran mao ang kabahin sa buhat sa kaluwasan ug kahimayaan sa Dios (tan-awa sa 1.2). Ang mga ordinansa nga gipahigayon diha sa mga templo nakahimong posible alang sa mga pamilya nga mahimong magkauban sa kahangtoran ug makasinati og hingpit nga kalipay sa presensya sa Dios.

Aron ang mga anak sa Langitnong Amahan makabalik ngadto Kaniya, ang matag usa nila kinahanglang maghinulsol, mahimong takos sa pagdawat sa mga ordinansa sa kaluwasan ug kahimayaan, ug motahod sa mga pakigsaad nga nag-uban sa matag ordinansa. Ang mga ordinansa sa kaluwasan ug kahimayaan mao ang:

• Bunyag.

• Kompirmasyon ug gasa sa Espiritu Santo.

• Pagtugyan sa Melchizedek nga Pagkapari ug pag-orden ngadto sa usa ka katungdanan (alang sa mga lalaki).

• Ang pagtuga diha sa templo (lakip sa initiatory).

• Pagsilyo diha sa templo.

Ang Langitnong Amahan nasayod nga daghan sa Iyang mga anak dili makadawat niini nga mga ordinansa atol sa ilang mortal nga mga kinabuhi. Siya mihatag og laing paagi aron makadawat sila sa mga ordinansa ug mohimo og mga pakigsaad ngadto Kaniya. Diha sa mga templo, ang mga ordinansa mahimong ipahigayon pinaagi sa proxy. Kini nagpasabot nga ang usa ka buhi nga tawo modawat sa mga ordinansa alang sa usa ka tawo nga namatay na. Didto sa kalibotan sa mga espiritu, ang namatay na nga mga tawo makapili sa pagdawat o pagsalikway sa mga ordinansa nga gipahigayon alang kanila (tan-awa sa Doktrina ug mga Pakigsaad 138:19, 32–34, 58–59).

Ang mga ordinansa sa kaluwasan ug kahimayaan wala kinahanglana ug dili ipahigayon alang niadtong walay tulubagon niini nga kinabuhi (tan-awa sa 18.1, 28.3.2, ug 28.3.3).

Ang mga miyembro sa Simbahan giawhag sa pag-ila sa ilang namatay na nga mga paryente kinsa wala makadawat sa mga ordinansa sa kaluwasan ug kahimayaan. Ang mga miyembro mopahigayon dayon sa mga ordinansa alang niadto nga mga paryente. (Tan-awa sa Malaquias 4:5–6; 1 Mga Taga-Corinto 15:29; Doktrina ug mga Pakigsaad 2:1–3; 128:15–18; tan-awa usab sa 25.1 niini nga tamdanan nga basahon.)

Kon ang mga miyembro wala makaandam og mga ngalan sa pamilya alang sa buhat sa templo (tan-awa sa 28.1.1), ang mga ngalan sa namatay na nga mga tawo kinsa nagkinahanglan og mga ordinansa ihatag diha sa templo.

Ang mga miyembro giawhag sa pagtambong sa templo kanunay kutob sa itugot sa ilang mga sirkumstansiya, sila mopahigayon ba og proxy nga mga ordinansa alang sa ilang kaugalingong mga paryente o alang sa mga tawo kansang mga pangalan ihatag diha sa templo.

Ang mga miyembro sa Simbahan mapanalanginan kon sila mopahigayon og mga ordinansa sa templo alang sa namatay na. Samtang magpahigayon og proxy nga mga ordinansa, sila makapamalandong sa ilang kaugalingong mga pakigsaad sa templo ug sa ilang pasalig nga motuman niana nga mga pakigsaad.

Ang mga presidente sa stake ug ang mga bishop motabang sa mga miyembro sa pag-andam nga makabaton og positibo nga mga kasinatian sa pagpahigayon sa mga ordinansa sa templo. Sila mohimo niini pinaagi sa pagtudlo sa gibasehan nga doktrina sa buhat sa templo ug sa pagsiguro nga ang mga miyembro nakasabot sa mga lagda alang niini nga buhat. Tan-awa sa kapitulo 25 alang sa dugang nga impormasyon.

28.1

Kinatibuk-ang mga Lagda alang sa Pagpahigayon og Proxy nga mga Ordinansa

Ang namatay na nga mga tawo nga nag-edad og 8 o pataas sa panahon sa ilang pagkamatay mahimong mapahigayonan og proxy nga mga ordinansa alang nila. Gawas kon gipahibalo diha sa 28.3, ang proxy nga mga ordinansa mahimong ipahigayon alang sa tanang namatay na nga mga tawo kon 30 ka adlaw na ang milabay gikan sa petsa sa ilang pagkamatay kon aduna ang mosunod:

• Usa ka duol nga paryente sa namatay na (wala madiborsiyo nga kapikas, hamtong nga anak, ginikanan, o igsoon) mosumiter sa ngalan alang sa mga ordinansa sa templo.

• Ang pagtugot sa pagpahigayon sa mga ordinansa makuha gikan sa duol nga paryente sa namatay na (wala madiborsiyo nga kapikas, hamtong nga anak, ginikanan, o igsoon).

Kon walay bisan usa diha sa mga kondisyon sa ibabaw, ang proxy nga mga ordinansa sa templo mahimong ipahigayon sa 110 ka tuig human sa pagkatawo sa namatay na nga tawo.

Alang sa dugang nga impormasyon, tan-awa ang mosunod nga mga artikulo sa FamilySearch.org (pag-access sa mga artikulo kinahanglan nga molog-in ngadto sa FamilySearch.org):

• “Individuals for whom I can request temple ordinances [Mga indibidwal kinsa ako mahimong mohangyo og mga ordinansa sa templo]”

• “What is the 110-year policy, and why was it initiated? [Unsa ang 110 ka tuig nga palisiya, ug nganong gipasiugdahan kini?]”

28.1.1

Pag-andam sa mga Ngalan sa Namatay na nga mga Tawo alang sa mga Ordinansa sa Templo

Daghang kapanguhaan ang magamit aron matabangan ang mga miyembro sa pag-ila sa namatay na nga mga paryente kinsa nagkinahanglan nga ang mga ordinansa mapahigayon alang nila (tan-awa sa 25.4 ug 28.3). Ang mosunod nga mga lider motabang sa mga miyembro sa pagkat-on kon unsaon pag-andam sa mga ngalan sa namatay na nga mga sakop sa pamilya alang sa mga ordinansa sa templo:

• Mga kapangulohan sa korum sa mga elder ug Relief Society sa ward (tan-awa sa 25.2.2)

• Lider sa ward alang sa templo ug family history (sa 25.2.3)

• Mga consultant sa ward alang sa templo ug family history (tan-awa sa 25.2.4)

Kon mahimo, ang impormasyon sa pag-ila sa namatay na nga mga sakop sa pamilya kinahanglang ibutang ngadto sa FamilySearch.org sa dili pa ipahigayon ang mga ordinansa sa templo (tan-awa sa 25.4.2).

28.1.1.1

Pagsumiter sa mga Ngalan sa mga Sakop sa Pamilya

Kon mosumiter og mga ngalan alang sa proxy nga mga ordinansa sa templo, ang mga miyembro sa kasagaran kinahanglan nga mosumiter lamang sa mga ngalan sa mga tawo nga paryente nila.

28.1.1.2

Pagsumiter sa mga Ngalan sa mga Sikat nga mga Tawo ug Wala Tugoti nga mga Grupo

Sa kasagaran, ang mga miyembro sa Simbahan kinahanglang dili mosumiter og mga ngalan ngadto sa FamilySearch.org gikan sa mosunod nga mga grupo:

• Inila nga mga tawo

• Mga ngalan nga gikolekta gikan sa wala tugoti nga mga proyekto sa pagkuha og mga ngalan

• Mga biktima sa Jewish Holocaust

Alang sa dugang nga impormasyon, tan-awa ang mosunod nga artikulo diha sa FamilySearch: “Can I do temple work for victims of the Jewish Holocaust? [Makahimo ba ako og buhat sa templo alang sa mga biktima sa Jewish Holocaust?]”

28.1.2

Kinsa ang Mahimong Moapil diha sa mga Ordinansa alang sa Namatay na

Ang mga miyembro nga adunay balido nga rekomend sa templo mahimong moapil sa mga bunyag ug mga kompirmasyon alang sa mga patay. Ang natugahan nga mga miyembro nga adunay balido nga rekomend sa templo mahimong moapil sa tanan nga mga ordinansa alang sa namatay na. Tan-awa sa 26.3.

28.1.3

Partisipasyon sa mga Miyembro nga Adunay Pisikal o Intelektuwal nga mga Kakulangan

Ang mga miyembro nga adunay mga kakulangan mahimong mohimo og buhat sa templo alang sa namatay na kon sila:

• Adunay balido nga rekomend sa templo (tan-awa sa 28.1.2).

• Adunay igong intelektuwal nga kapasidad sa pagsabot sa ordinansa.

• Makaatiman sa ilang kaugalingon o gikuyogan sa usa ka paryente o higala nga parehas og sekso kinsa adunay rekomend sa templo ug makahatag og tabang kon gikinahanglan.

Tan-awa sa 27.1.3 ug 27.2.1.3.

28.1.4

Pagpaeskedyul

Ang mga miyembro kinahanglang magpaeskedyul sa dili pa mopahigayon sa mga ordinansa alang sa namatay na. Tan-awa sa temples.ChurchofJesusChrist.org alang sa matag impormasyon sa pagkontak sa templo ug mga kinahanglanon sa pag-eskedyul.

28.1.5

Tabang sa Paghubad o Interpretasyon

Tan-awa sa 27.1.4.

28.1.6

Sinina nga Isul-ob diha sa Templo

Tan-awa sa 27.1.5.

28.1.7

Pag-atiman sa Bata

Tan-awa sa 27.1.6.

28.2

Pagpahigayon sa mga Ordinansa sa Templo alang sa Namatay na nga mga Tawo

Ang mosunod nga mga seksiyon mopasabot sa mga ordinansa nga ipahigayon pinaagi sa proxy alang sa namatay na nga mga tawo diha sa mga templo. Kon mopahigayon og proxy nga mga ordinansa, ang usa ka miyembro mahimong moserbisyo isip proxy lamang alang sa usa ka namatay na nga tawo nga parehas og sekso sa miyembro.

Ang mga ordinansa alang sa namatay na sa kasagaran ipahigayon sa mosunod nga han-ay:

• Bunyag

• Pagkompirma

• Pag-orden sa Melchizedek nga Pagkapari (alang sa mga lalaki)

• Initiatory

• Pagtuga

• Mga Pagselyo

Kon ang mga ordinansa alang sa namatay na nakompleto sa dili saktong pagkasunod-sunod, dili na kini kinahanglang ipahigayon pag-usab. Mahimo kining epektibo kon ang nag-una nga kinahanglanon nga mga ordinansa nakompleto na.

28.2.1

Mga Bunyag ug mga Kompirmasyon alang sa mga Patay

Bisan kinsa nga miyembro nga adunay magamit nga rekomend sa templo mahimong dapiton sa pagserbisyo diha sa mga buluhaton sa bunyaganan. Ang pipila sa mga buluhaton mahimong maglakip sa:

• Paglihok isip proxy alang sa mga bunyag.

• Paglihok isip usa ka saksi alang sa proxy nga mga bunyag.

• Paglihok isip proxy alang sa mga kompirmasyon.

• Pagtabang sa mga patron.

• Pagpang-apud-apod sa mga sinina ug mga toalya.

• Pagtabang sa pagrekord sa mga ordinansa sa bunyag ug kompirmasyon diha sa system sa computer.

Kon gusto nila, ang mga miyembro kinsa mobarog isip mga proxy mahimong mopili sa pagbuhat lang og mga bunyag o mga kompirmasyon.

Ang mga naghupot sa Melchizedek nga Pagkapari ug sa Aaronic nga Pagkapari mahimong dapiton sa pagpapahigayon sa mga bunyag alang sa mga patay. Ang mga naghupot sa Melchizedek nga Pagkapari mahimo usab nga dapiton sa pagdumala sa mga kompirmasyon alang sa mga patay.

Ang natugahan lamang nga mga lalaki ang mahimong dapiton sa:

• Pagserbisyo isip tigrekord diha sa bunyaganan.

• Pagserbisyo isip tigrekord sa kompirmasyon.

Ang organisado nga mga grupo, sama sa mga pamilya, mga ward, ug mga stake, nga magtinguha nga moapil sa mga ordinansa diha sa bunyaganan kasagaran magpaeskedyul nang daan sa templo (tan-awa sa 28.1.4). Usa o mas daghan pa nga mga hamtong nga adunay balido nga mga rekomend sa templo kinahanglang mokuyog niini nga mga grupo.

28.2.2

Pagtuga (Naglakip sa Initiatory)

Kon magpahigayon og proxy nga mga pagtuga alang sa namatay na, ang initiatory nga bahin sa pagtuga ipahigayon ug irekord sa managlahing paagi (tan-awa sa 27.2). Bisan kinsang natugahan nga miyembro nga adunay balido nga rekomend sa templo mahimong moserbisyo isip usa ka proxy aron modawat niini nga mga ordinansa.

28.2.2.1

Pagsusi sa mga Ordinansa nga Gikinahanglan sa Pagdawat sa Pagtuga [Endowment]

Ang namatay na nga tawo kinahanglan nga nabunyagan ug nakompirmahan, niini nga kinabuhi o pinaagi sa proxy, sa dili pa ang pagtuga, lakip na ang initiatory nga bahin, ipahigayon alang niya.

Usahay, human sa pagdawat og pagtuga sa namatay na nga tawo pinaagi sa proxy, ulahi nang mahibaloan nga ang bunyag ug kompirmasyon nga iyang nadawat samtang buhi pa dili matino. Niana nga sitwasyon, ang tawo kinahanglan gayod nga bunyagan ug kompirmahan pinaagi sa proxy. Dili na kinahanglan nga ipahigayon pag-usab ang pagtuga human sa proxy nga bunyag ug kompirmasyon.

28.2.3

Pagsilyo ngadto sa Kapikas ug Pagsilyo sa mga Anak ngadto sa mga Ginikanan

Diha sa templo, ang namatay na nga mga tawo mahimong isilyo ngadto sa mga kapikas nga ilang giminyoan niini nga kinabuhi (tan-awa sa 38.4.1.3 kon ang usa ka kapikas buhi pa ug 38.4.1.7 kon ang duha namatay na). Ang namatay na nga mga tawo mahimo usab nga ipasilyo kanila ang ilang buhi ug namatay na nga mga anak (tan-awa sa 38.4.2.2). Ang usa ka natugahan nga miyembro nga adunay balido nga rekomend sa templo mahimong moserbisyo isip saksi sa mga ordinansa sa pagsilyo.

Ang mga ordinansa sa bunyag, kompirmasyon, initiatory, ug pagtuga sa kasagaran napahigayon na, niini nga kinabuhi o pinaagi sa proxy, sa dili pa ang usa ka namatay na nga tawo maselyo ngadto sa kapikas o sa iyang mga ginikanan (tan-awa sa 28.2). Hinoon, ang namatay na nga tawo kinsa namatay sa wala pa mag-edad og 8 o walay tulubagon sa kinabuhi dili na kinahanglan nga modawat og bisan unsa nga ordinansa sa dili pa iselyo ngadto sa iyang mga ginikanan (tan-awa sa 18.1, 28.3.2, ug 28.3.3).

lawak sa pagselyo

28.3

Espesyal nga mga Sirkumstansiya

Kini nga seksiyon mopasabot sa mga sirkumstansiya diin ang pipila ka lagda diha sa 28.1 dili magamit.

28.3.1

Mga Bata Kinsa Namatay sa wala pa Matawo (Natawo nga Patay na ug Nakuha nga mga Bata)

Ang mga ordinansa sa templo dili kinahanglanon o ipahigayon alang sa mga bata kinsa namatay sa wala pa matawo. Alang sa dugang nga impormasyon, tan-awa sa 38.7.3

28.3.2

Mga Bata nga Namatay nga Wala pa Mag-edad og Otso Anyos

Ang gagmayng mga bata gitubos pinaagi sa Pag-ula ni Jesukristo ug “maluwas diha sa celestial nga gingharian sa langit” (Doktrina ug mga Pakigsaad 137:10). Tungod niini nga rason, walay bunyag o pagtuga ang ipahigayon alang sa bata nga namatay nga wala pa mag-edad og 8. Hinoon, ang mga pagsilyo ngadto sa mga ginikanan mahimong ipahigayon alang sa mga bata nga wala matawo diha sa pakigsaad o wala makadawat niana nga ordinansa sa buhi pa (tan-awa sa 18.1).

28.3.3

Namatay na nga mga Tawo nga Adunay Intelektuwal nga mga Kakulangan

Ang mga ordinansa sa templo mahimong ipahigayon alang sa namatay na nga mga tawo kinsa nahibaloan nga adunay tulubagon (tan-awa sa Doktrina ug mga Pakigsaad 20:71). Ang mga ordinansa sa templo mahimo usab nga ipahigayon alang sa mga tawo kansang pagkamay-tulubagon wala mahibaloi.

Kon klaro nga nahibaloan nga ang usa ka tawo nga namatay na adunay intelektuwal nga mga kakulangan ug walay tulubagon, ang ordinansa lamang nga mapahigayon mao ang pagsilyo ngadto sa mga ginikanan (tan-awa sa 38.2.4). Kini pagahimoon lamang kon ang tawo wala matawo diha sa pakigsaad o wala masilyo ngadto sa iyang mga ginikanan samtang buhi pa. Ang ubang mga ordinansa sa templo dili kinahanglanon o ipahigayon bisan kon ang tawo nabuhi sa edad nga 8 o pataas.

28.3.4

Mga Tawo nga Gituohang Patay Na

Ang mga ordinansa sa templo mahimong ipahigayon alang sa tawo nga gituohang patay na. Ang mga ordinansa dili mahimong ipahigayon hangtod molabay ang 10 ka tuig sukad sa panahon nga ang tawo gituohang patay na o legal nga gideklarar nga patay na. Kini nga palisiya mao gihapon ngadto sa mga tawo kinsa:

• Nawala sa gubat o nawala sa dagat.

• Nawala ubos sa mga sirkumstansiya diin ang kamatayon tataw kaayo apan wala makit-i ang lawas.

Sa ubang mga sitwasyon sa nawala nga mga tawo, ang mga ordinansa sa templo mahimong ipahigayon hangtod nga molabay ang 110 ka tuig gikan sa pagkatawo sa maong tawo.

Ang mga presidente sa stake mahimong mokontak sa Departamento sa Templo kon sila adunay mga pangutana mahitungod niini nga palisiya:

Email: [e-mail]

28.3.5

Mga Tawo Kansang Pagkamiyembro sa Simbahan Gibakwi o Kinsa Miluwat sa Pagkamiyembro

Kon ang mga tawo mibakwi sa ilang pagkamiyembro sa Simbahan o miluwat sa pagkamiyembro sa wala pa sila mamatay, ang pagtugot sa Unang Kapangulohan gikinahanglan sa dili pa ang mga ordinansa sa templo, lakip na ang pagpahiuli sa mga panalangin kon gikinahanglan, ipahigayon alang nila. Ang usa ka sakop sa pamilya mahimong mangayo og pagtugot pinaagi sa pagsulat ngadto sa Buhatan sa Unang Kapangulohan human molabay ang usa ka tuig sukad sa pagkamatay sa tawo. Ang sulat kinahanglang mopasabot sa mga sirkumstansiya. Walay gikinahanglan nga porma. Ang bishop o ang presidente sa stake mahimong moabag niini nga hangyo kon gikinahanglan.

28.3.5.1

Pagdawat Pag-usab sa Namatay na nga mga Tawo Kinsa Wala Matugahi

Ang namatay na nga mga tawo nga wala matugahi apan kansang pagkamiyembro sa Simbahan gibakwi o kinsa miluwat sa pagkamiyembro mahimong dawaton pag-usab pinaagi sa bunyag ug kompirmasyon. Ang pagtugot sa Unang Kapangulohan gikinahanglan, sama sa gipahibalo diha sa 28.3.5. Kining namatay na nga mga tawo dili na kinahanglang isilyo pag-usab ngadto sa ilang mga ginikanan kon sila natawo diha sa pakigsaad o nasilyo sa ilang mga ginikanan sa buhi pa.

28.3.5.2

Pagpahiuli sa mga Panalangin sa Templo alang sa mga Tawo nga Natugahan

Ang namatay na nga mga tawo nga natugahan apan kansang pagkamiyembro sa Simbahan gibakwi o kinsa miluwat sa pagkamiyembro ug sa kaulahian gidawat pag-usab pinaagi sa bunyag ug kompirmasyon mahimong makadawat sa ilang pagkapari ug mga panalangin sa templo pinaagi lamang sa ordinansa sa pagpahiuli sa mga panalangin. Ang maong mga tawo dili i-orden ngadto sa bisan unsa nga katungdanan sa pagkapari o tugahan pag-usab, tungod kay kining mga panalangin gipahiuli pinaagi niini nga ordinansa.

Sama sa gipahibalo diha sa 28.3.8, ang pagtugot sa Unang Kapangulohan gikinahanglan aron mapahigayon kini nga ordinansa alang sa namatay na nga mga tawo. Alang sa impormasyon mahitungod sa pagpahigayon niining ordinansa alang sa mga buhi, tan-awa sa 32.17.2